坐返埋位後,我都有留意住Emma...

我真係好怕佢會M痛到暈左都唔知...

只係見Emma靜靜地一個人坐係道,對腳都仲係伸到直一直...

做女仔真係幾辛苦...

每個月都總有幾日痛不欲生...





人地話搞得野多就無咁痛...

我就唔知係唔係真啦~

我只係知身邊既人除左關心佢之外就乜都做唔到...

而Emma仲要無男朋友...

想搵個人咬下、出下氣都唔得...





究竟Emma既意中人係點架呢?

以Emma天使般既女仔,鍾意得既人一定有如天人...

不過就算係天人,見到Emma都應該會心動先係架...

搞咩要Emma等咁耐姐?

一個女仔既青春就好似曇花一樣咁寶貴架嘛!





你要一朵咁美艷嬌麗既鮮花等你等到花兒也謝了?

你於心何忍呀?

真係越諗越把鬼火!

俾我見到係邊條仆街蛋散既話,我一定請佢食兜鎚窩面!

“叮叮 叮叮 叮叮”

公司電話響...

『你好,Good Bob Design。』

「喂~陳生~係我丫~阿基丫~」一把發姣發躉既男人聲...





都知係你架喇...

『喂~阿Gay生~喺邊道呢~』我真係覺得自己有D似鴨...

都無乜分別架喇~

大家都係接客姐~

睇下賣乜咋嘛~

只係做鴨就係賣屎忽~

我就又賣設計又賣屎忽~





「喺你公司樓下囉~有無客丫?方便而家上黎嘛?」阿Gay生講到好似撳鐘仔咁...

『方便方便~約好左阿Gay生你架喇嘛~一定方便架係唔係先~』我夠想話唔方便啦...鬼叫你送個咁大既生意俾我地做咩...

「係咁我而家上黎啦~一陣見~」

希望你困喺架升降機入面...希望你困喺架升降機入面...

*叮噹*...

嗱!

平時又唔見架升降機咁快既!

一唔想你快既時候就快到離罩既!





你話個天係唔係全心玩鳩我?!

你話呀你話呀!

隔住塊玻璃門,望一望阿Gay生...

外表都斯斯文文,不過著衫就著到花呢碌咁...

睇起上黎阿Gay生大約都有四十幾歲...

初初我仲幾驚佢會好似Nel Nel咁既樣~

唔通你真係可以當佢係Cammi咩?





就算係Cammi,陳生都係貪佢嫩口,有學生妹玩咋嘛~

唔通貪佢似Nel Nel咩?

好彩阿Gay生真人比較似鄭敬基多D...

其實我都幾鍾意鄭敬基架~

特別係佢喺烈火雄心裏面釋演司徒拔,佢死嗰幕我真係仲歷歷在目!

“我一出世就注定失敗。我本來叫司徒拔萃既,老豆想我出類拔萃。點知佢唔識寫個萃字,結果變左司徒拔。STUPID...STUPID...”

『喂~你好丫Gay生~請入黎請入黎~』而家呢一刻,我真係好明白D一樓一既心情...

有本教人做雞既書曾經有咁寫過“將注意力盡量放喺個客戶既優點上”...

盡量諗D正面D既野...

鄭敬基好好架喇...好過Nel Nel啦...

鄭敬基好好架喇...好過Nel Nel啦...

「喂~陳生你好丫~唔打搞你丫嘛~」阿Gay生一手就放喺我胸前...

『唔打搞唔打搞~入黎先講~入黎先講~』我輕輕一縮,請阿Gay生入公司...

「你間公司都幾骨子喎~」阿Gay生一手就揸落我個屎忽道...

仆你個街,真係一個死基佬...

『雀仔雖小,但五臟俱全架...』我行快兩步,避開Gay生既性侵...

「呢個妹妹仔係秘書小姐?好年青咋喎~」Gay生指一指住Emma...

「你好丫Gay生~我除左係秘書之外,亦都係陳生既助手。」Emma企左起身,送左個九十度鞠躬俾Gay生...

「有前途~有前途~後生可畏~」Gay生又借D易拍下我胸口...

『請入請入黎~』我急急腳行到去會客室門前,請Gay生入去。

「估唔到你咁心急架姐~」Gay生急急腳行入會客室...

點解我硬係有一種送自己去死既感覺?

『阿Gay生~唔知你想點搞呢?』由於個細小既會客室裏面就係得一張雙人梳化,我迫住要坐到阿Gay生隔離...

「咁你又想點搞姐~」Gay生已經急不及待,貼左個身埋黎...

『就咁既...我地公司呢都有唔少搞呢D既經驗既~你可以睇睇~』我拎起左本Catalog...

Gay生一直貼塊面過黎...

我一路縮...

縮到埋梳化邊...

