第021集 ~ 明︰喂,阿輝,有幅「勁嘢」可以當護身符呀!

我係阿明呀!我呢邊之前講到識咗我嘅「女神」小倩,真係諗起都…嘻嘻,,開心到訓唔到呀!

同小倩佢暫時小別之後,我哋成班人一齊搭「地鐵」返去酒店,行返去嘅時候,仲見到間車仔麵舖添…

真係好想過去試吓呢度D地道嘢食呀!不過有一男一女喺度阻住晒,真係想一腳踢走佢哋,夜D或者再落嚟睇吓仲有冇得食宵夜先。

我哋一班人一返到酒店門口,我旁邊嘅「光管陳」就即刻衝咗去廁所,我就行咗去廁所隔離個電話間度,諗住打返去同屋企人報個平安。





老媽子肯定係好掛住我喇,一打就即刻接通咗。

「喂,老媽子呀?我到咗日本喇!依家喺酒店,今晚食咗餐任食牛肉呀,超正!」我講完呢句就一直聽佢講。

「係呀,玩咗成日喇?攰唔攰呀?」

「喂~老豆!你個仔打返嚟呀!」

「哼,你老豆真係丫,成日都死要面嘅,而家又話唔聽喇喎,佢話你玩得開心就得。」





「你都唔知呀,頭先你未打嚟之前佢都唔知幾煩,喺度問長問短,話你做咩事咁夜都唔打返嚟咁喎。」

「哈哈,知佢「龍」嘢啦,得架喇,男人,明嘅。」我回應老媽子。

我一諗返起道「黑色符」就即刻再問︰—

「係噃,老媽子,點解我個喼度會有道黑色符嘅?係咪你放架?你知唔知咩事呀?」

「黑色符!?我唔知噃,喺個喼度架?係咪你阿姨放落去架?」





「係噃,好似係佢專登俾呢個喼我架喎,不過唔緊要,你都知佢係神婆嚟架啦,我問吓佢聽日同你講丫。」老媽子再講。

「重要架,你要問清楚阿姨佢。其他就聽日先講啦,電話費貴呀。」我唔想嚇親老媽子,所以冇講黑色符係召鬼符同埋道符可以害死我俾佢知。

我講完就收咗線,當然唔可以同佢提小倩啦,佢咁口疏,講咗,肯定全村都知。

我一諗起道「黑色符」,就諗起阿姨佢好似不嬲都唔鍾意我,佢成日都話係我累死阿公,所以如果佢真係想害我都唔出奇,我好擔心。

之後,我去咗廁所屙尿,廁所冇其他人,得一格有人用,應該係「光管陳」佢啦,我就對住個尿兜講嘢,大聲D應該廁格度都聽到。

「陳Sir呀,其實你有冇信心保到我哋全程安全架?唔知點解我覺得呢個旅行,好似而家咁落去,我肯定一世都唔會唔記得,我怕嘅係,我返唔到去香港呀。」

廁格裡面一直冇人回應,所以我屙完尿就去拍一拍道廁所門。

「陳Sir,你喺唔喺度呀?陳Sir,你喺唔喺度呀?」





「我真係想打「救」你,人哋喺度扮緊「大事」,你喺度唵唵唵,你D嘢唔可以我屙完先講架咩?」

一吓沖廁聲之後,「光管陳」打開道門,行返出嚟,去咗洗手。

「我哋走江湖嘅,一定要識南龍北鳳,「北鳳」,「火鳳仙人」係我師父,佢得我一個徒弟,如果我都保你哋唔到,肯定冇人保到你哋。放心啦,返房先啦。」

佢咁講,我唯有信晒佢啦。

………

之後,我同佢行返去大堂,見到阿輝﹑「喪狗」﹑「大袋」仲喺度,佢哋似係聊緊個櫃台姐姐傾計,「喪狗」仲好似真係溝點咗個姐姐咁…

