第078集 ~ 欣︰咬我唔理,我理家姐同輝輝啫,做咩會有道召鬼符嫁?

輝輝嘅黃老師就係「北轍」!?

最衰隻紙妖D「消息」未返啦,唔知佢搵唔搵到係邊個呢?

不過,其實佢仲會唔會返呢可?

上次講到輝輝佢已經係第二次錫我喇,我個心不知幾甜…





佢仲拖住我隻手衝去救佢朋友…

嗰種感覺…真係好浪漫啊!

我哋好快就衝到去搵輝輝俾人脅持嘅朋友前面…

個癲佬好明顯唔係正常嘅癲,係好唔正常嘅癲。

嘻嘻,呢句說話真係…有D笨添。其實我意思係佢似乎係鬼上身咁。





「咁而家可以點啊?」輝輝佢問陳老師。

陳老師回應佢話張老師試緊談判,而陳老師自己就好似做好拯救準備咁。

咦,嗰位老人家…佢好似係輝輝學校個校長噃…

佢繞咗個圈,行到去另一邊嚟睇嘢嘅嗰一堆市民側邊…

佢似乎都想拯救輝輝個朋友,但係佢咁老,好似好危險噃,點算好呢?





陳老師同張老師一齊俟住我哋向後行,我哋就係咁,同個癲佬嘅距離越嚟越遠。

而家好似只有校長可以有足夠距離衝前救輝輝朋友。

「欣欣,唔好望喇!個癲佬係隻妖怪嚟。」輝輝突然咁講。

妖怪!?係噃,輝輝佢唔知我其實已經習慣咗呢D鬼怪…

而家我已經「見怪不怪」喇,所以我推開咗佢隻手。

「輝呀,俾著係早幾日,我就會驚。其實…喺過嚟之前,因為你…我已經接受過訓練嫁喇,我唔驚嫁。」

佢似乎俾我嚇呆咗。

「哇丫!!@#@%!」校長旁邊嘅市民突然大叫,仲即刻走晒。





我望去個癲佬度,原來佢已經好似輝輝所講咁,變成咗隻口腫面腫嘅雞樣怪物。

佢仲突然一刀斬落去輝輝朋友度…

一片混亂之後,淨係見到校長佢…佢成背脊都係血…

我見到咁就即刻喊咗出嚟,嗚…嗚…嗚…

(插~)
(尺~)
(呯~)
(趴~)
「玉麟金劍!」
(插~!)





陳老師果然就係「先生」所講嘅「北鳳」…

尋晚喺13樓救妖怪我已經半信半疑,當時只知道佢識D道術…

而家見佢呢幾吓打手,似足「先生」佢收服「大惡鬼」咁…

我就可以肯定佢係喇。

「癲佬怪雞」被收服,呢邊都總算平靜返落嚟…

大家都各施其職咁去做返自己應做嘅事。

不過,我真係好擔心校長佢老人家啊,個傷口好似好深。





「呢個校章係邊個嫁!?」陳老師突然喺地下執起個校章咁問。

好似係輝輝佢嫁喎,唔知咩事呢?

個校章爛咗,裡面有張黑色嘅符,睇嚟唔似係護身符。

而輝輝佢…點解會呆晒嫁?

「哇丫~!」突然有把聲喺遠處大叫。

咦,係噃,家姐呢?

陳老師帶我哋成班人衝去呢個嗌聲嘅位置…

行到去近河邊,見到家姐同暈咗嘅「袋袋」。





「家姐,袋袋佢做咩啊?」

「佢…佢…佢頭先俾個醜樣男仔條大蛇咬親啊。」家姐喊晒咁。

「咩男仔嚟嫁?」

「咪住先,上次條蛇咬佢痛咗一吓,就唔痛喇喎。」阿狗佢咁講係咩意思呢?

我見到「袋袋」佢好似…

打眼色!?

我諗我知咩事喇,D男仔真係好壞啊!

「楊鉅祥,由而家起,你要一直跟住我行,我去邊你去邊,知唔知啊?」

哼,抵死啊,雖然係開始拍拖啫,但係抽水索油呢D嘢,真係唔要得啊!

我輝輝就唔同啦,同我拍咗拖咁耐…

係呢兩日先錫吓嘴嘴咋,佢從來都冇越軌嫁。

「好痛啊…好痛啊…唔跟得唔得嫁?」

死人頭丫,仲扮嘢噃。

「阿袋啊,唔怪得你頭先唔講全名我知啦。唔緊要啦,一陣我同你一齊跟陳老師行咪得囉。」

家姐竟然咁講,咁我都冇理由再嬲啦。

………

之後過咗一陣,陳老師咁同我哋講︰

「酒店老闆達叔,櫃檯女職員阿妮,六樓有個黑人警衛,二樓有個大食肥婆,三樓六樓有一堆外地傳教士,全部都保到你哋。不過佢哋有D係妖怪嚟,你哋唔使驚佢哋,佢哋係好妖。」

原來達叔﹑阿妮同個肥妹都係高人嚟嫁喎。

………

再之後,陳老師帶咗我哋成班人去食快餐…

搵到位之後,大家就自己出去嗌嘢食…

不過,陳老師佢留低咗輝輝同阿明陪佢霸位,唔知係咪有乜特別嘢傾呢?

我咋咋啼行返埋D偷聽佢哋講嘢。

「我哋團人似乎有人想害你。」陳老師對住佢哋講。

佢第一句已經嚇壞咗我,原來真係如「先生」所講,有嘢想害輝輝啊。

「會唔會係同之前點錯我相嘅對手自殺死嗰個人有關呢?」

輝輝講咩自殺死人啊?點解…點解關輝輝事嫁?

「「北轍」啊!我記得欣欣講過話喺廁所有隻「紙妖」同佢講,話佢混入咗我哋度。」

係啊!係啊!我係咁聽過。

「估唔到你哋連「南轅北轍」呢D邪術士都識,但係…冇理由。「北轍」年紀應該唔細,唔會係同學,而D老師…」

「「黃仔」啊!…」輝輝講。

「黃Sir!?訓導主任係「北轍」?」陳老師回應。

唔通輝輝嘅黃老師就係「北轍」!?

「咪住先,我竟然唔記得咗同你講啊,陳Sir!」阿明突然插口。

「咩事啊,咁緊張?」陳老師問。

「係喎,我都唔記得咗可以叫埋你去添。講起「北轍」先記得「南轅」,講起「南轅」先記得「千年石妖」。」輝輝幫阿明口講。

之後佢哋講咗好多嘢,仲講到「東虫」同埋一個比佢哋仲要高一輩嘅世外高人,「星」老前輩。

「好!有佢哋幫手更加好,就咁啦,一陣安排班衰仔返酒店,你哋四個男仔就跟住我去搵「千年石妖」!」

「我都想跟埋去睇吓隻「千年石妖」啊!」我突然衝口而出。

佢哋都俾我嚇呆咗,之後仲一陣想阻止我去,唔想俾我去咁。

但係我好簡潔易明咁講返我之前嘅遭遇俾佢哋聽,之後陳老師就免為其難咁批准埋我同家姐去。

不過,似乎陳老師同「先生」有唔少牙齒印噃,我講親「先生」,佢都唔係咁開心咁。

咦,話時話,點解「先生」好似冇咩聲氣咁嘅,唔係話今日嚟搵我哋嫁咩?

我睇睇電話,原來一早已經有個短訊︰—

「飛機延誤,可能今日都嚟唔切,萬事小心,要等我啊!」

(待續)

下集預告︰

呢度…個場面…好陰森恐怖啊…