SuperGirls退場後,身邊既觀眾都開始散去...

「唔該晒你丫,你真係一個好人~」而身後既小妹妹亦都向我道謝...

『唔使客氣...』我點一點頭...

「ByeBye~」小妹妹向我揮揮手...

『ByeBye…』我亦目送眼前呢個十三四歲既背心熱褲小妹妹轉身離開...





我唔應該將焦點放喺阿Wing身上...

就算要我放喺十三四歲既小妹妹身上都唔可以放喺阿Wing身上...

情願俾世人咒罵我有戀童癖,搞𡃁妹衰十一,都唔可以俾人話我兄妹亂倫,搞自己個妹...

我一路行,一路諗...

我要重新建立圍牆...建立價值觀!





堅定不移既價值觀!

我唔會愛上阿Wing...

我同阿Wing只係兄妹之情...

唔會改變...

呢種關係點都唔會改變!





“And you don't seem to understand”電話響...

係Ashlynn...

我立即滑動解鎖:『喂~BB~』

「死左去邊丫?」電話傳黎刺耳既聲音...

『我喺...Izzue出面咋嘛…』我企定定,望一望,望下見唔見到Ashlynn既身影。

「唔係喺Lowrys Farm咩?」Ashlynn帶住質問既語氣問我。

『痴線啦~Lowrys Farm只係賣女裝衫。我又點會無啦啦行過去呢?』我有小小心虛...

「點知你呀~你唔好行開丫,我行緊過黎架喇!嘟...嘟...嘟...」我都未有回應,Ashlynn就收左線...





又係咁又係咁...

次次都係連句Bye都未講就Cut鳩左我線!

識唔識咩叫禮貌架?

有無人教過你架?

知唔知收線前講句Bye係尊重人既表現黎架?!

我一支公企喺Izzue門口等...

等下等...中央廣場都仲有唔少人...





D毒撚好似想等Heidi由呢邊走人...

再等等下,我終於見到一個好似連詩雅咁既身影行緊埋黎...

Ashlynn今日著左套粉紅色連身短裙,配襯一對透透地既黑絲...

修長既美腿俾對黑絲修得更長更美...

條短裙差唔多短到上個屁股道...

Ashlynn對腳本身就已經好長,再加上呢條短裙就更加之長!

再望一望Ashlynn對鞋...原來著左有小小踭既粉紅色高踭鞋...

條短裙已經顯得Ashlynn對腳好長,再加上呢對高踭鞋就顯得佢對腳更加更加更加之長!





不少麻甩佬同死毒撚既眼光都去晒Ashlynn對腳之上。

個個對眼都係咁起勢掃描Ashlynn對腳。

我相信如果對黑絲有癖好既人望到眼前既Ashlynn,一定射到一褲都係...

當Ashlynn再行近D,睇清楚佢塊面個妝...

濃到好似成部FULL ARMOR UNICORN GUNDAM咁充滿戰鬥格。

你睇下佢對眼化到...大到...巨到...外星人對眼都無佢咁巨大!

再加上個下巴尖到,隊得死人嗰隻!





個鼻D陰影位打到深到呢~個鼻好似阿爾卑斯山山脈咁高!

個嘴唇又紅到呢~岩岩食完人呀?飲完血呀?

真係PS裝甲都唔使用,夠晒重武裝~

「點解咁鬼多人架!」Ashlynn一行埋黎就皺住眉頭同我講。

『頭先有SuperGirls丫嘛~』我都四圍望一望,睇下有無機會見到Heidi...

「又係嗰個Heidi呀?我都唔知佢有咩咁好,都唔知點解咁多人鍾意佢!人又矮!著對五吋高踭鞋都高唔過我!又無胸,跳起舞上黎胸前嗰兩舊肉震都唔震下!」Ashlynn妙嘴妙舌咁...

『唔一定要生到成碌竹咁先好架嘛…』要咁高托柒咩?

「矮矮細細咪岩晒你地呢D死矮仔囉~保證著對五吋高踭鞋都高唔過你,等你地D無謂既自尊心唔會受到衝擊丫嘛~你睇下我而家!就係著小小踭都高過你半個頭啦!」Ashlynn企直個人...

『咁你又著?』邊撚道有半個頭姐?大家企直個人咪又係高得嗰少少!

