米米蓮妖怪作品 -《旅行‧如此‧難以忘‧記 》(百集長篇): 第044集 ~ 明︰「九字護身法」，可以收，可以放！
第044集 ~ 明︰「九字護身法」，可以收，可以放！
「光管陳」踩爆咗道木牆之後，見到四條好樣衰既女鬼，其中三隻望咗過嚟，一隻個口仲好專心咁擔住「細鬼」條…
唉，算，唔講，廢事變三級片，不過我見到「細鬼」條慘樣，真係…唉，該煨囉，條…仲使要嘅？
正所謂一念天堂一念地獄，如果仲係天堂，我肯定連「光管陳」佢都落唔到手，不過而家佢哋四隻鬼都係「地獄樣」;1
咁就啱喇，係男人嘅一定一邊追住佢哋嚟打，一邊大叫「俾返四條索女我！」
四條八婆鬼，依依喲喲咁，我睇咁多「日劇」，都未聽過咁難聽嘅女人聲，真係想請加藤鷹出山調教吓佢哋。
唔見咗四條索女係火爆D，頭先就當我發勞蘇啦，而家冷靜返落嚟先。
之後，阿公又唔聽話，又用自己個名出招，「大波翻雲掌」，個氣勢好磅礡，個影像仲好立體添…
真係成個海浪出咗嚟，隆隆聲咁打埋去四鬼度，「光管陳」仲要成條紅底飛埋去…
嘩，仲要放大埋，一道紅光咁，俾佢飛中，仲得了嘅。
四鬼都算係咁喇，寧願去硬食個大浪。佢哋食到正一正，之後趴咗喺地下度郁都郁唔到，我唯有拍吓手賀一賀佢啦。
「我唔係叫你哋過嚟拍手架！快D捉住譚永倫同施計從先，佢哋可能會發爛架。」
我之後唔忍心再傷害「細鬼」佢，唯有幫阿輝手捉實阿倫，仲噤咗佢喺地下…
點知阿倫佢竟然反抗，仲吐咗啖口水落我對心愛嘅波鞋度，呢一吓，我真係忍唔住手，所以就兜搥二搥打落去。
「OK，今日就教你哋「九字護身法」，等我先收埋兩隻鬼先。」
之後，後面「雪」咗兩聲好大聲，我先又冷靜返落嚟，原來「光管陳」開始教嘢喇喎，學下先…
我真係…頂佢丫！同喺香港教書一模一樣，佢有佢噏，我有我學，講咁快，點樣學呀？
三句唔埋，就轉手印，教晒九個手印都唔夠兩分鐘，真心想問吓塵世間有邊條友仔可以喺兩分鐘學晒九個手印呀？
佢條趴街，仲要玩放鬼，我除咗擘大個口得個窿，就係睇住四周圍嘅環境變晒樣囉，我連救命都嗌唔到出聲。
而家，四周圍都變返晒做鬧市景，燈光火著，四圍都係「人」。
好在，三個老死仲喺我身邊啫，不過而家周圍嘅「人」都啤實晒我哋囉。
「唔好講咁多住喇，造好個「九字護身法」先啦。」「喪狗」講。
「不過我淨係記得八個咋。」「喪狗」再講。
「嘩，你人嚟架？講咁快你都記到八個？我淨係記得一頭一尾咋。好似叫「獨鈷印」同「隱形印」。」「大袋」講。
「我就記到四個囉，「獨鈷印」，「外獅子印」，「內縛印」，日輪印」，阿明，你呢？」阿輝講。
「我記到…」我真係支吾…識對。
「得喇！我係記唔到「內縛印」個名啫。」「喪狗」咁講，我真係情何…已堪呢！？
其實我一個都記唔到，第一個手印，我想學，學好咗個動作，諗住學第二個啦，點知已經講緊第四個…
想學第四個嗰陣，條友已經講緊第七個，講到第八個，我先發現自己唔記得咗第一個，所以索性冇學。
我哋四個好快手就造好咗個「九字護身法」，又幾靚架喎，五橫四棟，發出閃閃金光咁，不過係平面嘅，睇嚟我哋四個都要各自各造。
