同阿月喺山上周圍影,四圍影~

成個日落黃昏景緻都俾我地影云晒~

而個天都開始黑...已經天黑...

“颼~颼~颼!”風仲要越吹越猛…“颼~颼~颼!”越吹越狂…

『喂喂…得唔得架…會唔會搞到變山火架?』我坐喺大大個Gas爐前面,護住阿月起緊個爐...





「放心喎~一定無事既~」阿月起勢咁扭個打火器...

“啪...啪...啪啪...啪啪啪...啪啪啪啪...”

『我唔想Call飛行服務隊黎救我地丫...』我望住有D雞手鴨腳既阿月...

「都話一定無事咯~信下我得唔得架姐?」阿月仲係好專心咁扭...

“啪啪...啪啪啪...啪啪啪啪...啪!”幾經辛苦,終於起到個火!





「得左~嗱~我都話一定得架啦~」阿月啪一啪雙手。

『我無話你起唔到個火...我係話怕會搞到變山火...』萬里無人,水源就係得我地帶黎嗰幾支水...

萬一真係燒著周圍D野草,真係想搵水救都無...

到時就真係不能同年同月同日生,但就可以同年同月同日變燒豬喇...

「放心啦~我地呢邊都無乜雜草~仲有而家咩季節呀?D草有水份架嘛~邊有咁易著?有無常識架你?就算真係燒得著,踩一踩都熄啦~」阿月送左對冷眼俾我...





『彩彩彩彩彩~唔好講埋呢D野!開口中丫~』我無常識喎?我呢D叫小心...

小心駛得萬年船~萬事都要有定應變措施!

「花哈哈~咁迷信架你?好喇好喇~我去拎D野食出黎先~你睇住個火~」阿月拍拍籮柚拍拍手,向住個帳篷行過去。

望住個火俾風吹到擺下擺下...

Gas爐既火都俾風吹到咁...

我用手護一護住個火...

你唔好熄丫...阿月好辛苦先起到你出黎架...頂住丫...唔好輸俾D風丫...

望住個火,總係覺得好有親切感...





親切到...好似望緊自己個心一樣...

一顆脆弱既心靈...

由阿月帶起既心靈...

係唔係就好似卡西火一樣呢?

「登登登登~睇下我地今晚有乜好野食?」阿月左手拎住包牛扒,右手拎住包雞翼...仲有包牛油...彈下彈下咁彈過黎。

『嘩~上山登膠食牛扒雞翼?咁豐富丫?』我不禁要恥笑一下阿月~

有幾多人上山登膠,會食得咁豐富架?





求求其其公仔麵加條腸就算架啦~

「上山登膠識得食梗係食牛扒架啦~唔識野~」阿月得得戚戚咁望一望我。

『咁有無紅酒添丫?』有牛扒又點少得紅酒丫?

「丫~你提醒左我添~」阿月放低左D牛扒雞翼牛油之後,又彈下彈下彈返去個帳篷裏面...

唔係真係有紅酒丫化?我吹下架咋喎...

望住阿月既身影,喺個帳篷裏面搵下搵下...又摷下摷下咁...

過左無幾耐...

「登登登登~紅酒就無喇~82年利賓納就有兩支~」阿月左手一支,右手又一支膠樽裝利賓納,彈下彈下咁彈過黎~





『82年...會唔會死人架~』我拎一拎過阿月手中支利賓納...

「痴線既~人地D 82年Lafite咪又係用提子釀成~一樣架姐~」阿月一扭開個蓋,咕碌咕碌咁飲。

我偷偷望一望個日期...車~八咩二姐~咪又係寫住2015年先過期~

「做咩丫?你唔係真係信我會俾支82年利賓納你飲丫化?」阿月對我莞爾一笑…

『係丫~你講我就信架喇~』你有乜做唔出先得架...

「花哈哈~你係唔係真係咁天真?咁易俾人呃丫?」阿月擰一擰頭…

我呢D唔係叫做天真...更唔係容易俾人呃...





我只係容易俾你呃姐...

我都唔明點解,我對你好似總係言聽計從咁既樣...

只要係出自阿月口,我就差唔多可以話信到十足十...

