同阿月坐喺草地上,吹住風,望住個天空,等待黎明破曉。

等下等下,個天都開始藍,好快就天光。

我一直都好好咁記住今晚既每一分,每一秒...

與阿月相處既美好時光...

我唔知道,以後再有無咁既機會...





我唔知道,再有無機會欣賞咁美麗既景緻...

我唔知道,再有無機會可以同阿月單獨相處...

當日出之時,就注定左有日落既一刻...

看似好消極,但係事實。

我地可以積極D去諗:「有日落,就代表有聽日既日出。」





假如仲未世界末日既話。

要知道,同阿月相處,每日都好似世界末日前一日一樣~

你總係會有一種感覺,唔知幾時,會唔會係下一秒,佢就會無聲無息咁消失於天與地。

或者我就只可以...捉緊這一刻...這一秒...

「好靚丫~」阿月望住個雲海慢慢變色,撳實個快門...





我亦都揸住個快門掣,撳一撳實...

睇住個一望無際既雲海慢慢由灰色變成藍藍地色...再由藍藍地色,慢慢變成金黃色...

而四周仲要有少少霧氣...

金黃色既日出照射下,霧氣都變得金金黃黃...

就好似仙境一般...夢境一樣...

大自然既偉大...世人係無辦法取締得到。

一張又一張神之手作,穿過幾塊玻璃鏡片,攝入感光元件,存入CF Card裏面...

「天光喇...新既一天又到來...開始...終止...生生不息...每日都不停咁發生呢...」阿月帶住一絲絲惋惜,望住個太陽。





人地話,日出會為人帶黎希望~

但喺阿月面前,日出就好似帶黎絕望...

「肚餓喇~食個早餐先啦~我地仲有罐頭湯同麵包丫~」阿月一邊講,一邊轉身背住太陽行去帳篷...

或者我明白,點解你對住日出既時候,會格外惋惜。

可能就係因為見光死...怕喺人前表露真身。

唔敢以真身示人,唔敢面對真正既自己。

每日都要將個真心收喺黑暗既角落,封上重重高高既厚牆。





保護我地自己既心靈,免受外來既傷害...

其實...我同你都係同類人呢...羅海月...

「你呢個爛鬼Gas爐係乜鬼牌子呢架?撻極都唔著既?」阿月谷起塊面豬登,起勢咁扭個點火掣...

『AVPE囉~喺淘寶淘返黎架~』唔好話你手氣唔好...

「AVPE防毒軟件黎架?聽都未聽過!定係支Gas無氣丫?」阿月由個爐裏面,拎返支Gas出黎,搖左幾下...

『新買架!邊會無氣丫?』我由阿月手中搶返支Gas,放入個爐裏面...

「支Gas又係乜鬼野牌子?乜鬼野RomRom?咩鬼野爛鬼牌子呢架?聽都未聽過!」阿月谷起塊面豬登繼續撻...

“啪啪啪啪啪啪啪啪啪啪啪啪啪啪啪啪啪啪”阿月起勢咁扭!





『咪又係D大陸牌子囉~你唔掂就等我黎喇!』話你細路女唔識野呢真係...

「走開~大陸D野會爆炸架!」阿月推一推開我,自己仲係唔甘心咁起勢撻...

『而家有乜野唔係大陸做架?有無聽過大陸既野有乜唔會爆?炸彈丫~照咁講法,Gas同個爐都唔會爆~你放心繼續撻啦~』全界世也是中國了吧!

「妖!終於撻得著喇!」阿月撻著左個爐之後,瞓左喺草地上面。

望住呢個阿月,真係好想笑出黎~

「喂…你笑乜鬼?有乜咁好笑?」阿月瞓喺草地上面,送左對冷眼俾我...

『無~覺得你好有趣姐~』我回返個認真笑容俾阿月。





「有乜咁有趣~有幾趣~」阿月繼續瞓喺草地上。

『咁大個人,仲係好似好唔定性咁...』我打量一下阿月...

