在Instagram談一場戀愛: 第十七章

我因為有一份暑假前的PROJECT在身，跟小寶和信義拜別後就自己一個去了圖書館。
 
 
路上，我腦海一直浮現著小寶最後的眼神，她好像很憂愁……
 
 
入了圖書館，在四周上下找書的途中，我的餘光瞥見一個熟悉的身影。
 
 
呃？


 
 
Krystal正彎著腰，眼睛專心的掃瞄著書架上的書。
 
 
「妳黎……做功課？」我說。
 
 
她轉頭望過來，見到我便笑說：「係啊。」
 


 
「但點解一個經濟系既女仔會去文學類既書搵資料既。」我好奇問。
 
 
她失笑道：「咩啊，咁我唔可以順便借書黎睇下既。」
 
 
「當然可以啦，無任歡迎。」
 
 


「你講到間圖書館係你開咁。」
 
 
「下？」我假裝驚訝道：「乜妳唔知……我就係呢度既太子爺咩。」
 
 
「喔……」她一副師父明白了的樣，然後假裝正經的說：「咁請問太子爺……你可唔可以係咁意送幾本書比我。」
 
 
「當然可以，妳只要出去同啲職員講我要拎走啲書，同時響我個朵，佢地就會好驚訝，呢個時候唔好驚，
 
 
要鎮定到好似特首咁，萬毒不侵，因為佢地會想試下你到底係堅定流。
 
 


年中都一百幾十個人同我認親戚，所以佢地好嚴格。
 
 
你一定唔可以怯，用阿ＧＥＭ唱兒夜姨野以夜儀野既中氣，大聲一喝：「我要飲凍檸茶同偷書。」
 
 
佢地一聽暗號，知你堅過9999金，就會蛇行匍伏，四拜自跪，乖乖地咁放妳走，仲會比埋膠袋妳。」
 
 
「咁……著數？」
 
 
「當然啦。」
 
 


沉靜了幾秒，我們同時笑了出來。
 
 
「哈哈好白痴。」
 
 
「我都覺。」
 
 
「我去嗰邊搵書先，拜拜。」我說。
 
 
拿了幾本歷史書，我就坐在那後那行，類似自修室的桌椅上準備動工。
 
 


一看就去到八點左右。
 
 
我伸一伸賴腰，好奇的四周觀看，原來Krystal也未行，她坐我的前兩個位置。
 
 
或許是她感覺到我的目光，忽然也抬起頭來，我們的目光交接。
 
 
她笑了笑，我也點點頭。
 
 
再回首書中，讀了三分鐘已沒有什麼耐性，而且冷氣太大，身體也很冰冷，還是走吧。
 
 


我起身收執東西離開，經過Krystal時，她問：「你走啦？」
 
 
「係啊。」
 
 
「拜拜。」
 
 
「拜拜。」
 
 
我步出圖書館，身體頓覺暖了一點。走到小賣部前，我腦海突然閃過一個念頭，Krystal在圖書館會不會感到很冷……
 
 
「阿姐，唔該要枝暖既維他奶。」
 
 
我買了維他奶後，回到圖書館去找Krystal。我走到她身旁時，她還是很專心的在做自己功課，沒有注意到我的存在。
 
 
我將維他奶放在她的枱面上，她轉頭一看，然後才發現我又回來。
 
 
「咦，又話走既？」她笑說。
 
 
「無啊，比妳暖下架。」
 
 
她拿起枱上的維他奶，放入手心裡說：「哈……多謝你啊。」
 
 
「我走啦，小心夜啊。」
 
 
「嗯，拜拜。」
 
 
回到家裡，洗了個澡就睡覺了。
 
 
到了第二天，我收到一個Whatpps。
 
 
是Krystal，我們從在whatapps對話過，那是我們開始對話的第一句。
 
 
「好暖啊，多謝你，要你成日買野比我添。」