《藝文青》Vol.8: 【畫筆小新】虹爺

小弟一直都唔係一個識表達自己既人，好少會同人嗌交，因為我轉數慢，事後先識反駁；亦好少同人辯論，因為我知每個人既立場並唔係三言兩語就可以改變。
 
但係，自從雨傘運動既開始，我變左。
 
我唔止一次同人地因為呢件事而嘈，我每次都喊哂，甚至全身係咁不受控制咁震。原來，一個人真係可以嬲到震……
 
我明白大家都會有自己既立場，我明白咁佔法係會阻到好多人，但我真係唔明點解某啲人既諗法可以咁偏激，偏激到不辨是非，不問真假，總之對自己立場有利就一定岩。而且，我發現有個現象好有趣：對自己立場有利既言論叫中立，對自己立場不利既言論就叫偏激。以上情況係正反雙方都有發生。
 




對唔住我off左topic添。
 
其實到左呢一刻，我已經變番果個唔出聲既我。因為去到呢個時候，撐既會繼續撐，反既會繼續反，大家理念唔同，根本冇野好講。但，我唔出聲，唔代表我冇感覺，我會用我既方式繼續支持運動。

請原諒我的懦弱，請繼續支持還在街上的市民。

香港加油。