「我都不知幾定性~」阿月咬一咬下唇。

『一時時啦...就係因為一時時,所以先唔定性...』我認真咁望住阿月對眼...

「點呀你?又想同我講D乜丫?又有D乜偉論丫?唔好扮高深啦~」阿月看似唔多在意我既說話。

『我只係想講...係時候喇...你應該要認認真真搵返個人喇...』我知阿月唔會聽得入聽耳,但我都好想可以同佢認認真真咁講一次。

「我已經好認真。真架,我真係好認真。只係...可能仲未係時候。」阿月望住藍色既天空...

仲未係時候...

我地好似一直都唔會知,時候幾時黎到...

幾時先係最岩既時候?

最岩既時候仲有幾耐先黎到?

我地唔知道...我地唔知道...

我地乜都唔知道...

如果我地知道既話,就唔會成日喺岩既時候做錯既野,又要喺錯既時候做岩既野啦...

更悲哀既係,你永遠都唔知道自己得到過D乜,直至到失去既時候...

好真實呢?未算~更真實既係,你永遠都唔知道自己失去左D乜,直至到返唔到轉頭...

「好~食飽飽~」同阿月喺山頭欣賞住日出,食過美滿既早餐...

『嗯~真係好滿足~』有阿月喺我身邊,做乜野事都係咁滿足~

「嗯~不過...係時候要執野走喇~」阿月起一起身,拍一拍手...

『嗯~係時候喇...』霧氣開始蒸發喇...係時候離開呢個疑夢似真既仙境喇...

無論夢境有多美...有多難捨難離...始終都有夢醒既一日...

但假如有得俾我揀既話,我真係唔想醒...

只可惜...多情自古空餘恨,好夢由來最易醒...

越美好既夢,醒得越突然呢...

同阿月夾手夾腳執好晒D有用與無用既野,清理一下地方,執好晒D垃圾,遊多幾轉...

「點丫你?Check過晒無野漏喇嘛?」阿月催一催我...

『嗯嗯...無喇無喇...咩都無喇...』其實我仲想拖耐D...

我唔想咁快就離開...

我唔想咁快同阿月分開...

我真係好想拖長D同阿月相處既時間...

只可惜...拖文堪稱世界級既飛揚,亦都再諗唔到有乜藉口可以為我再拖落去...

「咁行喇~」阿月孭好個背囊,彈一彈,背住夢幻既時光落山...

我跟住阿月身後:『喂~小心D丫~』

「放心啦~你顧住自己仲好啦~一陣你碌落黎,我就真係大件事喇~」阿月行得鬼咁快...

其實到左呢個時候...我都仲係想可以拖耐D...

拖得幾耐得幾耐...

我真係好想可以再給我多一點時間,喺阿月身邊...

唔好話身邊,就算係跟住阿月身後,只要可以俾我見到阿月...俾我陪伴阿月...俾我喺阿月既世界裏面多一分...多一秒...我都已經好滿足...

可惜既係,睇黎阿月無咁既意思...

阿月越行越快...越行越急...俾上山既時候更加快...

咁就當然啦,落山梗係比上山快啦...你話我係唔係拖到技窮呢...

我地好快就落左山,仲好快咁有車上添...

係咁架喇~當你要趕返工既時候,鑊鑊都送車尾~

但你唔想咁快有車上既話呢?架車就一早停定定喺個站道~死都唔開~係都要等埋你~

你話個天係唔係有心玩鳩我架~

鑊鑊都係咁既!

搵似順下我意就唔得既?!

我今世究竟做錯左乜野呀?

點解689咁無恥你唔懲治佢?

點解李+x咁喪盡天良你唔收鳩佢?

我同你無仇無怨就係都要玩死我先安樂架呢?

不過我又唔可以一味鬧個天喎...

其實個天對我都算唔錯...

因為當我地一上到巴士,坐定定之後,阿月好快就瞓著左...

