「飛揚~」當我仲沈思緊世界真理既同時,一把動人既聲線喺對面馬路傳過黎。

我喺雨簾之間,隱約見到遠處有一個熟識既身影。

拎住黃色既雨傘,著住米黃色為主既花花吊帶短裙,雪白修長既美腿下著住白色平底涼鞋...

『Emma~』我隔住條馬路,隔住雨簾,向住仲同我揮緊手既Emma揮揮手。

Emma好似好開心咁~





應該話Emma日日都係咁開心。

『橫風橫雨丫,快D入去先啦~』我跑到去Emma面前,立即拉佢入大堂。

「係丫~三號風球啦~天文台好似話會打得成喎...」Emma望住出面既環境。

原來已經三號波...

估唔到三號波都大風大雨到咁...





睇黎呢個風真係好勁...

『不過點勁都好,我就話一定打唔成喇~香港勝在有李氏力場~』有李+x一日,香港都唔會有八號波~

「我就話唔係喇~嘿嘿...」Emma好似好有信心咁...

充滿自信既Emma真係好迷人~

望一望Emma個身,原來都有俾雨整濕...





『做咩唔上去先呢?整到個身都濕埋喇。』我拎出紙巾,幫Emma抹一抹手臂同膊頭D雨水。

「想等埋你先丫嘛~」Emma甜絲絲對住我笑一笑…

『咁都可以入黎等架姐~淋濕身好易病架~』呢個Emma,真係需要人照顧...

「咁...人地個心係你道...唔諗得咁多架嘛…」Emma嗲嗲地...

Emma今日做咩呢?

點解會講呢D野架呢?

係唔係因為隔左一日無見呢?

唔係隔得越耐越大隔膜架咩?





點解我地而家好似零感特薄架呢?

我望一望個大堂...

『ER...趁而家無乜人,我地不如上去先啦...』等等又一班麻甩佬搏Emma懵就唔係咁好...

「嗯~」Emma甜絲絲咁翹住我行...

今日既Emma做乜野呢?

好似怪怪地咁既?

唔係…其實Emma日日都係咁奇怪...





可能係鬼妹仔性格啦~

唔係…係日本妹…

“啪啪啪”入到公司開晒D燈...

「係呢~頭先見你望住部手機望到入晒神~有咩睇?係唔係睇靚女?」Emma放好佢個手袋仔之後坐定定,托住頭望住我。

『唔係唔係~唔係睇靚女...ER…都可以話係既...』阿Wing又真係好靚女既...

「睇咩靚女?有幾靚?我又要睇!」Emma叉住條腰行左過黎我身邊...

『ER…無…我細妹咋嘛…嗱~』我開返個Lock機畫面俾Emma睇...

Emma接過我部電話後:「哦哦哦~呢張相我尋晚喺你細妹個Facebook道見到~一Post出黎就成萬個Likes~勁靚女~同Heidi企埋一齊都分唔到邊個係Heidi,邊個係你細妹~」





Emma睇得好興奮咁...

但...Emma話佢尋晚睇阿Wing Facebook?

我有無聽錯?

Emma做乜會無啦啦睇阿Wing個Facebook?

『你對阿Wing都幾好奇架喎~』Emma唔係睇中左阿Wing丫嘛?

有人話,D靚女有種癖好,專搞D小妹妹架喎...

Emma成日都話等緊佢既米奇...





唔通米奇只係用黎掩飾佢心中對小妹妹既慾念?

「我係想了解你多D姐~」Emma向我打左個眼色...

想了解我多D?

「我係睇睇下你個Facebook見到你細妹Tag左你...」Emma彎一彎腰,喺我身邊控制我部電腦...

Emma個身好香,好似鮮花一樣清香...

係唔係M巾既香味?

我唔知...亦都唔需要知...

我就係知由Emma身上發出既香味令到我成個人都好放鬆...

如果係M巾既香味都唔差~

我對M又唔可以話好抗拒~

「嗱~你睇下~Tag左你架~」Emma喺我部電腦開左佢個Facebook,撳左入我個Facebook道...

『係喎…仲要過左九萬幾個LIKES?!』痴線架?呢個世界上係唔係真係有咁多狗公呀?

