米米蓮妖怪作品 -《旅行‧如此‧難以忘‧記 》(百集長篇): 第079集 ~ 輝︰出發去「迷霧森林」。
第079集 ~ 輝︰出發去「迷霧森林」。
我哋成班人去咗搵個死人「大袋」，原來條友又俾「酒吞童子」條蛇咬多咗啖…
本來我都幾擔心佢，但係經阿狗一講，再加上佢對死人鴛鴦眼…
我肯定佢冇事，只係純粹想抽水索油。我真係想一腳就踩爆佢個死人頭…
不過見佢馴服咗欣欣個惡死家姐就算啦。
之後，我哋成班人跟住「光管陳」去食快餐，一坐低，佢哋班友就去咗嗌嘢食…
但係「光管陳」就留低咗我同阿明。
「我哋團人似乎有人想害你。」
「光管陳」咁講其實一D都唔新鮮，亦係我意料中事…
但係我真係好想知係邊個，而我好直接咁將所有我知嘅嘢都連埋晒一齊。
即係「聖華」個斷腳隊長﹑「北轍」田育文﹑訓導主任「黃仔」…
呢三個人係有關係，可能仲係同一個人，但係又好似唔係咁講得通。
我真係諗極都唔明，只可以盡量避開「黃仔」，好在而家佢唔喺我哋身邊。
「咪住先，我竟然唔記得咗同你講啊，陳Sir！」阿明突然咁講。
「咩事呀，咁緊張？」
「係喎，我都唔記得咗可以叫埋你去添。講起「北轍」先記得「南轅」，講起「南轅」先記得「千年石妖」。」
阿明講起，我先記得我哋今晚要去一去「迷霧森林」。
我同阿明將所有喺我哋身邊發生嘅事情都講晒俾「光管陳」知。
「好！有佢哋幫手更加好，就咁啦，一陣安排班衰仔返酒店，你哋四個男仔就跟住我去搵「千年石妖」！」
「我都想跟埋去睇吓隻「千年石妖」啊！」欣欣突然衝口而出。
我真係唔想俾佢有危險，所以一直勸佢阻止佢去。
但係…欣欣原來都經歷咗唔少呢D鬼怪事…
佢仲識得「南龍」同一個叫「瘋婦」嘅高人…
佢講到好勁咁，但係「光管陳」就一直否定「南龍」嘅能力…
不過「光管陳」聽完欣欣咁講都批准咗佢去。
仲因為欣欣家姐要跟住「大袋」，而「大袋」又一定要跟住「光管陳」…
所以「光管陳」都批准埋欣欣家姐去。
欣欣突然睇一睇電話，我都睇到佢個短訊︰—
「飛機延誤，可能今日都嚟唔切，萬事小心，要等我啊！」
欣欣佢真係丫，專登俾我睇到呢個訊息…
如果我係偷睇嘅，我估我會呷吓醋嘅，但係佢咁明顯隊埋我身邊…
我真係覺得…呢招有D…那西囉，算啦，扮吓嘢當氹吓佢啦。
「男仔嚟架？做乜俾個咁嘅短訊你啊？」
「嘻嘻，你呷醋呀？係啊，佢對我好好嫁，你小心D佢氹走我添啊。」
「我呷醋啊，唔好啦，唔好啦，唔好俾佢氹走啦。」我咋晒嬌咁搖佢隻手講。
「好啦，睇吓你對我好唔好啦。」
欣欣佢就係咁單純。
之後，我哋成班人食完嘢，「光管陳」就叫Kenny帶隊返酒店…
而佢就同我哋四男二女，一齊出發去「迷霧森林」嘅入口—「理嘉城」。
………
嚟到呢度，我哋當然唔會聽「星」老前輩咁講，喺女更衣室裡面等啦…
我哋只係喺外面等佢哋。
「我哋等咩啊？」阿狗問。
「約咗高人喺女更衣室裡面等啊。」阿明講。
「咁唔入去裡面？」「大袋」問。
「女更衣室嚟嫁！」我答。
「咁叫麗欣佢哋入去睇吓咪得囉。」「大袋」問。
「呢度係職員更衣室啊！」我再講。
「車~！睇兩眼喳嘛，怕咩啫？」
「好啊，咁我同細妹入去睇吓丫。」欣欣家姐想拖埋欣欣入去。