瞓著左當然就唔係重點啦~

重點係,阿月挨左落我個膊頭道瞓...

車窗外既陽光照到阿月既面上,反照出淡淡既光芒...

睇黎阿月好似好攰咁,好似好無力咁,好似放鬆晒成個人落我身上...

而我個鼻就聞到...久違既氣味...

係阿月既氣味...

阿月身上既香味,又勾起左我一D回憶...

讓我記返起阿月第一次瞓喺我膊頭道,都係喺巴士上面...

嗰陣時阿月都好似而家咁...好攰好攰…

攰到成個人都無晒力,好自然咁瞓左落塊玻璃道...

我就拍一拍自己個膊頭,話一話佢:『有個咁舒服既膊頭你都唔瞓,竟然瞓落塊硬掘掘既玻璃道?』

阿月望一望我,諗左一諗,猶猶豫豫咁瞓落我膊頭道...

成程車,阿月都甜絲絲咁瞓喺我既膊頭...

好似瞓得好冧...好似瞓得好舒服...

我望住好似睡公主一樣既阿月,心裏總有一絲絲奇怪既感覺...

幸福真係會降臨喺我身上嘛?

到落車既時候,阿月仲同我講:「你個膊頭又真係幾好瞓喎~」

其實邊道好瞓~

自己知自己事~我個膊頭一D肉都無~分分鐘仲硬過塊玻璃~

我知架~我係知道...我知你只係氹我開心~

其實我真係知道...我係一直都知道...

到左而家,我個膊頭都係無肉,我好怕會令到你唔舒服,瞓得唔好...

我更怕既係你好快會醒...

我唔想你咁快醒...

我好想你可以再瞓耐D...喺我既膊頭上面再瞓耐D...

俾我再感受下你既體溫...你既重量...你既氣味...

再俾多一D時間我...再俾多D機會我...讓我好好咁將你記住...記喺深心最深處...

但當然,縱使我個膊頭有幾好瞓,你瞓得再冧,巴士都總會有到站既一日...

『阿月,起身喇...落車喇…』我輕輕摸一摸阿月隻手...

「嗯嗯...到喇...到屋企喇?丫~我流左D口水落你道丫!」阿月立即摷包紙巾出黎...

『仲未返到屋企丫~傻豬~仲要轉港鐵丫~』睇住阿月幫我抹返佢D口水,我唔覺得嘔心,反而覺得溫馨。

呢種溫馨好似已經好耐都無試過...

好似已經過左好耐好耐...

一個女仔可以瞓到流口水落你膊頭,仲要係你既女神喎...毒撚邊得黎咁好福氣?

而我總覺得,呢D機會真係可一不可再...

神丫~你可唔可以話我知,究竟要我用D乜野,先可以換到同阿月再喺埋一齊?

你就當我不知足...你就當我貪婪啦!

你話俾我聽啦...你就做一次好人,話俾我呢個凡人聽,你想我用D乜黎換?

你就算要我用一生去換一日,我都願架!

只要可以再同阿月一齊...喺埋一齊一日都足夠...我唔貪心架...一日咁多丫...

但當然,上天從來都唔會當面回答世人既提問...

更加唔會答應世人既苦苦哀求...

直至到坐完西鐵,去到阿月屋企樓下,我地既關係都仲係無變...

我地係咩關係?

我都唔知...

我都唔知我同阿月之間,呢種錯綜複雜,糾結離散既感覺係乜野關係...

但就可以好肯定,一定唔係情侶囉...

或者我都好想知道我地係乜野關係...

唔知道有無人可以話俾我知呢?

「飛揚~」阿月轉一轉身,回望身處喺佢身後既我...

『嗯?』我亦都痴痴迷迷咁望住面前既羅海月...

「多謝你...真係好多謝你...多謝你陪我癲左一晚~多謝你陪我瘋狂做愛做既事~」阿月對我莞爾一笑…

『丫...唔使多謝...應該話...我多謝你至真...係你令我再一次瘋狂...』讓我瘋狂正視對你既愛...