「D Comments都好正架~不過大多數都係男仔留~」Emma指一指住D Comments…

有D寫住好靚女丫、Nice to meet you丫、我真係好鍾意你丫、Wing Wing~:P丫、Wing Wing係我老婆丫、起雙飛丫、好想啪啪啪啪啪啪啪啪啪啪啪啪啪啪啪丫、一Q幾錢丫、可否交合丫...

屌!真係狗公無極限!

『D狗公真係好煩!』睇到D嘔心Comments,我有小小火起...

「你有D酸味喎~」Emma恥一恥笑我...

『邊係呢...只係...唔想自己細妹俾D狗公煩住...』加上真有小小酸咁囉...

「不過你又唔使擔心喎~照我睇,你細妹都唔在意班男仔~你細妹都無覆過佢地~」Emma繼續碌嗰幾萬個Comments...

『咁多Comments,俾我都唔覆啦~你應該好清楚架~』仲要D Comments鬼咁無聊...

「嗯?」Emma碌大對眼,頭上面多左幾個問號。

『你D相閒閒地都十幾萬個Comments架啦~』講誇張Emma更加誇張~

隨隨便便一張咬住支羹既相都可以有幾萬個Comments!

你話D狗公幾咁唔得閒~

日撚日Mon住女神s Facebook、IG等搶頭香。

俾你插到頭香又點撚樣姐?真係有得俾你插咩?

留意返啦,係女神”s”丫~即係唔只一個,係好多好多好多個!

日撚日分分秒秒撳F5真係乜柒Keyboard都俾你玩爛~

成日話自己有幾忙有幾忙~

就係忙埋呢D無聊野!

咁多時間去玩股票好過啦~

分分鐘回報更多~

「乜你都有留意我...架咩?」Emma面紅紅咁望住我。

我眼定定咁望左Emma一陣...

HOLY SHIT!

唔覺意將自己D變態行為爆左出黎添...

其實平日我都有去睇下Emma既Facebook,睇下佢D靚相...

雖然話返工就有得見,但夜麻麻無得見既時候始終都會心掛掛...

當然我就無用Emma D相黎打丁啦!

我真心只係純粹八卦下...欣賞下...雖然話見到D曬腳相,我都有扯下旗...

乾扯咋!Chok都無Chok過架!

不過俾Emma知道我有留意佢Facebook,佢會唔會誤會我會好似The Social Network裏Mark Zuckerberg咁一撚喺道F5 Mon住自己?

真係諗一諗都覺得自己好撚變態...

咁Emma會唔會誤以為我都係一隻狗公架?

HOLY SHIT!

越諗就越撚唔對勁...

分分鐘真係當正我係變態佬咁睇架喎...

玩下手仲要Show Blocked User - 飛揚咁點算?!

『咁你D相多人LIKE丫嘛~好難留意唔到既~哈哈...』我咁答會唔會有D牽強?

「但其實我唔係咁鍾意俾咁多人LIKE...我只係想俾你一個LIKE...」Emma繼續碌我個Facebook...

下?

俾我一個LIKE?

死喇...我從來只係乾睇(我係唔會用偷窺黎形容),從來都無留低犯罪證據...

Emma既意思係叫我以後唔好偷窺佢,要睇就光明正大D撳返個LIKE證明丁已打?

Emma繼續碌,碌碌下碌到去我已回復單身...

就喺呢道,我捉住左Emma隻手,眼定定咁望住個Mon...

一段感情開始,必須兩人Accept。

但當感情破裂,就只需單方面表決...

呢個就係戀愛既遊戲規則...

點會咁唔公平...

點解愛情可以咁唔公平?

我從來都無諗過要分開...

我無諗過你會俾綠帽我戴...

點解你要對我咁恨心?

點解你要對我咁殘忍?

我碌到見到Ashlynn既頭像,已經換左做攬住James既自拍照。

好明顯就係宣示主權!對我又好,對Amy都好...

你從來都未試過用我地既合照做頭像...

從來都未試過...

我Click左入去Ashlynn個Facebook入面...

