《港男FF妄誌》: [Day 7－圖騰禁忌] PART 8
「要買既野都買整晒喇～可以返屋企LUU～」連配菜都買好晒之後，我幫Emma拎住D餸就出發去Emma屋企。
究竟Emma住邊架呢？
仲使問？一定係豪宅啦...
坐住Emma架LP 700-4 ROADSTER一路望...
望下Emma揸緊去邊...
呢個方向...
司徒拔道…黃泥涌峽道...
淺水灣？！
睇黎Emma應該係住淺水灣啦～
住得淺水灣...唔通係The Lily？！
係都唔出奇丫～
對Emma黎講，The Lily既租金同散紙無分別...
“吼”LP 700-4 ROADSTER沿住淺水灣道一直行。
無錯～我無估錯～的確係淺水灣～
但係...
點解會駛過左The Lily架呢？！
Emma唔係住The Lily架咩？！
LP 700-4 ROADSTER繼續行，行到去一D獨立式別墅...
獨立式別墅？！
一提到別墅，我又諗到D衰野...
講開別墅我又真係唔係幾明，點解D時鐘酒店會叫做別墅？
你幾時可以百幾蚊租個獨立式別墅對住個海推車？
我就真係搵唔到喇～
而家D時鐘酒店全部都喺唐樓上面，就連九龍塘都無晒啦～
真係想租間好D既同D囡囡開心下都唔得...
搞到D囡囡下下都話要去五星級酒店先有交易...
我都係返屋企上高登搵丁圖射落牆好過～
LP 700-4 ROADSTER開始減速，停到一座獨立式別墅既黑色大閘前...
Emma喺個鎖匙包撳左一撳...
“咔”黑色大閘隨即打開...
Emma將LP 700-4 ROADSTER泊好，我亦幫佢蓋好車套後，回身望一望間白色別墅...
嘩…真係好有氣派...
白色為主既三層式別墅，有好多落地玻璃窗...
所有玻璃窗都要對正個大海...
無敵大海景…
而家喺香港，你有無諗過自己可以住到一個望到海既家？
唔係望住對面個肥師奶煮飯都好好架喇...
而家D地產商仲發明左咩樓景、路景呢D新名詞～
咁都仲要賣成千萬～
真係智障先會聽佢地點～
究竟Emma呢間別墅要幾多錢先可以擁有？
我真係唔敢想像...
幫Emma拎住D餸入屋...
入到屋裏，裏面一樣震撼...
以銀白色為主色調，配上玻璃同楓木家具襯托...
呢個設計咁熟口面既？
呀～Apple Store～
睇黎Emma係一個真真正正既果粉～
「D餸放喺道得架喇～」Emma行左入開放式廚房。
開放式廚房令到整間已經好鬼大既屋更有空間感。
『你屋企就係得你一個人住架咋？』我將D餸放喺黑色大理石檯上。
「嗯～平時返工時間會有工人黎做下維修丫～打掃丫～清潔丫咁～但到我返黎之前，佢地就會走～」Emma整理一下D餸。
『無人睇住？你唔怕俾人偷野架咩？』我望一望四周，雖然話D擺設唔多，但應該都唔係平野...
「唔怕～邊怕得咁多架～要對人有信心先得架嘛～」Emma向我打左個眼色。
對人有信心？
會唔會太有信心丫？
點解我成有都會有一種Emma好似小綿羊既感覺...
但同時我又可以肯肯定Emma係一個好識保護自己，又好識照顧他人既聰明女...
你真係搞到我好亂丫～～～
「你坐下等我一陣～我上去換件衫先～」Emma整理好D餸，洗個手，行上玻璃製既旋轉樓梯。
我一路望住個玻璃製既旋轉樓梯，一路望住Emma對修長美腿，一路望上大髀，望上黑色既裙底...望到入白色底底...
好靚…真係好靚…
Emma對腳真係好吸引，每一步都勾走我靈魂。
Emma企左喺道….企左喺梯上面…
我望一望上去，望到Emma帶住微笑望住我...
「你真係好鍾意望我對腳架喎～」Emma用手掃一掃自己條短裙...
短裙擺一擺，白色底底若隱若現...
仆街！
又俾Emma發現左我𥄫佢添！
『我望緊你條樓梯丫～你呢條樓梯十足十IFC間Apple Store條樓梯～』我唔係完全講大話，我真係留意條樓梯先到Emma對腳...
