《港男FF妄誌》: [Day 12－現在過去] PART 7

「終於都上到黎喇～」阿月舉起雙手，對住個藍天白雲放聲高呼。

『嗄…嗄…係咯…終於都...嗄…都...嗄…上到...嗄…黎喇...嗄...』我真係唔敢相信，自己有能力上到黎呢道...

爛頭營...行左成三個幾鐘...終於都上到黎爛頭營...

橫視一下整個山頭，一片高地上，分佈著以石塊建造既小屋。

綠草芒芒～晴空萬里～



置身喺廣闊既大自然之中，總有一份自由自在，無拘無束既感覺。

“颼～颼～颼！”不過就真係好大風...

喺呢個位置，D風仲大過岩岩上黎嗰段路...

望住俾猛風吹到擺下擺下，搖下搖下既阿月...我真係好怕佢會俾風吹走...

「比想像中早左上到黎～」阿月對我莞爾一笑。



『做咩呀？嗄…睇少我丫下？嗄…』老老柒柒，我仲未回到氣...

唔知係唔係高山症呢？我硬係覺得好似吸極都吸唔夠氣咁...

「你睇下你丫～行幾步路就無左半條命咁既死樣～」阿月過黎我身邊，扶一扶我。

『嘩～你就真係講得輕鬆喇...嗄…行幾步路？！嗄…上山丫...嗄…上山丫...大東山丫...唔簡單丫...嗄…』痴線架...

話晒，大東山都叫香港第三高山丫！點解阿月行到上黎都好似無乜野咁...就連少少攰意都唔覺...仍然面不改容咁既樣架呢？



最起碼都應該有少少缺氧既反應先係架...

「嘿嘿...做咩咁望住我？係唔係想問我，點解行左咁耐，經過咁多咁艱難既路，上到咁高，都仲可以一D攰意都無呢？」阿月一直扶住我行...

你可唔可以唔好次次都好似識讀心咁讀我心丫？

「係意志丫～」阿月一直扶住我，向住石屋方向行過去...

『意志？』唔知係唔係缺氧既關係，硬係唔係好諗到野...

「只要有無比既意志，總可以化不可能為可能～」阿月一直以堅定既眼神望向石屋...

化不可能為可能？咁熟既...阿穆？！

每次聽到人講“化不可能為可能”，我都會立即諗起Gundam Seed中，為左摯愛，用個反光束盾牌挺身擋住主天使號既「羅安格林」砲火既穆·拉·福拉卡...



為左愛，真係化不可能為可能～

多麼的偉大～多麼的感人～

而最不可能既係，阿穆拎住部突擊高達硬食完支主砲之後，成部機都變左灰塵，飄散喺無邊無際既宇宙之中架啦～

但阿穆竟然可以喺第二季出返黎！

仲要只係面上多左兩條刀疤加上失憶咁大把～

你話真愛真係幾咁不可能～

唔怪得咁多人都追尋唔到真愛啦～



我地呢D就仲慘～只有化可能為不可能的命～

唉～

係喎…當年阿月都好鍾意睇Seed架喎...仲要好鍾意基拉添...

肯肯定阿月睇到上晒腦，先噏得出化不可能為可能啦...

「嗱～而家俾你抖多陣先～抖多陣就要開始紮營架喇～」阿月同我一齊挨住間石屋坐...

『呢道大風成咁...紮唔紮到營架？』我真係有D擔心會連人帶營吹落山...

“颼～颼～颼！”我地而家已經叫做有間石屋擋擋，但D風黎自四面八方，點擋都吹到應一應...

「唔怕唔怕～我上網睇過架喇～人地話用棺材釘都差D吹落山～我地今晚一定死硬～花哈哈～」阿月若無其事咁開懷大笑...



唔係真係咁刺激丫嘛？

人地有經驗既，都話用棺材釘都差D吹落山...

我地呢D無經驗既，棺材釘都未必識落...

今次真係仆得街喇喂...唔係...係仆落山先岩...

我開始有D後悔，點解當初會跟阿月一齊癲？！

阿月話上山，我諗都唔諗就應承左...

真係太過瘋狂喇！



瘋狂...唔係…瘋狂唔係今日既事...我以前唔係一樣都係咁鍾意去闖...去蕩...

同阿月一齊做好多人地認為不可能既事嘛？

化不可能為可能...

“颼～颼～颼！”喺狂風推送下，阿月挨一挨埋我身邊...

我望一望住阿月...阿月又望一望我...

「做咩咁樣望住我？」阿月對眼半開半合咁問。

我唔知我自己用咩樣望住阿月，但我就覺得阿月個樣有D曖昧...

『大風丫嘛…大風到個樣都唔知吹到變成點...』的確，阿月對大眼都俾風吹到睜唔得大...

「吹下風…幾好丫...」阿月放鬆晒成個人，挨落石牆上，挨落我身上...

『好易吹到頭痛...』我地呢D年紀，真係唔係講玩笑...

諗住可以型D～瀟灑D～浪子D～喺海邊吹一吹風...點知都可以頭痛左兩日...

唔認老都唔得...

