《港男FF妄誌》: [Day 14－命中注定] ENDING
梳洗完後，換返套衫，望一望仲赤裸裸瞓喺床上既阿Wing...
阿Wing攬一攬住張被，甜絲絲咁望住我笑一笑…
而家既阿Wing，真係十足十一個岩岩扑完野既女朋友。
我跪到阿Wing面前，摸一摸阿Wing既秀髮...
阿Wing面紅紅咁捉一捉住我隻手：「哥哥...無論如何，你都要記住...」
我無等阿Wing講落去：『無論如何，我最愛既女人一定係你。永永遠遠都係你。』
錫一錫阿Wing既嘴仔之後，著返對鞋...
「哥哥～我等你返黎丫～等你今晚返黎再...」阿Wing面紅紅咁望住我笑一笑。
『嗯～今晚我一定會返黎～等我喔～』我向阿Wing報以一個承諾微笑後，打開門...
“咔”踏出門口...望一望殘舊既走廊...望一望被聖光照射住既天井...
係時候...出發！
坐上港鐵後，諗返起尋晚收到既WhatsApp...
一個日期、時間、地點...
日期時間我都清楚，但地點...點解會約喺嗰道架呢？
我總係唔係好明白女仔既心意。
一直都唔明白...
就係因為一直都唔明白女仔既心意，所以我先會錯過左好多好多，唔可以再返轉頭既機會。
有好多人話，人生就好似坐地鐵咁，喺路途中會遇上好多唔同既人。
有D人會早過你上車，同樣亦會有D人早過你落車。
而最後你會係遇到一個岩既人去同一個站落車，定係得返自己一個坐到去到尾站呢？
咁就要睇你識唔識得把握機會...
一個命中注定既機會...
希望...黎緊既日子可以好好把握...唔好再錯過...一次又一次錯過遇上青鳥既機會...
今日既港鐵好似比平日快，比平日順暢。
好快我就已經黎到目的地－香港迪士尼樂園。
今日既天空好清，好好陽光～
藍天白雲～天朗氣清～
沿住天上既聖光帶領下，我一步一步向住迪士尼既大門行過去。
走入迪士尼樂園之後，我喺中央廣場上已經見到一個熟悉既身影。
呢個著住白色吊帶短裙...白色碎花婆仔鞋...手中綁住一大束汽球...好似天使咁發出光芒既少女...
『Emma…』我帶住微笑，向住亦都帶住微笑迎接我既Emma行過去。
「你黎喇～」Emma笑得好甜，好似蜜蜂糖一樣咁甜。
『嗯～係呢～點解約我黎呢道既？想我陪你黎玩？』我有D怕羞，因為Emma真係好甜...
望住Emma既甜美笑容，總會令我既內心平靜落黎...
就好似...一種藥物...一種穩定劑...
「唔唔～」Emma擰一擰頭，「我約你黎，係要向你表白～」
聽到由Emma甜美既聲線，帶出“表白”呢兩個字之後，我成個人都呆晒！
我...有無...聽錯...
Emma要向我表白？
會唔會黎得太突然？
「喺你未拒絕我之前，聽我講個故事先～」Emma微微擺動一下身體。
『哦...』我呢個反應，會唔會太呆了吧？
「是咁的...喺我十五歲嗰年，我同爺爺黎迪士尼玩～我本來想同米奇影合照，但因為已經過左時間，所以無得影...」Emma扁扁地嘴。
Emma咁可愛，就算米奇放左工，都會第一時間仆到黎影喇下話？
除非隻米奇盲架姐～
「嗰陣時既我，其實好任性...我大吵大鬧話要爺爺買左成個迪士尼，鏟平佢！等以後都無人可以再同米奇合照！」Emma眉頭一皺，谷起塊面豬登。
『哈哈～』我不禁笑左一笑～
因為而家Emma個樣，一D都唔惡，仲好可愛～
可愛到令人忍唔住笑起上黎～
「唔好笑住先啦～我好認真架～」Emma繼續谷起塊面豬登。
『OKOK～請繼續～』我忍一忍笑。
「就喺我爺爺要打俾香港迪士尼既主席之時，米奇突然喺我眼前出現！」Emma碌一碌大對眼～
『哈哈～唔得唔得...頂唔順～真係頂唔順～D劇情咁CCTVB既？』我又忍唔住笑左出黎！
「你唔好笑住先啦～認真架～」Emma搖一搖我。
『OKOK～繼續繼續～』但俾Emma講講下...好似咁熟口熟面咁既？
「米奇話可以同我合照～原因唔係因為我霸道～」
呢個情境，真係有D熟口熟面...
「原因係因為我既堅持～」
越黎越熟口熟面…
「一份對愛既執著～」
的確！好似...好似...
「佢話同佢合照都得～不過就有一個條件...」我無等Emma講落去...
『要應承我，以後都唔可以再咁任性。』我伸一伸出手指尾...
「嗯～我以後都唔再任性～」Emma一副天真爛漫既笑容，勾一勾我手指尾...
Emma隻手指公掂一掂落我隻手指公...
『你...你就係...』我...我唔係好敢相信...
「嗯嗯～你終於都記返起喇～」Emma喺個銀包仔裏面，拎出一張相...
張相裏面有一隻米奇同一個女孩...係我同Emma既合照！
『你仲有Keep住呀？仲要Keep得好好喎～喂喂...等等先...嗰陣時既你...明明係一個大肥妹黎架喎！仲要成面暗瘡！點解你而家...同而家既你根本就係兩個人！你喺日本整過容黎丫？』我指住張相裏面嗰個成面暗瘡既大肥妹！
唔怪得我會唔記得啦...