「咁你慢慢望喇～不過唔準上黎偷睇架～上面無門架～」Emma向我打左個眼色之後，彈下彈下彈左上樓...
Emma對腳真係好靚...
而且仲唔介意俾我𥄫...
Emma…你真係唔好對我咁好啦...
我怕真係會忍唔住衝上黎姦左你架...
無門…
無門真係一上去就睇到Emma換衫架喇喎...
可以睇Emma換衫喎...
你係唔係對我有表示？
表示可以上黎欣賞你換衫...
屌！鹹濕小陣得唔得架姐？
我望下個廳，行下，參觀下。
呢道真係好大。
就係個廳止唔止六百呎？
我諗就真係唔止...
客廳連飯廳，加埋個開放式廚房分分鐘有一千呎！
真係好誇張～
一個人點樣可以住到咁大間屋？
呢道俾我一家四口一齊住都會覺得大得制。
不過又唔可以咁比既～
我地呢D窮撚係唔會明白有錢人既生活...
電視要最大最靚～
睇戲要用投影機～
音響要用膽機～
一條音響線分分鐘都要過萬蚊～
呢D享受我地一世...幾世都唔使旨意享受得到...
成日都話要努力D努力D～
你覺得你要幾努力先可以享受到呢D生活？
努力打份牛工就一定無可能～
努力做基金佬、倫敦金、地產仔就或者有可能～
但係咁樣賺錢，你真係覺得叫做有努力過咩？
努力呃人錢丫？
擺設真係唔算多～
再望一望，有一D水晶擺設，有一D銀器擺設～
好簡約既設計，好配合Emma既風格～
亦都好合我心意～
行近塊落地大玻璃窗...
一打開，出面唔係一大片草地花園...
面前竟然係一個長方形游泳池...
喺呢個角度，呢個高度，就好似連接住外面既大西洋咁(係唔係大西洋？無讀過地理唔知～)...
喺道游水真係好似喺個海道游緊咁～
呢個景象我只係喺女皇的盛宴中，汪阿姐去左田氏豪宅先見得到...
估唔到，我今日都有機會親身感受得到...
太過誇張...
太過唔實在...
又一次覺得好唔實在...
肉榮曾經講過，去到呢D吸盡香港靈氣既豪宅一定要撳返條六合彩～分分鐘頭獎都有得你中～
但我呢一刻，就真係無咁既心情...
我好困惑...
我好迷惘...
我硬係覺得這些機會不是屬於我的...
唔好話沾下光，就連企喺道既資格都無...
日落西斜，景色醉人...
究竟一生人要花幾多運氣先可以企得喺道，望下風景呢？
在有生的瞬間能遇到你，竟花光所有運氣...
“踏...踏...踏...踏...踏...”背後傳黎落樓梯聲...
我回身一望，望到Emma已經換好衫，由玻璃樓梯行緊落黎。
Emma扎左條高馬尾，著住一件白色Oversize Tee，好似無著褲咁露出一對修長美腿，仲要無著鞋赤住腳咁行過黎...
「做咩眼甘甘咁望住我～」Emma帶住微笑望住我。
『無…無見過你呢個Look丫嘛…』Emma真係好吸引...
「好怪丫？」Emma轉左轉身，件白色OversizeTee飄一飄起，裏面原來著左條黑色短褲仔...
Emma每一個動作，一舉手，一投足，都足以勾走男人既心。
『唔係唔係～好清新既感覺...』真係好清新脫俗...
「係屋企丫嘛～緊係要自然D啦～你都放鬆D啦～」Emma一邊講，一邊幫我除件西裝褸...
除完件西裝褸之後仲要幫我除埋條領帶，解開埋粒頸鈕...
「當自己屋企得架喇～」Emma轉一轉身，將我D衣物放喺白色梳化上...
當自己屋企？
你叫我點樣可以將一間豪宅，當成自己住緊嗰間狗竇？
「呀～差D唔記得～要落去藏酒室開定支紅酒抖氣～」Emma行落樓梯...
『飲酒？』仲要有藏酒室添？
「當然啦～」Emma由地下室叫上黎。
唔知點解，一講到飲酒就覺得好危險...
講到地下藏酒室，呢種設計立即令我諗起唐唐同689...
識得享受生活既人屋企一定有地下藏酒室...
唉～有錢有名有利有權真係好...