「乜你咁弱架～」阿月不禁要恥一恥笑我...

『乜鬼野弱丫？你聽日唔好頭痛到要我孭你落山～』俾個弱不禁風既羅海月話我弱，係有D唔順氣！

「花哈哈～你未免太過睇小我～你顧掂你自己先啦～」阿月對我莞爾一笑…

睇小你？我從來都唔敢...

我仲覺得你太過高...太過遠...

近在咫尺既你，就好似遠在天邊一樣...

捉不到，猜不透...

有乜辦法可以拉近彼此既距離？我真係諗唔到...

或者...要我花上一生既時間，都唔可以走近多兩步...

「抖夠未丫～抖夠就開始紮營喇～」阿月企一企起身，跳一跳，彈一彈...拍拍籮柚，拍拍手...

『嗯...』紮營...

“颼～颼～颼！”風伯伯...可唔可以唔好吹得咁勁住？

俾我地紮起個營先啦好嘛？

我同阿月兩個人，喺間石屋旁邊...

「唔係咁…唔係咁～」

『哦...哦...』

雞手鴨腳…

「係咁～係咁～」

『哦...哦...嘩！』

左手左腳…

「揸穩D～用力D～再用力D～」

『揸穩左喇...好大力架喇…嘩！』

「拎嗰個俾我...唔係呢個丫～嗰個嗰個～」

『呢個丫嘛～係喇嘛？』

右手右腳…

「唔係丫～嗰個丫～」

『你唔係話呢個咩？』

甩手甩腳…

「就得喇...差少少...仲差少少...」

『掂喇！掂晒喇！』

鳳爪排骨咁搞左好耐...幾經辛苦，終於都紮好左個營...

『嘩…痴線架…真係痴線…痴線架真係…』我將其餘既物資都放入個營裏面先...

「花哈哈～都話實掂架啦～坐陣先～坐陣先～」阿月走埋入黎避避風～

“颼～颼～颼！”

“啪啪啪啪啪啪啪啪啪啪啪啪啪啪”

“颼～颼～颼！”

“啪啪啪啪啪啪啪啪啪啪啪啪啪啪”

『大風到吹到啪啪啪啪啪啪啪啪啪啪啪啪啪啪聲～真係好勁囉～夜晚會唔會仲誇張D？』我有D擔心...如果再大風D，會唔會真係連人帶營吹落山...

「聽講夜D真係會再大風D架～不過我諗我地兩個加埋應該無咁易吹得走掛～」阿月放好個背囊之後，喺裏面摷下摷下...

『我地兩個加埋？』點解會係我地兩個加埋架？

「係丫～再加埋個袋囉...電筒囉...各樣那樣囉...我諗夠重既～」阿月繼續喺個袋裏面拎D電筒丫...水壺丫...

『我同你一齊瞓同一個營？！』我無咁諗過架喎...

乜唔係各自各一個營咁瞓架咩？

我真心無諗過要同阿月一齊瞓...

「你唔係丫化？咁既時勢仲諗住各自各起個營丫？起一個都咁辛苦喇～一陣真係吹走埋，咁就GG喇～」阿月拎一拎起部相機，搞下搞下…

但係要我同你一齊瞓，我覺得仲更加會GG喎...

「你唔係怕羞丫化？」阿月對我莞爾一笑…

『痴線！怕乜鬼野羞丫？無啦啦做咩野要怕羞丫？怕邊個羞丫？痴線！』就算吹我落山都唔會認我係怕羞架喇！

「咁咪得囉～快D拎部相機出黎～影D靚相先啦～」阿月已經喺道試緊機...

『哦哦...』我都喺我個背囊道摷返部相機出黎...

真係得？

真係無問題？

瞓同一個營喎...

雖然話今日個山頭乜人都無，就係得我地兩個...真係姦左阿月都無人知...

但係分營瞓既話，分隔既距離開D，無咁容易做錯事丫嘛…

瞓埋同一個營，阻隔少D...理智都薄弱D...好易出事架喎...

「快D啦～仲諗～」阿月已經孭好部相機，催促我快手D...

『哦哦...』蝦餃就蝦餃，燒賣就燒賣！有咩今晚先再算啦！

插返張卡...上返支鏡...入埋舊電...“咔嚓...咔嚓...”試過部機係OK...孭好部機...

“颼～颼～颼！”出面真係大風到痴孖肺...

我個人一出個營，D頭髮就俾D風吹到成隻Angry Bird咁...

真係顧得個頭又理唔到個髻...

「喂喂～飛揚～幫我影張丫～」阿月已經走到去遠遠既另一間石屋旁邊...

『哦哦...』我用手上既D800E對準阿月...

“咔嚓...”

「繼續～」阿月又走去另一邊...

『哦哦...』

“咔嚓...咔嚓...咔嚓...咔嚓...咔嚓...咔嚓...咔嚓...咔嚓...咔嚓...”

阿月一邊喺山頭上面走黎走去，一邊擺出唔同既Pose...

雖然阿月不停咁擺出唔同既Pose，但阿月既Pose又同Ashlynn以前擺開既好唔同。

Ashlynn擺親既，都好似D專業Model咁...

