《一位明星，在自己的「生前喪禮」上死了》: Chapter 19

Chapter 19 


跟警察先生發現了軟墊的機關後，兩位記者回到房間。 


「件事...... 好似越來越複雜喎。」Nicole 大字型躺在床上說。 

「唔駛驚。我地一步步黎，有系統咁去推論。 





我地頭先發現到水晶棺入面有一個懷疑機關，但果個究竟係咪真係殺死 Vincy 嘅機關，我地暫時無辦法肯定，要等鑑證科檢驗到入面真係有毒氣，先能夠確定。但目前，呢個的確係最有可能嘅解釋。 

咁我地就假設，真係有人用毒氣吹滿水晶棺入面嘅軟墊，等生前喪禮最後一個環節，Vincy 訓落去，毒氣就噴滿水晶棺，喺全世界面前毒死 Vincy。 

我地假設呢個就係真實發生左嘅情況，咁下一個要問嘅問題就係： 
『究竟係咩人做？點解要喺生前喪禮之上殺 Vincy？』」 


Erica 在白紙上寫上了五個名字。 





『陳校長。 
Amanda。 
Rosemary。 
Aaron。 
鄺牧師。』 


「水晶棺放左喺『永生號』上面，舞台之下嘅房間。要進入呢間房間，將毒氣注入水晶棺軟墊，就一定要有後台通行證。 
所以，最大嫌疑嘅，就係擁有後台通行證嘅呢五個人。」 





Erica 停了下來，然後在紙上加上了『Vincy』的名字。

「諗真啲，應該係六個人先啱。因為第一個要懷疑嘅人，正正就係 Vincy 自己。 
呢一場，會唔會根本就係一場 Vincy 自編自導自演嘅安樂死呢？」 

「唔會吓話？係全世界人面前表演安樂死？會唔會咁爆呀？」 

「而家講緊 Vincy 喎，出晒名前衛，又革命性又反傳統嘅大明星 Vincy 喎。佢有咩唔夠膽做？ 

佢生前喪禮都夠膽做啦，同性婚禮又諗住喺生前喪禮之後做，咁照推斷『一條龍』做埋安樂死，三樣社會現時嘅禁忌話題，同一日做齊，都幾合理喎。」 


「嗱！你都講左，生前喪禮之後，Vincy 計劃同 Rosemary 舉行同性婚禮架嘛！咁點會喺生前喪禮之上整死自己呢？」Nicole 反駁。 

「嗯，呢個推論有道理。」Erica 點頭認同。 





「同埋，佢生前喪禮上對全部人親口宣佈，因為佢媽媽陳校長係虔誠既基督教徒，所以只要陳校長一日未死，佢都唔會安樂死。」 


「但係，如果我再大膽咁進一步諗：佢會唔會其實係專登講呢啲說話，製造呢啲假象，去令人相信佢唔會安樂死，繼而嫁禍其他人？ 

例如，佢希望香港安樂死合法化，佢有可能為左達到呢個目的，而嫁禍嗰啲反對安樂死嘅人，令人認為係反對安樂死嘅人殺死佢，咁做的話，社會輿論就會因而轉向支持安樂死。」 

Nicole 呆了，聽不明白 Erica 的推論。 

「不過咁又好似太陰謀論嘅，Vincy 性格咁光明磊落，唔似會做呢啲事。所以憑你頭先講嗰兩個 point，即係 Vincy 計劃生前喪禮之後舉行同性婚禮，同佢話過陳校長一日未死，佢都唔會安樂死嘅宣言，我認為呢件案係 Vincy 自編自導自演安樂死嘅機會唔大。」

「如果唔係 Vincy 自己安排嘅安樂死，咁即係有人殺死 Vincy 啦。咁會係邊個呢？」 






「頭先警察先生話，佢初步懷疑鄺牧師同 Vincy 嘅死有關。 

其實，我都覺得鄺牧師好有嫌疑。 

呢件懷疑謀殺案發生嘅『場合』，係一個好重要嘅重點。 

兇手選擇喺『生前喪禮』之上落手，明顯係想喺全香港觀眾目光注視之下進行殺 Vincy，一定唔會只係為咗小事而做，而係有心要引起社會注意。否則，點解唔等生前喪禮完咗之後先殺？Vincy 都已經宣佈話生前喪禮之後就不再公開露面，如果要殺 Vincy，生前喪禮之後殺，會低調得多。可想而知，兇手可能就係想高調。 