「唔通為左就你就唔要靚呀?我唔會囉~」Ashlynn開始向前行。

屌你著咁靚咪又係俾我屌!

「食乜呀我地?」Ashlynn一路喺我前面行,一路口噏噏...

『你話事啦。』做咩硬係要行咁快?!

「次次都要我諗!你無主見架?你唔係懶到連諗下都廢事呀嘛?」Ashlynn一路向前行,一路擰轉頭對住我起勢咁屌...

『食越南野...』

「我個胃唔好你唔係唔記得嘛?」

『食粥囉...』

「淡茂茂!」

『食譚仔...』

「咁Cheap!」

『食烏冬...』

「都無款揀!」

『屌你法國...』

「都唔好食!」

『歐元高高...』

「咁多人!」

『飲茶喇…』

「熱辣辣飲乜鬼茶呀?!」

『泰國野...』

「我唔食得辣架!」

『可以唔食辣架姐~有酸有甜架嘛~』

「唔食辣食乜鬼泰國野?」

『咁日本喇!你最鍾意!』

「我食左好多餐食到嘔喇!」

『我點知你食左好多餐姐!失蹤左成個禮拜都唔知你去左邊!』

「去飲茶啦唔好煩喇!」Ashlynn一路上電梯...

我又跟住Ashlynn上電梯...

跟喺Ashlynn後面望住佢對黑絲,望住條短裙擺下擺下,唔知點解真係一D性慾都挑唔起...

之前我都好鍾意咁樣𥄫Ashlynn對腳,有時𥄫到起晒機仲會襯無人望到摸下摸佢對腳,掃一掃佢小腿,搓一搓佢大髀,有時仲會揭一揭起佢條裙望下。

但今日...真係唔知點解機都起唔到...

「又要等又要等又要等等等!幾十張檯都唔知要等到幾時!」Ashlynn拎住張飛一路屌,一路行埋去同個阿婆爭位坐。

『嘈少陣好唔好?』我企喺Ashlynn面前,真係覺得好失禮...

「你早D黎拎飛咪唔使嘈囉!」Ashlynn翹住對手,翹住對腳,西口西面咁喪屌...

『咁我都唔知你想食乜...』你睇下你,數云晒成個葵芳食得既野,最後又話黎飲茶...

我真係點估到你呀女皇...

「你乜都唔知架咩?!咁你知唔知點樣做人男朋友呀?」Ashlynn繼續對我西面。

屌鳩你,係你先咁麻撚煩架姐...

「點丫?無聲出呀?無野講呀?真係要你黎都唔知做乜!」Ashlynn喋喋不休...

對住Ashlynn既無理指罵,我真係無野好講...

沈默唔等於我懦弱...

沈默唔代表我認同...

我只係廢事大街大巷同佢嘈,免得俾人拍片放上網。

好似十四巴港女咁,前車都話左俾你聽D港女癲起上黎真係痴撚線。

港男懦弱起上黎真係連狗都不如。

「等等等等等...仲要等幾耐架?!」Ashlynn一路係咁埋怨...

『係要排隊架啦...』我留意到身邊既街外人用上D好奇異既目光望住我...

「你搵多D錢咪唔使等囉!」Ashlynn又發出無理既要求。

『搵多D錢又同使唔使等有乜關係呢?』我唔係嘗試淡化我搵得錢少,我真係想知道同搵幾多錢有乜直接關係。

「搵多D錢我地咪可以去酒店飲茶,唔使喺呢D平民茶樓同人等位囉!」Ashlynn黑撚晒面...

屌你老味你估潮江春平架?!

大口氣到你呀真係!

老老實實黑撚晒面既又點止Ashlynn...

坐喺或者企喺我地身邊同我地一齊等緊位既茶客,聽到Ashlynn咁講都黑撚晒面...

我唔知Ashlynn係唔係有心講得咁大聲,要俾全世界都知佢身價係高過在坐咁多位加埋既總和好幾倍。

我就係知Ashlynn好似我地既特首咁一直得罪人都唔知!

不過又有乜所謂,你對佢無價值先會唔理你感受架姐~

如果佢係重視你又點敢得罪你?

好明顯Ashlynn就係唔放在坐咁多位在眼內啦!

一路喺道等,Ashlynn就一路起勢屌...

