同Emma落左樓之後,Emma一直貼住我行。

不時仲會撞下撞下手臂。

呢種碰撞,總係有一份青澀...

就好似兩行樹陰下,一對著住校服既小戀人,兩小無猜,撞撞碰碰,藉著身體既碰撞以表心迹。

但隨住年紀開始大,我地好似已經忘記左呢種幼稚既傳遞方式。





我地只會攬攬錫錫,揸波摸J。

我地可以為左滿足性慾,放低幾舊出一出野。

我地可以為左滿足性慾,晚晚俾唔同既人喺自己身體上遊走。

細細個覺得愛情好重要。

同女神一齊,只談愛,不談性都無所謂。





但大大下...性比愛更重要...

唔理佢係豬扒定女神,扑左先算...

究竟真愛仲存唔存在?

或者真愛只存在喺年少輕狂,青澀歲月。

『你幫左我執好個會客室,呢餐我既~你又想食D乜?』我點解會用“又”黎問Emma架呢?





「咁都可以呃到一餐丫~咁...唔...」Emma咬住唇,諗一諗。

Emma諗到個樣好似細路女咁~好得意~

「我想食農夫包~」Emma拍一拍手。

『農夫包...我知道呢頭有熟食中心有得食既...之但係...好嗱喳架喎...』仲要好多麻甩佬...

「唔緊要丫~我OK架~」Emma咪咪嘴笑。

真係唔緊要?

真係OK?

真係無問題?





女神去麻甩佬領域?

我硬係覺得...格格不入咁囉...

同Emma走上扶手電梯,下面已經有好多麻甩佬𥄫Emma裙底...

我立即用件西裝褸幫Emma遮一遮!

想𥄫Emma裙底?問過我件褸先啦!

行到入熟食中心,就好似Model行緊天橋咁,全部觀眾都注視住Emma...

當然D觀眾全部都係麻甩佬...





幾個地盆佬𥄫到Emma對腳實一實...

幾個地產仔望到連隻羹都跌埋...

水吧仔倒瀉水...

廚房佬炒燶菜...

行過身邊既男人無一個唔係望住Emma...

頓時間,整個空間既生物都好似俾Emma吸住左咁...

Emma既吸引力實在太大...

大到好似黑洞一樣...





我都係巴巴聲拖住Emma走去個無乜人望到既死角坐低...

Emma坐得好優雅...

雙腳緊合...

雙手放到短裙上...

高貴大方既公主呀...

『除左農夫包之外,仲有D乜想食?』我眼定定望住Emma...

我都俾Emma吸住左...





「唔...我想食車仔麵~要魚蛋、牛柏葉、油麵~」Emma笑瞇瞇咁答。

『嗯~咁想飲D咩?』我仲想望耐D...

「可樂~」Emma笑得更加甜。

『嗯~咁你等等我~我去買~如果有咩唔對路記得大聲叫救命!』我提醒Emma。

「哈哈~會有咩唔對路丫~傻瓜~」Emma笑得好天真...

你真係入世未深...

喺呢D地方出現一個咁索既靚女...

真係乜事都有可能發生...

放低隻小綿羊喺道真係好唔放心...

所以我都係快快手手買晒D野返黎保護Emma!

『農夫包要等等~食住個車仔麵先~』放好晒野食準備開餐~

「咦?Girlfriend?」Emma擰一擰罐可樂...

『成箱成箱咁黎,呢道罐罐都係一樣架喇~你睇下嗰邊幾個地產仔,個個都係Girlfriend~真係Gay味濃~』真係唔知邊鬼個諗呢D屎橋出黎!

知唔知咁樣真係會好尷尬?

你話喺岩既人遇上岩既名字就話姐!

但係呢個世界上又邊有咁好彩丫~

你都係黑仔開架啦~

一陣你之前個女朋友叫妹頭,咁岩又拎左罐印住妹頭既俾你現任女朋友咁點算?

實炒大鑊啦!