我估計，有機會係同近日立法會『安樂死合法化』爭議有關，似係針對『安樂死合法化』爭議嘅一場立場宣示。如果真係咁，成件事就會複雜好多倍。」 

Erica 拿起平板電腦，一邊說，一邊打開社交網站 facebook 中的『鹽光社』群組。 

「如果係有關『安樂死合法化』爭議，咁最有動機殺死 Vincy 嘅嫌疑犯，就一定係鄺彼得牧師。眾所周知，全香港反對安樂死最大力嘅團體，就係『鹽光社』。而『鹽光社』現任主席，就係鄺彼得牧師。 

尋晚老總打電話嚟，話有人可能會喺生前喪禮上搞事。我即刻上網查下，發現發動網民去 Vincy 生前喪禮示威抗議嘅 facebook event 發起人，正正就係『鹽光社』一班教友。 





而我喺個 facebook event page入面，見到有人分享呢一段鄺牧師講道嘅 YouTube 片段。」 

＊＊＊ 

Erica 在平板電腦中，開啟了一段 YouTube 片段。 

片段是在『鹽光社』會堂拍攝的，影著鄺牧師在講台上講道的情況。片段似乎是從一次講道中剪輯出來的一個小片段，而全段片都沒有影過台下，所以不知道當時有沒有觀眾。 

「各位，香港立法會最近有議員提出一項『不具立法效力的議案』，希望政府及立法會討論有關安樂死之議題。 

對此，本人以及『鹽光社』係堅決反對！ 

安樂死，以我睇法，根本同自殺並無分別。
安樂死其實係一種因為病得太痛苦而被醫生認可進行嘅自殺。自殺，唔駛講，聖經係百分之一百唔容許嘅。 





十誡之中，第六誡就係『不可殺人』，而自殺就係殺人。人嘅生命係非常之寶貴，非常神聖。哥林多前書第6章19節：『難道你們不知道，你們的身體就是聖靈的聖所嗎？這聖靈住在你們裡面，是你們從神領受的。你們不屬於自己。』 

我地每一個人嘅生命，都唔係屬於我地自己，而係屬於神，我地只不過係神嘅管家，係神暫時將生命委托俾我地，我地無資格亦無權決定自己生死。約伯記第1章21節：『我赤身出於母胎，也必赤身歸回；賞賜的是耶和華，收取的也是耶和華。』 

唯有神有能力賜予生命，同樣唯有神有能力終結生命。安樂死，就係人試圖從神嘅手中奪取權威。申命記第32章39節：『你們如今要知道，我，惟有我是神，在我以外並無別神，我使人死，我使人活，我損傷，我也醫治，並無人能從我手中救出來。』傳道書第8章第8節話：『無人有權力掌管生命，將生命留住，也無人有權力掌管死期。』

除咗聖經上嘅教導，我地用理性都可以知道，安樂死對社會係有害架。 

首先，一旦安樂死合法化，即係法律上認可『殺病人合法化』。咁會對社會產生極壞嘅影響，人對生命價值嘅睇法都會被嚴重扭曲，唔再重視生命，輕言放棄生命。 

第二，安樂死合法化之後，長期病患者會承受『點解你唔選擇安樂死？』嘅無形壓力，尤其是家庭經濟狀況唔好嘅病人。同病魔戰鬥到底嘅想法唔會再得到家人認同及讚賞，反而換來浪費金錢同社會資源嘅無形指責。 

第三，安樂死合法化會令政府減少對長期病患者同末期病人嘅資源分配，唔再資助長期病患者嘅藥物及醫療費用，間接迫長期病患者選擇安樂死。 

第四，係本人最擔心出現嘅『滑坡效應』。一旦安樂死變成合法，容許身體患有不能治療的絕症嘅病人安樂死，先例一開，下一步就會慢慢將可以安樂死嘅資格降低，容許唔係絕症但長期受病痛折磨嘅病人安樂死，之後到無病但年老嘅人安樂死，到精神有問題嘅人可以安樂死，到最後連無痛無痛，只係自殺傾向嘅年青人都可以安樂死。 