就算明知有可能係講笑...講大話...除口噏下...我都會放喺心裏面...

我...根本就係阿月手中既布娃娃...

阿月鍾意點舞,我就跟住點跳...

「好~煮左塊牛扒先~我買左四塊牛扒丫~我諗住兩塊就咁煎到五成,另外兩塊切粒炒好唔好?」阿月放D牛油落個煎Pan道。

『你唔係乜都自把自為架咩?做咩要問我呢?』我冷眼望一望阿月。

「丫~俾個機會你發表下意見姐~咁寸嘴既?好丫~以後都唔問你野~我自把自為算數~」阿月拎出兩塊牛扒,放到煎Pan上。

呢個羅海月...

假如你會問我意見既話,我又唔介意花多D時間分析下,認認真真咁為你解答疑難丫~

只怕今次係最後一次姐...

“吱...吱...吱吱...”望住阿月又細心,又耐心咁煎牛扒...

好窩心呢...

好耐好耐都無見過,阿月煮野食既樣...

除左嗰次病,阿月日日上黎煲粥我俾食之外,就係我地發展地下情無幾耐,我上佢屋企做功課既時候...

每次上阿月屋企做功課加溫書,都會搞到唔記得時間...

到左夜晚,阿月都話要親自下餐,煮D好野俾我食~

阿月自細D烹任功夫已經非常了得~

佢話自細既我的志願就係要做個入得廚房,出得廳堂既事業型女強人喎~

真係唔知邊個可以咁好彩,娶到個Superwoman返屋企喇~

不過講返轉頭...其實當年我唔係搞到唔記得時間...

我係有心唔留意時間...

我想可以餐餐都食到,由阿月親手整既餸菜...

我正正就係想娶到眼前呢個Superwoman既凡人...

「好香丫~D牛油果然可以香遍全個山頭~唔知呢道會唔會有狼架呢?如果有既話,一定會俾D牛油香味引晒過黎~」阿月一邊煎牛扒,一邊大力索幾下。

『傻架咩~呢道係香港丫~點會無啦啦有狼出現架?』阿月真係...唔係唔知香港有幾貧乏嘛?

「車~野豬都有啦~」阿月係都要駁一駁~

「你咪係嗰隻波羅的海的一隻豬囉~」我指一指住阿月黎笑~

「我係豬既話,你咪係嗰隻狼囉~」阿月對我莞爾一笑…

狼...月...

如果我係狼既話,我既嚎叫聲都係為左向遠在天邊既明月,傳達我對佢既思念...

「差唔多喇~差唔多喇~丫~等我拎埋D碟出黎先~幫我睇住個火~」阿月一起身,就彈下彈下咁彈去帳篷...

『哦...』望住阿月既背影,幾時都係一樣,總係覺得好難捉摸...

再望一望上天空,月亮已經出左黎...

滿月喎~今晚係初一定十五呢?

望住掛喺夜幕上既明月...唉...

有D乜野係見得到,但又觸不到?

明明我地可以好清楚咁,望到明月掛天際~但偏偏就係天際太遠,遠到遙不可及...

我只可以遠遠咁望住你,但又唔可以走近幾步,親近一下你...你叫我情何以堪呢...

「喂~我叫你幫我睇住我火,你就掛住擔天望地!」阿月谷起塊面,拎住兩隻不銹鋼碟由帳篷行返過黎...

『放心喎~我有睇住架喎~嗱你睇下~塊牛扒仲係咁靚仔~』我夾起塊牛扒,放到阿月隻不銹鋼碟上。

「唔好講到好似係你既功勞咁~兩塊扒都係我煎架~」阿月再遞起另一隻碟。

『知喇知喇~你最本事喇得未~』我再將另一塊牛扒,放到另一隻不銹鋼碟上後...

「放埋D雞翼落去先~一邊煎住D雞翼,一邊食牛扒~」阿月單手拎起包雞翼...

『等我幫你啦~』我又單手幫阿月...

我地兩個人,一人一隻手,夾手夾腳咁將D雞翼放到落個煎Pan道...

「搞掂~開餐~」阿月坐到埋我身邊,貼一貼實我...

