拖住我隻手，得唔得呀？: 第三章：做學生邊個中意測驗架？

 
  開學頭幾日一向都係交代下一啲無聊野，都係派下嗰啲乜野買校服既回條之類無關癢既野，到左下個星期一先至正式開始上堂。
 
  呢幾日我同組入面既人開始有唔少既交流，對佢地既事亦都有咗初步既了解。希文唔洗介紹當然係我女神啦，靚得嚟又份人又親切，我幾乎每日望佢多過望個老師：至於卓珊呢就係希文既好姊妹，好似係由小學開始已經同一班，同希文比起嚟份人就係屬於好活躍嗰類，成日都參加形形色色既運動；子軒就係一個咩事都好認真既人，雖然表現就唔係話好突出，之不過佢做野唔馬虎呢樣野的確係有目共睹；最後就阿傑，佢係一個好典型既毒男，呢幾日嚟同佢講唔夠十句野，下下問佢野只可以用一句答完，老實講我真係唔知佢個腦係喺到諗緊乜。
 
  我地分組既方法其實係依照同學讀既科嚟將唔同既同學分組，好似我地呢組咁，除左中英數呢啲主科之外，我地全部人都係讀經濟，地理同歷史，所以無論我地上咩堂都會喺埋一齊。咁樣上堂怪就怪咗啲，之不過可以任何時候都見到希文，對我嚟講當然係非常好啦。
 
  不過雖然可以每堂都見到佢，之不過呢間學校既堂真係好悶架，啲老師又中意對住本書照講喎，每次上堂就開始講，講到落堂，真係完全冇為我地呢班學生著想過，搞到我週不時都頂唔住訓著。由其係一到左歷史堂，個Miss把聲又難聽喎，上堂又一味吹水，我真係鬼唔望快啲喺本歷史書入面見到佢個樣。
 
  不過好彩每次我就嚟訓著既時候希文都會拍一拍我，叫我起身，佢呢種關懷備至既性格真係令我對佢更加入迷。




 
  某程度嚟講，我宜家返學真係單純咁為咗見到希文既佢，有時我什至會特登趁上堂嗰時扮訓覺去引佢嚟叫我起身。我覺得每一日返學都令到我地之間既關係變得愈來愈親近。
 
  宜家已經開左學兩個星期，我又如常喺上堂既時候望住希文。之不過今日有啲奇怪，我硬係凝住有人喺到望住我咁，但係當我拎轉個頭望下後面，結果都係一啲特別都冇，唔通係我既心理作用喺到作怪？不過既然發現唔到啲咩咁就算啦。
 
  到咗今日數學堂落堂既時候，數學老師陳sir無啦啦話我地下星期要測驗喎。重讀中六就係有樣野唔好，就係學校為咗公開試就比一大堆測驗去谷同學讀書，對於我呢啲只係因為父母要求先至嚟讀既人真係幾難搞。不過我都係諗住求其考下算嚕，反正我都冇心去考既，只要最後出嚟個分唔好太差就得。
 
  但係希文佢就唔同講法，由佢聽到要測驗嗰一刻對眼就好似著咗火咁，睇嚟佢係嗰啲好睇成績既人嚟。不過算數啦，俗語都有話船到橋頭自然直呀嘛，所以我都係由得佢，順其自然。
 
  之不過我自從上年考完試之後就冇掂過本書，宜家又抱住啲咁既心態做測驗，個結果出到嚟又點會好先得架？肥佬呢家野就梗架啦，之不過我真係點都估唔到自己可以一百分先拎得三分，我一直以為係得漫畫入面啲情境先會見到啲咁既野。




 
  「唉呀，我今次先得三分喳，真係估唔到今次既測驗會係咁難架。」
 
  我如常咁同希文講野，之不過我見佢成塊面黑曬，個頭冇望過嚟我到，到底發生咗啲乜野事呢？佢之前一聽到我同佢講野就會立即拎轉嚟望住我嚟答我，點解佢今次既反應會係咁既？佢之前聽到話要測驗既時候成個人都好有衝勁，但係而家就好似好失落咁，唔通佢既成績唔太好？如果係咁既我一陣一定要去安慰一下佢。
 
  「今次同學既表現唔係太好呀，要比啲心機知嗎？老師對你地好有期望架。」
 
  好彩今次個個都表現得唔太好，咁即係我個分應該都唔係太大問題啫。
 
  「之不過亦都有同學拎滿分喎，就係希文啦，大家比啲掌聲佢啦。」




 
  吓，滿分？！咁點解佢仲要咁黑口黑面呀？