終於到左暑假最後既星期六,過埋呢晚我地就要執野,正正式式咁離開條漁村。我今晚要求唔算大,只係想同呀花打開話題,一次已經好滿足…

呢一日,男女班都各自分配好工作,準備今晚既聯歡。我地三個就負責睇場,以免有人搞事。其實自從我地同奇雲係漁村一帶出左名之後,好多村仔都認識我地。陳展就食住個勢收左幾個村仔做,幫我地執頭執尾。所以睇場都係交返俾班細既去做。

陳展呢份人天生特別聰明,讀書叻之餘又識同老師疏通關係,次次上堂訓著教同老師吹兩嘴就過到骨,但我同大強就獲獲新鮮獲獲甘。

果然陳展人愈大就愈醒目,已經識得學雞翼收,維持我地係漁村既勢力,如果係我同大強去收既話肯定搞到一獲泡。

--------------------------





終於黎到晚上,陳展話點都要打扮得好好睇睇,於是就拎左佢老豆送俾佢做畢業禮物既三間波鞋出黎威返次。我同大強屋企就冇咩錢,所以都係如常咁背心踢拖就出門口。

我地踩單車到燒烤場,睇下現況,人都差唔多齊晒。人海之中我總係可以睇到呀花既影子。佢今晚真係好,窄辮同簡單既襯衫睇上去平平無奇,但係我心目中完全係女神般咁完美!

但係淨返既爐已經唔多,我地只係可以搵到係正佢對面既爐落腳。

隔左無耐,兩邊既班長都企出黎同大家主持,宣傳聯歡正式開始,又歡迎大家互相結交。陳展同我講呢個係一個好機會。但我望住呀花佢身邊咁多女仔做伴,都唔係咁好意思走上去識佢。

唔知係鬼遮眼定點,呀花既視線無啦啦轉到我度,我地對視呢一秒間,心跳不斷加速,不知所措!





點知,佢竟然對住我微笑!

我的媽…我突然覺得呢個世界充滿色彩。我係咪開始戀愛啦?

我見到咁好既機會,把心一橫就企起身,意氣風發咁走過去。但點知係我身後突然殺出個程咬金!

"呀花。"班長文係我面前直行直過,走去呀花果度。







班長文係個富二代,聽講佢老豆同洋鬼做生意發左達,就俾左筆錢條漁村起左間學校。學校上上下下既人都唔敢對班長文指手劃腳。

"冇咩野你地都係唔好同你地班個有錢仔搞事。"就連奇雲都曾經對我地咁講,所以我地都盡量敬而遠之。

不過呢一刻我就有半分驚訝,點解班長文好似同呀花相識過呢?

"我叫錢少文呀,你讀緊間學校係邊個起架?冇錯喇,就係我老豆。"一個懶幽默既開場白。

屌,原來白撞既。

"我識你,有錢仔呀嘛…"呀花都友善咁同佢展開左對話。雖然班長文呢個開場真係好柒,但係總好過我坐係度燒炭,成碌柒咁…

"喂!做咩成個食屎仔咁姐?鬼叫你唔去馬咩…"陳展懶得戚咁串我。

"你睇下嘉儀。"我冷冷咁回應。





嘉儀係公認既校花,所以有三四個男仔坐埋一齊bbq都不足為奇。

佢拎轉頭一望,就大嗌"仆街喇!奶撻!"跟著就成隻狗公咁衝左去對面。
已有 0 人追稿