“Time to leave”

而裏面已經放左好多去東京旅行既相。

『八婆...』我不自覺咁噏左呢兩個字出黎。

“是你帶我脫離地獄 是你為我帶來新生"

喺D相入面,Ashlynn笑得好燦爛,從來都未見過佢笑得咁燦爛。

『死八婆...』我再忍唔住又噏左呢三個字出黎。

「飛揚...」Emma捉一捉住我。

『我無事...』我繼續Click入去睇Ashlynn個相簿。

好多好多Ashlynn既個人Model相,上面仲要寫住“1D Mark IV果然唔同D”。

『貪慕虛榮...』買得起1D Mark IV好撚巴撚閉咩?

影得好撚好咩?

影得再好都唔係自己既技術!

只係器材先決!

「飛揚...唔好再睇喇...」Emma捉實我隻手。

『我無野呀!』我向Emma大喝一聲!

Emma俾我嚇到呆左,眼定定咁望住我。

『我真係無野,你俾我靜下...』我無理到Emma,繼續專注喺Ashlynn既Facebook道。

「嗯...」Emma行返埋自己位。

我就繼續睇Ashlynn D相。

Ashlynn擺既姿態好自然,真係好似一個Model咁,我從來都無見過...

我以前同Ashlynn影相都無見過佢會擺得咁自然。

仲有佢既笑容,笑得幾咁燦爛。

就好似盛開緊既玫瑰一樣咁燦爛。

“好開心可以喺東京陶醉於戀愛之中”

過份...點解你從來唔會喺我面前展露呢種笑容?

“只有你能讓我最幸福”

好過份...唔通我地一齊既時候,真係無幸福過咩?

“為了你 我甚麼都可以”

太過份...點解同我一齊既時候,就只有我付出?

點解我付出我所有,你都仲係嫌唔夠?

碌過左一大堆Model相之後,輪到一張又一張同James既合照...

“完全被你佔有”

一張又一張喺床上面既合照...又攬又嘴...

“You make me so hot”

無恥!

點解可以咁無恥?!

明明就係一對狗男女!

點解可以講到咁光明正大?!

“咔”呢個時候有人入左黎公司...

但我已經無理到究竟係邊個行左入黎!

我繼續專注喺一對狗男女身上。

“從未如此滿足過”

不知廉恥!

點解可以咁賤格?!

竟然可以喺Facebook上面,大模斯樣咁Post只係得張被包住一對狗男女既裸體照?

「喂飛揚你搞乜鬼呀?」我好似聽到一把男人聲同我講緊野。

“從未如此瘋狂過”

好一對奸夫淫婦...

明明兩個都係偷情,點解可以咁明目張膽?!

難道而家喺埋左一齊,就可以將以前錯既事變埋正確?

嗰陣時你地係偷緊情架!偷緊情架仆街!

「個客話你乜都無傾過就咁走左去算係點呀?」我好似聽到肥豬老闆屌緊我。

好一對狗男女...

好一對奸夫淫婦狗男女!

你地兩個會唔會太過下賤呀?!

我地岩岩先分開架咋!點解你可以咁毫無忌憚咁Post呢D通姦相上Facebook公諸同好架?!

「個客話你好唔尊重佢呀!你搞乜撚野呀?」我好似聽到仆街肥豬老闆屌緊我。

點解一個咁仆街既行為都有幾百個LIKES?!

咩人會讚揚呢種背叛、通奸、偷情既不道德行為?

呢個世界係唔係癲架?!

D Comments 仲要仆街到唔恨!

“好甜蜜喔~”、“幸福果然係要自己爭取~”、“搶得好~”、“終於可以公開咁恭喜你~”、“一早就應該飛左你之前嗰條廢柴啦~”、“聽我講一定無錯既~”、“你地兩個先係天生一對~”

人黎架?屌你老母!

呢班又係乜撚野八婆黎架?

係唔係八婆既身邊一定都係八婆黎架?

「喂我同緊你講野呀俾D返應啦係唔撚係唔想撈呀?」我好似聽到個仆街肥豬老闆喺道屌鳩緊我。

『唔撈...』

“啪啪啪”肥豬老闆拍一拍我個Mon:「你講乜春呀?」

『我唔撈喇...』做自己想做既事...

“啪啪啪啪”肥豬老闆再拍一拍我個Mon:「你講咁撚細聲我聽撚到你講乜春呀?!」

『我唔撈喇...』瘋狂做愛做既事...

