返到屋企,放低晒D野,沖個靚涼,換件衫,開著部電腦抄返D相過去先~

好彩仲有D相可以證明呢段同阿月一齊既時光係真實,唔係發夢~

好彩仲有D相可以俾我再三回味~

細味品嚐一下自己既傑作...真係好靚呢~

特別係影阿月既時候~





縱使天上既明月有多美,都唔夠地面上既羅海月美~

唔覺唔覺...原來都影左二千幾張架喇?

要睇真係唔知要睇幾耐...

唔緊要啦~呢輯相我會好好收起佢~

不時都拎返出黎回味下~





回味一下夢境成真既一晚...

唔知幾時再可以與阿月相見呢?

「會既...喺適當既時候...」

唔知阿月所講既適當時候係幾時呢...

究竟係唔係真係會有呢一日呢...





我唔知道...我從來都唔知道上天既心意...更唔明白阿月既心意...

點都好啦~要來便來~

無人知道聽日會係點~

但呢一刻就要為聽日作好準備~

岩既~做人真係要積極D既~

而家要做既野就係...瞓返覺先~

好攰呀真係~

喺山上瞓都唔係瞓得咁好…





又唔係瞓得耐...

而家最好就係瞓返陣先~其他事就遲D先算啦~

我抄多份Backup落個外置Hard Disk道之後,一個箭步就衝返上張床~

瞓返喺自己既上格床...既熟悉,又陌生...

好似好耐都無自己一個瞓喺自己張床道...

幾晚都係同阿Wing瞓佢張床,前晚就同Emma瞓呢張床...

Emma…唔知Emma而家做緊乜呢?





有無返工呢?我諗就一定無返啦~

佢咁怕自己一個人...同隻肥豬獨處又咁危險...

都係唔返好過返!

Emma…Emma…Emma…Emma...唔...

打個電話俾佢好唔好?

唔知Emma起左身未呢?

如果未起既話,嘈醒左Emma會唔會唔係咁好?

都係Send個WhatsApp俾Emma啦~





拎起部電話,心心急急咁撳開個WhatsApp...

“Emma~我返左屋企喇~”

唔夠兩秒,我已經見到Emma上左線。仲輸入中添...

“叮” “平安嘛?好玩嘛?”

“OK丫~影左好多靚相~有機會俾你睇下丫~”

“叮” “嗯~好丫好丫~期待睇飛揚大師既傑作~”

哈...大師喎~我又稱唔上...





“唔大師啦~新手上路~”

又唔使兩秒...

“叮” “唔係丫~我睇過你之前D相~真係影得好靚~好有大師級既風範~”

如果你有睇過阿月影既相,我諗你唔會咁講...

“多謝你丫~有你既欣賞,我已經好開心~係呢~你做緊咩呢?”

“叮” “等你返黎囉~”

下...等我返黎?

唔係已經等足一日一夜丫化...

Emma咁樣做...係唔係鍾意我呢?

屌!毒撚幾時都係Ready好自High Mode!

“傻豬~有乜好等姐~係呢~同爺爺好返未丫?”

“叮” “咩好返未丫?”

下?Emma唔係話嬲左爺爺架咩?

又唔使兩秒...

“叮” “好返啦~好返啦~我地仲好過之前添啦~”

哦~好到都無左件事添喇~

咁都好既~幾驚因為我,搞到佢地兩爺孫關係破裂...

到時我就真係千古罪人喇...

“叮” “爺爺話見你咁老實 將成副身家全部俾晒你~”

俾...俾...俾晒成副身家我?!唔係咁開心呀化?!

幾個億...幾十個億...分分鐘幾百個億喎...

真係好到無人信!

“叮” “將個孫女嫁埋俾你~”

將個孫女嫁埋俾我?!

發達喇呢次!

真係仲爽過又有獎抽,又有女溝!

咪住...等等先...呢兩句對白...好似...咁熟口熟面既?

益力多?!

“咪玩啦Emma~”

Emma睇得太多廣告喇~

“叮” “哈哈哈~我講真架~我爺爺話你係老實人~幾欣賞你喎~”

下?係唔係真架…咁咁…

咁係唔係真係又俾晒成副身家我,又將個孫女嫁埋俾我?

“錯愛喇錯愛喇...”

發撚夢啦死窮毒撚~

童話故事都係呃鳩D細路仔架咋~

“叮” “得閒約個時間 同佢老人家飲個茶好嘛?”

Emma好似仲未玩夠咁...

無錯,我仲係覺得佢玩緊!

邊有有錢富豪會睇得起我地呢D下等人...

Emma既爺爺喎...口氣大到...領教過啦...

真係見過鬼仲唔怕黑咩...

世上又有幾多個有錢人,會好似Emma咁好丫...

Emma真係太好喇...

“好丫好丫~約個時間丫~”為左唔好令Emma尷尬,客套說話都要講下既...

“叮” “係架喇喎~我相信爺爺都好期待同你再次見面~”

期待...講真嗰句,如果Emma爺爺今次要喺Emma面前數臭我既話,我都唔知點算...

