《一位明星，在自己的「生前喪禮」上死了》: Chapter 13
Chapter 13
鄺牧師離開大台，剩下了嚇呆了的另一位司儀歐陽牧師，以及嚇呆了的全場嘉賓。
這時，這個生前喪禮的總管 Amanda 立刻盡顯女強人本色，處變不驚，優雅大方地踏上台，拿起咪高峰。
「好喇！非常感謝剛剛上台致辭同唱歌嘅所有歌手同粉絲。到咗最重要嘅人出場喇！無錯，就係今日生前喪禮嘅主角 —— Vincy 陳詠詩小姐！有請 Vincy！」
全場立即起立鼓掌。
Vincy 由陳校長及 Rosemary 扶著輪椅，沿特製的斜路上台。Vincy 今天以一身白色美人魚服裝出席，下身是閃閃發光以鑽石做鱗片的魚尾，上身是簡單的白色長袖衫，再加上一串串由珍珠串成的裝飾，應該是呼應她之前《化成泡沫前吿別演唱會》中的美人魚比喻。
Vincy 到了台中間，工作人員把咪高峰連接到Vincy 用來語音合成的電腦。
掌聲足足維持了三分鐘。
「大家好！非常感激大家，今日蒞臨本人既生前喪禮。
能夠好好咁向全世界道別，係一件幸運既事。
有好多人，可能因為各種突如其來既意外，連自己都未反應得切，就已經突然離開呢個世界。
我有漸凍人症，好多人會覺得係一件壞事。但係，我自己就非常慶幸自己有呢個病，因為我有一個可預計既死亡，等我喺死之前，可以有時間做我想做既事，包括今日既生前喪禮。
我好喜歡一套電影，叫《Dead Poet Society》。我大學畢業果一年，戲入面做老師既主角 Robin Williams ，因為抑鬱症自殺身亡。
呢件事對剛剛踏入社會既我，影響好大。
電影《Dead Poet Society》入面，Robin Williams 帶一班學生去睇學校一百年前舊生既黑白舊照。佢話俾班學生知，果啲舊生雖然喺相入面全部都好年輕，同大家一樣咁年輕，對未來一樣充滿自信同希望，但係事實上，時間過咗咁多年佢地已經死晒，做緊肥田料滋養植物。Robin Williams 語重深長咁對學生講「Carpe diem」，「Seize the day, make your life extraordinary (捉緊今天，要令自己的一生變得不平凡)」。
呢一切，都因為 Robin Williams 既死，令我有更深既感受。
(註：《Dead Poet Society》中講到 "Carpe diem, Seize the day" 的一幕：
https://www.youtube.com/watch?v=veYR3ZC9wMQ)
我今日搞呢個生前喪禮，最主要唔係為咗我自己；
我舉辦生前喪禮，係為咗大家。
係為咗在場既、喺碼頭上睇緊直播既、喺網上睇緊直播既，每一個聽到我而家講話既你、你、同你 —— 你聽到我講嘢嗎？聽到呀呵？
我正正就係為咗你，而舉行呢個生前喪禮。
我希望透過生前喪禮，喺自己臨死之前，做一件最有意義既事，就係 —— 親身話你知：人係會死。
人生自古誰無死？我地呢度在坐既每一個人，都總有一日，會死。
傳統中國人思想，係話「未知生，焉知死」，好踏實嘅一句，教大家只顧目前，活於當下。死亡？到時先算啦。
但係，隨住社會發展，人嘅生活質素越來越高，我哋追求嘅嘢就唔再只係「揾錢」，我哋開始追求「意義」，追求「價值」。
所以，喺現代，「未知生，焉知死」已經過時；今日，我教大家：「未知死，焉知生？」。
