買完兩隻加埋成幾百萬既手錶,Emma翹住我步出Vacheron Constantin。

望住Emma Fing下Fing下手上嗰兩盒手錶...

就好似有兩層樓喺空中Fing下Fing咁...

兩層樓...

我地要窮一生努力都未必可以擁有既兩層樓...





你真係點可以聯上到有錢人既消費模式...

『Emma…使唔使放返兩隻錶落架車道先?』我而家真係好撚驚會俾人當豬咁劏...

「唔使啦~放心喎~呢兩盒野咁輕,唔會阻到我既工作架喎~」Emma舉起兩層樓,喺我面前Fing下Fing下...

輕?!

兩層樓喎...





『我唔係咁既意思...我唔係咁既意思...』我撳返低Emma隻手...

「你係驚會俾人搶?哈哈~香港係法治之區~邊會有人日光日白無法無天丫~」Emma好天真咁笑...

法治之區?!

而家既香港仲講得上係法治之區咩?

你梗係無聽講光明磊落的暗角喇...





唔好話D MK仔,而家就連警察都無法無天啦~

仲講咩法律?

法律就係用黎保障有錢人架姐~

而家既香港明明就係人治~

有錢有權有勢既人治理香港!

有錢人...

係喎…

Emma咪係有人錢囉~





仲要係超級有錢嗰隻~

唔怪之得佢會咁相信法律啦...

「我地係時候要去Gay生個場道架喇~要行快兩步喇~」Emma拉一拉我...

『哦哦哦...』呢期真係多左好多社會不公既新聞,搞到我呢D政治零感既人都留意多左…

行過幾條馬路...

穿過一隻二隻蝗...

好快就上左去Gay生個會場。





「喂~陳生~早左喎~」一上到去,Gay生就由一個西裝友身邊,急急腳咁走埋黎我身邊...

『準時D…準時D好…』最好就係快D睇完個場快D走添...

Gay生一手揸落我個屎忽道:「我同呢道既負責人傾好晒架喇~你鍾意點搞都得架~」

我成個人嚇到彈左一彈!

媽~我俾人非禮呀...

點搞都好啦...總之就唔好搞我啦好唔好...

Emma有見及此,立即攝喺我同Gay生中間:「放心啦Gay生~我地一定會幫你搞得好好睇睇~」

好彩有Emma...





唔係既話我怕真係會變成Gay生既大餐...

基故喎...重口味黎架喎...唔係我Style囉...

「今次呢個Function呢,主要對像係D五歲以下既小朋友同佢地既家長~我都Send過有關既資料俾你地架喇~有無睇過丫?」Gay生一邊帶住我地行,一邊講。

「當然有啦~我地已經仔細咁睇過晒每一個細節...」Emma開始同Gay生交流~

Emma相當用心聽Gay生既要求,又相當詳細咁向Gay生講解~

每一個細節,每一個重點,都交代得詳詳細細,永無甩漏~

Gay生都聽到點晒頭,好滿意~





有Emma喺身邊真係好~

無晒煩惱~

老老實實有咩好得過有一個女仔可以同你解決難題?

兩個~

貪婪喔~七罪宗~

我成日都話人係唔可以咁貪心既~

有一個好似Emma咁完美既女仔喺身邊就心滿意足喇~

唔可以咁貪得無厭~

可惜既係,我地之間實在有太大距離...

一條銀河咁闊既距離...

「有你地咁用心既服務,我就放心~我有D事要做要走先~你地慢慢睇~阿周生~佢地就交俾你喇~」Gay生將我地交左俾負責人之後,揮揮手就轉身走。

走得咁急,去搵菊花插丫?

「李小姐。」周生行埋我地身邊,點點頭...

頭先都無介紹過,又識得叫李小姐既?!

「你可以去休息下先~等我地睇完之後,我再Call你~」Emma同周生微笑點點頭。

「知道喇李小姐。有乜吩咐可以隨時Call我。」周生向Emma點點頭後行左出去...

『Emma…嗰個周生你又識架?』我好自然咁加左個又字...

「嗯~呢座大廈係我Daddy架嘛~所以佢認得我都唔出奇~」Emma喺個場道行黎行去...

呢座大廈係Emma既老豆架咩?

呢座大廈唔係長實架咩?

我記得李+x好似無女架喎...

就算有都無Emma咁後生啦...

唔通係孫女?!

孫女都無咁大個啦...

係唔係我搞錯左D乜?