我唔係話怕出羞,我呢D下等人有咩羞怕出丫~

我係怕會令Emma難受...

一陣又搞到佢地兩爺孫反檯既話,你叫我點收科呢?

“嗯~我都好期待丫~”都係嗰句啦...為左唔好令Emma尷尬,客套說話都要講下既...“不過我而家想去瞓個覺先~尋晚喺山上瞓得唔好~”

“叮” “嗯~咁好啦~瞓好D喇~早抖喇飛揚~”

“早抖”

唔夠三秒...

“叮” “…”

Emma Send左一張相過黎...

係Emma瞓左喺張白色既床上面,攬住左劍熊,單起隻眼仔,𡁯長個嘴仔,假裝錫一錫劍熊...

點解係錫劍熊唔係錫我呀?

點解呀?

Why Not Me?!?!?!?!

屌你老味!益撚晒隻劍熊呀真係...

呢一刻,我真係好想做Emma懷抱中既劍熊...

我唔理佢身上有無沾過我D精液...有無沾過Ashlynn D淫水...

我乜撚都唔理!

我又要Emma抱抱...我又要Emma錫錫…

屌~正一FF撚!

講到尾都只係一味識FF既死毒撚!

你話丫!除左FF之外,我仲識D乜撚野?!

乜撚都唔識!

瞓啦柒頭!

瞓喺張床上面,伏枕毒輾轉..

諗下諗下阿月...經過尋晚之後,究竟佢心裏有無我呢?

唔好話多丫...少少都好丫...

但係我總係覺得,阿月心裏係有一個人...

雖然阿月無親口講過,又無提及過,但唔知點解呢,喺佢既眼中,總係好似有一個人...

次次望住阿月對眼,由佢對眼裏面,硬係望唔到自己...

唔好話眼喇...就算係身處同一個空間,我都硬係唔覺得佢有在意我...留意我...為意我...

究竟喺阿月心裏既呢個人,會係點既樣架呢?

又係一個點既人黎架呢?

我好想問...但又唔敢問...

每個人都有一段刻骨銘心既傷痕...

而呢一個人,一定影響得阿月好深,先會令佢一直帶住呢個人喺心裏面生活...

所以我唔敢觸動到佢...我怕我一觸及到,阿月會失控暴走...

帶住一個人喺心裏面生活...影響得好深...

就如我自己一樣...

無錯喇...我何嘗唔係俾阿月傷得太深,一直都將佢帶喺心裏面呢...

搞到我同Ashlynn一齊既時候...

係囉...我同Ashlynn一齊既時候,佢成日都話我心不在焉...

就好似阿月俾我既感覺一樣...

帶住呢種感覺生活,仲點樣可以再同另一個相處...

好似Emma咁,當Emma提起阿月,我都有D失控...其實都唔係有D...

好彩Emma都唔算好在意我,好留意我,好為意我...

好彩Emma唔係鍾意我,唔係同緊我一齊...

如果唔係?我諗佢一定好感覺到我總係心不在焉...

就好似Ashlynn咁...就好似我咁...一定好難受...

我就話明知阿月心中有另一個,都心甘命抵咁盅個頭埋去姐~

但如果話係Emma...

阿月...Emma...阿月...Emma...阿月...阿月...Emma...Emma...阿月...Emma...阿月...阿月...Emma...阿月...阿月...

「究竟你鍾意我D乜呢?」阿月對我莞爾一笑…

『因為我地係命中注定...』我毫無保留咁講出心中既說話...

我好似好耐都無試過,對住阿月可以咁赤裸裸...

「命中注定...我地以前成日都講~」阿月轉一轉身,背一背向我...

『無錯...我地以前成日都講...但我唔會覺得係得個講字!我係真心覺得,我地係命中注定...呢種感覺一定唔會有錯...』我好清楚,世上唔會有另一個你。

「但我唔想你咁...我唔想再一次佔有你地...」阿月仍然背住我,聲線中帶點抽泣...

『但我想俾你佔有...』我攬住左背住我既阿月...

我唔知你所指既“你地”係邊個你地...

有幾多個你地...有幾多過他...

唔重要…真係唔重要…只要可以再同你一齊,我願再做一次你背後既男人...躲喺月亮後面,唔見得光既男人...偷偷摸摸既男人!

「值得咩?」阿月既身體一直震...聲線變得扭曲...

扭曲既聲音...

「你真係覺得咁樣值得咩?」阿月既聲音繼續扭曲...扭曲到好似唔似係阿月把聲...

「為左佢...你真係甘心再做一次唔見得光既男人咩?」阿月把聲...

呢把聲音...

唔係阿月…

「躲喺幽暗既角落,偷偷望住月亮既光芒...就連正視一眼都會灰飛煙滅...唔見得光,偷偷摸摸...世人唔認同你...就連你自己都唔能夠認同你...值得咩?」阿月轉一轉身...唔係!

係Emma...

我本來攬住既阿月,突然變左做眼前既Emma...

Emma向我送上憐憫既眼神...

我感到好辛苦...好難受...

我就好似一隻小鬼一樣,見到天使發出神聖既光芒,我受唔住...好刺眼...

