《一位明星，在自己的「生前喪禮」上死了》: Chapter 15
Chapter 15
時間是4月1日，晚上19:24。
生前喪禮結束後半小時。
工作人員帶著一名年約五十，穿著西裝的中年男子快步走到水晶棺前。
「葉醫生，Vincy 唔知做咩暈咗呀。我摸過...... 佢連呼吸同心跳都無呀！你快啲睇下佢......」
陳校長焦急的對醫生說。
Vincy 的私人醫生葉醫生立即檢查水晶棺內躺著的 Vincy的呼吸和脈搏，再微微打開 Vincy 的眼皮，以小電筒照射曈孔。
做了一輪檢查後，葉醫生為 Vincy 進行心肺復甦。
可惜，做了幾分鐘都依然毫無起色。
「請問船上面有無『純氧』？」滿頭汗水的葉醫生問陳校長和 Amanda。
陳校長和 Amanda 都一臉茫然，不知從哪裡找『純氧』出來，以眼神向四周在場的人們求救。
「『純氧』就無，潛水用果啲『高氧氣樽』得唔得？」Aaron 問葉醫生。
「呃...... 都得呀！麻煩你盡快攞黎呀，唔該你！」葉醫生答。
「好！！我即刻番房攞！」
Aaron 立即向通往後台的樓梯飛奔去。三四分鐘之後，Aaron 抱著一小樽潛水用高氧氣樽跑回水晶棺前給葉醫生。
葉醫生給 Vincy 戴上一個透明面罩，連接住Aaron 的高氧氣樽，讓高濃度的氧氣填滿面罩。
時間來到 20:03，葉醫生的急救已經進行了差不多四十五分鐘。
葉醫生再三檢查 Vincy 的脈搏，然後失望地嘆了一口氣。
「陳校長，我好遺憾，Vincy 已經無任何生命跡象...... 證實死亡。」
陳校長聽到 Vincy 死訊後，
淚水如決堤般從眼內湧出，用手掩著面龐抽泣，站著的腳步都有點不穩，要由身旁的 Amanda 扶著，再慢慢走到一張椅子上坐下來。
Rosemary 的反應則好像是呆了一樣，根本不相信這是個事實。
葉醫生繼續說：
「我暫時揾唔到任何表面上嘅死因。不過，我留意到 Vincy全身皮膚都比平時黑，所以我懷疑 Vincy 係缺氧窒息致死。我諗需要送去醫院，由法醫作進一步檢查先知死因係咩。」
「缺氧窒息致死？佢平瞓係水晶棺入面，全部人都睇住佢，照計無嘢阻礙到佢呼吸架喎！」
Aaron 說。
「呢方面...... 我都未諗到原因...」葉醫生低頭苦思。
「會唔會係 Vincy 俾自己口水『濁』親呀？Vincy 有 ALS，佢吞口水嘅肌肉其實已經唔太能夠控制。」Amanda 試著以科學推測。
「嗯...... 都有呢個可能，不過...... 如果係『濁』親，本能反應應該會咳，但頭先 Vincy 無咳，全程都好平靜......」葉醫生猶豫的說。
「咁即係點呀？我個女點解會...... 頭先仲好地地架...... 鳴...... 神呀！點解呀？瞓落去水晶棺時仲好地地架...... 我問 Vincy 有無邊度唔舒服...... 佢都笑笑口咁話『無問題』...... 點會咁架......」陳校長哭著問。
葉醫生：「呢一層...... 我真係毫無頭緒。今朝我同 Vincy 檢查過，一切都好正常架......」
「我而家報警，送 Vincy 去醫院先！」Rosemary 說，同時間拿起電話準備報警。
「咪住！唔好報警！」Amanda 激動的喝住 Rosemary。
在場人士都很驚訝。
唔好報警？？？
Amanda 接著解釋：「我覺得唔好送去醫院，太高調啦。同埋，Vincy 嘅意願係，當生前喪禮完結之後，唔會再公開露面。呢一個意願，佢頭先於生前喪禮之上已經講得好清楚。」
「你係咪傻咗呀？唔報警？可能而家去醫院仲有得救呢！同埋咁大件事，點可以唔報警呀！」Aaron 反駁 Amanda。