相中既大肥妹…一D都唔吸引！
同眼前既Emma相比，根本就係判若兩人！
況且...當年...係我人生中最低潮既一年...
好多野我都無記住...只係記住一件事...一個人...一個唔應該再記住既人...
Emma立即望一望張相：「咩喎～我無整過容丫～係我好努力咁Keep...唔食煎炸野啦～做多D運動啦～唔好翹腳啦～唔好過十點鐘訓覺啦～係忍唔到口...久唔久飲下可樂囉...我諗住要做一個完美既女仔先返黎搵你嘛…」
Emma谷一谷起塊面豬登。
望住Emma一副認真樣...
呢一刻...我真係有少少感動...
唔係…
係好感動先真！
原來喺世界上，有一個女仔...一直喺遠處...一直為左我...為我付出咁多...
我仲要唔知道...就算黎到我身邊...黎到我面前...我都無留意到...
一直都...一直都...
之但係...
『咁你點知隻米奇係我？』我指一指住自己。
「我同你影完合照之後，我有偷偷跟喺你後面～我見到你入左去後巷，除左個米奇頭抖氣～嗰陣時我覺得你都幾靚仔丫～最重要既係你講既一句話，我覺得好有意思～我覺得我自己只會聽你話...只有你既說話...咁...我就愛上左你喇～我真係有聽你話，唔再任性！好努力咁做個乖乖女架～」Emma面紅紅咁點點頭...
竟然...當年一次巧遇...一句話簡單既說話...改變左一個人...
『但...隔左咁多年...你係點樣同幾時知道我喺你姑丈道工作？』我硬係覺得有D地方係諗唔明...
Emma古古惑惑咁諗左一諗…
「唔...乜你到左而家，仲覺得所有野都係偶然架咩？」Emma向我打左個眼色...
點解我會覺得呢一刻既Emma，好似有D奸奸地咁架呢？
「咁...飛揚...我...可唔可以...」我無等Emma講落去...
到在呢個地步，唔通仲要Emma開口咩？
我捉一捉住Emma對手：『Emma…原來有一位天使，一直喺我背後守護住我，我都唔知道...好彩既係，當我知道既時候，都唔係太遲～我已經錯過左太多，錯過太多幸福既時光...但可以既話...可唔可以以後既所有快樂...所有幸福...所有美好既時光，都有我喺你身邊，一齊經歷，一齊度過？』
Emma甜絲絲咁笑一笑，點一點頭：「嗯～」
睇到Emma點過頭之後，我已經急不可待咁攬實Emma！
我地錯過得太多...錯失左太多...
我地錯過左2012，錯過左地球停轉日，錯過左雨傘革命，錯過左爭取真普選，錯過左一切驚險與不驚險...
錯過左既...錯失左既...已經唔可以返轉頭...
但係...未來既路...
我地唔可以再錯過！
我地要把握每一個機會！
每一個幸福既機會！
一句我願意，一個擁抱，永不分離。
「喂喂喂～呢D時刻梗係要影返張相先架啦～仲有帶返個米奇頭箍～」Emma幫我戴上米奇頭箍後，喺手袋仔拎出手機。
「攬實D～攬實D～」Emma攬到我實一實～
『哦哦哦...』我又攬一攬實Emma～
我同Emma笑笑口，面貼面咁望住個畫面準備自拍～
「一～二～三～」當Emma數到三既時候，我見到螢幕既上方，個通知欄彈示出一條...WhatsApp既Message...
WhatsApp now
Amy：我地已經收到你既尾...
The End？
【Emma福利】
第一時間要講既係，為左答謝大家長久以黎既支持，我而家正準備梗Emma既福利俾大家！
係咯，追左咁耐故，無理由無Emma既床上戲架嘛～
不過，仲未可以出俾大家睇住～
我會喺一個月後(6月19日)既準時晚上7點正，喺我個Facebook專頁(https://www.facebook.com/whirlingdancer/photos/a.638836572838504.1073741828.635960156459479/848374931884666/?type=3&theater)上發文～
對Emma福利有興趣既朋友，一定要留意喇～
點解要一個月後先Post？到時你咪知囉～
至於個結局點解最後係會揀Emma...
其實喺咁多留言之中，大家都講出左三個女角既可以愛同唔可以愛既理由。
我真係好滾動，估唔到原來有咁多朋友係咁了解成個故事～
Emma既完美，但距離太大。
對阿月既心結，希望給飛揚完夢，但阿月本身太過飄忽。
GiGi付出好多，但太細個，對飛揚既愛可能係錯誤投射。
好多好多深入既分析，都係呢三個女角最徹底既分析。
但點解最後會揀Emma？
因為一個讀者Inbox我，講出晒所有女角既處境。（包括Ashlynn同Wing Wing)
而最重要既係，呢個讀者只係一個中一學生。
我覺得一個中一學生可以睇到咁多既話，佢真係好有心機去睇呢個故。
所以我就尊重佢既選擇，寫出Emma既結局～
而呢個結局係唔係Happy Ending呢？
每個人都會有佢個人既睇法既～咁就交由大家自己覺得喇～
而故事係唔係真係完結呢？(除左Emma福利外)
我就唔會寫前傳丫～《港男FF妄誌2》丫咁～
因為我會覺得呢D拖長故事壽命既手法，都只會玩爛個故～
但《港男FF妄誌》既世界觀係無咁快完～
因為其實內裏有好多鋪排，都係為打後既故事而設～
而新故已經落筆～好快都會同大家見面～
如果你鍾意《港男FF妄誌》，下個故事會更可愛～
最新既消息，我會Post返喺飛揚既Facebook專頁道～
希望大家多多留意～
最後，在此再一次好感激大家一直以黎既支持～我地下個故事再見啦～