《一位明星，在自己的「生前喪禮」上死了》: Chapter 18
Chapter 18
「我認為個軟墊可能有古怪，不如我地去水晶棺度睇下，影下相，如果我地早過警方揾到 Vincy 嘅真正死因，咁就威囉！」
「水晶棺係案發現場，我地唔可以貿貿然去睇架，況且如果陣間俾人見到，以為我地兇手，去毀滅證據就大鑊喇。我地同警察先生講聲先啦，交俾差人查喇。」Nicole 這番話都不無道理。
大約晚上十一時，記者 Erica 和 Nicole 來到了警察先生的房間敲門，不過沒有人應門。
「佢可能同陳校長落緊口供，我地去陳校長門口聽下佢係咪喺入面。」
正當她們差不多到陳校長房間之際，房門打突然開了。
警察先生焦急的跑出來，神情慌張。
當他見到 Erica 和 Nicole 二人，立刻跑過來說：
「麻煩兩位，幫手揾葉醫生黎睇睇陳校長呀！佢頭先喊得太犀利，暈低左，唔知佢有無事。」
「無問題，我地去揾葉醫生過黎呀！」
她們很快便找到了葉醫生，葉醫生來到替倒在地上的陳校長檢查。
五分鐘後，葉醫生踏出陳校長房門。
「陳校長無咩大礙嘅，只係傷心過度，喊得太劇烈，個腦一時唔夠血啫。
佢已經醒返，我俾左少少餅乾同糖佢食，穩定返個血糖。佢休息下，應該唔會有事嘅。
不過，聽日最好送佢去醫院檢查下，因為呢...... 據我所知，其實陳校長腦入面有個腫瘤，成日都會頭痛頭暈，但佢一路暪住 Vincy 唔俾佢知自己有病。我唔知佢頭先暈低同個腫瘤有無關。所以，今晚俾佢休息下好喇，唔好再刺激佢。」
「明白，唔該晒你呀醫生。」警察先生鬆了一口氣。
「係呢！你地兩個本來想揾陳校長做咩？我頭先出黎揾醫生時，你兩個咁啱喺門口嘅？」
「其實我地唔係想揾陳校長，而係想揾你架。」
「揾我？」
「係呀，不如趁而家陳校長要休息，我地俾啲嘢你睇，可能對案件有幫助。」
就這樣，兩位記者帶警察先生到自己房間，把他們偷拍片段中的可疑地方指給他看。
「嗯...... 個厚度有咁大嘅分別，的確係好唔尋常。」
「我地懷疑張軟墊同 Vincy 嘅死有關，所以我地想同你一齊去睇一睇個水晶棺。」
＊＊＊＊＊＊
水晶棺所在的房間，是位處於舞台的正下方，方便升降台把它升上舞台。
要進出這間房，都需要用後台通行證拍卡，方能夠開門。
Vincy 的屍體，依然安詳地躺在水晶棺之中。
人生第一次近距離對著一具真實的屍體，兩位娛樂記者都有點不自在。
警察先生叮囑她們站到一邊，不要破壞現場證物，而他自己就帶上了手套口罩，拿起小電筒往水昌棺內仔細檢查。
「揾到喇！！！」警察先生示意大家到他那邊看看。
「你地睇下！喺 Vincy 左邊耳仔對開，旁邊隱藏咗一粒好細粒嘅軟膠，就好似用嚟吹脹吹氣水泡嗰種軟膠開口。但係，個開口底部俾人用膠索帶輕輕綁住左。
以我所知，為左等人容易啲吹漲個水泡，呢種軟膠開口入面有個活塞，只容許空氣由出面吹入去水泡入面，但就唔俾空氣由入面漏返出黎，除非用手輕輕按住開口，開啟個活塞，咁空氣就能夠由開口噴出黎。」
「係喎！」
「葉醫生之前話 Vincy 應該係缺氧窒息致死。根據現時得到的線索，我能夠諗到最有可能嘅死因係：有人用毒氣裝滿咗個吹氣軟墊，再用膠索帶綁住個軟膠開口，開啟活塞等毒氣能夠噴出黎。然後，等『瞻仰遺容』環節時，工作人員抬 Vincy 入去水晶棺，因為 Vincy 身體嘅重量，吹氣軟墊入面嘅毒氣就會受壓，由個軟膠開口度噴出來，噴滿整個水晶棺，將 Vincy 毒死。」
「但係個水晶棺唔係密封架喎，啲毒氣唔會散走咩？」Nicole 質疑。
「我估......」Erica 搶著回答，「個水晶棺只係上面無密封，所以如果兇手使用嘅毒氣，係比空氣重的話，毒氣自然唔能夠離開水晶棺，而會喺水晶棺入面積聚。」
「厲害厲害，小姐，你唔做偵探而去做記者，真係嘥晒。」警察先生真心稱讚 Erica。
「不過，究竟兇手用咩毒氣，就唔到我呢啲小市民去調查啦。我地已經盡咗責任，提供咗可能對破案有用嘅資料俾警方。」
「哦，咁當然！查案係我地警方嘅職責嘛。你地已經幫左我好大忙，真係唔該晒你兩位。
我估個軟墊入面，一定會有少量嘅毒氣剩底嘅，聽日我會叫鑑證科黎拎氣體樣本去驗。
今次真係好多謝你兩位，你地嘅發現對破案真係好重要。」
警察先生突然語氣一轉，很嚴肅的說：
「不過，既然而家發現左呢個機關，咁即係話：Vincy 嘅死，並唔係自然，而係人為造成。
咁到底係邊個設置呢個殺人機關呢？
頭先生前喪禮上，司儀介紹水晶棺時講過，個水晶棺係由『鹽光社』一眾教友集資捐出，由鄺彼得牧師作代表送出，加上我地警方之前收到情報，話『鹽光社』有部分強烈反對安樂死嘅激進教友，計劃阻止 Vincy 於生前喪禮上宣揚安樂死。
所以我初步懷疑，鄺彼得牧師同 Vincy 嘅死有關。
不過呢啲嘢，就等我地警方去調查喇。」