“啪啪啪啪啪”肥豬老闆又再拍一拍我個Mon:「屌你老母講野講到成隻鵪𪂹咁你夠膽你就講得大聲D!」

『我唔撚撈喇!』我一手就掃左隻Mon落地,怒視住隻仆街肥豬老闆。

「你你你你你...」仆街肥豬老闆指指指指指住我。

『你你你你你乜撚野呀?!我話我唔撚撈喇!你挺執笠啦!』講完之後我怒氣沖沖急急腳咁行去公司門!

「你夠膽你就走,你夠膽你就行出呢道門,你...呀~仆你個街你真係夠膽架喎...」

我無再理身後條仆街肥豬老闆講D乜,直出公司門之後係咁起勢撳部升降機掣。

「飛揚飛揚...」Emma追左出黎捉一捉住我隻手。

我無理到Emma,仲係起勢咁喪撳部升降機掣,只係想快D離開呢道。

「飛揚你聽我講,你唔好走啦飛揚...」Emma仲係拉住我。

『你俾我做自己想做既野啦!一次啦!就俾一次機會我得唔得呀?!我根本就唔屬於呢道!』我對住Emma咆哮。

Emma俾我既咆哮聲嚇到個人呆晒,眼定定咁望住我俾唔到反應。

“叮”升降機門開啟,我Fing開Emma隻手衝入升降機。

入到升降機,我又起勢咁喪撳個G字,我好想快D離開呢道,快D逃離呢道...

淚水開始湧出...

我好辛苦喇,我受夠喇...我忍夠喇!

唔好再要我喺呢個殘酷既世界上,強忍自己既情緒生存落去好唔好?

我個面具熔喇...爛喇!

我唔可以再笑笑口任人屌呀!

人戴綠帽我戴綠帽,人地戴綠帽都識一巴車鳩落條淫婦道!

我呢?我仲要俾人話無撚用,正廢柴!

而家我錯呀?!

因為我無撚用先會戴綠帽既係唔係呀?!

係唔係痴撚線架?!

我真係好痛苦,戴綠帽已經夠晒慘,而家仲要將所有罪名放到我身上,我係罪人,戴綠帽都係我咎由自取!

屌你老母呢個世界係唔係痴撚線架?!

“啪啪啪啪啪啪啪啪啪啪啪啪啪啪啪啪”我一路拍打D掣,一路喪喊...

我真係唔知除左喪喊之外,我仲可以做得D乜?

落到地下,“啪”一聲巨響,我一手推開道鋼門,衝出大廈,外面橫風橫雨…

匆匆忙忙咁衝落黎,只係拎左個公事包,連把黃雨傘都漏左喺公司。

唔理喇...咩都唔想理喇...

我沿住簷篷一直行,一直沾到雨水,一直撞到唔同既人...

好多人,點解條街仲係咁多人?點解道道都係咁多人?

好討厭,四周都好討厭...

一車二車旅行箱車黎車去…

一個二個唔係講廣東話既大陸強盜...

成街都係雨傘,但就係擋唔住呢班禽獸...

點解成個香港都充斥住呢種令人窒息既氣息?

點解全個香港都好似搵唔到一個容身之所?

點解我地要咁慘?

點解我地無得揀?

我只係想搵一個屬於自己既地方,我只係想搵一個容身之地姐!

我已經好努力咁生存,但你就迫到我連生存都無能力...

我行到去一個黑暗既角落,一個終於都無人既角落...

我抬頭望向天際...

灰沈沈既天空下,強風把雨簾吹到左搖右擺...

望住呢個絕望又失去方向既景象...

『你係唔係想迫死我先安樂呀?!』我終於都忍唔住要對住個天咆哮。

我真係好耐都無試過咁失控。

對上嗰次,已經係七年前...

七年黎我一直都好好控制住自己既情緒...

七年黎我一直都好好去跟住呢個世界轉...

七年黎我一直都同條行屍走肉既死屍無分別!

我無靈魂架...我無靈魂架...我乜都無喇!

「陳飛揚!」就喺我個靈魂游離緊既同時,有人呼喚我...

「陳飛揚!」我望一望前面,望一望返條街...

「陳飛揚!你喺道做乜丫?」眼前係一個一直喺我內心深心處既身影...

一個拎住黃色雨傘,著住黑色連身長裙既身影...

我用上困惑既眼神,呆望住呢個笑面裏帶住點點哀愁既面孔:『羅海月?!』