人來人往,你為甚麼要回來找我...: 17

  「喂，同佢搞成點啊？」羅船長在我身旁坐下。
  「咩搞成點？」
  「肥婆若呀，上次陸運會完左之後就無晒聲氣咁。」
  的確，跟她的關係毫無進展。
  「咁又唔洗咁灰喎。」他打了我肩膀一下：「主動啲。」
  「點主動法？」
  「拿，既然肥婆若佢又唔係唔鐘意你，一於搵個機會約佢出街，之後……你明架啦。」
  「之後點？」
  「表白囉，唔係咁都要人教呀嘛？」
  在這方面……我可是毫無經驗。




  「比啲信心自己，我實撐你既。」
 
  好不容易才等到畫畫這一節課外活動。
  再不開口的話就要等下星期了。
  「好喇，今日我比大家既題目就係最靚既野。」畢老師說：「大家可以出黎攞畫紙。」
  最漂亮的事物嗎？
  執鉛筆的本事著實不夠好，無論怎樣勾畫也勾不出個輪廓來。
  「你做咩係度畫我啊陳子良？」
  她發現了我筆下畫紙上的女孩。
  「又一定會係你既……」




  「咁仲可以係邊個丫？」
  「係喇係喇，」我說：「咁而家要畫最靚既野丫嘛。」
  「最靚果個？」她托著臉蛋：「你睇下你畫左啲咩出黎先啦。」
  「對唔住囉。」
  雖然真的畫得不太像，不過這幅畫打開了我們的話匣子。
  「拿，條腰呢，就無咁粗既。」
  「係咩？」
  「緊係啦唔準駁嘴。」
  她認真得皺著眉的樣子甚是可愛。
  「咁呃，唔知呢位靚……靚女可唔可以陪我一齊出街呢？」




  「下，陪你？」
  她的反應好像不太好。
  「做乜你講靚女兩個字既時候好似咁猶豫咁架？」
  要我直接開口稱讚你實在有點難為情。
  「叫多聲靚女啦，」她擠眉弄眼：「或者，我可以考慮下既。」
  「靚女。」
  「唔……幾啱聽。」她點著頭：「仲有呀，唔該你搞清楚先。邊有女仔會陪男仔去街架？」
  呃，始終是不答應嗎？
  「係男仔陪女仔去街，知道無？」
  「知道知道。」
  辛苦掏出來的勇氣總算沒有白費。
  「咁你諗住去邊呀？」
  啊，地點可是還沒有想過。
  「你唔係諗都無諗過就走黎約我去街掛？」
  不幸被言中了。




  「拿，咁啦，有啲咩地方你係熟架？」她問。
  「北江。」
  「北江？」
  「係。」
  那個我最熟悉不過的地方。
  「聽日帶你去。」我說。
 
  隔天和她相約在龍門站，她穿的是黑色綿衣。
  「又係黑色既？」我問。
  「你講件衫？」
  「係呀。」
  「乜你有留意住既咩？」
  「上次果件有波點架嘛。」
  「咁細心？」她嫣然一笑。
  「唔覺意留意到啫。」




  「咁你都幾唔覺意下架喎。」她撞了我的手臂一下。
  「有車喇。」
  我們走上610線列車，列車沿著鐵路一直走，走到兆康站的時候，不少人湧進車廂。
  「小心。」我左手拉著頭上的扶手，右手一把抱著她的腰，側著臉打量那個穿米色擋風衣的大叔。
  「咪借啲咦乘機抽水喎。」
  「啱啱有人差啲撞到你。」我鬆開了手。
  「吓，哦。」
  那大叔睥睨著我，然後用食指擦擦鼻尖。
  我和周子若在塘坊村站下車。
  「要轉761P。」
  「入天水圍？」
  「係。」
  終於到了樂湖站。
  「呢度就係我講既北江。」
  「睇得出丫。」她抬起頭。




  頭上清楚地寫著「新北江商場」五個字。
  特地從屯門乘輕鐵回到這，心裡面有種覺得自己挺可笑的感覺。
  明明就搬離了天水圍，卻總是想念著。
  「我跟實你架喇，」她按著我的手臂：「既然要咁遠路入到黎，你實係好熟啦。」
  「係，」我點頭：「真係好熟。」
  帶著她走上扶手電梯，穿梭在人流之中。
  「知唔知呢度原本係咩黎？」
  我指著那些售賣耳機和螢幕保護貼的商店。
  「可以係咩黎？」她皺著眉。
  「冒險樂園。」
  「吓？呢度以前係冒險樂園？」
  「係，以前呢度咁多個舖位都係冒險樂園既，冒險樂園無左，先分拆成呢啲位。」
  「你以前成日落黎玩既？」
  「有時啦。」
  昔日快樂的時光漸漸在我的腦海中浮現……




