米米蓮妖怪作品 -《旅行‧如此‧難以忘‧記 》(百集長篇): 第083集 ~ 明︰而我就…睇「春麗」打「河童」，仲唔小心跌咗入井…
第083集 ~ 明︰而我就…睇「春麗」打「河童」，仲唔小心跌咗入井…
阿輝，咪淨係掛住自己啊，記得保護阿欣啊！
呢！你睇吓，阿欣嗌喇！
我遠水不能救近火啊，而近火又不能由我嚟救噃…
我淨係想唱情歌俾小倩聽啫，點知隻「壞蛋河童」條木契又要走出嚟攪事。
…
「光管陳」嚟到，兩句唔埋就請神上身喇！好在佢嚟到幫拖啫。
「…急急如律令，請媽祖顯靈，上徒兒我身，收服呢隻河中惡妖！」
我開頭以為「媽祖」肯定係大龍鳳嚟，會好似做大戲咁，成身鈴鈴鐺鐺…
但係原來…
佢成個「春麗」咁款，仲要似足全盛時期「彊屍先生」嘅「李賽鳳」咁鬼靚…
不過…
我一諗到佢本來係「光管陳」嚟，我就想嘔喇！
都係睇返我小倩好，我見「壞蛋河童」似乎俾「春麗」吸引住…
我乘機就用「九字護身法」包住舊喺地下執返嚟嘅石頭掟過去…
順便一個箭步衝前，一個嚟手拉返小倩埋我身邊…
「家明！」小倩一副感激流涕嘅款，真係我見猶憐…
「佢就係我孫新袍呀？個樣又幾標緻噃。」
「我頂你個制！頭先又唔出嚟幫拖，而家又彈出嚟做電燈膽，我想乘機鍚啖小倩家嘛！」
(茱~！) 小倩佢竟然…襯我發緊阿公脾氣嘅時候鍚咗我一啖。
我霎時間，開心到面都紅晒…
「毒河水炮！」
「壞蛋河童」嗌完我先記得原來佢同「春麗」打緊…
似乎呢個時候唔係咁啱講兒女私情住，但係…
「家明，你頭先冇受傷丫嘛？不如我哋行埋一邊先丫。」
小倩一把咁溫柔嘅聲又將我喺精彩嘅戰場上拉走咗…
我同小倩坐咗喺石井嘅壆上面，食住花生睇「春麗」打「河童」…
「喂，俾多幾粒嚟丫！」
「你又唔過去幫拖，又阻住我同小倩二人世界，仲想食花生！？」
「你估我唔想幫咩？我夠鬼人哋打呀？你條衰仔，仲好講，頭先淨係喺度唱歌，我見情況唔妥，走返轉頭去搵鳳初兄嚟幫手咋，好在中途就見到佢，唔係你而家仲咁安樂喺度食花生睇戲呀？」
「咁好啦，花生俾晒你啦，你行埋一邊慢慢食，唔好阻住晒。」
「衰仔，重色輕我。」
大家都唔好理阿公住喇，睇返「春麗」先…
「壞蛋河童」招「毒河水炮」似乎D水力好勁…
但係「春麗」一吓跳起就避開咗，仲一落返地就嚟招「倒掛旋風蹆」…
而「壞蛋河童」就一直向後退，退得幾步，後面冇路，唯有用雙手硬擋…
總算頂得住…
之後佢不甘示弱，即刻就舉起右手大嗌︰—
「地獄冥河~！」佢有種「大地在我腳下」嘅氣勢。
呢招奇特之處喺將成條「桂家村」嘅大街變成一條黑色嘅河…
好在，水位未到我哋坐緊嘅石井高度。
「嘻嘻嘻，而家呢度就係我嘅主場，睇你個「媽祖」仲可以點對付我？」
「睇你個媽祖」呢句好似鬧緊「光管陳」老母咁，估唔到妖怪都識語言藝術。
「春麗」佢始終都係水神，總算可以企喺河面，但係…
明顯「壞蛋河童」更加輕鬆…
而家成個場景都黑黑紅紅紫紫咁，點睇都真係覺得對壞人有利…
「冥河鬼爪~！」
「壞蛋河童」嗌完之後，「冥河」裡面就隊咗幾十隻鬼爪出嚟…
仲想攻擊「春麗」啊！
「鳳凰百裂腿~！」
「春麗」總算可以一腳踢走一爪…
之後佢雙手合拾…
「你條冥河D水太淡喇，睇我將佢整鹹啦！大海汪洋，賜我力量，天從臨海~！」
天上面突然眨眼間嚟咗一大堆發亮嘅海水，仲…
我頂佢個肺丫，兜頭淋落嚟，整濕晒我同小倩…
咦，我望一望一身濕晒嘅小倩，又好似…
唔頂住好D噃，攪到我對眼都嚟唔開小倩添。
…
