米米蓮妖怪作品 -《旅行‧如此‧難以忘‧記 》(百集長篇): 第084集 ~ 欣︰「草帽呼子」原來…，大家似乎都打得好激烈啊！
第084集 ~ 欣︰「草帽呼子」原來…，大家似乎都打得好激烈啊！
個井咁深咁窄，點解阿明你仲咁輕鬆咁嘅？你有信心返到上地面咩？
而家仲咁明顯有隻妖怪喺井底陪你，我真係戥小倩擔心你啊。
不過，我呢邊都好亂，我似乎應該擔心返自己先…
「哇丫~！」「依丫~！」「走啊~！」「救命啊~！」「哇~！」
D鬼怪都爭相走避，場面一時間真係好墟冚，好混亂啊！
仲人踩人，鬼踩鬼咁，攪到周地都係手腳，仲有甩咗出嚟嘅頭…
…
「其實你哋冇理由會驚嫁喎，會驚嘅應該只有呢個小妹妹。」
「老人家」佢摸摸我個頭講。
而我頭先淨係掛住睇個混亂場面，都唔知佢哋講過D乜。
「你哋七個人，有「北鳳」後人，有靈犬護身，有靈貓護身，有靈狐護身，有老鬼護身，仲有邪靈護身，你哋使乜驚啊？」
我數數手指，有陳老師，靈犬！？唔通「居居」都係神靈嚟嘅？
仲有「荷瑪」﹑阿妮！？
「老鬼」係咪講緊頭先傾計有講到嘅阿明公公呢？淨返係…
「袋袋」！？佢真係俾邪靈上咗身呀！？
但係，點解班高人由得佢俾隻邪靈侵佔身體嘅？
講到明係「邪靈」嚟，佢會唔會保護「袋袋」嫁？
定係會調轉槍頭打返我哋呢？
…
「至於「草帽呼子」，雖然係隻強大嘅妖怪，但係性格孤僻，仲好怕醜，小妹妹你冇靈力，就你去同佢傾吓計啦。」
唔係講緊我呀！？
輝輝佢拍一拍我膊頭，唔係連輝輝都想推我出去死呀！？
不過我諗諗吓，呢個位好似已經係最冇危險性…
所以輝輝應該都係咁諗，我唯有…
「好，我試吓啦。」
我有D唔係咁開心，依個時候，仲要有個喺地下碌碌吓嘅鬼頭碌咗埋我腳邊…
我咪大力一踢發洩吓囉，點知…
踢中咗「臭西道士」塊面。呸呸呸，LUR口水講過，講得太快添…
我係想講臭道士「西斜」啊…
「哼，我都估到嫁喇，原來真係你哋。」
死喇！攪到佢哋班壞蛋睇到我哋添，好在，好似冇人發現呢個秘密…
大台上面仲行緊個男仔落嚟…
咦，又幾靚仔喎，佢咪好似係…
GTO個鬼塚英吉啊！電視版嗰個啊！
「就等我嚟分場啦！蝦！蝦！蝦！」「肥高人」突然分開佢哋。
我掛住睇男仔添，嗱嗱聲就位試吓同「草帽呼子」傾兩句先…
我慢慢Say住Hi咁行埋去…
「我叫阿欣啊，你好，你叫咩名啊？你有冇時間啊？不如我哋坐低傾吓計丫…」
佢望一望我，之後就好快耷低咗個頭，好似好怕醜咁…
仲行咗埋一邊坐低咗，唔係咁順攤呀！？
之後，我都坐咗埋去…
「你係咪怕醜啊？」
佢冇答，我就繼續講。
「我係香港人嚟嫁，你係咪日本人嚟嫁？」
「係呢，你有冇朋友嫁？」
咦，佢似乎有D反應噃，佢另另頭咁。
「咁頭先喺你隔離嘅係你乜嘢人啊？」
佢搲搲個頭，之後終於出聲︰—
「爸爸媽媽哥哥姐姐叔叔伯伯！」
一時之間，我真係睇唔到邊度有兩個女性出嚟…
但係廢事打斷大家傾計，唯有繼續搵嘢傾…
「佢哋好錫你架？」
「係！佢哋成日打我嫁！」佢竟然咁回應。
唔通真係打者愛也？俾人打仲要話佢哋錫自己都有嘅？