但阿月就好似一隻蝴蝶咁...

即係點？你會覺得一隻蝴蝶會擺出乜野既Pose？

就係無Pose...

一隻蝴蝶，又點會無啦啦走去擺Pose呢？

佢只會喺空氣之中，拍下拍下對翼，輕舞...輕舞...

唔需要刻意擺出任何Pose，只要自由自在咁，喺空氣之中輕輕舞著舞著，都足以吸引世人既目光...

「喂～到你擺D Pose～我幫你影丫～」喺遠處既阿月，拎起手中既相機，瞄準住我...

『哦哦...』正當我想放低手中既相機之時...

“颼！”一道猛風一吹...

阿月條馬尾就俾呢道猛風吹散...長長秀髮喺空氣中飄逸...

我第一時間拎返起手中既相機，立刻捉緊呢一刻！

“咔嚓”

我眼定定咁，望住LED顯示器裏面既阿月...

真係好靚…

呢朵曇花真係好靚...

曇花…

我記得細細個既時候，老豆種左棵曇花。

有一晚，老豆話棵曇花將會開花，叫我地一家三口一齊睇。(嗰陣時，老媽子個肚裏面仲陀住阿Wing。)

不過我就聽過老師講，曇花只會開一晚，第二朝早就會謝...

為左唔想有一種得到後失去既心情，我好早就瞓左，無等佢開花...

第二朝一起身，我就走去望一望朵曇花...

果然...曇花已經凋謝...

我無親眼見到朵曇花有幾靚，只係由老豆同老媽子口中吞吞吐吐咁轉述...

我兩老都唔係文人，自少讀書唔多～

可以簡單形容到曇花雪白明光，有如清秀脫俗，純潔無瑕的少女。

花瓣透白，在交疊之間化為輪狀，盛放有如夜空明月散發陣陣光芒...算係咁啦～

不過，喺我老豆一邊形容曇花有幾靚之時，佢面上總有帶一點點可惜之情...

我到而家都唔會忘記...

或者呢種就係對曇花一現既惋惜之情...

當時年少既我，無膽去承受呢種剎那火花既傷感...

今日，我無心之下竟然偶爾遇上...

我唔知道呢D係唔係上天刻意既巧妙安排...

或者呢D就係叫做冥冥中自有主宰，避無可避...

“曇花一現，只為韋陀。”

你既韋陀，又係邊個？

「喂～睇得咁入神，睇緊乜？」阿月行到埋我身邊，望一望個LED顯示器...

阿月望多望...打量左一下...

「嗯～呢張又影得幾好喎～果然有返咁上下～嘿嘿～證明我捉你上山幫我影相既想法係無錯既～」阿月對住個LED顯示器莞爾一笑…

『下...乜你捉我上黎既目的，就係要我幫你影相咋...』我總有一種...好似俾人利用既感覺...

「仲有俾我影囉～黎～快D擺D Pose俾我影下～」阿月行後兩步，舉起部影機，瞄準住我...

我生硬咁擺一擺Pose...

『喂喂～唔好成個木頭人咁好唔好～』阿月對我指指點點...

平時要我影人就影得多姐...俾人影喎...有幾何...

「嗱～你聽我講～個樣要有自信D...自信呀唔係叫你乸埋口面呀！高低膊...高低膊唔係長短手呀！係喇係喇...側側地個頭...側側地呀唔係瞓捩頸呀！係喇...無錯...少少好喇唔好Over左...左腳輕微曲一曲...曲一曲呀唔係叫你提起呀！哎呀～你係唔係有亞氏保加症架？」阿月一路係咁指示我...

我就一路跟住阿月既指示擺出唔同既Pose...

“咔嚓...咔嚓...咔嚓...咔嚓...咔嚓...咔嚓...咔嚓...咔嚓...咔嚓...”

喺唔同既位置，唔同既角度，影左好多張之後...

「嗱～你睇下我影得你靚唔靚仔喇～」阿月隊左佢部機俾我睇...

我拎一拎起手，望一望個LED顯示器...

『又真係幾好喎...』我睇住一張又一張阿月幫我影既相...

我好似從來都未試過，喺相機個LED顯示器裏面見到自己...

我真係好少被人影...

應該話好少會有人會用心替我影一張相...

「咩幾好丫？係好好丫～由神級攝影大師－羅海月影架喎～簡直係世界級靚相啦～」阿月一副高傲自滿既死人樣...

咩叫不可一世...

「黎黎黎～而家係影黃昏最好既時候～快D幫我影多幾張～」阿月一邊跑去遠處，一邊大嗌...

『哦哦...』望住眼前呢個阿月，總係覺得...好唔實在...

一個好似好會關心我既人，但又好似極度飄忽...

捉不緊，握不穩...

又好似一隻風箏咁，你捉住條線，佢就喺天空上面拉下拉下...

好似一直掙扎...想掙脫你既擺佈...

你唔會知，條線會喺幾時斷...

遙遠既未來？定係下一秒？

或者就喺你仲猶豫緊既時候，佢已經自由自在咁翱翔天際...