你試下俾我有錢～我整個地下王宮出黎都似～
有咩所謂～俾得起錢想點整都得架啦～
唔合法咪搞到合法為止囉～
我又真係唔明點解俾多少少錢去搞好佢都唔肯！
有錢人有錢到咁係唔係都仲要咁鍾意計婆仔數？
算啦～我一世都唔會明佢地D人諗乜～
如果我明，我做左特首啦～
「搞掂～」Emma由地下藏酒室彈下彈下彈返上黎之後，向住開放式廚房行過去...
Emma開著個水龍頭，準備洗野。
『我有乜可以幫到你？』我摺起衫袖，行到Emma身邊。
都係嗰句，為免食物中毒收場，都係幫下Emma手好D...
「嗯...咁你幫我洗下D配菜先啦～」Emma轉身指一指大理石檯上既配菜。
『OK～』洗菜我最拿手丫～
同Emma一齊係個廚房道玩煮飯仔...
「喺嗰道喺嗰道～」
『哦哦...』
「雪櫃有雪櫃有～」
『哦哦...』
「上面上面～」
『哦哦...』
「下面下面～」
『哦哦...』
「哈哈～你成面都係啦～」
『哈～你都係啦～花面貓～』
「嘩嘩～D水～D水～我濕晒啦～」
『哈哈～小心D～小心D～喂～喂～喂～咁奸既你～』
「嘻嘻嘻～要濕一齊濕～」
『係唔係想再濕D？』
「唔好～唔好～嘩～好衰架你～飛揚～哈哈～」
『哈哈～』
「印落你道～印落你道～哈哈～唔准避～」
『喂喂～我投降～我投降～我投降啦～』
感覺真係好溫馨～
『係呢～你平日都係一個人煮飯食架？』我幫Emma穿起圍裙...
「嗯～可以再緊D...可以再緊D...」Emma背住我郁下郁下個身...
『哦哦…』Emma條腰真係好幼...
綁到咁緊都仲有空位...
不過上圍又好豐滿...
俾條圍裙箍到成個胸口挺起晒...
真係完美極致既Body...
「以前大學生活都係咁～自己煮，自己食～有時同D朋友一齊煮～幾開心架～」Emma開始落手煎牛扒。
『仲有朋友一齊煮添？咁咪好熱鬧囉？』我就唔得啦...
間屋咁細，就連自己煮個公仔麵都難...
有時阿Wing走埋入黎真係迫到核爆...
迫D係親密D既～不過就危險D啦～
「都真係幾熱鬧架～我地個個星期都好似開Party咁～不過返到黎香港之後就無試過LUU～」Emma好專心咁煎牛扒。
『點解返到黎香港之後就無既？』我都好專心咁望住Emma煎牛扒。
估唔到Emma真係有板有眼～
好似一個大廚咁～
万刀甲話Dry：「美女廚房，食左先講！」
如果有得食，我真係想連埋Emma都食落肚～
企喺扎住條高馬尾既Emma身後，望一望佢條粉頸，望一望佢耳背，任何位置都係咁精緻。
上神創造Emma既時候，會唔會過份細心丫？
「因為我喺香港無乜朋友～」Emma反一反塊牛扒。
『下？你會無朋友？』我唔係好信囉～
一個咁善解人意既女仔點會無朋友？
唔好計狗公有如天上既繁星，銀河沙數。
閨密總有幾個掛？
「喺日本D朋友就繼續係日本生活，日本發展。有D就情願去澳洲～去芬蘭～就算係生於香港既都話唔想返黎香港...」Emma擰擰頭...
呢層我明...
香港根本就唔係俾人生活。
香港只有生存。
有錢既人喺香港都唔係生活，只係為左盲目咁搵更多既錢。
如果有錢，可以去其他地方生活～
外面有好多地方都好過香港～
俾著我有錢，我都想逃離香港...
『咁你呢？點解唔留返喺日本...或者其他地方？』日本就唔係話真係咁好...
但如果話去芬蘭，都真係幾吸引～
晚晚去捕北極光都唔錯丫～
「唔～」Emma擰擰頭，「我隻米奇係香港～所以我要返黎搵佢～」
米奇？
哈～
呢個千金小姐睇黎真係講真...
Emma愛上左隻米奇～
『咁仲唔快D捉返佢返黎？』我以帶恥笑既笑聲笑Emma～
「你無聽過咩？要捉住男人個心，先要捉住男人個胃～」Emma望住塊牛扒點點頭。
嘩～咁有深度？
我不得不承認有時真係會俾Emma嚇一跳～
我終於能夠進入你的身體，我犧牲也要跟你融為一體，我那麼愛你要和你的胃同歸於盡...