“咯咯咯”敲門聲...

「Gay生~陳生~咖啡岩唔岩?」Emma拎左兩杯咖啡行左入黎~

Emma~

救我呀Emma~

「岩丫岩丫~放低得架喇~我地繼續~」雖然話Gay生坐返開,但對眼仲係盯住我...

「嗯~咁我出返去先喇~」Emma放低兩杯咖啡後就行返出去...

Emma...

唔好走丫Emma...

「我地傾到邊話?」Gay生等Emma閂埋門之後,又貼個身埋黎...

『你睇睇~嗱~我地有歐陸式既設計啦~又有哥德式既設計喎~想現代D又有前現代式司徒拔與豬乸葉愛情系列...』我一路隊本Catalog去Gay生面前,一路縮後...

「前現代好丫~我都好鍾意現代架~現代夠SEXY丫~」Gay生一路貼埋黎,一路用手摸我胸口...

我屌我屌!

我而家終於明白D女仔俾老闆性侵係咩感受...

又唔想,又唔可以叫救命...

你唔叫救命佢又會越黎越過份...

但你叫咩?

連份工都無埋...

你只可以被迫俾鹹濕老闆非禮...

玩下手見你唔反抗仲會姦埋你...

所以話做女人幾咁慘?

『你睇下先你睇下先...』我已經退到無路可退...

Gay生一隻手猛係我胸口亂摸,另一隻手放到落我大髀道向上掃...

屌你屌你!

我無喇...

我玩撚完喇...

為左份工,為左個客,我可以去到幾盡?

可以連貞節都唔要...

菊花都盛開...

我緊緊閉起雙眼...

咬實個嘴唇...

忍辱負重...

就係呢個時候...

“咯咯咯”敲門聲...

「Gay生~除左陳生介紹嗰D原有既設計外,我地仲可以為客人度身訂製獨特既設計架喎~」Emma一入到黎就立即坐到我同Gay生中間!

Emma~

我既女神~

「唔知Gay生個會場係用黎搞D乜架呢?」Emma完完全全幫我擋住Gay生。

雖然話Emma已經好瘦,但三個人坐兩個人既梳化就真係有D迫...

我個屁股同大髀完完全全緊貼Emma...

喺咁近距離聞Emma既體香...

冷靜!

Emma幫我解圍,我無理由仲要走去佔佢便宜!

我唔敢亂郁,乖乖地坐定定...

「我就開Playgroup公司既~個會場呢就想用黎去介紹下我地公司咁囉~」Gay生對住Emma變得檢點D...

「哦~咁即係目標大多數都係小朋友同佢地既家長啦~我地可以試下Colourful D~或者我地可以利用一下汽球...以七彩繽紛既汽球做主題你認為點?」Emma開始向Gay生俾意見...

Emma呢個女仔真係又聰明,又醒目~

嗱~我唔係多鳩餘丫~聰明同醒目係兩樣唔同既野黎架~

聰明,可以話係識得多野,轉數快~

醒目,就係識睇時機,識執生~

你知唔知楊修係點死?

就係自作聰明而死~

聰明反被聰明誤~

你有聰明,但唔識睇時機,唔識執生,好易俾你既聰明累死~

職場上大把呢D人~

有邊個打工既唔知老細係戇鳩?

你又會唔會聰明到走去同老細講:「你咁樣唔撚得架~聽我講啦~你應該咁樣咁樣~咁咪無咁柒囉~」

係醒目既就梗係話:「老闆~你既諗法真係有見地~如果加埋咁咁咁係唔係更加完美呢~」

做人其實同做狗就真係無乜分別~

識得扮晒狗衝去吠鳩人之餘,又要扮俾主人拉得住~

俾飯你食仲要笑笑口,俾俾手~

咁先長食長有架嘛~

雖然話唔想佔Emma便宜,但呢種肌膚之親又真係好難抗拒...

Emma對大髀真係好白...

條腰又幼...

我敢肯定好砌過Ashlynn~

男人就係咁架喇~

CCTBB有套戲係咁講:「男人就好似貓一樣,口咬一條魚,眼望一條魚,手撳一條魚,心諗咪又另一條魚~」

我立即聯想到一隻喺河邊既貓...都幾可愛丫~

就算我已經咬住左Ashlynn,我隻手都好想摸下Emma大髀...

假如Emma真係唔介意俾我摸一摸既話...

摸一摸姐~

都唔算得上係背住Ashlynn偷食既~

但換轉係Ashlynn肯俾其他男人摸呢?

屌你咁同背住我出去偷食又有乜分別?!

所以話,人又點可能唔係雙重標準丫~

再有邊個高官敢同你講唔係雙重標準既話,屌柒佢啦!