「Aaron，你諗下，如果係喺你公司隻船上面死，以後仲有無人夠膽上你架船，喺你架船上辦喪禮？」
「Amanda，你咁講好侮辱我！你當我係果啲唯利是圖嘅奸商呀？Vincy 係我由細玩到大嘅好朋友黎架！！！」
「Sorry Aaron，我意思唔係咁，我收番頭先句說話。
我話唔報警，但唔係話唔送去醫院！
我係想唔驚動任何記者嘅情況下，靜靜地秘密送 Vincy 去私家醫院。
你諗下 Vincy 搞生前喪禮嘅目的係咩？
佢係唔想自己嘅死，令 fans 太過傷心，所以先搞咁多嘢，
希望佢真正要死嘅時候，係無任何人知道，
等 fans 心目中 Vincy 最後嘅形象，就係水晶棺入面，好靚，好似公主咁嘅佢。」
眾人聽到這好像很有道理的話，都不知如何反應。
大家靜了下來，面面相覤。
「陳校長，Vincy 係你個女，由你決定報唔報警喇。」Amanda 把決定權交到陳校長手上。
坐在椅子上的陳校長，情緒依然未能平伏。
她聽到 Amanda 的問題，想了一回，可能因為想到女兒死了，又倒頭痛哭。
忽然，其中一個工作人員，年約三十歲的男人說：
「咁多位唔好意思，其實呢...... 我係警察。
上頭收到情報，話可能有反對安樂死嘅組織，會對 Vincy 不利，所以派我黎做臥底，假扮工作人員暗中觀察。估唔到真係會出事......」
男人從口袋中拿出委任證，遞給 Amanda。
Amanda 接過委任證來查看之後，顯得一臉不悅。
「我已經通知左我上頭，應該一個鐘之內，就會有同事黎到調查，送 Vincy 去醫院驗屍。
而家我要做兩件事：
第一，封鎖現場，避免現場證據被破壞，等鑑證科黎套取指模；
第二，登記在場各位嘅資料。
麻煩各位攞身份證出黎，我會逐一記低身份證號碼同聯絡電話，之後就可以落船喇，日後警方有需要會聯絡大家協助調查。
不過，有後台通行証嘅幾位，就要留一留低，稍後跟我番差館，同事會同大家落個口供。」
其實生前喪禮結束了一個半小時，到現在依然在船上的，不足二十人。
主要都是工作人員，以及跟 Vincy 最親近，可以擁有後台通行證的幾位家人朋友。
工作人員一個一個跟警察先生登記過後，都下船了。
剩下來的，只有十個人。
包括有後台通行證的七個人：
陳校長。
Amanda。
Rosemary。
Aaron。
鄺牧師。
記者 Erica。
記者 Nicole。
以及沒有後台通行證，但希望留下來的三個人：
葉醫生。
警察先生。
歐陽牧師。
總共十個人。
「請問船上面仲有無其他工作人員，例如船長同水手？」警察先生問 Aaron。
「無架。『永生號』係由高科技智能系統控制，唔需要船長同水手。咁係因為『永生號』根本上就唔需要出海，佢只會長年停泊係碼頭供人上船拜祭......」
Aaron 說到一半，呆了。然後抓狂了般搜索自己的手腕及褲袋，似是在尋找手錶或電話。
「Oh Shit！弊啦弊啦！而家幾點呀？」
「九點零一分。」警察先生望望自己手錶後回答。
「弊啦弊啦！唔記得左添，今次大鑊喇！！！」
說罷，Aaron 便以高速向船頭方向飛奔而去。
「等我去追佢！！！大家喺度唔好行開呀！」
警察先生朝 Aaron 的方向追去。
在場的八個人，都很聽話的留在原地。
大家都沒有說話。
只是靜靜的，各自在腦海中，
組織一下到底現在發生了什麼事。
Vincy 的屍體，依然安靜的睡在水晶棺內。
甲板上一片沉默，
直到......
「點解...... 架船...... 好似...... 行緊咁嘅？！！」
Erica 無心的一問，在場的各人立即往船外看。
沒錯。
這時，『永生號』已經離開了碼頭，
正在慢慢的，駛向大海。