所以話要搞新意都用下腦先丫唔該~

「咁樣會搞到我唔捨得飲架喎~」Emma望住罐可樂...

『有咩唔捨得~我幫你開啦~』我係Emma面前表演單手開可樂...

「唔該~」Emma咬住支飲筒啜下啜下...

『女仔好少會飲可樂架喎,你唔怕肥咩?』我開始食我個男人的浪漫。

「嘿嘿~我唔會肥架~」Emma都開始食佢碗車仔麵。

『咁好?食極都唔肥?』真係天生麗質難自棄...

「都唔可以話食極都唔肥既~都要做下運動~如果唔係個身形會走樣架~」Emma咬住粒魚蛋講。

『貪靚~』果然係女人都會貪靚~

天使般既女神都係一樣~

「咁我都想將我最完美既一面俾我最深愛既人睇架嘛~」Emma斯斯文文咁食佢既車仔麵。

食車仔麵食到好似食天使麵咁...

真係靚人食乜都靚D...

「其實豆腐火腩飯係咩味架?」Emma望一望我碟男人的浪漫。

『咩味...鹹鹹地...咁囉...』其實我又真係唔係好識形容...

「可唔可以俾我試一舊~」Emma已經準備夾我舊火腩。

『無所謂~你夾~』望住Emma對筷子夾落舊火腩...

再望住Emma將舊火腩放入口...

Emma眉頭一皺,扁一扁嘴:「好重口味丫~」

『哈哈~係咩?我覺得OK喎~』我又食一舊火腩。

「男人真係咁鍾意食鹹野架咩?」Emma狂啜可樂。

『關咩事?其實除左鹹味,仲有一份濃味...』我食多兩啖飯。

「濃味?」Emma疑惑咁望住我。

『嗯...就好似經歷過好多辛酸,好多苦澀...』我唔知Emma明唔明,但我內心就係有呢種感覺...

就好似人生咁樣,細細個咩都唔識,咩都未識過...

大大下遇既人多左,見既事多左...

好多時都要做你唔想做既事,但你又無得揀...

要同唔想一齊既人相處,要笑口勢勢面對討厭既客人...

被呢個世界又炒又炆...

到最後,可能唔可以話苦盡甘來,但至少都嘗盡人生滋味...

呢種味道,就好似豆腐火腩飯既重口味...

「農夫包呀!哩到咁撚埋想搵死人咩!想搞野就返屋企啦!」個阿叔放低左個農夫包之後就口噏噏咁行左去。

個農夫包真係好鬼大個...

「好野~有農夫包食~」Emma睇黎真係好開笑。

對住咁天真既Emma,有邊個男人心會唔被溶化~

我好自動波咁帶起手套,拎起把刀,切丫切...

切好左一細舊,靚靚仔仔既,點一點汁,我又好自動波咁餵到去Emma口中...

Emma一啖就咬左落口:「你平時都係咁餵你女朋友架?」

係喎...我喺道做緊乜丫?

我做乜好似平日餵Ashlynn咁餵Emma丫?

點解我會咁不自覺架?

『係丫...係丫...女仔怕整到隻手油淋淋嘛...』我有D唔係咁好意思...

「你女朋友真係幸福...」Emma笑中帶點點哀愁...

幸福...

呢兩隻字好似好耐都無喺Ashlynn口中出現過...

只有話“一D幸福既感覺都無”咁囉...

究竟係我做得唔夠好?

定係Ashlynn貪得無嫌?

我都唔知...

但點解Emma會覺得我女朋友會幸福呢?

難道真係隔離飯香?

或者係因為Emma仲未有拖拍,呢個先係事實既真相...

『你都係快D搵返個人拍下拖,錫下你啦~』我繼續餵Emma。

「拖係唔可以隨便拍架~」Emma又一啖就咬左落口。

唔可以隨便拍...

「如果隨隨便便搵個人拍既話,只會後悔...後悔浪費左時間~自己既時間又好,人地既時間都好...」Emma咬下咬下...