  「果陣時有部揸車食豆沙包既機，我次次落親黎都會玩，仲玩到破晒紀錄。」
  「呀果個我都有玩過呀。」
  往事只能回味。
  「咦前面果間野有無格仔餅賣架？」她指著前方的一家小吃店。
  「應該有。」
  「我想食啊。」她的食指點著自己的下唇。
  我走上前：「唔該要兩份格仔餅丫。」
  「兩份格仔餅吓嘛？」那個啊姨問我。
  「唔洗兩份呀，要一份得喇。」周子若說：「我地一齊食咪得囉。」
  真的可以嗎？
  「呀哥仔你真係唔識做，一份餅兩份食先夠滋味丫嘛。」啊姨笑著說：「雖然賣兩份我又唔拘既……要咩醬呀？」
  「咩都要。」周子若說。
  「搞掂喇。」
  我付了錢，然後接過夾餅。
  「你食先啦。」我遞到她的嘴前。
  「唔食住，你食先。」
  「咁我食架喇……」我咬了一口。
  啊，燙死我了。
  「欸，咁心急做咩呢？」
  「哦，原來你係因為太熱先至唔食住啊？」
  我微微地晃著頭，輕輕對著夾餅吹氣。
  「拿。」
  她擠著臉蛋：「唔該喎。」
  然後接過夾餅，小口小口地吃著。
  「到你食喇。」她把吃掉一半的餅遞到我的口邊。
  我大大的咬一口。
  「唔……」
  沒想到這種夾著花生醬和巧克力醬的東西竟然會如此好吃。
  「好食。」
  「緊係啦，唔好食我都唔會食啦。」她舔一下唇。
  這倒是。
  吃完了夾餅，一起走著走著，走到一家名叫「佳芳裝」的男裝店門前。
  「老細。」我步進店裡面。
  「好耐無見喎。」黑黝黝的老闆走出來。
  「咦今次仲帶埋個女仔黎添呀？」他托一下幼框眼鏡：「我地呢度無女裝賣架喎。」
  「無，我黎幫下眼架咋。」周子若笑著說。
  「吓係？咁隨便睇啦，有咩睇啱既可以幫到你架。」說罷他將視線移回他身後的袖珍電視上。
  「等我黎幫你睇下邊件啱你啦。」她一邊說一邊翻著一件件掛起的衣服。
  「識唔識揀架你？」
  「呢件啦。」
  她取下一件藍色的襯衣。
  這種藍色近乎綠，好像是湖水藍。
  「做咩啊？唔鐘意呀？」
  「咁又唔係唔鐘意……」我說：「係覺得有啲特別啫。」
  「幾啱你丫，」她打量著我：「唔好再著到灰灰沉沉咁喇。」
  我望著身上墨藍色的襯衣。
  「咦你地睇啱呢件呀？」老闆瞪著右眼，食指擦擦自己的眼眉：「等我搵下有無你個碼先。」
  他蹲下來在自己儲貨堆裡翻著，然後摸出一件一樣的衣服：「有有有，試下呢件。」
  他把包裝膠袋拆開。
  「啱丫，幾啱身呀。」周子若將襯衣拼到我的背上。
  「喂，再加埋呢條皮帶丫。」她指著一條滿佈音符圖案的皮帶。
  品味真是獨特。
  「好啦老細，就呢兩樣野啦。」我說。
  「係咁多係咪？」老闆拿起計算機按著：「呃，件衫……再加埋條皮帶……一百四八，我計你一百四十啦。」
  我付了他一百四十塊錢。
  「下次再黎睇過啦，」他說：「同埋女朋友。」
  還不是女朋友呢。
  既然周子若沒有開口否認，我也閉著嘴好了。
  「好呀老細，拜拜。」
  「你以前成日黎買衫既？」她問。
  「係呀，幾乎由細到大都係度買架。」
  再走前一點，我的腳步停了下來。
  「做咩呀？」
  「行呢邊。」我帶著她走進這走廊。
  「又變返做舖位……」我說：「呢度之前係pizza hut黎。」
  「係？」她察看著周圍的小商店。
  「而再之前……呢度係我老豆開舖既地方。」
  我呼了一口氣。
  「我老豆以前係度開模型舖，叫做『友盈模型』，啲人個個都叫佢做『肥老闆』。」
  「佢又會揀係呢度開舖既……」
  「我係呢度大架。」我合上眼笑一下：「我以前住樂湖，細個成日落黎玩。仲記得果陣時拎住部GBA打星之卡比，有個哥哥幫我打爆機，一班細路圍埋一齊捉波子棋……」
  「估唔到你既童年回憶都幾特別喎。」她說：「竟然會係呢個商場入面。」
  在記憶深處，總有些不起眼的小事。
  「暑假果排有間書局，我周不時鑽入去入面走黎走去……有間士多賣啲雪到結晒冰既水……」
  她聽得呆呆出神。
  「呃，有無悶親你？」
  她搖頭：「無呀，置身係呢個屬於你既地方，真係好特別。」
  這個地方並不屬於我，只是我的童年埋藏在這個商場裡面的這個角落。
  或許正被我踏在腳下呢。
  「咁點解之後無做既？」
  「做唔住，」我苦笑一下：「佢模型又賣，砌圖又賣……做黎做去生意都係唔好。」
  「咁最後……」
  「最後當然係執左啦。」
  她噤聲。
  「電腦舖執，漫畫舖又執……其實佢都算捱得耐。」我說：「模型舖無做之後，佢就無所事事，由朝到黑係度飲酒───」
  說到這，鼻子感到一陣酸。
  「得喇，其實可以唔洗繼續講落去。」她拍拍我的背。
  「嗯，食唔食飯？前面轉出黎果間臺味冰點啲野食唔錯架。」
  我和她離開身後這個滿載著笑與淚的地方，在餐廳內找到兩個位子坐下。
  「係喎，啱啱先同你食完格仔餅。」她說：「咁而家……不如叫一碟飯兩份食啦。」
  「唔……好啊，咁既情況下我都食唔晒一碟飯架啦。」
  「咁叫咩食？」
  「焗飯丫，呢度啲焗飯夠熱夠大碟。」
  我倆一起吃完了這頓飯。
  正想掏出錢包的時候，周子若按住我的手。
  「等我請你啦，頭先你請完我食個格仔餅。」
  那……好吧。
  結帳後我帶著她繼續逛這個我最熟悉的地方。
  「我以前成日落黎呢間at189租碟睇架。」
  「知唔知呢間子健醫務所已經搬左幾次位？」
  「以前屋企壞左錄影機會落黎呢度整。」
  走出商場，回首再望著這個我成長的地方……
  桃花依舊。
  「走囉。」我嘆口氣。
  「唔捨得呀？」
  「都無咩唔捨得既……」
  我們一起步入輕鐵，回到屯門。
 
