迪士尼無麥記,不過就有間類似麥記既快餐店喺明日世界嗰邊。

揀左個露天位之後,我就去買野食。

迪士尼D野食真係好呃錢...

又無乜款揀,又貴...

不過都好彩,今日真係唔算多人~





要排隊買野都好快~

「好野~有野食~」當我買左兩個漢堡包餐返黎之後,Emma顯得更加高興。

任何類型既女仔一黎到迪士尼,都會變回小朋友~

望住眼前呢個Emma...

好唔真實...





佢比FF中既人更唔真實...

靚、索、溫柔、體貼、高貴、大方、親民、純真、有錢集於一身!

CCTVB有呢D人物設定都俾人屌到升天啦~

就連韓劇都唔玩呢D玩外星人啦!

「幾多錢丫?我俾返你先啦~」仲要講AA制喎!過於FF,腐皮上一頁。





『唔使啦~尋日嗰餐我都未多謝你~』我點好意思收你錢...

「咁多謝晒喇~」Emma開始享受佢既漢堡包~

有時候,唔係男人俾唔起錢,係你點去使男人錢。

買個袋俾你唔係問題,唔好下下都話要LV先孭得上膊。

買完開心唔夠兩秒又口黑面黑。

我都係想你開心姐,你既開心可唔可以持久一D?

好似Emma咁幾好~

最起碼都叫識感恩丫...





『你真係好鍾意迪士尼喎~』望住笑容滿面、滿心滿足既Emma,我不禁覺得佢好似小妹妹~

「我細細個就好鍾意迪士尼架喇~嘻~」Emma左手一啖漢堡包,右手一啖可樂。

『咁你最鍾意邊隻人物?』

「米奇~我最鍾意米奇~」Emma講到兩眼發光咁。

『米奇?咁行架?』我忍唔住要恥笑一下Emma。

「咩行丫?你知唔知點先為之係一個成功既Logo?」Emma瞪大對大眼睛問。

『下?成功既Logo...』





「就係就算你將佢裏面所有野都拎走晒,你都認得出佢係咩牌子咁就係最成功~」Emma用隻指手畫下畫下...

係喎...

我都唔記得左...

「就好似Apple咁啦~只係睇Outline你都知係蘋果公司~米奇亦都一樣~只係得返三個圓,你都知係迪士尼~」Emma得得戚戚咁戚下眼眉。

『你...真係好特別...』我不禁用上Emma既口吻...

人地話兩個人經常單獨相處,就會互相吸納對方既性格。

久以久之,就會覺得大家都好夾,又或者好似自己。

老實講,我一直都唔認同呢種講法。





你睇下我同Ashlynn就知啦~

咁耐以黎,我地一直都係處於對立面狀態。

我係佢既反面,佢亦都係我既反面。

而我都覺得自己根本就係黎自火星。

只係每日都無可奈何咁迎合地球人既生活。

所以人地睇我好似個怪人,我睇人地都好似一大班怪人。

但眼前呢個Emma...





我開始有一種他鄉遇故之既感覺...

「咁你呢~鍾唔鍾意迪士尼呢?」Emma繼續咬佢個漢堡包。

不過嘴細既佢就好似小朋友咁要夾硬擘大個嘴先咬到。

真係好搞笑~

『我丫...無話特別鍾唔鍾意既~不過...』我突然諗返起D野...

「不過咩?」Emma繼續追問。

『我諗返起我以前喺道做過兼職...係扮米奇...』我腦海開始浮現以往既影像...

「跟住呢~跟住呢~」Emma就好似準備好聽故事既小朋友...

『我記得係迪士尼起好無幾耐...扮米奇其實都真係幾熱架~我久唔久都會閃埋一二角除左個頭抖下涼~』

「跟住呢~跟住呢~」

『我記得嗰年係我岩岩考完A-Level,因為家境貧窮所以黎呢到做兼職幫補家計...』我眼裏開始浮現以往既影像...

A-Level...

係我黑暗既一年...

我以為我可以同你一齊上大學...

我以為我可以永遠同你喺埋一齊...

我以為上天會眷顧我...

“點解你唔聽我電話?”

但現實就係黑暗既開始...

“我有好多野想同你講...”

而更現實既係...自始,黑暗就再無離開過我...

“月:我無野想聽,亦無野想講。”

「喂喂~跟住呢~跟住呢~」Emma搖一搖我隻手...

『唔記得喇~咁耐既野有邊個會記得...」有D野係唔應該成日記起...