意思即係，如果唔知自己會死，你又點會知道自己呢一世人應該點過？
「知死」，同追求意義同價值有咩關係呢？
試想像你去一間自助餐廳，嗰度有好多嘢食，但你只可以出去攞一次嘢食。你會點做？
又想像你去一個主題樂園，有好多機動遊戲玩，但你只有一日時間，天黑就要走。你會點做？
你會珍惜，你會計劃，你會希望喺限期之內獲得最多嘅嘢。
當人知道，美好既事係有限期，人就自然會懂得珍惜。
同樣，當人深刻咁了解到自己終有一日會死，佢嘅人生觀就會變得不再一樣。
大家可以抬頭睇一睇，我幅型格唱片封面咁款既車頭相，上面既輓額，寫住——『死不足惜』。
呢四個字，係我自己揀既。
『死不足惜』？
對於討厭我、憎恨我、恨不得我快啲死既人嚟講，當然覺得講得好好，我死咗都唔值得可惜。我亦唔打算反駁佢地。人生在世，無可能討好晒所有人，總會有人睇我唔順眼；
但對於愛我既歌迷，可能好疑惑：Vincy 究竟係咪病到懞咗，竟然揀呢四隻字俾自己？
我無傻到，我好清醒。
我揀『死不足惜』，係想話俾大家聽：
死亡，其實唔需要覺得可惜。
生存，但係無意義、無目標、無夢想，到最後先發現自己白白咁浪費咗一生，先至係最可惜嘅事。
有好多人，經常有個錯覺，以為死亡離自己好遠，自己仲有大把時間大把青春可以 hea，可以揮霍。但，正正係因為咁，好多人白白浪費咗自己寶貴既時間、機會同青春。
如果，你生命只剩低五年，你會做啲咩？
如果，你生命只剩低一年，你會做啲咩？
半年呢？
一個月呢？
一個星期呢？
一日呢？
你仲會唔會好似而家咁生活？
我今日，就係要用我自己已經進入倒數階段既生命去話你知：
人既生命係有限期，每人都只得一次生命。
所以，請閣下，好好珍惜。
＊＊＊＊＊
以下，係本人對一直以來都咁支持我嘅粉絲嘅一個口諭：
眾粉絲，聽命！
我，陳詠詩，從來都唔係一個普通嘅歌手。
我鐘意唱一啲非主流嘅歌曲，講一啲非主流嘅訊息，做一啲非主流嘅事。我鐘意做啲普通人唔想做，又或者唔敢做嘅事。
所以我好自豪咁講，會鐘意聽我唱歌既歌迷，都係一班不平凡，有品味，有內涵既人。
我，好快就會離開你哋喇。
我知你哋一定會好唔捨得我，我都會好掛住你哋每一個。
我雖然要走，但我好希望我嘅精神，可以喺你哋每一個人嘅身上延續落去。
咁 Vincy 嘅精神係咩呢？
Vincy 嘅精神，要靠你哋每個人，自己去領會，由我過去所做嘅事所講嘅話之中去領會。
我對自己嘅 fans 係有啲期望，希望所有自稱為「Vincy fans」嘅你哋都可以做到。
我希望我嘅 fans ，喺追求温飽之後，會敢於追求夢想。我希望我嘅 fans 會以我之名，為世界做好多好事。我希望我嘅 fans 會敢於做自己熱愛嘅事物，但記得唔好害人。我希望我嘅 fans揾到自己熱愛嘅事物之後，就唔好理旁人嘅冷言冷語，鼓起勇氣循序漸進，終有一日一定會有成就。
我希望我嘅 fans 會多啲關心人、鼓勵人、支持人。我希望我 fans 多啲睇下世界美好嘅一面，但同時都要睇下世界唔完善同醜陋嘅一面。我希望我 fans 多啲同人接觸，多啲了解下其他人，多啲了解下個世界。我希望我嘅 fans 會相信世上有正面價值嘅存在、會堅持原則、會敢於對不公義同邪惡說不。
Vincy 所做嘅嘢，根本好容易做到，你哋每個人都可以做得到架。你哋同樣有能力可以影響好多人。我衷心希望我嘅信念同價值觀，會喺你哋身上延續，喺各自嘅崗位上發揚 Vincy 嘅精神。[註1]