  羅船長所說的時機，大概就是現在。
  慢著，四周這麼多人，還有置身在這個搖搖晃晃的車廂裡……
  先裝作望著遠處的風景吧。
  「喂陳子良，點解你好似怪怪地咁既？」
  「無啊，邊度怪？」我說：「一陣我陪你返美樂先好唔好？」
  「呃，好呀。」
  我和她走下車廂。
  「周子若。」
  「唔？」
  「我有啲野想同你講。」我拈起她的手。
  「你……」
  「我……」我將臉靠近她的耳邊：「我鐘意你。」
  電話忽然響起來。
  「呃，張卓蓉打黎。」我接聽了這個來電。
  「喂？」
  「喂？陳子良呀？」
  「係，做咩事？」
  「還書啊───」
  「呃係喎。」
  忘了這件事。
  「還書啊───」
  「係既係既───」
  周子若一把搶過我耳畔的電話。
  「喂，你係咪張卓蓉呀？」她用手捂著自己的嘴和鼻子。
  她轉身背向著我，兩肩微微升起，然後徐徐下降。
  「喂，」我走上前：「做咩無啦啦搶我部───」
  「好喇，比返你。」周子若將手機還給我。
  我接過電話，然後放到耳邊：「喂？喂……」
  「佢收左線喇，幫你約左聽朝九點。」周子若說：「啱啱先講到邊？」
  「啱啱先我話我鐘意你……」
  氣氛已經完全沒有了。
  「良。」她執起我的手：「對唔住，我地唔可以係埋一齊。」
  「吓？」
  「我走喇。」她放開我的手，抿唇擠出一個微笑，然後慢慢離去。
  呃，我總得講些甚麼吧……
  半張著的嘴卻發不了音。
  根本就連該說甚麼也還沒想到。
  就這樣目送著她遠去，再見也沒有一句。