『咁你而家都成個大廚咁既樣啦～仲等咩丫～』我而家除左聞到Emma身上既少女香之外，我亦聞到好香既牛扒味～
聞到我個胃都係到叫囂～
「咁就要等你試完再話我知啦～」Emma向我打左個眼色...
有幸可以食到Emma親手煮既野食其實真係好幸福～
一個入得廚房，出得廳堂既少女，試問又有邊個男人可以抗拒？
你隻死米奇仲唔快D死出黎？
聞到咁香既野食都仲唔識出黎咬返啖～
你係唔係老鼠黎架？
Emma將牛扒同配菜都上晒碟，擺好位之後：「搞掂～飛揚～幫我落去藏酒室拎支紅酒同兩個酒杯上黎丫唔該～」
『OK～』我送個OK手勢俾Emma。
「放左喺檯上面架～」Emma繼續提醒我。
落到去藏酒室，真係一個典型既藏酒室...
全木製既藏酒室…
裏面既櫃、檯、凳、擺設全部都係木製...
柔和既燈光，好有氣派...
櫃裏面放左好多酒～
Emma好鍾意飲酒架咩？
我又睇唔出Emma有幾鍾意飲酒...
不過唔鍾意飲都可以放架姐～
俾我都會啦～
以備不時之需嘛～
萬一突然有朋友話想黎飲下酒，傾下計，都唔會待慢客人～
我望一望張木檯，有兩隻紅酒杯，另外有一個載左紅酒既醒酒器...
喺呢D喇～
我拎起兩隻酒杯之時...
呢隻酒杯...之唔係...Zwiesel 1872既ENOTECA系列？！
唔係咁誇張呀化...
一隻呢D酒杯都要成千蚊...
飲酒姐...唔使咁專業丫化...
真係唔講得笑...
我係唔係要小心D拎？
我小心翼翼咁單手夾住兩隻水晶紅酒杯，再小心翼翼拎起埋支紅酒...
我真係覺得自己好Man～
我一路沿住樓梯行返上去...
我一路行，我發現上面黑漆漆咁既？
當我行到上去，我望到Emma正喺道點著以威士忌杯做蠟燭台既白色蠟燭。
點好兩杯蠟燭之後，Emma好細心咁放置喺餐桌上。
望住Emma好滿意既樣，真係有一份窩心既感覺由深心裏面直沖上腦。
之不過...
『會唔會太過有情調丫？』我放好酒杯同紅酒。
「咁先夠完美架嘛～唔係既話就會浪費左我地既一番心血～」Emma拍一拍手對住我笑一笑。
『嗯～咁我地真係要好好享受～』斟好兩杯紅酒...
「Cheers～」敲一敲杯，我地開始共進晚餐。
Emma既廚藝真係好了得～
了得到想像唔到～
五成熟既牛排，岩岩好～
D汁又唔會搶左牛肉既鮮味～
再加上八二年Lafite...我估係啦～真係絕配～
當然唔少得主菜...Emma～
Emma係主菜就理所當然～
望住美麗動人嬌俏可人既Emma用餐，真係獸色可餐...
屌！我喺道講緊D乜？
雖然話獸色可餐唔係貶義詞，但對住Emma又獸色又可餐咁都唔係咁好...
食野期間，我地都好少對話，多數都係眼神交流多。
但就係眼神交流先夠入心入肺...
由柔和既蠟燭光之間，望住Emma一雙大眼睛，帶住一絲一絲甜絲絲既笑意...
你看著我，我看著你，總有一種千言萬語盡在深心處既感覺。
我會將呢種感覺形容為錯覺...
單靠眼神既交流實在太虛幻...
呢種虛幻會令你帶來無限既幻想...
你唔知對方既心意，你只會以自己既心意去猜度對方既心意...
古人一早就有呢方面既智慧。
知魚之樂丫嘛～
你開心，所以就覺得條魚開心～
你鍾意人，所以咪會誤以為人地都鍾意你～
食完一餐幸福甜蜜溫馨既蠟燭晚餐之後，我同Emma拎住杯紅酒，坐喺泳池邊曬月光。
我同Emma都伸左對腳落水裏面。
Emma對腳仲要踢下踢下，泛起了陣陣漣漪。
『真係好舒服呢...』我飲一啖紅酒，放鬆一下個人。
「嗯？」Emma望一望我。
『呢種環境...』呢種無幾多個可以擁有既環境...
