拖住我隻手，得唔得呀？: 第二章：我最期待的畫面出現了。

  「你點呀，起唔起到身呀？」
 
  「我冇問題既，唔該你。」
 
  我眼前呢個女仔個身材都算係唔錯，而喺呢個時候仲要烏低左個身望住我，搞到佢領口位嗰到跌左落嚟，嗚呀，我幾乎可以睇到佢校服入面係著左啲乜野款呀。雖然睇佢個表情應該係冇心咁show出嚟，但係大佬你叫我望邊到好呀？講比你知我望到你入面既話你實會以為我係一個變態佬啦。
 
  我試圖望向其他地方，希望咁做可以令我唔好只係將注意力集中喺同一個位到。
 
  咪住先，佢呢一個動作咁似我一直以嚟發夢見到既情節？！雖然旁邊冇一個小巴站，但係呢個同學比我既感覺真係同夢入面嗰個女仔差唔多一樣。
 




  「咦，你成塊面都紅曬喎，有冇事呀？」
 
  你個身烏到咁前，我唔面紅就有鬼啦！不過話時話，呢個女仔個心口……唔係，係成個人真係有一股好大既吸引力，緊咁將我個心吸住左。喺不知不覺間原來我個人只係顧住望實呢個女仔，即使成個人依然係仲係訓係地下，但係我個腦入面依然未有起身既念頭。
 
  唉，雖然我都好想留喺呢到望多一陣，但係如果遲咗入班房既話萬一比老師問起既應該都會幾麻煩，都係等我快啲入去先，反正喺同一間學校入面點都會有機會再見到佢既，反正生命滿希望呀嘛。
 
  我今年重讀既呢間學校位於炮台山，我諗大約算係band 1 中掛，之不過其實間學校係咩級數又點呢？唔通我入到間勁既中學就一定會考得好個公開試咩，傻的嗎？如果我唔讀書既你幾高級都奈我唔何啦。
 
  喺我入左間課室一陣之後，一個肥佬慢慢行咗入班房入面，到底呢個肥佬係咩人嚟架？班主任？訓導主任？不過點都好啦，既然頭先門口嗰個老師都可以串成咁，我對呢間學校既老師質素已經有唔太好既印象。
 




  「各位同學好，今年又係我楊sir做你地既班主任，大家多多指教呀。」
 
  原來呢個肥佬講野都幾客氣喎……咩話，佢就係班主任？！
 
  「今年我地呢到會多左一位新同學，叫做阿樑，大家要好好相處呀。阿樑不如你起身做個自我介紹先啦。」
 
  之後呢個楊sir指一指我，示意我要起身。
 
  「大…大家好，我叫阿樑，多多指教……」
 




  就喺我用兩秒都唔洗既方式做完自我介紹之後，有個人突然開左我地班既房門衝咗入嚟，原來就係頭先喺樓下嗰個女仔。佢睇落應該係全力跑過嚟，因為我見佢成塊面比起我頭先喺樓下見到既更加紅，而且佢成個人氣來氣喘咁。不過到底點解佢要跑得咁快呢？
 
  「唔…唔好意思呀，頭…頭先風紀嗰邊有野做搞到遲左……咦，你咪係頭先嗰個人，點解你會喺到架？」
 
  「呢位係今年既新同學阿樑。」
 
  「我係阿樑，你好。」
 
  「你好呀，我叫希文，希望個希，文化個文」
 
  嘩，希文呢個名咁有意思既？！我個名只不過係我呀媽諗唔到名所以求其喺本字典到拎嚟用架喳，入面一啲意思都冇囉。喺呢個moment我覺得自己喺某方面輸左，仲要輸得好應。
 
  「好啦，你坐返埋位先啦。嗱，今年我地會有一個新少少既上堂方法，就係要分組上堂，即係話你地要以一組組既形式去上堂。咁學校就希望同組既同學可以多多交流，如果你地有唔明既野都可以立即問同組既同學，老師認為咁樣你地就可以學得好啲。」
 
  乜呢間學校好搞唔搞，偏偏要搞啲乜野分組上堂呀？明明係最後一年就好心比我地求其讀啦。宜家仲扮曬好人話咩同組同學交流可以學得好啲，計我話你班老師係唔想我地有問題就走去問你，驚麻煩到你之嘛。嘩，人性的光輝呀，老師既道德呀……OK，明曬。




 
  「咁開始分組啦。第一組，子軒，希文，卓珊，阿樑同阿傑。你地最後一年就要一齊讀啦，知唔知？」
 
  呢個時候希文對住我笑左一笑，同我揮一揮手。
 
  「今年要你多多指教啦，阿樑。」
 
  聽到呢句說話之後我成個人緊張到都唔知點回應好，我只係有樣學樣咁揮一揮手之後佢就擰轉個頭同其他同組既同學打招呼，而我就除左傻笑之外就唔知做咩好。真係估唔到一開學就可以同呢個一個咁愛既女仔一組，嘩，真係人性的光輝呀，老師既道德呀。
  真係老套啲都要講一次：我最期待的畫面出現了！