「你咁無記性架!」Emma又谷起塊面豬登。

『人既記憶好有限架咋~要記就記住D重要野好過啦~』

「嗯~所以我會好好記住你保護我...你教識我既野囉~」Emma咬住支飲管...

保護...

點講都講唔上我有保護到Emma啦...

平凡像我呢D無鬼用既男人,分分鐘要Emma保護返轉頭...

講到教亦都無資格啦...

呢兩日黎,Emma都係自動波完成所有工作。

仲要做得好過我,快過我。

我有咩資格講話教佢野?

望住眼前既Emma,真係覺得越黎越唔現實...

喺呢個世界上根本就唔會孕育到天使一樣既人...

喺呢個醜惡既世界裏面,每個人都係爭名奪利...

擁有極權既人就不可一世,傲視人間...

邊道黎得一個好似Emma咁純潔既天使?

我地根本就唔係處於同一個空間、同一個境界...

“And you don't seem to understand”

望一望個電話...

仆街!

『老闆打黎!』我望住部電話表現出驚訝既表情!

仆街喇呢次!

一定係嗰隻葉總惡人先露股!

向肥豬告我一狀!

點算呢...點算呢...

我應該點解釋好呢...

我拎住個電話,手都震埋...

呢個時候Emma由我手上搶過電話!

「我同飛揚做緊正經事...嗯...嗯...OK喇,你唔駛擔心咁多。嗯...嗯...Bye。」肥豬同Emma講左D乜?

死喇呢次...

俾老細插就事少...

一陣真係炒左我咁點算?

而家要喺出面搵過份又會俾人撳...

又勁多大學生出黎搵工!

D大學生多到掃地都要做!

個個就話騎牛搵馬,D老闆就唔係想搵人返長工咁!

三個月內唔係你炒鳩個老闆,就係老闆炒鳩你...

點算好丫...

我唔可以無左份工架...

我無左收入就乜都無架喇!

「飛揚~你無事嘛?成頭大汗既?」Emma隊返部電話俾我...

『無無...好熱姐...係呢...老闆佢講D乜?』我一邊抹汗一邊口震震...

「無丫~佢叫我地玩得開心D喎~」Emma又向我打左個眼色...

玩得開心D?

係唔係則係話:「有得玩好玩埋佢喇~玩完返黎收大信封啦~」

Holy Shit!

「食飽我地要出發~」Emma拉住我...

『行...行去邊丫?』

「去霸返個靚位睇巡遊丫~」

睇巡遊?

而家既心情真係睇馬賽跳艷舞都起唔到機喇...

Emma翹起對腳,雙手撳住條短裙仔就坐左喺路邊。

粉紅色底底就喺大髀與裙底之間若隱若現...

唔好話路過既途人,就連D工作人員都眼定定𥄫Emma...

我都係放件西裝褸落Emma大髀道,幫佢遮遮好D...

唔係既話一陣巡遊時,D迪士尼人物忍唔住𥄫Emma...

鹹濕胡迪...

「唔該~」Emma輕輕挨一挨落我身邊。

不過一件西裝褸係唔足夠殺退班餓狼!

因為Emma個V領開得好低!

班餓狼見𥄫唔到Emma條底底就轉攻佢對粉嫩半球...

男人真係一隻只會諗淫野既禽獸!

我手上並無其他武器,遮都無一把,唯有只可以眼神制敵!

當然,班餓狼彩我都傻啦...

佢地仍然肆無忌憚咁𥄫Emma V領下春光...

過份!

我忍唔住!

要再為Emma加以防衛!

我左手輕輕撳一撳Emma個V領!

但係呢一下舉動,令我感受到Emma對乳房既彈性...

Shit!撳得太低添!

不過又真係好彈...真係好彈...

而且仲好大...

Emma亦都察覺到自己個V領太開,自己用手撳一撳...

『Sorry!我唔係想...』我都未講完...

「我知你想保護我~」Emma甜絲絲咁對我笑...

天啊...

咁善解人意既女仔真係喺邊道搵?

「開始啦開始啦~」Emma一隻手撳住自己件V領衫,另一隻手拉住我。

一連串輕快既音樂,幾隻迪士尼既角色跳下彈下,巡遊就開始喇~

Emma都好聚精會神咁睇,就好似身邊D小妹妹咁。

「黎喇黎喇~Mickey丫~」Emma好天真咁指住花車上既Mickey...