而我，將會一直喺你哋身邊，一路陪伴住你哋，保佑你哋，為你哋打氣。
＊＊＊＊＊
跟住我想講一講有關安樂死嘅問題：
最近有一單令人傷心嘅新聞。一位患有末期癌症嘅病人，因為唔想再承受疾病嘅痛苦，亦唔想成為家人嘅負擔，選擇跳路軌自殺。死者家人話：「無得醫嘅點解唔俾佢安樂死？你班醫生虐待緊人呀！成日話人道人道，但就日日要人受苦，晚晚無得瞓，周身痛，呢啲真係無人道。」
(--> 2015年3月26日大圍墮軌事件：
http://forum3.hkgolden.com/view.aspx?type=BW&message=5747727)
安樂死問題，其實一直都存在。
但因為爭議大，社會選擇集體視而不見。
視而不見，係對病人最冷血最殘忍嘅做法。
我哋呢個社會係咪咁落後，咁唔文明，要因為一啲法律上宗教上嘅戒條，而唔肯去正視病人真正嘅感受？
我，陳詠詩，在此公開支持安樂死合法化，支持病人有權利申請合法安樂死， 支持政府訂立嚴格審批過程及法例規管安樂死，支持立法會盡快討論安樂死合法化議題。
至於本人，會唔會選擇安樂死？
我媽媽係一個好虔誠既基督徒。安樂死係一樣佢非常反感既事。我尊重我媽媽，所以只要我媽媽仲在生，我都唔會主動安樂死。
我重申一次我嘅意願：
只要我媽媽一日在生，我都絕對不會要求『主動安樂死』。
但係，當本人病情惡化到呼吸都不能夠進行，
一定要依賴呼吸機先能夠維持生命時，
我將會要求『被動安樂死』，即是除去呼吸機，等我自然死亡。
＊＊＊＊＊
最後，係有關本人財產嘅分配。
本人已經喺一年前，喺律師見證下訂立咗一份遺囑，亦有律師專門處理死後財產分配嘅事宜，我死後所有爭議將以一年前嘅遺囑為準。但為免日後有任何不清楚嘅地方，我想公開地大致講一次，等大家作見證。
本人所有財產，於本人死後將按以下方式分配：
60% 資產撥歸「陳詠詩慈善基金」作慈善用途，主要收益機構包括大愛聯盟和香港漸凍人協會。
30% 資產以及一間物業贈予本人媽媽陳吳麗芳女士；
10% 資產贈予愛人 Rosemary。
就係咁樣喇。
＊＊＊＊＊
印度詩人泰戈爾寫過：「使生如夏花之絢爛，死如秋葉之靜美。」 (Let life be beautiful like summer flowers and death like autumn leaves.[鄭振鐸翻譯成中文])
我過去一生，我自己認為都稱得上有意義，好似夏天嘅花一樣咁燦爛。
今日，係我花開嘅最後一日。
聽日開始，我會化為秋葉，
安靜，自然，隱居，
大家唔會再見到我架喇，我會從此隱居，去一個好遙遠既國度，同我愛既人一齊，安靜咁過我餘下既日子。
記得我初入行，唱過一首歌，叫《出生入死》，係開宗明義講死亡。
入面有一句歌詞，我好鐘意，亦好適合呢個場合講：『如果這算白過，留下的因果，化做我輓歌。』
我陳詠詩 Vincy 呢一生過成點，有無白過，我自己好清楚。
我喺世上種下咗乜野『因』，將來會結成乜野『果』，我唔清楚，就等時間去見證喇，我會喺遠方一直睇住。
好喇，我唱歌喇。
---------------------
[註1]:
這段文字有部分參考自2009年香港商業電台 903 節目《西崎公園》最後一集，主持人 Jessie 的西崎公園結束陳詞：
https://www.youtube.com/watch?v=pVWv_RlqmDw