「喂，快D教我！哇呀！」我大叫咗出嚟，原來有隻「人」已經喺我背脊。
「喪狗」將個護身咒轉過嚟幫我隔開咗隻「人」，之後阿輝佢都造好咗…
我眼見連「大袋」都造好咗四五筆，我即刻就立下決心學晒佢哋而家對手造緊嘅手印。
「喪狗」同阿輝一路防禦D「人」攪我哋，一路教我同「大袋」做手印。
死喇，連「大袋」都造到第八筆喇，我先造得第六筆咋…
我之後發脾氣，「丫」一聲大叫咗出嚟。
點知仲大鑊，我嗰六筆飛走晒，呢一刻，我真係想喊出嚟，從來未試過咁挫敗…
…
「嘩，阿明，你呢招咩嚟架，咁勁嘅？」「喪狗」問。
我一時之間都唔知發生咩事。
「係噃，點解你可以將嗰六筆射出去嘅？你睇吓，射出去嗰幾筆打散晒咗幾堆鬼噃，而家佢哋都唔敢行埋嚟。」阿輝講。
「條友撞手神啫。」「大袋」講。
「咩撞手神呀？呢D咪「六脈齊飛」囉！唔信我飛多次你睇。」我吹水。
我即刻就做返晒六筆出嚟，再大叫：「丫！丫！丫！」
「丫你條命咩！烏鴉求偶呀？」「大袋」講。
突然…
「估唔到你哋都有D料噃，不過你嗰個老師同個阿公已經俾我隔絕咗，我最叻就係製造異空間，而家，你哋已經俾我困住咗喺呢個空間，我就睇你哋點走得出我手指罅，哈哈哈。」一把唔知邊度傳嚟嘅聲音。
我哋四個你眼望我眼，之後一齊一線眼，細細聲對講︰
「大佬呀，頭先隻女鬼邊識講廣東話啫。」
「仲要睇個樣又知道佢哋係我哋老師同我個阿公囉，真係無奈。」
「仲要男人扮女人聲囉，真係想死。」
「唉，咪當陪吓「光管陳」玩囉。」
之後，大家轉返身，造好「九字護身法」，不過「大袋」係「八字護身法」，我就「六字護身法」，唔理喇，造住咁多先啦。
「咁而家你想點丫？」「喪狗」大聲問。
「咁而家我哋點呀？」「大袋」細聲問。
「我諗試吓向一個方向衝吓，睇吓D鬼會點丫？」阿輝建議。
「好呀！你帶頭丫！」我講，一來阿輝造好晒「九字」，二來佢喺我後面，所以我咁建議。
「喂，我喺陳Sir呀！我而家俾隻鬼隔離咗，去唔到你哋嗰邊，你哋試吓用我教你哋嘅嘢解決丫。」「光管陳」唔知邊度傳嚟一把死人聲。
「我阿公喺你隔離，叫佢幫口咪得囉，使乜自己玩轉聲呀？」我好細聲講。
「哈哈，個「喂」字仲要走音，好很攪笑。」「大袋」講。
「其實呢…我覺得陳Sir就喺我哋隔離，你哋點細聲佢都聽到囉。」阿輝講。
「陳Sir，咁我哋應該點做呀？」「喪狗」大聲向住個天問。
「之前我講過，「九字護身法」可以收，可以放，可以攻，可以防，大嗌「收」，個網就會包起嚟，可以捉鬼或者保護自己，嗌「放」就係放開，嗌「蝦」，就係解體或者射出去，想點玩都得，你哋自己領悟吓啦…」
回音過後，周圍D「人」變晒鬼樣，又返咗去廢墟，頭先隻鬼亦都正式嚟咗，而家喺正我個頭上面。
而家個景係廢墟，女鬼配喪屍嘅畫面，我哋四個就背對背咁。
「大家唔使驚！我有個提議。」「喪狗」大聲講。
「講啦！」我哋三個一齊講。
「踢波！」喪狗大嗌。
(待續)
下集預告︰
陪我長大嘅姐姐…俾佢哋…監生虐待至死