米米蓮妖怪作品 -《旅行‧如此‧難以忘‧記 》(百集長篇): 第043集 ~ 輝︰我學咗「九字護身法」嚟保護你呀。
第043集 ~ 輝︰我學咗「九字護身法」嚟保護你呀。
聽到阿芙佢講︰—
「咁我食住嘢等你返嚟丫！」
我真係差D虛脫。好在，遠離咗佢，我先放心返D…
之後我咪鬧鬼「大袋」佢個死仔囉，佢仲串串貢咁喎，真係想打鑊佢…
阿明同阿狗，仲有竟然連公公佢都幫埋口串我，我只能慨嘆自己做錯好事喺啦。
阿妮之後突然喺後面出聲，真係嚇咗我一跳，更嚇人嘅係佢竟然話個「肥妹」係靚女…
我只能慨嘆各花入各眼，我好似用錯咗形容詞噃，好似悔辱D花添，唉，算喇。
一落到樓，就見到「光管陳」喺度，都係佢好，一落嚟就幫我串返「大袋」，真係大快人心，等我都幫下口先︰—
「哈哈，原諒佢啦，阿Sir，功課返香港我哋幫你提佢，而家就免為其難，帶埋佢去見識吓啦。」
不過到「光管陳」講到要去「鬼竇」，仲話阿倫同「細鬼」撞咗鬼，我D緊張感又返晒嚟喇，真係要打醒返十二分精神先。
………
之後，我哋跟住「光管陳」去搵佢哋，條街D人當我哋傻嘅咁望我哋，不過我哋又衰D嘅…
「光管陳」坐低身手執一個似係羅庚又唔係羅庚咁嘅嘢喺度一路行一路望來望去，連阿明同「大袋」都係咁做…
我同阿狗就行後面，真係尷尬到想死呀。
不過，都好彩，好快就搵到阿倫同「細鬼」，我哋跟住佢哋行咗入去一條好旺嘅大街，呢度燈火通明，好多人，但係…
D人好似有D怪，好似一直重覆緊同一個動作咁，最怪係有條友一直喺度跌嘢，又一直喺度執返，我真係睇到好無奈…
唯有問吓「光管陳」發生咩事啦。但係佢竟然咁答︰—
「D人！？丫，我唔記得咗我開咗法眼，呢度一個人都冇，係個荒野嚟，等我幫你哋開眼啦。」
我個心真係寒咗一寒，明明見到咁多人，但係竟然全部都係幻象！？
………
之後，「光管陳」叫我哋跟佢去咗一條冇人嘅後巷，佢擒咗上一個木箱度企咗喺度，望咗入隔離個澡堂度…
雖然似係(目及)嘢咁，但係我知佢睇到嘅同我哋睇到嘅唔同，所以我都跟埋佢咁做，點知…真係好尷尬呀！
裡面係四女二男，都冇著衫，唔啱，冇乜著衫先啱，都唔啱，著咗等於冇著先係啱，兩女服侍一男咁…
男嘅就係阿倫同「細鬼」，四個女人美艶非常，誘人犯罪嘅款，攪到我第一隻腳，第二隻腳，就連…
「第三隻腳」都硬晒，想郁都郁唔到，塊面就紅晒。
「光管陳」竟然仲問得出「你哋做咩另轉晒面呀？」
我呆咗唔識答，得「大袋」敢咁應佢︰—
「因為我哋唔想好似你咁流鼻血！」
我冇辦法唔對「大袋」表示敬意。
聽到阿狗之後一問，「光管陳」一答，我真係對「光管陳」有D失望，佢竟然咁話︰—
「啱啱忍唔住誘惑閂咗一陣法眼，你話D妖邪幾咁邪惡丫。」
我以為佢一直都係開住法眼嘅添，估唔到佢係D咁嘅人，唉，我除咗失望同無奈之外，仲可以有咩感覺丫？
「好啦，再咁(目及)法，未捉鬼就流血身亡喇，開法眼啦，你哋做好心理準備，再唔會係四條索女，係四隻女鬼嚟架。」
「四隻女鬼」四個字再次令我醒返，佢幫我哋開咗法眼，睇嚟就係咁可以睇到晒四隻女鬼。
開眼之後，的而且確，四周圍環境變成廢墟，淨係見到前面呢間爛木屋，淨係聽到風聲同大家嘅呼吸聲…
睇嚟大家都好緊張，我盡力冷靜落嚟，做好一切準備。