『唔好咁望住我...唔好...』我不禁用手擋一擋住聖光...

「點解?點解你唔敢正視我?點解?點解你一直唔肯正視自己個心?」Emma步步進逼...

『我無唔敢正視你...我無唔肯正視自己個心!』我無...我從來都無!

「你無?你敢講你無?你敢講你對我無意思?」Emma行到我面前,捉一捉住我兩手…

『我...我係對你有意思...但咁又點?你...我實在襯你唔起...』我算係D乜?I am zero I am nothing!

「定係因為我?」突然又聽見阿月把聲...

我望一望面前既Emma,突然又變返阿月!

『我...無可能將你放低...』我無可能...我無可能唔愛你...

「無話無可能,只有你試唔試。」阿月對我莞爾一笑。

『試?我唔係無試過...我試過...結果呢?我傷害左人!我帶住你喺我心裏面,愛另一個人...結果我傷害左佢呀!』我傷害左Ashlynn...

無錯...係我傷害左Ashlynn...

我無全心全意咁愛Ashlynn...係我欠左佢...

「你都知你欠左我架咩?」眼前既阿月,突然變成Ashlynn...

仲有佢身邊既...James...

James搭住左Ashlynn既膊頭...

「係你欠我在先...係你借我黎做阿月既代替品...我離開你,我無錯架!」Ashlynn攬住左James...

唔係…唔係咁架…我...我唔係全心要搵你黎做阿月既代替品...

阿月...無人可以代替到阿月...無人...

「我唔可以一直都喺你心裏面...你都要生活...你都要自由自在咁喺天空上飛翔...讓我飛揚...」本來既Ashlynn又變回阿月...背住左我既阿月...

讓你飛揚?

一直以黎,係我無釋放自己,定係無釋放你?

係我一直留喺地面,定係我拖累左你?

一直以黎,我就好似只係顧住自己有幾愛你,而無諗過會唔會影響到你...

我愛你你係知道,你係好清楚...

但我對你既愛,會唔會成為你勇往直前既阻礙呢?

呢一點,我真係無諗過...

愛,可以令人感到幸福。

愛,亦可以令人感到纏擾...

無錯喇...俾一個自己唔愛既人愛上,係一種纏擾...

無錯...係我一直阻礙左你向住天空飛揚...

你應該可以飛得更高更遠...向住遠方飛向天際...

「讓我飛揚...讓我飛揚...讓我飛揚...讓我飛揚...」背住我既阿月突然化為一隻啡色蝴蝶...

蝴蝶輕輕拍一拍對翅膀...擺下攞下...飄下飄下...向住天際輕舞飛揚...

『阿月...阿月...』我萬分不捨咁望住阿月越飛越遠...

直至啡色既蝴蝶慢慢變成灰色...與整個空間變成灰色...分裂...飄散...

『阿月...』當我漸漸有返意識既時候,我發現我眼角好似濕濕地...

雙手仲要呈擁抱姿態...

『係發夢...唔係...』唔係發夢...係我心中最真實既想法...

夢係反映人心中最赤裸既一面...

頭先既夢,好明顯就係我心中最無法正視既真實一面...

比真實更真實...

阿月...Emma...Ashlynn...

我無辦法放低阿月...害左Ashlynn...接受唔到Emma...

所謂既真心,係唔可以同一時間分俾唔同既人...

愛住一個唔愛自己既人,係痛苦...

愛住一個唔愛自己既人去愛另一個人,係兩個人都痛苦...

愛住一個唔愛自己既人去愛另一個人,而唔愛自己既人都知道既話,就係三個人都痛苦...

紅線一直連錯,姻緣一直錯配,痛苦只會一直輪迴...

一個沒完沒了既因果關係...

Emma…

錯過一次,唔應該再錯多一次...

假如我仲未放低阿月之前,接受Emma既話,只會傷左Emma,痛左Emma...

Emma…一個咁好既女仔,係應該搵返個全心全意愛佢既男人...錫佢既男人...俾到幸福佢既男人...

我唔可以咁自私...已經自私過一次...已經傷害過一個人...傷害過Ashlynn...我唔可以咁自私架!

自私?

屌!自乜私姐?

Emma有話對我有好感咩?

Emma有話鍾意我咩?

Emma有話愛上我咩?

Emma有話想同我一齊咩?

一切都係自己喺張床道FF,喺道自High!

醒下啦~柒頭~人地Emma好心地,憐憫世人咋!

等我仲喺道不知天高地厚,侮辱人地,無恥咁話人地愛上自己!

無鏡都屙篤尿照下自己個衰樣呀~

好似我呢D柒頭,無一可取!同到天使做到朋友咪算執到囉!

我地呢D咁唔起眼既人,同舊垃圾又有乜分別?

嗱~我都話人喺清醒既時候,保護意識特別強烈,唔會俾自己亂諗野架啦~

乖乖地,唔好再唔知醜,自己攞黎柒喇~

就喺我仲喺張床上面碌下碌下,又不斷提醒自己唔好再柒落去既同時...

“And you don't seem to understand A shame you seemed an honest man”

電話響?