米米蓮妖怪作品 -《旅行‧如此‧難以忘‧記 》(百集長篇): 第060集 ~ 欣︰去到酒店，竟然…遇上一次恐怖經歷…
第060集 ~ 欣︰去到酒店，竟然…遇上一次恐怖經歷…
上回講到，輝輝佢托佢老師嚟接我…
仲好鬼衰添噃，整咗個大字牌寫住「阿欣，我愛你」…
真係…真係…正一衰人嚟架…
「細妹！你發姣呀！但係都唔使幫人抹玻璃架！」
「咩噃，人哋幾時有發姣啫。」
之後，阿輝老師佢當然係個正經人啦，佢俾我哋睇過佢嘅教師証…
仲猛話個牌真係阿輝寫架喎，攪到人哋鬼死咁開心，嘻嘻。
我哋同陳老師佢講話我哋未Book酒店，佢就帶咗我哋去佢哋住嗰間酒店喇。
………
上咗車，好快就到咗酒店，呢間酒店睇嚟都唔錯噃。
我哋之後行埋櫃位辦理入住申請，見到一個都幾靚女嘅職員。
喺阿輝居住範圍有個咁靚嘅女仔，我都好自然咁有D醋意添…
「你好！歡迎光臨！」女職員(阿妮)好有禮貌咁講。
「你識講廣東話架？有冇一個叫朱嘉輝嘅男仔撩過你呀？」
家姐竟然出口咁問，不過…我都好想知。
「朱嘉輝！？阿輝？」
阿輝，阿輝，而家同你好熟咩？點解叫得咁親切呀？
「佢真係撩過你呀？」家姐再問。
「點會喎！我男朋友叫鄭學淵，狗狗，阿輝係佢朋友嚟！」
個女職員一邊講，一邊扭，點解咁似我嘅！？
「得喇！得喇！佢冇撩你就好，唔使發姣嘅！」家姐咁講。
「我抹牆喳嘛！唔該，俾你哋嘅證件我丫！」
之後，佢就幫我哋辦理入住手續…
「或者你哋周圍行吓先丫，等我哋D職員執好個房再通知你哋丫。」
之後，陳老師佢問我哋呢幾日會唔會同佢哋一齊行，我哋都表示可以…
所以，佢就帶我哋上咗12樓，先認識一吓阿輝D同學同老師…
去到一個房，門口打開咗，我望入裡面，見到好多男仔…
「喂，你哋班衰仔喺度攪咩？又賭錢？睇「無字天書」？」
(註釋：「無字天書」即係有圖冇字嘅書，有D咩書係咁？自己諗啦！)
「未食飯，咪鋤一陣啤囉！」
「介紹你哋識兩個靚女，右邊呢個係朱嘉輝嘅女朋友仔，叫阿欣…」
佢咁講，攪到我面都紅晒，我淨係及咗吓頭向大家請安…
「左邊呢個係佢姐姐，叫咩話？」
「阿欣嚟過睇阿輝踢波啦！「咩話」就第一次見，又幾靚女噃，你好！」
「大家好！我叫麗欣！你哋叫我Stephy啦！請大家多多指教！」
「有冇男朋友啫？我哋好識指教人架！今晚慢慢指教你呀吓！」
一個男仔喂喂嗩嗩咁講笑。
「你係咪唔想畢業呀？」「正氣朋友」陳老師咁講。
介紹完之後，陳老師都有帶我哋見吓其他老師…
………
再之後，我哋就落咗去一樓間餐廳…
「呢間餐廳好似都幾細噃！」家姐講。
突然，身後有個「人型生物」行咗出嚟…
唔好意思呀，「人型生物」四個字可能嚇親大家添…
不過當時我真係未睇清楚「佢」個樣丫嘛…
「佢」原來係一個肥妹，佢見到我哋兩個就即刻起晒槓咁講：—
「你哋係邊個呀？識唔識Leslie呀？」
「我哋咪呢度嘅住客囉！Leslie！？有邊個香港人唔識呀？你又係邊個呀？」
家姐都掗起雙手不甘示弱咁回應佢。
「我講住喺呢度嘅Leslie呀！佢叫阿輝呀！」肥妹都惡言回應。