浪費時間...

我地不斷喺茫茫人海裏面尋尋覓覓,算唔算得上浪費時間...

「呀...呀...」Emma好似D雛鳥咁擘大個口等我餵...

我再將一細舊靚靚仔仔既餵到Emma口中...

「青鳥喔~每個人都等緊佢既青鳥呢~」Emma咬下咬下...

青鳥...

「青鳥已經返返黎喇...」

『別再迷戀在青鳥之間...』我望住手中既麵包...

Emma一啖就咬走左我手中既麵包:「你仍然迷戀喺你隻青鳥呢~」

我...

『你都係快D食啦~』我再切一舊靚靚仔仔既餵到去Emma口中。

「你都食D啦~」Emma捉住我隻手,放我嘴邊。

『喂喂喂~OKOK~睇住D汁~』

同Emma你一啖,我一啖...

過去?未來?

邊諗得咁多...

而家既我只希望顧住眼前...

我地每一日既時間都好唔夠用...

或者你會想一日可以有四十八小時...

但當你一日有四十八小時之後,就會有九十六小時既工作等緊你...

過去已經無辦法追回來...

未來又唔諗得咁多...

我地...或者...只可以...活在當下...

話咁快就差唔多食晒成個農夫包。

睇黎Emma都食得好滿足~

「呀...」突然,Emma好似好痛苦咁既樣撳住個肚...

『做咩事丫Emma?你無事丫嘛?』我扶一扶Emma...

唔係食物中毒呀化?

無理由...

如果係都唔會咁快架...

但Emma睇落真係好痛苦咁既樣...

「我...M痛...」Emma捉住左我手臂...

M痛?!

『你M Come?M Come仲飲凍野?傻豬黎架!你等等我...』我立即除低手套...

巴巴聲衝去拎杯熱水黎...

再喺我杯C0T道拎幾粒冰...

插支飲管落去...

攪兩攪...

『飲啖先...慢慢睇熱...』我拎住杯暖水將支飲管放到Emma嘴邊...

Emma細細啖咁啜左幾啖...

『M Come唔飲凍野是常識吧~你仲走去飲可樂,對身體唔好架...』睇住Emma個痛樣真係心都痛埋...

「嘻嘻...我諗住一次半次唔緊要啦...呀!」Emma講到一半,就捉住左我隻手,撳住喺佢小腹道...

Emma捉得我好緊...

睇黎Emma真係好痛...

我一隻手按住Emma小腹,另一隻手拎住杯暖水:『飲多兩啖暖水...』

Emma慢慢啜...慢慢啜...

直至Emma啜晒杯暖水:『好D嘛?』

Emma點一點頭...

我將杯暖水放到檯上之後,Emma挨左落我膊頭道...

我好自然咁將隻手搭喺Emma膊頭上面,就好似平時Ashlynn M Come咁...

「你隻手好溫暖...」Emma細細聲講...

何止暖...直頭熱添啦...

我內心真係好困惑...

對另一個女仔好似對自己女朋友咁...

係唔係唔係咁好呢?

係唔係應該保持一下距離呢?

我咁樣做又算唔算做左D對Ashlynn唔住既事呢?

我內心總有一份怯...

我情願輸一世,都絕對絕對絕對唔會形容為心虛!

只係...我覺得...對一個朋友咁親暱...好似唔係咁好...囉...

點解我會用親暱黎形容架屌!

Emma慢慢坐返正個人...

『好D嘛?』我亦都縮返開我隻放喺Emma小腹上既手...

「嗯...好好多喇...多謝你...」Emma塊面都仲係青青地...

『不如我買D藥俾你食。』我知道有一隻藥係Ashlynn食開,好有效。

「唔使喇...有你既溫暖,我好好多喇...」Emma對我苦笑...

望住Emma個辛苦樣,我真係有D心痛...

就好似見到Ashlynn M痛,我個心都好痛...

Ashlynn一直都話我唔心痛佢...