真係屌到成個場D人都怕左佢...

「四十六號...」個姐姐終於都叫到我地。

「等左咁耐,餓到胃都痛埋先入得...」Ashlynn臨入去都要屌多兩句。

個姐姐就梗係無你咁好氣,求求其其寫個檯號就請你入去。

『想飲咩茶丫?』係唔係都慰問返句既...

「我個胃唔受得茶架!你又唔記得喇?你有咩記得架?」Ashlynn又黑晒面咁對住我。

唔飲得茶你又話黎飲茶?!

「開壺水俾我!」Ashlynn拎起張點心紙望望望...

『唔該,一壺水仙,一壺大滾水丫唔該。』最好黎個大滾水熱死你!

Ashlynn繼續喺張點心紙畫畫畫...

叫左個姐姐開茶之後,我都係時候要Chok一Chok Ashlynn...

『係呢,你去左邊道旅行?』首先係問去左邊道旅行...

「日本囉...唔該!」Ashlynn隊左張點心紙俾個姐姐...

『日本邊道丫?』再問得詳細D...

「東京囉…」Ashlynn拎左部電話出黎睇...

『係丫?同邊個去丫~』跟住就係問同邊個去旅行...

「Friend囉...嘻嘻~」Ashlynn望住部電話笑笑口...

『邊個Friend丫?之前唔聽你講既?』又再問得深入D...

「講你都唔識咪無講囉~」Ashlynn笑瞇瞇咁撳緊電話...

『咁你係幾時返架?』然之後再問下佢係幾時返黎既...

「尋日呀!」Ashlynn繼續撳佢部電話...

『尋日返?』尋日一返黎就Whatsapp我?!

「一壺水仙…一壺大滾水...」我等姐姐放好晒D茶壺...

「係丫…我尋日一返到黎就Whatsapp你啦!洗乾淨D呀!」Ashlynn隊晒D杯杯碟碟俾我...

『咁你返左黎之後,同過邊個出去?』我一路洗,一路好用心咁洗乾淨D杯杯碟碟...

「無同邊個出過去丫...岩岩返黎咋嘛…」Ashlynn一路撳部電話,一路好唔專心咁答我...

『咁去過邊道?』我洗到D杯杯碟碟乾乾淨淨後,仲要用紙巾抹到乾一乾…

「你有無聽我講乜架?都話岩岩返囉!去得邊姐?做乜問咁多呀?Check我呀而家?!」Ashlynn收返埋部電話,又黑起塊面望住我...

『唔係…關心下你姐...』問唔夠幾句就發晒癲...

「就算我真係同其他男人去旅行都唔關你事啦!次次叫你去旅行都話請唔到假!返工返到你咁真係食屎架!」Ashlynn翹起對手,不屑望我一眼...

叫我去?真係講得好聽...

係叫我請你去旅行呀嘛?

大姐...而家去旅行咁鬼貴,我邊有咁多閒錢請你去呀?

去到又要買呢樣,又要買嗰樣...唔使問都知,全程都係我包架啦~

我既人工有一半係用黎俾家用養家,另一半已經俾埋你去花...

我每日都仲要搵D碎銀搭車返工,食都只係敢食飯盒...雙拼都唔敢呀!

咁既生活仲講乜鬼旅行丫?

你使少D我,首期都俾得起啦!

D點心一路黎,Ashlynn就一邊食一邊撳手機...

Ashlynn點親都係又貴又唔飽肚...

仲要叫到成檯都係...

Ashlynn依然好少理,自己鍾意食乜就食乜...

望住部電話笑笑笑...食食食...

同我可以話係完完全全零交流...

講真,我真係唔撚覺我地係拍緊拖...

極其量都係我喺道服侍緊佢...

幫Ashlynn斟水...

幫Ashlynn食埋佢食剩既野...

望住佢笑瞇瞇咁對住部電話撳撳撳撳撳撳撳撳撳撳撳撳都唔知佢撳乜春!

『你喺道睇緊乜野丫?』我試圖拎Ashlynn手上既電話...

「關你咩事呀?想Check我電話呀?」Ashlynn雙手掩住部電話。

『關心下姐...』唔見得光咩咁大反應...

「關心關心關心,拎你部電話出黎俾我關心下啦!」Ashlynn向我伸出手。

『嗱...』我雙手奉上...