「BYE~」正當阿月要轉身之時...

『我地會再見面嘛?』我衝口而出,問左個好戇鳩既問題...

阿月背住我定一定身,諗左一諗,再轉一轉身:「會既...喺適當既時候...」

適當既時候?

幾時會係適當既時候呢?

而適當既時候,又係唔係真係會出現呢?

我都仲未諗得出答案,就只見阿月一個轉身,步入大門...

望住阿月既身影,由我既視線中消失...

再見喇...阿月...喺適當既時候...

喺一邊行返屋企既同時,我一直回味尋晚喺夢境裏面,與阿月共度既時光。

一個發夢都未必再夢得到既夢幻時光...

阿月既好,可能唔係個個都感受得到...

可能真係要相比既話,一定會覺得Emma好過阿月。

可能Emma真係靚過阿月少少、身材正過阿月少少、索過阿月少少、善解人意少少、溫文儒雅少少、有錢多多...

但其實除左講錢之外,阿月同Emma都係不相伯仲。

阿月已經係國色天香~傾國傾城~

所以,如果要比較,已經唔係單憑面貌外型可以分出勝負。

要比既話,就要比同邊個夾。

講到夾,我諗要喺呢個世界上,搵到個夾得到我既話,真係無乜可能...

我記得Ashlynn以前久唔久都會話我係黎自火星~我係唔會忘記佢講過既野...

無乜人諗得明我諗乜...唔知我講乜...唔知我想做乜...唔知我做黎為乜...

根本就同地球人夾唔黎~

“若你喜歡怪人 其實我很美”

係既…如果Ashlynn係地球人,我真係唔識點同地球人相處~

而事實上,世界上有好多好似Ashlynn既人存在~總有一個喺左近~

或者你唔覺...因為你自己都係地球人~

而我成日都話,我架UFO無晒能源咋~唔係既話,我一早走返去火星啦~

喺無辦法之下,我只好期望喺藍星上,會有一個好似我咁唔好彩既火星人,黎左藍星又返唔到去~

我一直都希望可以遇上~

而我又真係曾經遇過...

與阿月既相處,總有一種...他鄉遇故知既感覺...

好明顯,阿月就係呢一個火星人~

迷失喺藍星二十五年,只有阿月俾過呢種感覺我...

所以話,如果要比較同邊個夾D...唔使問一定係阿月...

但係又話分兩頭,如果係Emma既話,又會唔會擦得出新既火花呢?

屌!兩個都咁好...俾你會點揀呀?

真係好難揀呀!好撚煩呀仆街!

如果有得揀既話...

係囉...煩乜春姐?

而家有得我揀咩?

阿月就唔好講啦~

Emma有話過鍾意我咩?

雖然Emma對我真係好似好好咁...

好似好著緊我咁...

好似好有好感咁...

好似鍾鍾地意我咁...

會唔會係咁?

屌~我成日話D高登仔正一FF撚~自己咪又係咁...

人地咁岩唔覺意望到你,你就話人地偷偷地望你。

人地無位企,企喺你隔離,又話人地有心親近你。

人地好心問你有無帶齊野,又話人地留意你。

喺Yahoo知識+上面,見到人地問D咁碌柒既問題,我都不禁要恥笑一下~

屌你老味,明明就係你對人有野,問乜Q野“P.S.佢係唔係鍾意我”?

好撚柒架真係~

你咪撚戇鳩啦~你係乜野新鮮蘿蔔皮?人地點解會鍾意你丫?

問得出呢D問題,都知你係毒撚一條啦~

真係貪你以毒攻毒咩?

你咪打去森美道玩“你知道唔知道 有人掛住你”添呀!

真係笑到人地連早餐都噴埋出黎架!

好喇~到自己既時候,咪一樣係咁撚柒~

唉...所以話呢...瞓喇柒頭!