「哈哈哈，你以為有用咩？地獄冥河係無底深潭，加上係完整實在嘅，而你呢度只係得部份海水，根本冇可能將佢填滿！」
乜話！？原來「春麗」呢招完全起唔到作用！？
「冥河鬼爪就好似一個開關制咁，開啟之後鬼爪會一直不斷走出嚟拉你落去，我就睇你頂得幾耐！」
「哼，刁蟲小技，天從臨海護我腳下！」
海水冇再刻意覆蓋「冥河」…
反而係喺「春麗」腳下做成一個海水屏障防止鬼爪嘅攻擊…
「到我喇喎，水轉鳳凰捲~！」
我有D鄙視呢一招，因為明明就係水龍捲，但係佢就死唔肯用個龍字…
攪到呢招成個食物咁。
個「水龍捲」射向「河童」，又估唔到幾大力噃…
射到「河童」一仆一碌咁，佢而家個死人樣勁唔忿氣…
一對射喱眼紅到出血咁款啤住「春麗」…
「睇嚟我要用真身喇！冥河水鬼，魂歸吾身，怨氣積聚，邪體現形！」
佢一嗌完，一大堆鬼魂就喺「冥河」裡面洩出嚟，好快咁走晒入去佢身體度…
邪氣一直積聚，佢個身形就越嚟越大，個死人樣就越嚟越衰…
而家成隻巨型鱷魚咁，但係手腳較長…
而家佢…最少有成個大貨櫃咁大隻…
佢之後一吓就跳咗入「冥河」，濺起嘅水花裡面都有靈魂同鬼爪走出嚟…
好在，「春麗」幾吓手刀就擋晒。
「大波兄，睇住阿明同你孫新袍！」
「好！」
「孫新袍！？」小倩佢面都紅晒咁俟埋我度，感覺又真係幾唔錯噃。
「衰仔，咪淨係掛住爽啦，睇住自己同我孫新袍啊！」
我想回應佢，但係突然…
「哇~丫~！」
「水怪」突然喺「冥河」衝咗出嚟，仲…
吞咗「春麗」！？
唔係咁大鑊呀？冇戲做喇？唯一救星都死埋？唔係咁化學呀？
「水怪」吞咗「春麗」之後就跌返落水，而我哋兩男一女就四周圍望…
好緊張咁搵「春麗」。
…
已經成十幾秒喇，「春麗」，唔係，「光管陳」真係上唔返嚟？
「哇~丫~！」
「丫！」「水怪」又再衝咗上嚟，仲將我…
嚇到跌咗入井…
「阿~ 公~ 幫~ 我~ 保~ 護~ 小~ 倩~ 啊~！」
我就一直跌落井底，淨係跌嘅過程都有成分鐘，可想而知個井有幾深…
(噗~！)
「丫！」咦，嘩，咁高跌落嚟都冇事嘅！？
井底有D水，但係下面有D淋淋地嘅嘢，個井口唔係好闊…
我打橫伸盡隻手差D都點到牆，但係…
D水好臭吓，不過我冇理太多，因為依然擔心上面嘅情況…
「阿公！小倩！聽唔聽到啊？」我向上大嗌。
過咗一陣…
「喂！聽到！你冇事丫嘛？」
「聽到！但係回音好勁，你講慢D丫！」我回應。
「講咩啊？你講慢D丫！」
我真係俾佢激到想死！
「我！問！光！管！陳！點！啊？」
「你講嘢一舊舊！我聽唔到你講乜啊！總之鳳初兄頭先用把金劍隊爆咗隻水怪喇！而家我哋都安全！不過鳳初兄就受咗D傷！」
安全就好，唔想再回應佢喇。
睇嚟「光管陳」又係用「擘天式」兜底插爆咗隻「水怪」…
嘩，呢次喺體內插，肯定超痛。
「咁！快！D！救！我！啦！」
「你喺好深呀？我睇你唔到！條繩夠唔夠長啊？」
我連繩頭都見唔到。
「駁！長！D！啦！」
「我連我全身最長嘅體位都用埋喇！真係唔夠長呀？」
佢咁講完，我真係即使見到條繩都唔想揸埋去…
唯有自己死死地氣搵吓其他方法啦…
「你嗌完未啊？」井底呢度突然有把人聲。
真係嚇咗我一跳，但係…
相對咁諗，咪即係有人喺度囉，咁返上去就有望喇。
「你踩完未啊？」
我…踩完未？唔通…
黑色嘅井水裡面突然隊咗對極唔友善嘅眼出嚟啤住咗我…
(待續)
下集預告︰
但係…我最鍾意就係食靚女嫁喇！哇！
註解︰
(1) 木契—睇唔起人或者鄙視人嗰陣鬧人用嘅
(2) 嚟手—順手或者反手