拖住我隻手，得唔得呀？: 第八章：Presentation真係好難呀

 
  要數我咁用心去做一份Project真係唔知係幾耐之前既事啦，由唔知幾時開始我做Project基本上就係會上網不停玩Copy & Paste，跟本就冇乜野係要自己親手去寫出嚟。就算係通識科嗰份IES啲問卷都係自己作既，返正都唔會有人分得到究竟係唔係真架啦。
 
  不過今次又的確認真咗少少去做，雖然未必話個整成品一定係好好，但係至少我整完出嚟之後都幾滿意。我滿懷自信咁帶住我既整成品喺Present嗰日既朝早返到學校，希望我地組既同學可以一齊Present埋我自己做好嗰一部分。唔知希文見到我咁落力去做會唔會原諒返我呢？
 
  「希文，我尋晚整咗個……」
 
  「阿樑你嚟得啱啦，呢個就係我地組個Powerpoint，呢到就係你要講既部分，睇熟啲呀。」
 
  「其實呢，我想話……」




 
  「仲想話啲咩呀？你成個Project咩都冇做過，宜家係唔係要你背少少稿都唔肯呀？」
 
  見到希文一臉唔耐煩既樣，試問我又點敢去駁佢先得架。我呢個時候真好後悔點解自己唔一早同佢地講自己尋晚整嗰個Powerpoint，搞到宜家比佢以為我咩都冇做過。不過我宜家後悔嚟都冇用，始終整好個Powerpoint先係最緊要。
 
  「唔係呀你聽我講先啦……」
 
  「你又想諗啲唔知乜野解釋係唔係呀，解釋就即係掩飾，我都係唔想聽到你講野。我風紀嗰邊有野做，我都係走先。」
 
  估唔到我連唯一一個機會去解釋都冇，到底我喺希文心入面既印象係差成點呀？唉，事到如今唯有記熟啲份稿，等佢唔好咁憎我啦。至於我個Powerpoint…… 有機會先拎比佢睇啦。




 
  時間話咁就快去到我地要Present嗰堂，真係講都唔信，呢個時候我心入面埋沒咗好耐既嗰種Present之前既緊張感居然會浮現返出嚟，等我仲以為自己以後都唔會有呢種感覺添。
 
  「下一組，佢地既主題就係灣仔既店舖歷史發展，各位同學要留心聽佢地講野呀。」
 
  聽到老師咁講之後，我既緊張感居然立即提升咗唔知幾多倍，宜家成個腦變得一片空白，頭先好努力去背既內容都一一忘記曬，唉，唯有睇下自己記得幾多得幾多啦。
 
  但係可能因為呢一份緊張既感覺，搞到我都唔可以集中係個Presentation入面，我既專注力全部都放曬喺眼前其他同學既表情到。有啲同學就喺到玩手機，有啲就喺到訓覺咁……總之聽既人就好少，不過其實我都幾明佢地既感受既。我地呢組既Powerpoint冇錯係就係圖文並茂，內容又叫豐富，之但係悶咗啲囉，佢地講既野基本上你求其Google下都會睇到，我地多既只不過係啲訪問既內容。
 
  我一路望住同學既表情，然後再望一望老師個樣，見到佢對眼眉已經成咗「八」字形，睇嚟佢對我地呢組真係幾失望。




 
  而我見到老師個樣咁之後就開始覺得呢個Presentation突然變得好漫長，長到我都唔係好頂得順。雖然話就話我地今次冇時間冇限制，但係我一望到老師個失望既表情就好想快啲完，呢一種感覺真係好難受呀……
 
  時間唔知過咗幾耐，我地呢組終於都Present完，而老師喺呢個時候亦都開始想講出佢既評語。不過睇佢頭先咁既樣，睇怕個評語都唔方好得去邊，算啦，宜家件事會點發生根本就唔到我去理。
 
  「老實講希文你地呢一組真係令到我好失望。」
 
  唉，真係冇估錯。
 
  「你地既內容真係一啲新意都冇，到底你地有冇用心做過個Project架，咁既質素我求其上網都睇到啦，仲需要你講比我知咩？」
 
  我真係估唔到我諗既野同呢個老師諗既居然一樣。
 
  「你地讀書的確係好叻，由其係你呀希文，但係做Project就唔同測驗，唔係話寫得多就會高分，你呢份野我幾乎可以比唔合格你地。」
 




  唔係掛，唔合格會唔會誇張咗少少呀，我地都冇離題，只係內容悶咗啲啫，唔洗去到唔合格咁大件事下話。
 
  而喺我個心好不滿呢個老師既決定既時候，我忽然聽到身邊有少少好似索鼻水既聲，不過呢把聲唔係好大，幾乎要去到你耳邊先可以聽到。而喺呢一個時候，我輕輕咁拎個頭望向我聽到嗰把聲既方向，居然比我見到……