米米蓮妖怪作品 -《旅行‧如此‧難以忘‧記 》(百集長篇): 第022集 ~ 輝︰唔知對呢隻…「嘢」有冇用呢？

第022集 ~ 輝︰唔知對呢隻嘢有冇用呢？

當我想大嗌Yeah嗰陣，突然唔知邊度彈咗個西裝骨骨嘅男人出嚟，佢仲企咗喺訓咗喺地嘅阿明前面…

正確D嚟講，係阿明喺佢胯下。

個男人一身嘅裝扮，似係酒店嘅職員，佢對住阿明笑咗一笑，之後就望咗過嚟我度，佢仲…呆咗咁望住我…

攪到我都有D尷尬，我唯有好生硬咁對佢笑咗吓同及咗吓頭，當係表示吓禮貌啦。





「唔好意思，唔好意思，因為都夜喇，唔好嘈到其他住客丫嘛，唔好意思，真係唔好意思呀。」

個西裝友竟然識講廣東話，仲要笑到四萬咁嘅口講。

但係…佢成個人都好怪，企到直一直都冇咁直，仲超有禮貌咁，個口就有半塊面咁大，仲有一棚好大隻好整齊嘅牙…

咁…佢個樣又總算係和藹可親嘅…

我哋喺公眾地方踢波，當然唔好意思啦，咪嗱嗱聲就執好D嘢囉。





執返好D嘢之後，我突然諗起今日嘅怪事，即刻就扯咗阿明去我房度傾吓，而其他人就各自各走。

去到我房，我哋坐咗喺張床度，一坐低，我就問阿明︰—

「阿明，「光管陳」佢係咪幫你解決晒D怪事喇？除咗發惡夢﹑黑色符同埋D怪聲，仲有冇其他嘢呀？」

「佢…一入到我房，就望住幅畫，之後就叫我放心去沖涼訓。道黑色符呢，我就等緊我老媽子佢問阿姨，因為似乎係阿姨放落去，暫時咁睇，我覺得可能係我阿姨想害我，因為佢成日話我害死佢老豆，即係我阿公呀。怪聲就再冇出現過啦，講真，今日最怪嘅事咪嗰個藍色小朋友囉，佢未出現之前，我根本唔信有妖怪，而家真係咩Q嘢都信晒啦。」

「黑色符嗰度，唔好亂諗住啦，等伯友覆先啦。小朋友就冇嘢嘅，佢叫「龍也」呀，好乖架，我頭先仲同佢洗過身。我反而想知嗰幅係咩畫嚟架？」





阿明佢諗咗一諗，望咗一望我房個廁所門口。

「呢，你呢度都有幅呀，好似一模一樣添噃，咪嗰幅裸男畫囉。」

我另轉頭望去幅畫度。

「喂，你有冇「即影即有」呀？」阿明問。

我記得同我同房嘅阿倫有一部，所以我就同阿明「借」咗嚟用，見幅畫咁神，我同阿明都各影咗一張「裸男相」傍身。

袋好幅相之後，見冇嘢做，諗住第一日嚟到日本，加上個腦仲有D怪嘢嘅印象，又訓唔到…

就同阿明佢行咗出去，諗住搵吓大家，睇吓會唔會有嘢好玩啦。

我哋出到去，閂埋咗門，就諗起呢層好似有個位有嘢飲噤，咪走過去睇吓囉，嗰個位好特別…





有部「噤汽水機」﹑一張檯同埋三張櫈，應該係俾人HEA吓抖吓傾吓計用嘅。

我同阿明行咗去嗰度，見到有個女人背住我哋踎咗喺「汽水機」側邊…

佢一身嘅裝束，應該係酒店女職員，佢阻咗我哋噤汽水，所以我咪試吓叫吓佢，諗住叫佢行開少少囉。

「HELLO…」

佢聽到我講嘢之後，就慢慢另個頭過嚟…

「咔咔，咔咔」佢條頸發出D咁嘅聲音…

再「咔咔，咔咔」又轉左D過嚟，之後…





「咔嚓…」一吓就轉晒過嚟，正面望住我哋。

而家喺我前面嘅係一個完整嘅背脊，同一個完整女人頭嘅正面。

好在，佢個樣係正常嘅，唔係我諗瀨尿應該唔少得喇。

同時間，我都已經有咗D保護意識，我即刻揸實咗個校章同張「裸男相」，我見到阿明佢都揸住咗張「裸男相」，仲揸到剿晒。

之後，個女人慢慢企起身，慢慢轉返個身對住我哋，但係依然一聲都冇出過。

我呢一刻只係想佢同「龍也」一樣，係好妖，唔會傷害我哋。但係…

唔知佢做乜嘢…右手伸起，手指一隻一隻咁放咗入口，緊緊抓住咗個下顎…

之後左手提起，兩隻手指篤入右邊眼眶，兩隻手指篤入左邊眼眶…





再好大力咁向上下拉扯個頭，裂開，噴血，熔爛，變成一片血肉模糊…

我嚇到…成個人僵硬晒，仲隱約見到我旁邊嘅阿明，除咗呆咗，連下身都濕埋。

我以為一切驚嚇都要完啦，點知…我仲見到…

爛開咗嘅口裡面，轉緊D嘢出嚟…

(待續)

下集預告︰

…日怨夜怨自己害死咗自己父母…