米米蓮妖怪作品 -《旅行‧如此‧難以忘‧記 》(百集長篇): 第059集 ~ 明︰「肥龍」我要叫你「大師」先得喇！
第059集 ~ 明︰「肥龍」我要叫你「大師」先得喇！
阿輝佢唔知做乜咁嬲，係咁鬧「肥龍」佢…
之後佢仲連珠炮發，鬧到「肥龍」狗血淋頭…
我見到「肥龍」嬲到七竅生煙，怒髮沖冠咁…
真係驚大家大打出手…
不過阿輝講到「侮辱咗靈丸」一句，「肥龍」佢個樣竟然180度轉變…
講緊嘅係佢個樣，唔係佢個頭呀！
之後，老人家仲插埋把口入去，佢哋三個就係咁講，我就係咁聽…
希望用心聆聽，更知佢哋心啦！
喺中間，我淨係問咗句有關「東虫」嘅問題…
原來「肥龍」就係「虫節大師」，而老人家係佢師父…
我真係好想知道高人嘅師父究竟有幾勁呀！
不過佢叫我哋叫佢「星爺」，我始終做唔到，因為呢個名太根深柢固喇…
喺我一生好似可一不可再咁，所以我都係叫佢「星」老前輩算啦！
認識佢哋本來我好開心架，但係聽到老前輩嘅一番話之後，我就變得好擔心…
「…你唔信嘅話，睇吓後面！」
我亦跟住大家向後望，原來不知不覺間，整個月台已經唔係月台，變成一個荒廢嘅地下城…
遠處仲有一個揸住蛇形拐杖嘅「老妖人」，旁邊有隻巨型蠍子，而喺我哋身邊仲有成千上萬隻蠍子仔…
「打鬼用朱古力，捉鬼用保鮮紙！」「星」老前輩咁講…
現場冇人理佢，只係見到「肥龍」變得超級認真，原來人認真起嚟，個樣可以咁有型架喎…
佢背住「星」老前輩向住「老妖人」方向講咗一番咁嘅說話…
「師父！當年你帶住師兄嚟到日本捉妖，當時我只有幾歲，喺街頭流離浪蕩，好在得你哋執我返去，陪住我一路成長，教曉我做人道理之餘，仲將你畢身所學嘅道術 都教埋我，今日…我見到你再次返嚟日本，睇到你老人家老咗好多，啱啱仲蕩失路，入咗嚟呢度，但係點都好…我見返你我真係好開心！我知道我喺你心目中永遠比唔上師兄佢，師兄佢都係我最尊敬嘅人之一，但係…但係…畢竟佢已經誤入歧途，而家佢係邪，我係正，所以呢幾十年嚟，我每日都苦練你所教我嘅道術，希望有一日可以打敗師兄，將佢帶返入正途，而家！就睇吓我修練嘅成果啦！」
話剛說完，「肥龍」佢雙手舉起，凝聚四方八面傳來嘅閃電，「噼嚦啪嘞」咁喺佢雙手不停閃動…
「哇丫」一聲再高舉雙手，隨即「哈」一聲打落地面…
一環環嘅電光震動整個地下城，全場所有蠍子都迅間被震到停頓咗…
佢再「哇丫」一聲，又一吓打落個地度，所有蠍子被震到反晒肚…
最後再嚟「哈」一聲，更用力咁打落地面，整個地下城嘅蠍子傾刻間…
「破叭！破叭！破叭！破叭！~」，全部爆開晒！
嘩！一次過成萬隻蠍子爆炸，場面真係精彩到形容唔到…
「肥龍」隨即一吓跳躍，飛到巨蠍子頭上，一招「閃電手刀」就劈落去…
可惜巨蠍子都唔弱，隨即一個「神龍擺尾」，用佢條蠍子尾打向「肥龍」…
「肥龍」一個「鯉魚翻身」，避開咗佢條蠍子尾…
睇完呢連串動作，我諗要叫返佢做「大師」先得喇！
「老妖人」見到「肥龍大師」嘅厲害，亦隨即做出一連串恐怖動作…
佢一手插入巨蠍子身體，一吓拉出嚟，連絲帶血咁…
