人來人往,你為甚麼要回來找我...: 7
距離陸運會還有一個月的時間，啦啦隊開始了排練。
說實在的，我從未參加過啦啦隊。與想像中不一樣的是，這一次的排練在課室內進行。
「咦，到左喇？」周子若換上了白色搭上綠色的運動服，她雙手的指尖在衣服兩邊肩膀上提一提，再在自己的背後拉一拉。
「好喇，既然大家都到齊喇，不如而家開始啦。」鹿仔說：「不過我想係跳舞之前等大家介紹下自己先。」
在各自逐一作了自我介紹後，鹿仔開始將我們分成兩人一組。
「啊良你就同啊若一組啦。」鹿仔指了指我和周子若。
我倒抽一口氣，握緊了拳頭。
放鬆，放鬆。
「唔洗咁緊張喎。」周子若發現了我故作自若的戇態。
「我邊有。」
「唔洗唔認喇。」
鹿仔示範了一連串的動作，然後讓我們慢慢地學起來。
周子若牽起我的手：「你隻手濕晒既？哈哈。」
我隨手往自己的衣服上擦了擦手心沁出的汗。
「唔準笑。」
「唔笑唔笑。」
周子若的手，暖暖的，彷彿是種我倆之間的連繫。我浸在這種溫暖中，做出每一個動作，感覺上周遭的事物都變得很慢、很慢。
「啊茵，唔好咁急，慢慢黎，你啲動作搞亂晒。」鹿仔走到黃逸茵的身旁，仔細地將那幾個動作重複一遍。
黃逸茵用小手推推自己的黑色方框眼鏡，點點頭，可是她怎樣跳也是跳不好。
「呃……其他人休息下先啦。」鹿仔說。
「乜我真係咁唔掂咩？」黃逸茵用手背擋住自己的鼻尖。
「我唔係咁既意思，慢慢黎，比心機去練，一定可以跳得好。」
黃逸茵默然。
「唔好咁啦，我真係唔係怪你，我都係想幫你啫。」鹿仔伸手想要搭她的肩。
黃逸茵後退一步。
「做咩事？」
她捂著臉，搖搖頭，轉身跑出課室。
所有人的目光集中在鹿仔身上，但彊住的他臉上同樣掛著茫然的神情。
「仲唔追？」
鹿仔被這一句推出門外，一陣急促的腳步聲過後，他獨自一人回來。
「追唔到？」
「追到，但係佢咩都唔肯講，莫講話返黎。」
「咁……今日不如就練到呢度先啦，下次齊人再練。」趙尚文剔剔頭：「係咪話要傾啦啦隊隊衫？」
「係呀。」
「今年既啦啦隊衫大家點睇？」
「綠色就梗架喇，差在咩圖案既啫。」
「Angry Bird咪有隻綠色既，我想用果個公仔。」鹿仔說。
「喂認真，識揀一定揀變型俠醫。」羅船長搶著說。
周子若走上前：「唔洗爭喇，你地一定會揀四葉草。」
「四葉草？」
「唔錯喎。」
「幾清新丫。」
「嗯，都唔會有其他架喇。」周子若說。
「等陣，」我說：「點解你地唔諗下淨色既？」
「淨色？」
「淨綠色。」
「吓，淨色好咩？」
「你諗下喇，人地紅社同黃社既衫都係圖案，又係啲唔知咩卡通人物咁老套。如果我地著淨色衫，效果一定比佢地好。」
「啊，」周子若拍一下自己的額頭：「點解我諗唔到既呢？」
「呀你又啱喎子良。」羅船長豎起姆指。
「咁淨色啦。」
「四葉草係就係靚，不過又好似老套左啲……」
「估你唔到喎子良，真係語出驚人。」趙尚文拍拍我的背。
「咁既話，」鹿仔頓了頓：「就用淨綠色黎做我地啦啦隊既隊衫啦。」
「如果無問題既話下次再練啦。」鹿仔拍拍手，各人開始收拾自己的行裝。
我走到蹲著的周子若身旁。
「唔同左，」她凱凱地望著自己的背包：「有啲野唔同左。」
「有啲咩唔同左？」我忍不住問。
「吓？咪話你囉，你唔同左。」
「我唔同左？」
「係呀，你變得主動積極左喎。」
「乜……乜係咩？」
是她改變了我嗎？
「緊係啦。」她伸手搭我的肩：「Keep住咁樣就啱架喇。」
「哦。」
我怔了怔，其他人逐漸散去，驚覺這溫煦的時光流逝得特別快，我忘了剛才踏出的舞步，記憶卻以甜蜜的味道存留在我的腦海中。
「走喇我地，仲呆左咁企係度做乜？」
「哦，走啦咁。」我說。
走到學校門外，瞥見不遠處有一個穿著我們學校校服的男生，一頭蓬鬆捲髮，單手提著手提包，襯衫下擺瓣了出來。
「好似係啊草。」周子若說。
他的前方站著幾個人，卻不是穿著我們學校的校服……
「仲記唔記得我？」一個身穿淺灰色短袖汗衫的男孩走近啊草。
啊草沒有答話。
「咪以為唔出聲好似好型咁呀。」另一個身穿黑色汗衣的胖子走上前。