無錯喇...呢座野唔係長實既...

但係邊個架呢?

又係屬於邊個仆街有錢佬呢?

老老實實呢座野係邊個都唔緊要,最緊要係呢座野係Emma既老豆既...

咁就已經夠晒誇張啦!

睇黎Emma老豆係一個發展商...

嘩…發展商丫...

試問而家係香港,有邊個惡得過發展商?

發展商要加租,你就要買貴野,食貴野...

發展商定九萬蚊一尺,就連廁所都無得你瞓...

發展商要你食屎,你一世就連樹皮都無機會食!

所以話呢...

唔怪之得Emma咁有面啦...

「飛揚~我覺得呢道可以放一個大型展板~依呢道呢就可以放D七彩繽紛既氣球喎~」Emma喺個場上面指下呢道,畫下嗰道~

『嗯~好提議~』Emma真係好有諗頭~又好合我心意~

「呢道仲可以Set個台~因為Gay生話會有講座既~咁呢道呢最好就係Set D可以移動既小型展板~咁咪可以方便轉場囉~」Emma繼續指下畫下~

『嗯~無問題~』我都係咁諗~

「而呢邊呢...可以放D Counter~」Emma行到牆邊...

『嗯~的確係一個好選擇~』完全符合設計原則~

「喂喂~如果有D乜唔岩,你可以Ban我架喎~唔使就住我架~」Emma叉一叉腰,咬一咬唇望住我。

『唔係丫~真係好好~你既提議我都好認同~』我唔係就住Emma,而係佢既提議真係無懈可擊~

老實講,我未諗到之前,Emma已經構思好晒~

而且Emma既諗頭俾我更新鮮,更靈活~

的確,Emma比我能幹得多~

做同事又好,做朋友又好,做情人又好,做老婆都好,Emma真係一個好女仔~

咁好既女仔,一定要配個完美既男人先襯得起。

而我喺Emma身邊...總係好似格格不入...

「咁係唔係我話乜你都話OK先?」Emma伸出一隻手指尾...

『下?』我好習慣咁勾住左Emma隻手指尾...

「今晚上黎我屋企煮飯仔~」Emma用佢既手指公掂左落我隻手指公...

『哦...下?!上你道?!』喂喂咁快就上去你屋企好似唔係咁好喎...

「應承左我架喇~無得反悔~」Emma向我打左個眼色...

我咁都算係應承左你架喇?

靚女唔係老奉屈機架喎…

唔知係唔係Emma好心急想快D返去玩煮飯仔,佢喺個場行多幾個圈就話諗好晒搞掂走得...

係唔係真架…

係搞得掂先好喎...

話晒都係大單野...

唔好天一半地一半先好喎...

人類,有一種惡性,就係為左想做到自己想做既事,其他野就求鳩其HEA左佢就算。

特別係D女人...

我再重申一次我唔係歧視D女人丫下~

但係歷史中有好多偉人可以做例子~

你睇下獎勵芸就知啦~

為左舐阿爺鞋底真係乜鳩都噏得出~

上網見到D乜都無去分析過、思考過就搬上立法會~

嗰隻孽瘤就更加不知所謂!

上Facebook、Whatsapp、IG、膠登就話人地有組織...

喺個Google Map亂畫幾筆就話有計劃~

你都真係痴Q線既~

識唔識咩叫英雄所見樂瞳丫?

唔識就上Google search下啦!

講講下又講左去政治...

不過無計,因為而家既我真係心如鹿撞,想搵D野分散下注意力...

上女仔屋企丫...

上次就係因為上Ashlynn屋企就咁俾佢食左落肚...

今次仲要上Emma屋企玩煮飯仔?!

我真係好怕會貞節不保喎...(定係晚節?)

不過講開又講,Emma係唔係真係識煮野食架?

話晒都係千金小姐...

上次Ashlynn沖杯咖啡俾我飲都屙到我九彩...

今次仲話要食Emma煮既飯…

為左唔會食物中毒,入院收場...

睇黎一陣要幫多D Emma手先得...

「飛揚~你喺道諗緊乜丫~」Emma凝視住我...

『無無~諗緊Gay生咋嘛~』唔可以俾Emma知道我對佢無信心...

“吼...吼...吼!!!”坐住Emma架LP 700-4 ROADSTER,話都無咁快就過左去中環~

Emma話要去IFC間city’super買材料喎~

city’super?好春貴架喎...