拉出一個類似心藏嘅晶體，隨即將佢放入個口，仲吞咗添佢…
仲唔單止咁，佢仲一啖一啖咁咬爛蛇型拐杖，再吞D殘渣入口，嗰種詭異恐怖真係非筆墨所能形容…
「哦！蛇蠍老人！」「星」老前輩咁講。
「唔係蛇蠍美人咩！？」
「蛇蠍美人老咗咪蛇蠍老人囉！」
只見呢個「蛇蠍老人」漸漸變成一隻蛇皮人身蠍子尾嘅怪物…
佢雙爪仲好鋒利，轉化成型之後，佢一躍而上，一吓就爪向「肥龍大師」…
速度之快，我雙肉眼睇只可以看到佢迅間移動到「肥龍大師」身上…
「肥龍大師」一連幾吓閃避…
雖然已經好靈活，身手亦真係估佢唔到咁好…
但係始終唔及「蛇蠍老人」出手嚟得快，終於「肥龍大師」右手被爪傷咗…
手上露出四道頗深嘅血痕…血肉外露咁…迅間變得腐壞…
「蛇蠍老人」再窮追猛打，一連二三十吓，狂爪，喪爪，癲爪…
「肥龍大師」只能一再閃避，間中以拳腳格擋…
但係隨住時間耐咗，「肥龍大師」傷勢似乎變得嚴重…
「蛇蠍老人」襯住「肥龍大師」突然一吓劇痛，立即就運勁一吓爪落去…
雖然「肥龍大師」仍然可以用左臂抵擋，但係…
「蛇蠍老人」隨即擺動蠍子尾，蠍子尾針就直插入「肥龍大師」手臂之內…
我同阿輝都真係好擔心呀，畢竟我哋認識嘅呢個動作，唔係吸走人嘅能力，就係會令被吸者中毒…
點知…我哋真係唔想，但係…就真係如我哋所料，「肥龍大師」右臂被石化咗…
我哋非常緊張之際，我見到「星」老前輩佢…竟然露出喜悅微笑！？
我心中不禁覺得一陣陣心寒，佢涼薄之餘，仲根本冇人性…
我嬲到冇再理佢…另返轉頭就睇返「肥龍大師」呢邊，但係…點解會咁嘅！？
情況180度轉變，石化嘅手臂緊緊將蠍子尾鎖住…
「好！」「星」老前輩大嗌一聲。
「哈！」「肥龍大師」左手揸住蠍子尾全身發電…
「哇丫！」「蛇蠍老人」被電到全身震動麻痺…
佢只好貿然放棄蠍子尾，隨即彈跳數十米遠…
一呼一吸間，顯然已經受傷，但係佢一如大家所料…
尾巴再次重生，不過佢未有再有任何攻勢…
「肥龍大師」企直個身，右臂石化退去，傷痕亦已凝固…
雙手再次做出「紫電靈丸」嘅動作…
座低身，雙手運勁放於腰間，再運勁儲氣…
………
「靚仔，你講得啱，我唔應該侮辱「靈丸」，不過我真係好鍾意「幽遊白書」，我試吓出呢招，希望你可以接受啦！」
說時遲，那時快，「肥龍大師」今次同之前有所唔同，佢雙手間嘅電球變成黑色…
「蛇蠍老人」想借呢個時機直衝上前使出佢嘅致命一擊「魔蠍毒蛇爪」…
「肥龍大師」亦已準備十足喇！佢雙手向「蛇蠍老人」一伸…
「雷神，絕殺，黑龍波！」
嘩丫！一條黑色全身充滿閃電嘅巨龍衝向「蛇蠍老人」！
全場震撼，「嘭」一聲大爆炸！
灰塵飛飛，四處變得模糊…
………
迷霧慢慢散去，見到地上嘅「蛇蠍老人」被炸至粉身碎骨，只淨下身體部份殘肢
………
但係…突如其來嘅係一陣陣嘅壓迫感…
神壇之上又有一個身穿一身端莊素衣，一頭黑色長髮，英氣中帶點妖邪之氣嘅男人企喺度，腰間有一把長刀，佢望向我哋…
「師…師…師兄！」
「肥龍大師」竟然咁樣嗌，唔通…佢就係「東歪」，司徒不正！？
(待續)
下集預告：
「女人鬧交，男人行埋一邊！」