[足球故] 我要踢港隊！: 二十三

「喂，我返屋企先啦。」我換過衣服後，向著隊友說。 

「好啦！下個禮拜三見。」 


我走出去更衣室外，看了看足球場，剛剛熱鬧的情境已過去，剩下的只是綠草如茵的球場。還想看看靜華走了沒有，算了吧，還是獨自歸家。 


「老豆老母，今日嬴左波呀。」 





「又嗌我老母？」 

「媽咪。」 

「咁咪幾好囉，有我風範！有冇好似我咁連中三元？」 

「老豆，唔好咁膚淺啦。入波先叫勁既咩？」 

「我冇講過呀。不過入得多波，溝女就一定易啲！你知啦，啲女仔剩係識睇入波之嘛。」 





「我踢波又唔係為左女仔先踢。」 


「噔～」 

「恭喜哂。」是靜華傳來的訊息。 

「哈多謝。」 

「今晚仲有冇力跑步呀？」 





「梗係有！陣間見。」 



嬴波後的那一個晚上，與平時一樣，沒有風雨亦無晴，在平靜的晚間，沿著河畔跑步，真的是件樂事。當然，也要有個好的伴。 

「今日踢得幾好啵。」靜華抹著汗對我說。 

「我都冇入波。」 

「又唔係入波先代表踢得好，你球助攻好靚喎。」 

「識貨喎，哈哈。」還以為天下女生一樣只愛看入球，還以為老爸說的話一定對，看來靜華與其他女生不一樣。 





「我先冇你諗得我咁膚淺呀，哼。」靜華對我做了個鬼臉就繼續向前跑。 

「喂，等埋呀。」我看著她的背影，跟著她的步伐跑，追著她。 



學界的首勝背後，有賴一直在街場與我踢球的波友。當然，舅父是最大的功臣。 

隨著體能的進步，在街場踢球更加得心應手，不停的盤球與轉邊已經是在街場最常做的事了，在硬場足球場踢球真的有種不同的感覺，是久違了的熟悉感。始終，在練波後總會有一至兩天的斷層，讓自己雙腳休息一下，所以也減少了在街場出現的時間。 

所以每當我再來街場踢球時，我也十分珍惜在那裡踢球的時光，也特別珍惜與舅父談天的短短幾分鐘。 

「舅父，第一場學界嬴左呀。」 

「咁咪好囉。有冇得上陣踢呀？」 





「有呀，後備上陣。雖然果時都大局已定，不過總算有功勞。」 

「嘿嘿。唔好睇少球場上每一個人，只要有機會落場，都有機會改變球場上既一切。」舅父又吐出一絲絲煙圈。 

「舅父，多謝你。」 

「下？」 

「多謝你之前係我迷失既時候省醒左我。」 

「嘿嘿，你諗多左啦。果時我見你個樣樣衰到督眼督鼻先忍唔住省你咋嘛。」舅父笑著說。 
「又話有操體能既？咁快就攰，借同我傾計黎抖呀？出去踢波啦。」 






「係既！」