俾阿月貼一貼實,我有少少唔習慣...

點解會咁架呢?

其實,我應該一直都好期待有呢一刻先係...

但點解當呢一刻終於發生之時,我總係好似無乜心理準備咁架呢...

「夜空真係好靚呢~」阿月叉起塊牛扒,一邊咬住塊扒喺嘴邊,一邊講...

望到咁樣食牛扒既阿月,我不禁笑左一笑…

「笑咩喎~」阿月仲係一邊咬下咬下塊扒,一邊射喱眼咁望住我黎問...

『無無~係囉...夜空真係好靚~』有明月相伴既夜空真係特別靚~

「再夜D~個天再黑D~滿天星光下既夜空就仲靚~」阿月繼續咬下咬下塊扒咁望住個夜空...

我望住咁樣食牛扒既阿月,真係忍唔住又笑左一笑…

阿月呢個樣真係太搞笑~

一個悽美動人既貴氣女子,就咁叉住塊牛扒咬下咬下...實在格格不入~

「喂…你笑夠未?」阿月擔住返牛扒,送左我一對冷眼...

『你真係好搞笑~』阿月仲要係講野講到一舊舊咁~真係好搞笑~

「我懶得理你~」阿月再次將視線放返去天際中...

“颼!”此時有一道猛風一吹!

「嘩!」阿月慘叫一聲,雙眼緊閉!

『做咩丫?』我望住仲緊緊咬住塊牛扒喺口裏面唔放既阿月...

「吹沙入眼...吹沙入眼...」阿月含糊不清既聲音,令我又想笑起上黎~

『哈哈~鬼叫你對眼咁鬼大對丫~梗係容易吹沙入眼啦~黎黎黎...等我幫你吹返D沙出黎...』我放低手上碟牛扒,扶一扶住阿月。

「我D眼睫毛都好長好密架囉好唔好?我一直都唔信就咁吹係可以吹返D沙出黎囉~」阿月仲係猛咁合埋雙眼...

『信我啦~你放開口中既牛扒先~你一放,塊扒就落返隻碟道架喇...』我仲係扶一扶住阿月,等佢個人定D...

阿月慢慢放開口中塊牛扒,放返落隻碟上面...

『嗱~你放鬆D...放鬆D個人~唔使咁緊張既~』我溫柔咁用兩隻手指撐開阿月隻大眼仔...

“呼...呼...”輕輕力吹一吹...

『好D未丫?』我問一問阿月。

「都唔係呢隻...」阿月冷冷回一句...

頂...唔係呢隻你又唔早D講...

我再溫柔咁用兩隻手指撐開阿月另一隻大眼仔...

“呼...呼...”再輕輕力吹一吹...

『好唔好D丫?』你唔會話俾我聽又唔係呢隻掛?

「嗯...嗯...」阿月眼定定咁望住我,點一點頭...

我望住眼前一雙大眼睛...

水汪汪既大眼睛...

眼裏充滿住...

為何你的眼裏,總帶著點點憂鬱?

為何你的笑裏,總帶著點點哀愁?

為何你總會令我擔心?

為何我總會替你難過?

為何我總會愛著你這個...悽美動人的波羅的海裏的一顆夜明珠...

「我望到...我望到你眼裏面既我...」阿月用上一對憂鬱既眼神同我講...

『眼珠會倒影出眼前既事物架嘛~』我合埋雙眼,與阿月再次保持一定既距離...

我唔想太接近阿月...

我唔敢太接近阿月...

因為...我喺阿月眼裏...見唔到自己...

不單止心裏...就連眼裏也沒有我...

我係清楚明白...我地之間既距離,唔單止係你總會走在我前面...

而係...我自己都唔敢走近...

因為我知道,我越係要走近,我就會越傷...

你就好似一件用各式各樣唔同既刀劍利器,製成既藝術品...

充滿殺傷力...

只要我稍有不慎...被你吸引...無意走近...我都會遍體鱗傷...體無完膚...

「D雞翼燶喇!要翻喇!要翻喇!」阿月一個轉身,彈下彈下咁彈返埋去爐邊...

阿月...我真係好想問你一句...究竟有邊一個,可以讓你放下身上既利器?