Ashlynn好純熟咁用Touch ID解鎖...(Ashlynn係有迫過我入埋佢個指紋入去...)

所以我一直都覺得指紋識別系統一D都唔安全,佢絕對係唔可以阻止到你唔想俾佢睇到既人睇到裏面既野。

唔想俾Ashlynn睇到既野?

仆街!

「做乜會有Heidi咁性感既相架?唔係喎...仲要喺你屋企?!」Ashlynn用隻中指喺個芒上面喪撳...

『唔係唔係…阿Wing黎架...』Heidi又點會無啦啦喺我屋企丫?用下個腦啦!低能...

Ashlynn拎埋D部電話,仔細咁再望多幾眼:「係喎...阿Wing幾時剪左個Heidi頭?核突到死...」

你就核突!

Heidi頭又有乜唔好丫?

睇起上黎清爽D~又精神D~

唔通好似你咁鬼死咁長好丫?

做咩呀?扮貞子纏身4D加長版呀?

坐起蓮上黎你D死人長髮就遮住晒D光!

人地喺側邊睇就好睇~

我瞓喺道望上黎就真係好似見到隻貞子喺我身上印下印下...

仲點屌得落?

真係你屌埋我嗰份!

成日話有氣質有氣質...

氣質唔係好似你咁架囉!

有氣質既應該好似Emma咁架囉!

「女仔著呢D絲襪九成九都係發緊姣~」Ashlynn嘴妙妙咁。

『唔好再講我細妹得唔得?』我條氣真係有D唔係咁順...

「我講事實咋嘛!講事實都唔得呀?唔好講囉!」Ashlynn繼續撳我部電話。

又係咁架喇,有乜唔Like就話“唔好講囉”架喇!

而家係有你講無我講囉好唔好?

「呢個邊個黎架?!」Ashlynn極度大聲,大聲到整間酒樓既茶客都望晒過黎...

『我既新同事...我既新同事...』無錯喇,我想話仆街既事就係指呢樣...

前兩晚同Emma Whatsapp過既Messages唔記得左刪...

「新同事?唔見你話佢咁靚女既?下?佢仲要咁關心你既?下?傾得好Sweet咁喎?下?仲要Send張白痴相俾人添?下?男人老狗你戴乜春米奇耳仔呀?下?同人去完迪士尼玩呀?下?我叫你同我去你又話唔得閒又話攰牙痛咁既聲!下?你而家同人地就玩得咁開心呀?下?!」Ashlynn一路篤住我部電話,一路一輪嘴起勢咁屌...

『你冷靜D聽我講先...』我都未講完...

「我好冷靜喎!」Ashlynn就搶住答...

『你咁冷靜咁我唔使講啦。』最好係咁啦。

「唔得喎!我冷靜還冷靜,你解釋都係必要架喎!快D解釋!」Ashlynn一邊撳我部電話一邊等我解釋...

『是咁的...咁人地靚唔靚女關我鬼事咩?下嘛?所以咪無刻意同你講佢係一個宇宙級靚女囉~咁大家喺同一間公司做野,咁你都知我公司就係得我同老闆架姐~咁佢唔同我熟,唔通同老闆熟咩?下嘛?所以Send D Messages好似比較Close D都好合情合理丫~下嘛?至於男人老狗戴乜春米奇耳仔喇喎...嗰日我同佢去左迪士尼見客...戴住黎見親切D,易傾得成D丫嘛~下嘛?咁跟住佢就話夠唔夠膽戴到返屋企,咁你都知我份人唔服輸架嘛~所以咪戴到上小巴囉~就係咁咋嘛~』我認我講左咁大段野都係大話...

當然亦有D野係真既...

例如Emma係一個宇宙級靚女啦...

「就係咁簡單?咁做乜同人地影D咁親密既合照呀?人地仲要用黎做頭像添!」Ashlynn隊左我部電話埋我面前...

電話裏面開著左個Facebook Apps…

Facebook裏面嗰張相...係我同Emma既合照!

仆街...Ashlynn竟然醒撚到搵到Emma個Facebook...

所以話D女人真係要佢醒就唔撚醒,要佢唔撚醒就鬼咁撚死醒...

『ER…』真係仆街喇...平日唔係好講慣大話,突然諗唔到點駁落去添...