全個氣氛都好歡天起地、載歌載舞。

有陣時要開心真係好簡單~

黎迪士尼就得~

但更簡單既係只要放下所有負擔,自自然然就識得笑。

就好似身邊D小朋友~好似Emma咁~

但又有幾多人可以放得低負擔?

又可以放得低幾耐?

「好好睇丫~係唔係丫飛揚~」Emma拍晒手。

『係丫...』我慢慢起身,『不過我地係時候要走喇。』

Emma拉住我起身,表情有D唔係幾願意:「玩多陣添啦~」

『下次你再搵你男朋友陪你啦~』我覺得應該係時候返返黎現實世界。

「我都無男朋友~」Emma谷起塊面豬登。

『下?』

「正確黎講我都未拍過拖~」

『下?點會呀?』呢個會唔會吹得大得制?!

「因為我心有所屬~嗰個人就係Mickey喇~」Emma指住已經走到遠遠既Mickey...

Mickey?

「所以玩多陣先啦~」Emma捉住我隻手搖下搖下...

『ER...』

「ER即係OK啦~GoGoGo~」Emma翹住我行...

有陣時真係好奇怪...

當你想返返黎現實既時候,幻境係唔會俾你咁輕易離開...

同Emma喺迪士尼玩得真係好開心~

Emma總會散發出歡樂既氣色~

無憂無愁~

當然啦...

有錢人仲需要憂D乜?愁D乜?

喺呢個社會裏面就只有我地呢D下等人先會憂柴憂米...

玩玩下都差唔多黃昏...

Emma翹住我喺美國小鎮大街上面行...

「今日真係玩得好開心~」玩左成日既Emma仲係無一絲絲既累意...

『嗯~如果每日都可以咁開心就好喇...』貪婪...七罪宗...

「如果每日都係咁開心既話就唔珍惜架喇。」Emma好似看破紅塵一樣。

都係既...

習慣左幸福快樂,就忘記左痛苦既滋味...

我地人類就係咁衰...

唔知返到公司,老闆仲喺唔喺道呢?

一提起老闆...

好似忘記左D野...

呀!

『唔記得左要幫老闆買D野添!』我拉停左Emma。

「買野咋嘛~Easy啦~」Emma快快手拉住我去間水晶店入面...

Emma左望望,右望望...

喺唔同既櫃位穿梭...

當走到一個陳列頸鏈既櫃位面前,Emma雙眼發光...

「就呢條啦~」Emma指住條Mickey頭形既水晶吊咀。

女人買野係唔係天生本能黎架呢?

「你女朋友真有眼光~呢個款係岩岩新到...」一名女服務員已經黎唔切係咁推銷...

『我地唔係情侶...』點解一男一女就一係情侶?

點解愛情故事硬係要加入呢D劇情?

「我地買俾老闆既情婦~」Emma呢句算唔算係打完場?

只見女服務員尷尷尬尬咁幫我地包起條鏈...

「多謝你八百一十蚊~」

又要碌卡...

又唔知攞唔攞得返...

『Emma...你又知條鏈係老闆買俾情婦既?』我對呢個問題幾有興趣...

「我姑姐都唔鍾意迪士尼既~」Emma又翹住我行出水晶店。

『咁都唔一定係買俾情婦姐~』我唔係刻意幫老闆解話,我只係想探求多D Emma既睇法。

「唔係仲送得俾邊個丫~你地D男人~」Emma用手指指一指我個鼻...

我地D男人?

喂喂喂...

搞清楚!我從來都無偷食過囉!

「呀!仲有一樣!你喺道等等我!」Emma鬆放佢隻手之後,衝左入一間飾品店裏面。

又想搞乜...

日落西斜...

小鎮大街越黎越黃...

越黎越橙...

過左一陣,Emma雙手放後,彈下彈下咁喺飾品店門口彈左出黎。

「登登登登~你要帶住佢同我影返張相~」Emma彈到去我面前之後,由背後拎左個米奇耳仔頭飾出黎...

『下...唔係咁好掛...』硬係覺得怪怪地...

「俾我任性埋呢次咁多啦...」Emma𡁯長個嘴...

『好喇好喇...』

帶上頭飾後,Emma翹住我,黐到實一實,柔軟既乳房就壓實我手臂...

“咔嚓”

「好野~同Mickey影左張合照~」Emma既笑容真係好天真,好純潔...

有時男人求D乜?

唔係話真係要靚到核爆、索過連詩雅、有錢過李+x...

