米米蓮妖怪作品 -《旅行‧如此‧難以忘‧記 》(百集長篇): 第015集 ~ 明︰影相﹑打機，唔啱我，我去睇女好過。

第015集 ~ 明︰影相﹑打機，唔啱我，我去睇女好過。

「光管陳」見到「黃仔」望住佢，佢即咁講︰—

「記得帶十字架同聖經呀，最好帶埋耶穌添。」

佢講完呢句，之後大家就等(車立)搭落去三樓間百貨公司度行吓，我知道今晚都冇可能離開「光管陳」太遠，因為係得佢先可以保到我安全…

返房時一定要帶住佢去我個房度睇吓，返到酒店亦要先打電話俾老媽子佢問清楚道「黑色符」係咩一回事。





落到去個百貨公司度，我見應該都冇咩問題咁，就自己一個行開睇吓嘢，諗住買返D手信返去俾老豆老媽子佢哋，呢間百貨公司都冇咩特別…

都係一排排陳列架咁，係比香港大少少同整齊D，不過都好似冇咩嘢啱我買嘅咁。

我行咗一陣之後，離遠見到「阿華」佢哋四個同學喺度聊D日本學生妹影相，見到D日本學生妹，真係成個人都醒神晒。

D日本妹，仲要係學生妹，真係好正架，最正嘅係套校服，「美少女戰士」咁嘅水手裝，高到睇到大脾嘅短褶裙，再加上一對純白色嘅毛毛襪套…

真係「咔娃依呢」，對「襪套」直頭可以將「豬扒」變「凡人」，「凡人」變「女神」架！





之後見到「阿華」佢哋帶住班女學生行咗去後樓梯，我都跟咗埋去睇吓有冇機會黐佢哋，同D學生妹影吓相，返香港都總算有D交代丫麻。

行到埋去，發現原來呢個商場嘅後樓梯都幾光猛，D路同樓梯仲好闊架，冇防火門阻隔嘅，佢哋班人都影得好開心，笑晒咁，不過…

原來近睇，嗰五個學生妹加埋對「襪套」先可以變成「凡人」嘅。

「阿華」仲一個同五個學生妹影咗張相，雖然呢幾個日本妹妹唔係好靚，不過佢哋竟然仲要喺度扮錫「阿華」佢咁，攪到我都有D羨慕。

佢哋影完又影，到我想行埋佢黐一張啦，點知D學生妹話要走喇。





10點左右，原來呢間公司要收舖喇，咁我哋成班老師同學就聚集返埋一齊先，見到阿輝佢同「光管陳」一齊有講有笑咁…

仲好似笑緊我同「阿華」佢哋咁，不過我唔知佢同「光管陳」笑我哋D乜？

之後我哋成班人「轉戰」樓下二樓，二樓原來係「理嘉城」，日本遊戲第一品牌「理嘉」嘅電子遊戲機舖，咩「街機」都有得玩，勁正。

「喂，阿明﹑阿輝一陣同你哋挑返舖「街霸」先！」「大袋」講。

「咁我呢？」「喪狗」問。

「妖，你咁屎，自己打電腦啦。」「大袋」笑住串佢。

「喪狗」好無奈，因為佢真係好「喳」，次次俾人「挑機」都輸。

「妖，你咪又係一樣咁屎！」阿輝笑住串返「大袋」。





「頂你丫，一陣我唔會讓你「彎」。」

阿輝笑住無再回應。

我哋四個一齊行，睇吓有冇「街霸」或者D可以「雙打」﹑「四打」嘅遊戲。

四圍搵嘅時候，間中都會同其他同學撞到嘅，之後我哋搵到部好似幾好玩嘅「機」。

「喪狗」佢見到部電椅機，即係走咗埋去，我哋都跟咗埋去。

部電椅機係真係玩電自己嘅電椅，有一個石像揸住一張木櫈，木櫈有兩邊木手抦，木手抦上面有兩條銀色嘅金屬柱，就係呢兩條金屬柱會發電。

「喪狗」佢一行埋去就入錢玩。等緊部機啟動嘅時候，「喪狗」咁講︰—





「你哋三個唔夠膽玩呀？」

「妖，電椅有得雙打咩？你玩完我咪玩囉。」「大袋」回應。

我見到阿輝佢望住電椅後面個石像，無回應佢哋，個石像又真係幾樣衰嘅，不過佢個樣唔使好似咁驚青咁呀？

講真我真係淆底，亦都唔明點解會有人鍾意俾錢人哋電自己都有，所以我咁回應佢哋︰—

「揸住人哋碌嘢嘅遊戲唔啱我，你哋慢慢啦。」

之後佢哋留喺度玩，我自己就一個人行開咗。

行行吓，我離遠見到個兩個人喺度傾緊計，一個女仔﹑一個男仔，應該都係職員嚟，個男仔就T恤牛仔褲，個女仔條裙好靚架，白色碎花吊帶裙……

(待續)





下集預告︰

「…東虫西聖，南龍北鳳，中神通。」