………
大家準備好晒，一齊面向木屋，就等待住「光管陳」佢發號司令。
「光管陳」大嗌一聲，一腳就踩爆咗道木牆，木牆冧咗，前面見到竟然再唔係嗰四條索女，而係…
四個面目猙獰嘅女鬼，模模糊糊咁嘅樣，佢哋而家四隻一齊望住我哋。
「魑魅魍魎四小鬼，快快束手就擒！」「光管陳」大叫。
四鬼依依喲喲咁，似係講緊日文，睇嚟大家溝通唔到。
「睇嚟大家溝通唔到！大波兄，右邊嘅你處理，左邊嘅我攪掂。」「光管陳」再叫。
「好，呢四隻鬼，雞嚟架啫，唔係，我意思係好雞架啫，我一個都攪掂啦！」公公回應佢。
啱啱佢先講完呢句廢話，就即刻衝咗前去一招「大波翻雲掌」…
一吓打落地下，地下翻起一個大浪衝向四鬼，不過四鬼似乎可以飛起嚟避過佢…
但係，當四鬼想飛起之際，「光管陳」一招「鳳凰擺架」，唔知邊度嚟條毛巾，佢飛咗條毛巾出去…
毛巾變到好大張，阻咗四鬼向上飛，四鬼就係咁硬食晒成個大浪，之後「光管陳」同公公各一手一鬼將佢哋捉住晒。
我哋四個好齊心咁，一齊拍手掌，恭喜佢哋，呢個先係我心目中嘅「光管陳」嚟家嘛。
「我唔係叫你哋過嚟拍手架！快D捉住譚永倫同施計從先，佢哋可能會發爛架。」「光管陳」講。
我哋四個即刻衝前去捉佢哋，我見到阿倫同「細鬼」真係好似喪屍咁，冇晒人性咁，正想衝向「光管陳」度…
好在，我哋兩個捉住一個啫，我哋將佢哋反向噤咗喺地下，用個欏友坐住佢哋。
………
「大袋」一搥搥打落去「細鬼」度…
「想反抗丫喇！想反抗丫喇！我都想打你條鹹蟲好耐架喇！呢次仲唔大條道理打到你PK？」
阿明同我就坐住阿倫，阿明佢都濕咗阿倫幾搥…
「話時話，我都想打阿倫好耐，成日以為自己好好波咁「阿支阿左」，襯佢冇咩知覺，揼多佢幾吓先。」
其實…我都想打佢哋好耐，不過我見到「光管陳」喺度，唔知佢會唔會報串家嘛，都係唔好亂咁郁手好。
阿狗佢就冇出聲，但係…就係咁借D椅扯「細鬼」D頭髮，呢招高明噃。
「OK，今日就教你哋「九字護身法」，等我先收兩隻鬼先。」「光管陳」講。
四鬼其實一直「依呀依呀」咁叫，不過可能大家都習慣咗呢D嘢，都冇驚，由得佢哋鬼叫囉。
「光管陳」一吓打到右手隻鬼黐實咗牆度郁唔到，喺個袋度攞咗兩個水樽出嚟，「雪」一聲就吸一隻…
「雪」兩聲就吸晒入水樽，放好佢哋就行過嚟我哋四個度…
「光管陳」一邊講一邊做手印叫我哋跟住學…
「你哋用心學好，「九字護身法」係九個手印，即係咁，呢個係獨鈷印…呢個係大金剛輪印…外獅子印…內獅子印…外縛印…內縛印…智拳印…日輪印…仲有最後一個，隱形印，九個印學好晒，可以收，可以放，可以攻，可以防，一般妖魔鬼怪都唔會再係你哋對手，不過一定要用心學好，仲要運用得好。」
「大波兄，留返一隻俾佢哋練習，另一隻收埋佢先。」「光管陳」講完就向公公講。
講完呢句，佢收咗一隻鬼，再一手執住另一隻鬼…
「唔好意思，借你嚟做一吓教材先，唔該晒。」佢同隻鬼講。
我哋四個已經呆咗，之後仲見到佢放開咗手，大鑊嘅係…
唔知係隻鬼已經準備好咗定係「光管陳」專登嘅呢？四周圍環境變返晒開法眼之前嘅咁，繁華鬧市間，有好多人…
「光管陳」同公公就唔見咗，而家所有人都望住咗我哋四個…
(待續)
下集預告︰
頭先隻鬼亦都正式嚟咗，而家喺正我個頭上面。