拖住我隻手，得唔得呀？: 第七章：行行行，灣仔入面係咁行

  就係咁，阿玲就開始帶我喺灣仔到左穿右插，只係行下大街旁邊比較少人行既小店。一路行既時候我隱約見到阿玲既步伐有時係跳下跳咁，好似心情唔錯。由士多到開始行咗大約五分鐘之後嚟到一間文具店，店入面有一個著住白色背心既中年大叔。
 
  「阿叔，你得唔得閒呀？」
 
  「喂阿玲，你最近點呀？咦咁好帶埋男朋友仔嚟呀，士多老闆實開心死啦。」
 
  就咁聽落似乎呢間文具店既阿叔應該同阿玲屋企人有啲交情，所以佢先敢膽對住阿玲講啲咁既說話。而阿玲佢聽完呢個阿叔既說話之後塊面又紅曬，之後佢伸隻手指放喺佢桃紅色既嘴唇到，希望阿叔唔好再講落去，阿叔望到之後個人就係咁喺到笑。
 
  「對唔係呀阿樑，叔叔佢一向都…中…中意講笑，佢冇…冇心架，你千祈唔好介意呀，真係唔好介意呀。」




 
  「唔緊要……」
 
  其實我根本一啲都冇介意，聽個阿叔既語氣就知佢喺到講緊笑，所以我一啲都冇在意到。點解佢要咁在意呢？仲要將「唔好介意呀」呢句野講咗兩次。
 
  「叔叔呀，呢個係我同學阿樑，佢話好想訪問下啲小店喎，得唔得呀？」
 
  「梗係得啦，阿玲男朋友既要求就等於阿玲既要求，我又點可以唔理呀？」
 
  「阿叔！」




 
  「哈哈哈……」
 
  喺呢一片笑聲中我真係有啲唔知點反應好，一方面我有得同呢間鋪頭做訪問當然覺得開心啦，但係似乎同一時間為阿玲佢帶嚟唔少麻煩，個心到覺得有啲唔好意思。
 
  「係呢，你就係阿樑啦下話，你有乜野問題都可以問架，我地呢間鋪由我呀爺就開始營業，做到宜家已經好多年嚕……」
 
  就係咁樣我就開始咗我個訪問，而阿玲就喺旁邊坐喺到聽，我諗佢就算同呢間文具店既人幾熟都好都未試過咁認真聽佢地講歷史掛。個訪問大約進行咗一半個鐘左右，中途有下相，個阿叔又同我推介下邊啲文具係好用，邊啲唔好用咁，雖然我只係第一次同佢傾計，但係個感覺就好似同一個親戚傾計咁，個感覺好自然。
 
  訪問完呢間文具店之後，阿玲佢又再次帶我去其他老店到去做唔同既訪問，好似係玩具店呀，舊書店之類。可能係阿玲帶住我既關係，嗰啲鋪頭既老闆都好願意同我做訪問，講下佢地既歷史。但係奇怪既係唔係點解每間店鋪既老闆都會不約而同咁誤會我同阿玲係情侶關係，搞到佢每次聽到都會面紅同向我道歉。訪問完最後一間鋪之後我就同阿玲佢一齊返去佢屋企間士多。




 
  「今日真係好多謝你帶我行呀，如果冇你既我真係唔知點好。」
 
  「唔…唔緊要……」
 
  「咁我走先啦，拜拜。」
 
  「拜…拜……」
 
  同我道別既時候阿玲佢依然講野口窒窒咁，不過好奇怪，同我講野既時候佢先係咁，當佢頭先見到唔同店鋪老闆既時候講野就好流利，我諗大慨係因為同我仲未好熟掛。
 
  不過到底點解佢喺我面講野會口窒窒都係唔好諗住啦，既然宜家訪問既部分都做好曬，等我立即返屋企做好份Powerpoint等希文對我刮目相看，知道我都有心讀書，令到佢唔好咁憎我先。
 
  我呢一次真係只許成功不許失敗，失敗咗既我罰自己日日喺到背「許許許」10分鐘又點話！





-------------------------------------------------------------------------------------------------------------

真係好對唔住冇遲先至更新到
不過都係嗰句, 就算我幾遲更新都好, 我都唔會無啦啦放棄個故佢
希望大家可以繼續支持啦

(如果覺得好睇既不妨share比朋友睇, 如果有咩意見既不妨留個言啦 )