「嗯～咁都要有人陪先得既～」Emma對腳繼續踢下踢下。
我既視線不時都被Emma對腳吸走...
Emma對腳真係好靚，喺水波裏就更動人...
「平時得我一個既時候，好悶架...」Emma既笑面裏帶著點點哀愁...
都係既…
一個人住咁大間豪宅，自己同自己傾計，自己同自己食飯，自己同自己踢水，真係會有D悶...
『你都係快D捉你隻米奇返黎陪你啦～』我再飲一啖紅酒...
Emma情深深咁望住我...望左我好一陣子：「你有無聽過...一個故事...」
一時之間我回唔過神來：『故事？』
「是咁的...從前，有一位士兵，愛上左美麗既公主。國王知道之後，對嗰位士兵講：「如果你喺城牆下企足一百日，我就讓公主嫁俾你啦！」由嗰日起，唔理係烈日當空，定係風雨交加，士兵一直堅持企喺城牆下，全城都被佢既行動所感動。到左第九十八日既晚上，當全城都為士兵快要完成任務而雀躍既時候，佢竟然流下淚來，愈喊愈傷心，直至喊到第九十九日，就喺呢一日，佢默默地轉身離開左城牆，從此，再無人見過士兵既出現...到底，點解佢要走？我問過好多人，每個人既答案都唔同，你既答案又係點既呢？」Emma依然情深深咁望住我...
呢個故事...
呢個關於城牆下的士兵既故事我有聽過...
喺七年前我仲貼過上Xanga...
而嗰時我見到既答案係...
『士兵喺城牆下企左九十八日，佢每日都看得見公主喺道眺望著遠方，隨住士兵百日之期漸近，佢既神情亦越黎越憂傷。最後，士兵不得不承認，雖然佢好愛公主，但公主愛既係另有其人。就喺第九十九天，士兵為左讓公主繼續等待佢所愛既人，佢決定離開嗰個國家，佢放棄左一己之私，放棄左自己付出過既努力，決心成就公主，為既係佢明白就算俾佢得到公主，公主亦都唔會幸福。』呢個就係公主既答覆...
七年前...公主對士兵既答覆...
有誰會比士兵更了解公主...
「又有誰會比公主更了解士兵...」Emma挨左落我膊頭道...
究竟喺呢七年裏面，士兵去左邊呢？
又做緊咩呢？
重要咩？
士兵，你始終都係一隻兵。
就算你犧牲幾多，就算你再偉大，你都唔會成為到喺呢個故事裏面既真正男主角－白馬王子...
或者喺呢七年裏面，你只可以帶住一顆思念既心游離浪盪...
Emma挨住我，對腳就繼續喺水裏面踢下踢下...
『好靚呢...』
「嗯？」
『喺道睇星空真係好靚呢...』今晚個天好清，可以好清楚咁睇到滿天星。
「嘿嘿...我有更好既位置睇星～」Emma貼近我，望住我...
『下？』
「跟我黎～」
我同Emma抹乾對腳之後，Emma就拉住我上樓梯。
我喺Emma身後，望住佢對腳喺樓梯上彈下彈下...再望上D...個屁股擺下擺下...
好有動感...
沿住樓梯上到一樓，再上到...二樓...
二樓係...係Emma既閨房…
白色為主既睡房簡潔明瞭。
好合襯Emma，我亦都好鍾意～
白色既牆身、白色既地毯、白色既梳妝檯、白色既木製天花、白色既雙人床...
『雙人床？』我望住張雙人床，有D疑惑...
Emma一個人，做咩要瞓咁大張床？
「嗯～舒服丫嘛～而且仲可以...黎～過黎～」Emma坐左喺床邊，拍一拍張床，向我示意坐到佢身邊...
我猶猶豫豫行到去Emma床邊...
上次就係因為上左Ashlynn張床，我就係咁俾Ashlynn食左落肚...
今次上Emma張床，會唔會又重複犯錯...
Emma伸出雙手，溫柔咁拉一拉我...
當我坐左落Emma張床之時，Emma情深深咁望住我...輕輕推一推我...推左我落床...
想點...
Emma你想點...
我好緊張...
我個心噗通噗通，噗通噗通聲咁跳...
就快大聲到成間房都聽到...
我諗返起上次俾Ashlynn飛禽大咬...
唔得架...
唔可以咁快就...