只係一個滿足既笑容,都可以溶化男人個心...

喺兩行樹影下,開始要離開背後既奇幻世界...

「要走喇...要返去喇...」Emma鬆開左佢翹住我隻手...

『嗯~係時候返去喇~』喺時候返返去現實世界...

「今日真係玩得好開心~多謝你~」Emma帶住微笑點點頭...

『我都好開心~』我唔敢將“下次一齊再黎過”講出口...

「應承我~你要帶住個米奇耳仔返到公司~」Emma向我伸出一隻手指尾...

『下...會唔會好奇怪丫...』

「最後一次~俾我任性多最後一次~」Emma又𡁯長個嘴...

『好喇好喇...』

手指尾一勾,Emma用佢隻拇指掂我隻拇指...

帶住個呢個奇幻世界既道具返去現實世界...

或者...呢個就係曾經親身渡過幻想空間既證據...

回去現實世界既路途中,Emma都一直瞓喺我膊頭上。

睇黎Emma玩得好攰...

帶住甜絲絲微笑既Emma究竟喺道發緊咩夢呢?

夢見同Mickey行沙灘?

夢見同Mickey跳舞?

唔知呢~

或者就只有Emma自己先知~

我開始明白人點解會臨崖勒馬...因為你見唔到前路,你見唔到未來,所以你會好理智咁停落黎...

就好似我而家咁...

唔會有將來...

『都差唔多夠鐘放工~你唔使跟我返公司喇~』返到黎現實世界,就要跟返現實世界既時間...現實世界既處事方式...

「咁好啦~星期五見~」Emma同我揮揮手...

『星期五見~』縱使幾咁唔捨得,都要接受現實。

有人話過一個人唔經歷過快樂,就唔會知道痛苦係咩感覺。

或者真係...

我地無經歷過快樂既話,就唔會有比較。

唔會比較我地所得,或者所失...

無開始,無終結。

返到上公司,玻璃門裏面已經黑麻麻一片...

睇黎老闆已經走左...

都係既,成六點幾~

唔通會等埋我拎野返黎先走咩?

好喇~放低盒吊咀...寫低張紙俾佢,等佢自己聽日返黎拎~

“啪啪啪”開晒燈...

我唔怕寂寞...不過我怕黑...

一個人既夜晚...

無其他聲音影響你...

無其他事去左右你...

無其他人去牽動你...

思緒比較清醒...

所有野都唔現實,今日既一切...

我唔可以俾自己跌入虛幻既世界當中...

唔係既話只會迷失自己...

現實既我只係一個平凡像我路過,十個似我...

生於下等階層日日為生存勞碌既下等人...

食左盒叉飯,一做又做到十二點...

係時候收工...應承左細妹聽日睇佢表演~

拎住個公事包,一個人喺旺角街上行...

每個人都變得比較真實。

或者係帶足一日面具都有D攰,係時候將面具除落黎...

又或者個妝化左成日都溶...

究竟我地係唔係只可以喺最黑暗既黑夜先可以以最真一面示人?

點解我地要喺陽光下收埋最真既一面喺黑暗既深淵?

我地係唔係真係有咁多野唔俾得人知?

咁唔見得光?

或者只可以講,為左喺呢個社會裏面生存,我地只可以收埋自己,迎合他人...

行人路上面好多人都不時望住我...

我有咩咁奇怪呢?

就連上小巴既時候,林雪都眼定定望住我...

做咩事呢?

坐返每晚都坐既位...

拎個電話打俾Ashlynn...

「喂~我係Ashlynn~而家唔得閒...」

仲未返?

飛左去邊丫...

*噹* “Emma:有無失信未返到公司就除左個米奇耳仔?唔准講大話~”

呀!係喎!

都唔記得左自己仲帶緊個米奇耳仔!

唔怪得街上咁多人用奇怪既目光望住我啦!

“咔嚓”影張相...

Send俾Emma...

*噹* “Emma:你仲帶緊丫?哈哈哈~你真係好特別~星期五見啦~早抖^3<”

如果可以帶住一世...都唔錯...

“啪”VAN仔門關上...

我身邊個空位都坐埋人之後...

「好~人齊起飛~」林雪一抽頭就飛出去。

今晚坐喺身邊既都唔係小妹妹...

已經係第二晚喇喎...

小妹妹去左邊呢?

我再望住手中既銀鏈:『我會唔會以後都再見唔到你...』

TO BE CONTINUED