「唔好，聽你哋之前所講，裡面有條空間隧道，淨係佢哋兩個入去太危險，就喺度等齊人先啦。」「光管陳」講。
之後，我哋就喺度慢慢等…
唔知點解，今日呢度好多白袍憎人，D做型都似足晒「虫節大師」…
我諗圍數最少有五六十人…
乜僧人都可以玩遊戲機嫁咩？又好似真係冇人講過話唔得噃。
「咦，你哋都嚟到喇，咁多人嘅？我以為得你兩個添。」
係「星」老前輩啊！「大師」喺佢後面…
之後嗰堆白袍憎人都行到「大師」後面，原來真係佢D(口靚)嚟嫁喎。
「哈哈，老前輩肯定就係「星」老前輩，而大師肯定就係「東虫大師」喇，我哋好多年前見過面嫁喇，你哋好，我係火鳳派傳人，陳鳳初。久仰久仰。」
「「狗養」呢兩個字留返嚟一陣串敵人，仰慕我就得喇。好啦，一齊入去啦。」
我哋成六七十人去，真係有D誇張，好似想鏟平「迷霧森林」咁。
「大家唔使覺得誇張，因為我估計「余二十」同「袁丰田」會比我帶更多嘅徒弟出席「千年石妖」嘅壽宴，各二百個左右啦。」
我哋幾個都嚇呆咗，咁一陣D敵人咪成千隻鬼怪再加上幾百個人？
我哋點同人哋打啊？
我哋就係咁，成六七十人一齊行咗入去女更衣室。
「丫~!$#$%@%！」
趴街！原來咁啱得咁蹺，有個女職員換緊衫。
「輝輝，唔准睇啊！」
「袋袋，唔准睇啊！」
欣欣噤住我對眼…
其實我一早睇到晒啦，不過個女職員只係普通貨色，嚇我唔到嘅。
(啪~！)
呢吓就唔同喇，我嚇呆咗，「大師」佢竟然一吓就打暈咗個女職員…
不過原來佢只係想打暈佢放佢埋一邊啫。
「出發！」
「大家記得合埋眼啊！」我講。
「可以唔使，我幫大家做好咗個隱身防護網！」
我哋就係咁，由「星」老前輩帶頭，一個搭住一個，一齊出發。
………
呢次感覺好唔同，即使開眼睇，D隧道嘅守護精靈都好似睇唔到我哋咁。
我哋好快就到咗「迷霧森林」。
「呢度邊度嚟嫁？」
「好似好夢幻啊！」
「係啊，好大霧啊！」
「原來呢度都會天黑架？」
「係啦，夜晚喇喎。」
「呢度係「迷霧森林」啊！」
「呢度就係「迷霧森林」喇？」
「咁我哋而家去邊啊？」
「森林山坡下面，壽宴場地！」
「你哋喺度等，結好「風雷天網」，知唔知？」
「!!@#$^#^@@#！」
「徒孫留低結網，你哋七個就跟我同肥仔落去。」
我哋就係咁，九個人一齊慢慢行落山坡。
見到「光管陳」明明係我哋老師，但係行到埋「星」老前輩同「大師」度…
就好似佢哋學生咁，感覺好得意，原來我哋呢度成四代人嚟。
我扶住欣欣就跟住大家一齊行，踩住D樹藤，經過D草叢，慢慢摸黑向下行…
………
終於嚟到山坡下面，我離遠見到迷霧之中，有好多石檯石櫈喺度，慢慢…
我睇到…
呢度個場面…
好陰森恐怖…
D光都係由旁邊一大堆凌空飛起嘅白色紙燈籠發出…
我見到…真係有成千上萬隻鬼怪，唔止，應該仲好多係人嚟…
佢哋都望上去大台上面，似乎係有人講緊嘢。
但係我個角度同位置，睇唔到台上發生乜事。
「我哋就留喺度睇吓先。」「星」老前輩咁講。
(啪~！)
乜事呢？
原來係「大師」又打暈咗隻…小妖怪，仲攞咗今晚個菜單嚟睇…
(待續)
下集預告︰
咦，河童！？但係…你做乜嘢啊？