「肥忠！」穿灰色衫的男孩向他的身後一瞪，然後把臉別回來：「上次係海趣既事，我想講───」
我走到啊草身後：「啊草。」
「原來你叫啊草。」男孩伸出手：「我叫啊景。」
啊草並沒有跟他握手。
「喂，比啲面景哥好喎。」那個叫肥忠的胖子說。
「唔緊要……其實我係想講，上次係海趣既事，係誤會黎。」
「誤會？」啊草終於開口了。
「係，上次係果個女仔跌左銀包，所以我地先走上前比返佢。」
「係呀我可以做證。」肥忠用姆指貼著自己的胸口。
啊草望著啊景。
「丫你而家即係唔信景哥咁話喇喎。」肥忠提起右手手肘向後拉，出拳打向啊草。
「喂，唔好───」我擋在啊草的身前，臉門吃了這一拳。
啊，臉上一陣灼熱，額上一陣暈眩。
「喂你做咩打人呀？」身後的周子若指向肥忠。
「良。」啊草按著我雙肩，使我不致跌倒在地上。
啊景轉過身，用手掌壓在肥忠的臉上，壓得眼睛小小的他臉容擠成一團，整個人跌坐在地上。
「我講過幾多次，唔係下下都要講手架嘛。」啊景說：「下下講唔埋欄就用拳頭既話仲邊有人會聽我地講野？」
肥忠沒有答話。
「真係好對唔住。」啊景向我們三人躬身。
沒想到眼前這個小混混會表現出這樣的態度，不過臉上捱的這一拳仍舊在隱隱作痛。
「嗯，你講既野都係真既？」啊草咬咬牙。
「真既。」啊景點頭。
「但係啊敏佢提都無提過。」
「可能係佢比我地嚇親，果次我地真係無惡意架。」
「咁……咁好啦，我信你。」啊草伸出手。
「多謝。」啊景跟啊草握了握手。
「起身啦肥忠，」啊景扶起肥忠：「我地走喇。」
「拜拜啊草。」
他們離開後，我這才鬆了口氣。
「你無事丫嘛？」周子若看著我的臉：「啱啱果班咩人黎架？」
「上次係海趣見到佢地走去撩蔡晨敏，我走埋去趕走左佢地。」
「喔？」周子若身子微微向後傾：「啊敏就係因為咁而鐘意左你？」
啊草尷尬地笑了笑：「你講乜呀？」
「呀，哈哈，無野。」
「啊草你住邊架？」我問。
「寶田。」
「寶田邨？」
「係。」啊草點頭：「一個人住果啲公屋。」
「一個人住？」
「我父母因為某啲事而分開，我兩個都無跟到，最後社工介入，比左呢間屋我住。」
我一時之間反應不過來，原來啊草的家庭背影這樣悲慘。
「唔洗覺得唔好意思喎，我無乜野。」
我想起了自己的父親……
「八八卦卦，顧掂你自己先啦。」周子若伸手摸我左邊的臉頰，嚇得我後退一步。
「痛呀？」她皺眉。
「唔，唔係。」我用左手按著自己燙紅的臉。
「哦，咁即係無野啦。」她轉身：「咁我走喇。」
「唔係呀，有野呀有野呀。」我追上前。
回到家裡，母親不在，芳姨也不在。
「呀媽同芳姨去左買衫呀。」坐在沙發上的哥瞥我一眼。
「哦。」
「咦你塊面腫左既？」他放下遊戲控制器：「同人打交呀？」
「呃……唔算係打交既。」
「嗤，咁即係比人打啦。」
「又唔係你諗果種比人打。」哥哥想必是以為我被人欺負吧。
「即係點？」
「我幫人頂左一鎚。」
「幫人頂？」
「係呀，有個肥仔出拳打我隔離個人，我食左呢拳啫。」
「無打交？」
「無。」
哥拍拍沙發，把身子挪到一邊。
我在他的身旁坐下。
「良。」他的手按著我的大腿：「有咩事，唔好叫呀媽擔心。」
我點頭。
「呀媽而家得返我地兩個，我地唔可以有啲咩事架知唔知呀？」
「哥。」
「嗯。」
「其實……其實你有無諗過老豆？」
「你想話呀媽同呀爸係返埋一齊？」
「係。」
「諗都唔好諗添呀。」他一把打在我的大腿上。
「點解，」我說：「佢唔係一個衰人黎。」
「佢無得救架喇。」
「佢只係飲酒啫，佢又無食煙又無賭錢。」
「唔通你認為一個男人好定唔好淨係單憑食煙同埋賭錢？」他用右手執起我的左手：「唔好唔記得，佢打呀媽。」
「咁係因為佢飲左───」
「總之就無可能。」他攬著我的肩：「以後唔好再諗呀爸喇，除左我地兩個同佢一樣都係姓陳之外，其他既野都唔關我地既事。」
真的不可能再見一次嗎？我的父親，記憶中那張熟悉的臉孔，方方大臉，滿是皺眉的額頭，兩道很深的臉頰紋，揚起濃眉，眼鏡一托，露出一個逗趣的笑容。