「阿輝」二字一出，連我都即刻變得好嬲呀！
「阿輝係我男朋友！關你咩事呀！」
呢一刻，已經撇除咗家姐，我同肥妹四目雙投，雙方中間電光霹靂咁…
「大家唔好咁啦！以和為貴！」陳老師佢想做和事佬。
「女人鬧交，男人行埋一邊！」但係換來三個女人齊聲回應。
「噼嚦啪嘞吱吱咋咋~」電光一直冇停咁樣閃住…
突然，一個轉捩點嚟咗…
「莊小姐，你哋可以上房喇！」女職員(阿妮)咁講。
「阿芙(肥妹)！幫我手去一去四樓丫！」
佢行咗埋嚟同我哋講叫佢做「阿妮」就得，仲俾咗鎖匙我哋，之後就帶咗肥妹行樓梯走…
陳老師都話要去個洗手間，咁我哋兩姊妹咪自己搭(車立)囉…
………
「叮！」
(車立)到咗，我哋入咗去，門好快就閂埋咗，制都未噤就上咗去…
我哋望望D制，先知原來呢個(車立)淨係去單層，去唔到6樓…
「噤5字，行上一層咪得囉！」
我哋都跟住做，喺5樓度出咗去，但係…
頭先邊個叫我哋咁做架？(車立)裡面明明係冇其他人架喎！
出到嚟之後，(車立)門就閂埋咗，去咗其他層…
而呢度就…橙黃嘅燈光突然變得暗淡…仲閃吓閃吓咁…
十足十就係恐怖片情節…
「喂，荷瑪，荷瑪，出嚟呀~」家姐咁叫。
點知…我哋淨係聽到佢D鼻鼾聲…
呢個樓層應該係成「H」型嘅，我哋就係喺中間，而家…
兩邊仲傳嚟D怪聲…
「餐躝~餐躝~餐躝~」一吓一吓拖住地嘅鐵鍊聲。
「蹼~蹼~蹼~」一吓一吓沈重嘅腳步聲，但係唔似係正常雙腳走動嘅聲。
我哋即刻想噤返(車立)落樓下，但係D(車立)都上晒樓上…
最慘我哋連出路都冇，只可以企定定喺度等…
但係等待換來嘅…只有更害怕，一吓一吓嘅聲音越嚟越逼近我哋…
「荷瑪荷瑪，快D出嚟呀，真係會死人架！」
「貓靈小姐，你一定要救救我哋呀！」
我哋不斷咁叫，但係「貓小姐」佢就只有鼻鼾聲…
突然，鐵鍊聲同腳步聲都已經冇咗…因為…
聲音嘅發出者已經企定定望住我哋…
一邊係…古老紙傘上面有一隻巨眼，配上一隻粗壯嘅男性腳…
仲有一條佈滿脷苔嘅大舌頭…
親身見到先知…原來「遮鬼」並唔係好似卡通咁可愛得意…
佢舔吓舔吓條脷，成個鹹濕佬咁樣，真係好得人驚呀~~~
另一邊…仲…仲恐怖，係個身上綁有鎖鍊嘅大肥鬼…
身上無一忽係好肉，灰白色嘅裸體，肥腫難分…
肉同肉之間呈現一條條藍光綠光嘅嘅嘢，似係血絲…
一對明顯嘅大細眼，鼻大而崩裂，口中爆牙利齒清楚可見…
再加上佢舔舔脷咁嘅樣…
根本就係一個恐怖大淫魔…
「哇哈哈！靚女呀！正呀！」
我同家姐都驚到跌咗地，嗰種無助感覺…
我真係唔識形容…只係覺得好難受…
眼淚亦再次好自然咁流咗出嚟…
我以為經歷過，人就會成長，唔會再驚…
但係…原來…經歷死亡邊緣係咁可怕架…
再者…我更驚嘅係…佢哋似乎係想先姦後殺…
我好驚呀，救命呀，可惜…我就連嗌救命嘅力氣都冇…嗚嗚嗚…
………
「你左，我右，一人一個，唔使爭！」
「大肥鬼」向我走過嚟，「遮鬼」向家姐走去…
(待續)
下集預告：
阿明佢去咗邊呢？
「傻佬明！傻佬明！」