第014集 ~ 輝︰阿明,做咩嘢同四個日本男學生行去後樓梯呀?

睇住班同學笑完阿明佢鍾意D日本阿婆,我自己行咗埋一邊,唔知點解好掛住我女朋友阿欣,唔知阿欣佢點呢?我個電話又要夜D先用得,打唔到俾佢。

之後我俟埋地鐵門嗰度,我望出窗外,見到有D風景,諗住都冇再見到嗰個「會飛嘅人頭」咁耐喇,放心D去望吓風景,欣賞吓日本嘅風貌啦,點知……

我望望吓風景,又見到有D嘢喺個天空度,嗰個嘢離我哋好遠,見到「佢」喺度到閃來閃去,我驚起嚟,立即縮埋D同學同老師度,再俟埋牆邊。

「你冇嘢丫嘛?」D同學都咁問我,我就另另頭回應咗佢哋。





之後,我都唔敢再望出去窗出面,總係覺得嗰一點嘢似係搵緊人咁,唔知點解我仲覺得佢係搵緊我嘅咁。

我一直匿埋,直至到咗站。好在,沿途都平安渡過。

「你哋跟住我同張Sir行丫,我哋而家先去食晚飯,我哋去嗰度有間百貨公司同遊戲機城,食完飯,夠時間嘅話大家可以去行吓。」「黃仔」講。

我心諗,你咪又係跟住「鐵拳」行,人哋識日文,你又唔識。

之後跟住佢哋行,我再望上天都見唔到嗰個「會飛嘅人頭」。行咗一陣,搭(車立)上樓,去咗間食牛肉嘅舖頭…





一坐低,D牛肉就嚟喇,應該係D老師一早預約好晒嘅,死人阿明佢連我碟牛肉都食埋,仲猛話好食好食…

我嬲嬲地咪搶咗佢最鍾意食嘅飯嚟食囉,醮D醬油,問咗「喪狗」攞咗兩塊牛肉就撈個飯食…

飽就真係唔係夠飽,不過都冇咩胃口,見到阿明佢食得咁開心就算啦。

我自己就仲擔心緊自己,真係驚返唔到屋企。條「傻佬」佢食飽晒先知佢食咗我碟牛肉,之後仲係咁同我講對唔住同噏廢話…

講到酒店個(車立)度,又嚇鬼我哋,不過我又真係諗唔明「傻佬明」點樣可以同時扮到三把唔同嘅聲,其實我都好懷疑。





過咗一陣,「光管陳」突然行咗埋阿明度,我仲以為佢鬧阿明今日車上面嘅事,點知佢竟然係問阿明係咪撞鬼?

阿明個樣當時呆晒,我見到都忍唔住笑咗吓,不過聽到「光管陳」咁問,我都好想知,同我都想分享吓我見到嘅嘢。

聽到「光管陳」講到「哪喳嘢」三個字,我真係想講我都見到,但係見到咁多同學喺度,我又唔敢講。

阿明一直就話自己係發惡夢,之後「光管陳」再問佢,佢就成個夢講咗出嚟,我真係好用心去聽,聽到佢講我抓佢膊頭嗰度…

我先記得自己俾佢打咗搥,塊面仲痛緊,「死仔明」丫。

真係唔明點解有D同學仲笑得出,其實阿明個夢夜晚訓之前諗吓佢講嘅情景,真係好鬼恐佈。我就真係好想聽…

好專心咁望住「光管陳」同阿明,阿明佢望到我咁認真,佢就繼續講。佢都講返車上面嗰度係佢大驚小怪,其實當時我都有驚埋一份…

之後佢話佢個喼度有張黑色符,我即刻有咁嘅感覺︰「會唔會係阿明佢惹咗嗰D嘢,累埋我呢?」





之後,見到「光管陳」佢好似好緊張道黑色符咁,我都變得好緊張,好想知究竟係咩一回事。

不過佢好似驚嚇親D同學咁,求其「打完場」,叫我哋有事搵佢就算。佢仲叫我哋記得帶校章,話係護身符喎…

但係佢講完我先記得自己留咗個章喺酒店房,雖然大部份同學都唔信佢,但係我就真係信到十足十,因為我覺得唔信佢,我都唔知點算好喇…

唯有一心諗住快D攞返個護身符同一直喺佢哋身邊啦。

之後聽到「黃仔」佢話「光管陳」教壞學生,我真係嬲嬲地,唔通靠你條乸型咩?

「光管陳」佢之後講話要帶十字架同聖經,雖然我知道佢係要「應酬」「黃仔」啫,但係我都真係想放埋十字架同聖經喺身,感覺真係會安心D。

「光管陳」佢教我哋D手印,我好用心咁跟住做,亦記得好清楚,係班死仔仲當玩啫。





見到「光管陳」同阿明佢講笑,我先稍為輕鬆返D咋。

走嘅時候,「光管陳」細細聲咁同阿明講嘢,我都行咗埋去偷聽,講到話道黑色符係召鬼符嗰陣,我已經呆咗。

講到話係用嚟害阿明,仲要想害死阿明,我真係差D嚇暈咗。

好在「光管陳」好似係有辦法解決咁一直叫阿明唔使驚,我先冇咁驚。但係原來個「死仔」仲聽到D怪聲話會害佢,我變得擔心佢仲多過我自己。

「光管陳」係323號房,我記實咗,佢仲用緊佢之前部「3210」,我亦再放心D,因為我有佢呢個電話嘅號碼。

之後大家都落咗去3樓間百貨公司,我仲係諗緊之前D怪事,所以自己坐咗埋一邊,睇住阿明自己一個行來行去,其他人就四圍走。

坐咗一陣,我就喺度諗︰「係咪要搵「光管陳」傾吓呢?」

正當我想去搵「光管陳」,起身之際,我見到阿明佢望住樓梯口嘅方向,樓梯口嗰邊見到「阿華」﹑「達明」﹑「陳仔」同「膠榮」…





佢哋四個同幾個人傾緊計,嗰幾個人全身都係中山裝,應該都係日本男學生,之後見到佢哋成班人一齊行咗去後樓梯…

但係佢哋四個做咩事會同幾個男仔行咗去後樓梯呢?

(待續)

下集預告︰

我離遠見到個兩個人喺度傾緊計,一個女仔﹑一個男仔