好在,我都有小倩啫。阿輝同「光管陳」就喺度「咬耳仔」,之後阿輝突然轉過頭嚟問我︰—





「其實個(車立)嗰度係咪你扮聲嚇我哋呀?」

「梗係冇啦,頭先咁多把口,我硬哽咋。」我咁回答。

之後聽到「喪狗」同「大袋」講話D聲係佢哋講嘅,我真係覺得好疑惑。

「光管陳」知道之後,仲叫我哋入(車立)後要企喺四角,頭先喺廁所佢講到自己咁勁咁,我梗係聽晒佢講啦…

一入到(車立),我就搵個靚位企定,過咗冇耐…

個死人「大袋」竟然放屁,我企佢後面架,大佬,硬食晒呀,阿輝仲叫我塞隻腳去佢「後欄」度。

「攞我隻腳嚟「教飛」,你塞丫!」突然…

「嘻嘻嘻,嘻嘻嘻…」一把鬼異嘅聲音喺(車立)頂傳嚟…





我都嚟唔切做任何反應,部(車立)一到,「光管陳」大嗌咗一聲,就揸咗「大袋」一吓,仲掟咗D嘢上(車立)頂…

「啪」一聲,真係嚇死我呀,好似拍緊戲咁,仲無端端一大舊嘢跌咗落嚟,「光管陳」再加一腳踢咗舊嘢出(車立)…

我除咗呆咗,都唔知做D乜好,但係見到「光管陳」真係成個超人咁,我真係唔佩服都唔得。

我望出去睇吓舊嘢,望清楚D,原來係個個樣怪怪地嘅小朋友,「光管陳」同阿輝為咗佢,仲噏咗一輪廢話,好似話個小朋友係冇惡意咁囉。

之後,佢就由得阿輝帶住個小朋友,佢自己就轉個身嚟搭我膊頭帶我走,仲咁講︰—

「頭先唔小心整爛咗「大袋」件衫,而家直行唔好另返轉頭。」

「你都知佢叫「大袋」嘅?你見過呀?」我問。





「講真,我未聽過你哋叫佢第二個名囉。」

………

入到房,開晒燈,發現「細鬼」唔喺度,條友可能真係走咗去叫雞,「光管陳」佢就四圍望來望去,一句嘢都冇講…

佢喺垃圾桶度執起道「黑色符」就問我︰—

「係咪就係呢道符?」

我想回應佢,但係佢突然望住廁所旁邊嗰一幅人像畫,仲伸起右手對住我,似係叫我唔好講嘢住咁,佢望嘢望到好似俾人點咗穴咁,郁都冇郁過。

我好奇咪跟住佢望埋去幅人像畫度囉,但係…只不過係普通西方人像畫啫,有條友,剝晒D衫坐喺度,得塊布遮住個咕咕,冇咩特別丫…

裡面D嘢又冇郁嘅,我真係諗唔明「光管陳」佢望緊D乜。

我見「光管陳」郁都唔郁,咪搵隻手指篤吓佢囉,點知佢…

「篤乜鬼嘢啫,你真係博鬧架喎!」

之後,佢再望返去幅畫度一陣,低頭一手叉住塊面,再諗咗一陣…

就一手拍落我膊頭度。

「OK!冇嘢架喇!道符放返落個喼度,放心沖涼訓啦。」

佢講完呢句就走咗去,我真係覺得莫名奇妙。

我望住幅畫諗,呢幅咩畫呀?呢條剝衫佬又係乜水呀?佢咁勁,可以保護到我?

不過「光管陳」佢咁講,我就信佢啦,之後我嗱嗱聲就走咗去沖個靚涼。

沖完涼,我就走咗出去,諗住問同學借部「即影即有」嚟影返張「剝衫佬」相,當係護身符都好丫嘛,點知…

一出到去,Kenny同「老鼠安」就叫我去「冷行」踢波,咁我咪奉陪一吓囉,當輕鬆吓心情都好丫嘛。

(待續)

下集預告︰

而家喺我前面嘅係一個完整嘅背脊,同一個完整女人頭嘅正面…