Emma一直幫我同Gay生洽談,我就只需要坐喺道聽~

Gay生對Emma既建議都好接納~

Emma真係好厲害~

有Emma既幫手真係輕鬆好多~

起初我仲以為Emma只係一個花瓶,只係用黎插。

但一個星期都唔夠,佢已經幫我處理晒D討厭工作~

如果一直都可以有Emma喺道幫手就好喇~

至少我唔使孤零零一個...

「OKOK...就照你既意思做啦...聽日...聽日記得黎睇睇...嘩...唔得!個肚好痛...邊道有廁所?」Gay生撳住個肚,年初四咁既樣...

『呢道出去直行轉左行出去就係...不如等我帶你去。』我企一企起身...

「得架喇...我自己去得架喇...就咁啦...聽日黎睇睇個場...唔使送喇...」Gay生一路撳住個屎忽衝出公司門。

真係好~

接到單大生意~

咁快又送走埋個Gay佬~

『Emma~你真係好叻女~』當我拎起杯咖啡想飲落口之時...

「唔好飲!我兩杯都落晒藥架!」Emma立即拎走我手上杯咖啡...

『落咩藥丫?』我一面驚訝...

「瀉藥~為左萬無一失,我兩杯都落晒架喇~」Emma舉起V字手勢...

『瀉藥?!你點會有瀉藥架?』我仲係O晒嘴咁望住Emma...

「為左保護自己,免受傷害,我都會帶一D低殺傷力武器喺身架~」Emma對眼碌向上,望一望天花...

瀉藥都算係低殺傷力武器?!

係既…

相比起你呢種具毀滅性武器黎講,瀉藥梗係低殺傷力武器啦~

『咁萬一我飲左...你咪殺錯良民囉...』

「你平時都唔飲咖啡既~」Emma講完之後,拎左兩杯有毒既咖啡杯出去...

話就話我平時唔飲咖啡姐...

唔難保我突然口乾想飲D野架嘛...

話時話,平日又唔覺Emma既保護意識咁高...

點都估唔到佢會帶瀉藥喺身...

究竟Emma係一隻小綿羊,定係一隻刺蝟?

就咁睇真係睇唔出...

係唔係真係要俾佢吉一吉先知痛?

我唔想...

我硬係覺得俾呢種小綿羊無聲無色咁吉一吉會痛不欲生...

「咁聽日三點去睇場喇~」當我走出會客室之時,Emma提一提我。

『OK~我到時會去架喇~』我立即Mark落我個Schedule...

「我都會同你一齊去~」Emma好專注咁望住我...

『但聽日係星期六,你返半日咋喎...』我無記錯Emma係返五日半架嘛...

「你夠係返半日咯~」Emma指一指我。

『打工仔不嬲都係有返工時間,無放工時間架啦~』有邊個打工仔唔使OT?

放左工仲要俾老細Remote...

喺香港就係咁架喇,一個急速既社會裏面根本唔存在私人空間...

「咁我都係打工仔丫~」Emma指一指住自己。

『你...』你點同丫...

帶住千金之軀...

做野又高效率又高質素...

根本就唔使好似我咁開OT...

「你唔好唔記得,係我同Gay生傾好架~有好多野都應該由我跟~你先係我副手~」Emma對我莞爾一笑...

點解突然好似感覺到背後一涼...

點解會突然覺得Emma好似咁陰險咁架呢...

「呀...」Emma撳住左個肚,趴一趴落張檯...

『又痛?』我立即行到Emma身邊...

「就漏就漏...」Emma手震震咁拎起個手袋仔...

『使唔使我扶去你丫?』我扶一扶起Emma...

「我OK丫...放心...」Emma擰一擰頭,八字腳咁行出公司...

幫Emma拎起隻杯,再次幫佢斟D暖水...

點解我要咁關心Emma呢...

我覺得我既關心有DD超越左朋友...

話晒M Come都係一D幾私人既野...

幾尷尬既野...

就好似打丁咁,男仔唔會隨隨便便同個女仔講我岩岩打完丁出黎...

女仔亦都一樣唔會隨隨便便同個男仔講佢M Come...

要講都只會講俾男朋友聽...

而照顧M Come期間既女仔亦都係男朋友既責任...

點計都唔會係我呢種身份去照顧囉...

但唔係我照顧,又有邊個去照顧Emma呢?

係囉...

只係知Emma無拍過拖,但佢D交際情況又係點架呢?

Emma份人咁好,應該有好多朋友先係架~

狗公更加不計其數...

但好似無乜聽過Emma講過佢朋友D野?

咁又係既...又點會無啦啦同我講佢朋友D野...

更加無理由同我講有幾多狗公喺佢身邊圍住黎轉...

拎杯暖水到Emma檯...

Emma仲未返黎...

會唔會暈左喺廁所架...

我都係去搵搵Emma比較好...