不過都好過幫襯李+x間仆街既~

仆街D野又貴又唔係真係咁新鮮!

最唔順氣就係又要俾錢李+x使丫嘛!

條香港皇帝已經掌握晒香港命脈,衣食住行樣樣都係佢既!

仲要貪得無厭!

乜春都鬼死咁貴!

搞到香港民不聊生...

睇你幾時死丫!

去到IFC,出入都係D鬼佬呀、土豪呀、地產仔丫咁...

某D特別日子仲會見到好多大陸佬拎住一舊二舊金牛企喺Apple Store門外添~

平日真係好少過黎,唔係見客都廢鬼事~

呢道名店林立,又係嗰D幾萬蚊一件衫、幾十萬一個袋仔、幾百萬一隻錶既奢侈品牌...

我地呢D死窮鬼真係過黎呢邊打工都無資格...

究竟一個窮奢極慾既社會,背後要犧牲幾多人先夠呢?

我就真係唔清楚~

睇政府Set嗰條貧窮線睇到我好迷茫...

嗰條明明就係絕望線黎架啦~Set到咁Q低都戇鳩既~

睇報告不如睇自己好過~

好明顯我就係被犧牲嗰個啦~

而呢個社會裏面,被犧牲既又點只得我一個?

你睇下你自己~

你唔係仲以為自己仲係向緊上爬丫嘛?

係~你的確係向緊上爬,但條梯就向緊下滑呢~

你仲未知個遊戲點玩丫?

你認為既得利益者會俾你有機會爬到佢嗰個位置,同佢爭利益咩?

而家既政府就係依重喺既得利益者身上,等佢地可以繼續奴役我地,為佢地賣命~

醒下啦~仲發夢~

同Emma推住手推車仔喺city’super裏面行下行下~

左望望~右望望~

就好似一對新婚夫婦行街買餸一樣~

新婚夫婦...

拖都無資格拍啦仲講乜新婚夫婦?

真係癩蝦毛想食天鵝肉!

望住Emma既背影...

『Emma~你...想煮D乜呢~』打探下等自己有個心理準備都好丫...

「一陣你咪知囉~」Emma對我笑一笑,繼續搜索材料...

唔好咁驚喜得唔得丫...

我心血少唔嚇得架...

Emma望住一塊塊扒。

有雞扒、有羊扒、有豬扒、有牛扒...

Emma好細心咁左揀揀…右揀揀...

望住眼前既Emma就好似一個師奶仔咁~

都真係幾可愛~

『好啦~就呢兩塊啦~』Emma揀左兩塊...Chateaubriand steak?

則係咩肉?

我學歷低真係唔係好知係乜...

但就咁睇應該係牛肉...

Emma想煎牛扒?!

『今晚你想煎牛扒?』問清楚D先~

「係丫~煎牛扒最易煮~無咁易失手嘛~第一次請人上黎最好就係煎牛扒架啦~」Emma擺下擺下咁繼續行。

係丫~唔記得左係張小嫻抑或王貽興...定係李錦聯丫?!

唔鬼記得...

總之就係有一個知名人士曾經咁講過:「第一次請人上黎屋企,要俾好印象人,最好就係整煎牛扒~唔熟又食得,熟過頭咪當安全D囉~好難會失手~如果你咁都失得手,咁你都係孤獨終老罷啦~」

不過...

『你都幾老實架喎~』我不禁要恥笑一下Emma~

試問喺呢個人人帶住假面具做人既香港,有邊個會咁老實架~

Emma雙手放後,轉一轉身,帶住微笑望住我:「老實D唔好咩?」

望住眼前咁Pure咁True既Emma,我先係呆左一呆...

『好...當然好~』可以老老實實當然好...

如果呢個世界上,每個人都可以老老實實既話,就唔會有咁多猜忌...

如果每個人都可以交個心出黎既話,就唔會有咁多誤會,亦唔會有咁多錯過...

可惜既係,呢個世界上有好多人都會利用他人既真心...傷害他人...

我地就係因為害怕俾人傷害,害怕受傷害,所以唔敢以真心代人...

我地害怕受傷...唔敢表露心意...

我地害怕受傷...唔敢同深愛既人表白...

我地好怕好怕...我地好多野都好害怕...

所以我地錯過左好多好多…

我地錯過左獅子座流星雨,錯過左撐起雨傘,錯過左硬食催淚彈,錯過左激情與不激情的...

我地仲要錯過幾多?