但有乜野面部表情係可以表達到心痛架呢?

我唔識...

好多時唔係我唔心痛佢,係佢唔知我心痛緊...

坐多一陣,等Emma抖多抖,我地就行返去公司。

沿途上,Emma都捉住我手臂行。

我亦都就住佢,慢慢行...

『不如我送你返屋企休息下啦。』我真係唔忍心仲要Emma返公司。

「我OK架...仲可以返到工...」Emma堅決咁擰一擰頭...

其實,我真係唔係好明Emma堅持D乜...

如果係Ashlynn既話,M痛成咁一定一早就發晒皮四孖叉緊我!

但Emma...

身為一個千金小姐...

返唔返工都得架啦...

大可以而家就話要返屋企休足一個星期...

但點解佢仲可以咁好脾氣?

但點解佢仲要堅持返工呢?

女人心,海底針...

我唔單止唔了解Ashlynn,更唔了解Emma...

返到上公司,Emma仲係面青青咁...

『我幫你斟杯水,你坐坐抖下...』我拎起Emma隻米奇杯,走去水機斟D暖水。

女仔係要俾人照顧,俾人愛惜,俾人錫...

但應該係俾佢愛既人錫...

就正如...「我唔係唔鍾意俾人鍾意...我只係鍾意俾自己鍾意既人鍾意...」

『飲杯水先~睇熱喎~』我插左支飲管落Emma個杯道。

「唔該~但...點解會有支飲管咁得意既?平時熱飲都唔會有飲管架~」Emma面色好似好返DD...

『呢個...係我女朋友既習慣黎既...佢飲熱野都會用飲管...因為用飲管飲無咁熱喎...』仲有乾淨D...

「你...無時無刻都會諗起你女朋友...你好著緊你女朋友呢...」Emma咬住支飲管啜下啜下...

諗起Ashlynn...

『邊係呢~只係拍拖拍得耐左,成日都一齊生活,好多習慣都係大家一同擁有...』其實Ashlynn並唔覺得我掛住佢...

Ashlynn成日都會話我個心唔知去左邊...

明明就一齊行緊街,但就成日心不在焉...

其實...係我一直都喺你背後,你留意唔到我姐...

「都係既...人地話拍拖拍耐左會好似對方...你地拍左六年拖當然會有共同習慣...」Emma塊面終於都有返D血色。

『你又知係六年?』我印象中好似無同Emma講過我同Ashlynn拍左幾耐拖...

「估架咋~你話耐丫嘛~六年對我黎講咪耐囉~」Emma笑笑口。

『咁你都估得幾準架喎~』六年...原來不知不覺已經六年...

「你地感情一定好好架喇...」Emma飲完杯水之後仲咬住咬住支飲管。

『一D都唔好,我地成日鬧交。』六年黎經常吵吵鬧鬧...

「下?點會丫?」Emma一頭問號。

「正確黎講係我成日俾佢鬧...」Ashlynn無時無刻都話我呢樣唔好,嗰樣唔好...

只見Emma一面無奈咁咬住支飲管...

『好喇~你抖下先喇~真係好痛既話記得話我知~』我都係行返埋自己位比較好...

同Ashlynn一齊第二個禮拜開始,已經成日俾佢鬧...

唔係話我唔幫佢做功課,就話我唔幫佢點名...

唔係話我唔幫佢搵資料,就話我搵D資料係廢料...

又話我無主見,又話我唔了解佢...

又成日叫我執正D個人,又話我生得唔夠高要增高...

上至天文,下至地理都屌到我暈...

我已經盡我既能力做到最好最好...

但都仲係俾Ashlynn日屌夜屌...

不過算啦...

我都唔想同佢嘈...

始終女朋友係要黎錫,唔係鬧...

我一直都好錫Ashlynn,盡我所能去錫佢...

可以滿足到佢既,我都會去滿足...

男朋友丫嘛~

做得人男朋友,你就要全心全意去愛錫佢架啦~

唔係既話,要你黎做乜野?