我仲未Ready好丫！
「Hi Siri，打開天窗。」Emma瞓平個人，望左上天花...
我跟住Emma既視線望上天花...
“吱 咯 咯 咯 咯 咯”白色木製天花隨即打開...
智能家居？
“咯 咯 卡”好快，整個天花就打開晒...
同Emma瞓喺張白色大床上面，望住整個夜空星際...
好壯觀...好壯麗...
我一直以為呢種情境只會喺電視或者係大銀幕出現...
估唔到...
可以親身體驗一次...
「如果落雨既話，仲可以閂返埋塊玻璃～隔住塊玻璃睇住D雨灑落黎～都好靚架～」Emma同我一齊望住個星空。
『真係好靚呢～望住一粒又一粒星星，佢地分隔左好幾億...甚至更遠既光年，但就喺你眼前編織出一副美麗既圖畫...神之手作～』我欣賞住眼前偉大既藝術品...
無邊無際既星空，好似點睇都睇唔晒～
『處女座丫～呢道可以睇到處女座～』仲要好清楚～
漫天星宿...一顆一顆…一閃一閃...
「係丫係丫～仲有水瓶座丫～」Emma指一指上天空畫一畫，圈一圈。
好壯觀...好壯麗...真係好神奇！
可以咁樣瞓道欣賞星空，一生人真係未必可以有一次...
『我好鍾意睇星空～星空真係上帝為世人創造最美麗既油畫。』而Emma就係上帝為世人所創造最完美無瑕既藝術品...
「我都好鍾意睇星空，特別係同深愛既人一齊...」Emma既聲線傳入我耳內...
『嗯？』我望一望瞓喺身邊既Emma...
Emma面紅紅...情深深咁望住我...
Emma對眼好大，無化上任何妝粉既佢對眼都係咁大...
精緻既可愛面蛋好細緻，完全睇唔到毛孔...
滑溜溜既皮膚反射出月亮散落既光芒，有層薄薄既光芒鋪喺面上，好似識發光一樣...
Emma既小嘴好有光澤，好柔潤...
Emma一呼一吸...就好似將我既靈魂拉出拉入咁...
Emma既口中仲有少少酒氣，總有一種迷魂既感覺...
Emma真係好吸引...
Emma…Emma…
Emma慢慢打側個身，我地兩個既距離越黎越接近...
我隻手都開始不期然伸向Emma條腰道...
我輕輕掃一掃，Emma條小蠻腰真係好幼...
而豐滿既乳房已經側埋左一邊，仲要俾Emma對手臂夾一夾，顯得更加豐滿...
我真係...好想...好想可以掃上去，摸一摸...
Emma對大眼仔半開半合...塊面越黎越紅...
我...隻手...我個嘴...我...
我控制…唔到...
『Em…』
就喺呢個千鈞一發之際，我大髀震左一下...
“叮”Whatsapp？！
面臨崩潰既意智突然返晒黎...
點撚解次撚次總要喺呢D咁關鍵既時刻唔撚熄鳩左個電話先丫？！
『Sor…Sorry…』我起一起身，拎部電話出黎望一望...『Ashlynn？！』
*噹* “女皇：聽日一點葵芳等”
Ashlynn返左黎...仲要約我聽日出黎...
點解佢好似咩事都無咁既？
唔通尋晚真係我睇錯？
“OK～^3<”
「你女朋友...返左黎？」仲瞓喺張床道既Emma望住我...
『嗯...我...我諗我要返去喇...應承左細妹要早D返...』我都係快快手手離開張床...
「嗯...咁...我車你返去...」Emma亦都跟住我起身...
『唔使喇！你...飲完酒揸車好危險...我搭的士得架喇...』唔好再勞煩Emma...
「嗯...」Emma點一點頭...
飲醉酒都總有醉醒既時候...
醉醒左又要面對現實...
「拜拜喇飛揚～星期一見喇～」Emma送到我出門口，依依不捨咁揮揮手...
『嗯～星期一見～』我亦都係時候上的士離開...
夜空明月下，兩旁樹影間，的士沿住小路，離開身後既城堡...
呢道既一切都唔係屬於我...
所有野都唔係真實，只係幻覺...
酒精驅使下，令我產生出無限既幻想...
甚至係妄想...
我妄想Emma對我有好感...
我妄想可以佔有Emma...
Emma…
我要盡快清醒...
我要盡快適應返我原有既生活...
有Ashlynn喺我身邊既生活...
TO BE CONTINUED