「你睇下人地個Caption!“終於都同到最深愛既米奇合照”呀!幾Sweet呀!」Ashlynn又係咁起勢篤我部電話...

『係咯係咯~佢話好鍾意米奇~但又搵唔到米奇合照喎~咁咪搵我扮住先囉~係咯係咯...就係咁咋嘛…』咁講過唔過到骨架?

「梗係咁啦!唔通鍾意你咩?你係乜野新鮮蘿蔔皮呀?人地咁靚女又點會睇得上你呀?你同到我一齊都算你執到啦!」Ashlynn繼續篤我部電話...

『係囉係囉...又點會睇得上我呢...』乜我真係咁差咩?

係既…

講樣我又唔靚仔,直頭可以稱得上柒...

講身高又唔係高,直頭可以話有D矮…

講到錢就直頭唔好提添啦...

份工又無前途,人生又無出路...

好似我咁失敗既人,可以同到Ashlynn已經係幾生修道~

我仲可以要求D乜...

「痴線架?一張普普通通既食雪糕自拍都五萬幾個Likes?係唔係真係咁多狗公呀?一句無相既廢話都有四萬幾個Likes?係唔係買返黎架?」Ashlynn一路黑晒面咁撳我部電話,一路口噏噏...

『你可唔可以積返D口德呢?』聽到Ashlynn咁話Emma,個心口硬係好似有D野頂住頂住...

「做咩呀?心痛呀?哦~而家幫住人地講野啦?下?」Ashlynn係咁指指指指住我...

『我心痛你姐...你把口咁臭,我怕你爛嘴呀...』最怕你生椰菜花上嘴丫...

「話我把口臭?我係咁架喇!唔好要我囉~」Ashlynn擺出一副臭嘴臉...

『我唔係咁既意思...我都係為你好姐...』我真係有D唔明點解一講到呢D位就話“唔好要我囉”。

「為我好為我好...等我幫你Block左佢就為我好喇!」Ashlynn試圖喺我個Facebook道Block左Emma...

『喂喂喂…唔好!』我好自然咁想由Ashlynn手中搶返部電話!

當然我永遠都唔會成功...

我部電話仍然喺Ashlynn手中...

「做咩丫?唔捨得呀?你好呀你!作反喇!」Ashlynn拍左幾下檯...

“砰砰嘭嘭”檯上面既杯杯碟碟都震左幾下...

『唔係咩作唔作反…咁一場同事如果咁樣Block人,你叫我返工點面對人呢?仲要一齊工作架嘛…咁樣對我份工會有好大影響架...』我試圖冷卻返Ashlynn既情緒...

因為已經成間酒樓D茶客都望晒過黎...

我唔想一陣真係YouTube見囉...

「你份工有無影響都係廢架喇~有乜所謂呀又?!好啦~得啦~你話乜咪乜囉!」Ashlynn一手就DOM返部電話過黎...

我望住喺檯面打左幾個轉既iPhone...

唉...辛苦你喇...

之後既成餐茶,Ashlynn一直都係黑住面左望望,右望望...

我唔知我塊面係唔係咁難對焦,望左Ashlynn咁耐,我就硬係唔覺佢將焦點放到落我道。

Ashlynn唔係不時望住部手機傻笑,就係眈天望地口黑面黑...

我就一邊食Ashlynn食剩D餸頭餸尾,一邊諗...

與Ashlynn身處既空間,係唔係真係令佢覺得咁討厭呢?

喺呢個空間中係唔係真係無一樣野值得Ashlynn笑一笑呢?

唔係咁…

唔係因為呢個空間出現左乜野問題...

只係因為我...

有我既地方,Ashlynn都覺得唔順眼...

只要有我出現,Ashlynn條氣都係咁唔順...

究竟點解兩個人可以相處到睇對方唔順眼?

究竟點解一開始明明係相愛,時間耐左就變成相嫌?

究竟一段感情係要用乜野黎維繫?

係唔係時間耐左就唔會再珍惜對方?

係唔係時間會將兩顆心磨蝕?

係唔係一對情侶拍拖拍得耐,一定會變成敵人?

我唔明...

我更加唔明既係,既然兩顆心已經唔可以好似當初咁互相緊扣,點解仲要勉強一齊?