支持安樂死嘅人，會覺得以上論點無稽。可惜歷史上新聞上，我地的而且確揾到事實證明安樂死『滑波效應』的確會發生。以下係最近一宗案例： 

[國際新聞][2015年6月28日] 比利時批准健康女子申請安樂死 　社會嘩然。 
比利時一名24歲女子蘿拉（Laura），雖然身體健康，但心靈受到不愉快童年影響，從6歲起就有自殺念頭，21歲進入精神病院，嚴重厭世的她向醫生申請安樂死，竟然獲批准，事件引發爭議。 
比利時自2003年將安樂死合法化後，每天平均就有5人安樂死，大多為70到90歲的老年患者，但許多人認為醫生批准年輕又身體健康的蘿拉安樂死，會有「協助自殺」的嫌疑。 

事實證明，安樂死會造成『滑坡效應』並非只是杞人憂天，而係的確會發生。 

所以，安樂死合法化係名符其實嘅『殺人法案』！ 
只要呢個『殺人法案』一通過，以後就會有千千萬萬嘅生命被強行『人道毀滅』，亦會有千千萬萬嘅生命因為『唔想生存』而輕率放棄。為咗拯救生命，我哋一定會用盡一切方法，誓死阻止『殺人法案』通過！

我，『鹽光社』鄺彼得牧師，在此向神起誓： 
為咗維護生命嘅神聖價值，我將會一生堅定不移，用盡一切方法，誓死反對香港安樂死合法化！ 

如果有一日，安樂死真係不幸地，喺香港變成合法的話， 
我發誓，我，鄺彼得牧師，將會自焚！ 
我將會以自焚至死嚟抗議安樂死合法化，絕不與呢個罪惡嘅末世，同流合污！！」 

＊＊＊

雖然 Erica 之前經已看過一次這段片段，但聽到鄺牧師以牧師身份，公開發這樣一個毒誓，依然是十分震撼。 
她心想：看來鄺牧師反對安樂死的決心真的非同小可，意志之堅決，可謂驚天地泣鬼神。 

Nicole 看完，目瞪口呆，問：「乜牧師可以自焚自殺架咩？無矛盾咩？反對安樂死，但又自焚？」 

「就係咁，先顯得佢嘅堅決嘛。睇嚟佢真係會誓死捍衛自己嘅信念。」 

Erica 放低手上的平板電腦，繼續推論。 

「因為我地尋晚嘅訪問，Vincy 成為咗香港第一位公開表明支持『安樂死合法化』法案嘅名人，而又因為佢身患絕症，本身遭遇就已經惹人同情，所以成為咗支持『安樂死合法化』最有力嘅代言人。 

你估下，鄺牧師所指嘅『用盡一切方法』阻止安樂死合法化...... 會唔會... 包括殺死代言人？」 

「牧師殺人？！你越講越離譜喎，有無可能呀？」 

「乜牧師唔可以殺人架咩？牧師又唔係聖人，聖人都會犯錯喇。同埋而家都係估下啫，每個嫌疑兇手都推論一下，睇下有無殺人動機嘛。」 

Nicole 聽完這句，認真思考了一會，說： 

「但係 Erica，你以上推論，有一個破綻：如果真係咁做，透過殺咗安樂死嘅代言人嚟反對安樂死，似乎只會做成反效果，令更多人同情 Vincy，繼而支持『安樂死合法化』喎。鄺牧師無理由咁蠢諗唔到呢點架喎。」 

面對 Nicole 的質疑，Erica 又認真思考了一會，答： 

「如果殺人嘅事被揭發就係嘅，但如果件事無被人揭發，所有人都當 Vincy 係普通病死，咁就無問題啦。不過你咁講又有道理嘅。」 

「同埋，會唔會係鄺牧師間接叫人去殺 Vincy，又或者，係有教友因為聽咗鄺牧師嘅講導，自己去設計個機關去殺 Vincy？」 

「如果係咁，咁真係唔知邊個先算係兇手喇。」Erica 苦笑。 


「但其實我有個問題一直想問：既然鄺牧師同『鹽光社』咁反對安樂死同同性戀，咁點解 Vincy 會邀請鄺牧師做生前喪禮嘅主禮牧師，而鄺牧師又會肯應承，仲送埋個水晶棺俾 Vincy？ 


「哦，原因好簡單啫，因為陳校長係返『鹽光社』架嘛。你只要上去『鹽光社』個網站，睇下佢地聚會同活動嘅相，就會發現裡面成日都會見到陳校長嘅出現。 
我相信邀請鄺牧師嘅，並唔係 Vincy，而係陳校長。而鄺牧師肯出席，其實係為左俾面陳校長。」 

「竟然係咁？」Nicole 很驚訝自己一直沒有留意這個事實。