不過似乎可以試吓拉攏佢幫我哋呢邊噃。
「佢哋打你，你痛唔痛丫？」
「好痛！」
「係囉，錫你係唔會打你嫁，所以佢哋根本唔錫你，不如你幫我哋丫，我哋唔會打人嫁！」
「但係…出面騎住獅子嗰個人用皮鞭打緊人噃！」
佢講緊輝輝，一時之間，我真係好尷尬！
但係又唔可以講話輝輝打嘅只係妖怪，因為「草帽呼子」佢都係妖怪丫嘛。
「哦，佢…哋係骷髏骨，所以唔算係人囉，應該係咁。」
「咁…嗰邊嗰個打緊人嘅人呢？」佢再問。
佢講緊「袋袋」，我又要諗嘢回應喇！好攰啊！
「哦，佢…其實係…黐線嫁！唔使理佢，好似係。」
「咦，又係噃，嗰邊個老嘢同個大肥佬係同媽媽佢哋三個傾緊計咋喎。」
媽媽！？佢係講緊「千年石妖」！？
如果鬼塚英吉係女人，又真係…
好嘔心啊！
不過我飛過咗就算，我望一望家姐嗰邊，再同「草帽呼子」講︰—
「呢，你睇吓，嗰邊佢哋都係玩緊躝藤喳嘛。」
好在，家姐佢哋未打到埋身，仲係爪爛緊「毒藤女妖」D毒藤。
「草帽呼子」睇到佢哋都好似好開心咁，所以我就再問佢嘢…
當試探吓佢都好丫嘛。
「係呢，呼子，我叫你呼子好唔好啊？」
「好！都係一句啫。」
「呼子呀，你有D咩力量嫁？勁唔勁嫁？可唔可以講嚟聽吓啊？」
「風力量，木力量，我一吹，呼呼呼咁就可以吹到D嘢亂晒嫁喇，好勁嫁！」
佢好似都冇乜問題丫，似乎都係隻好妖嚟…
「係呢，呼子啊，你鍾意食咩嫁？」我試吓問吓佢D無聊嘢。
「人類！」呢個回應，似乎有D唔尋常，我亦開始感覺到我有危險…
「Eee…會唔會…有其他食物…你都會好鍾意食嫁？」我唯有繼續問。
「但係…」佢好似有嘢想講，但係講唔出咁。
「但係咩啊？」
「我最鍾意就係食靚女嫁喇！哇~！」
佢突然擘到個口好大，好似想吞咗我咁，佢D牙有成幾層，仲有好多蟲喺裡面…
「丫~！」
「欣欣！」
(插~！)
一條金光陪住一把三尖兩刃槍直接插穿「草帽呼子」個口，仲將佢飛咗埋一邊。
之後，輝輝騎住「居居」跑過嚟，仲一手將我扯上「居居」背脊…
「居居」背脊位置有限，所以我只可以做嘅就係…
攬到輝輝實一實…
「欣欣，你冇事丫嘛？」
「無…無事，但係頭先嚇死我喇！」
我好驚，但係而家輝輝喺度，我放心晒喇！
仲可以同佢喺危難中一齊騎住白雪雪嘅「居居」…
感覺真係好夢幻啊！輝輝佢就好似白馬王子咁。
「蝦~！「居居」，衝去欣家姐嗰邊啦！」
輝輝佢「蝦」一聲，把三尖兩刃槍就返埋佢右手度，真係好有型，好勁啊！
「居居」跑咗兩步，一個跳躍，就飛咗埋去「毒藤女妖」度…
「蝦~！蝦~！蝦~！」
(嘭~！嘭~！嘭~！)
輝輝佢橫掃三吓，毒藤就爆開晒…
「喵~！」
家姐佢亦都迅速衝到「毒藤女妖」面前…
(嚓嚓嚓~！嚓嚓嚓~！)
連環幾吓貓爪，將「毒藤女妖」爪到重傷訓咗喺地下…
家姐仲要吓吓爪面，睇嚟「女妖」呢次真係醫返都唗藥費。
至於阿狗嗰邊，我哋完全睇唔到情況…
因為佢同「迷霧天魔」都俾一舊巨型泥土包住咗…
不過好快，泥土就裂開咗，我見到「迷霧天魔」佢訓咗喺地下…
而阿狗就凌空飄起咗，仲一副不可一世嘅奸樣…
佢邪氣咁強，究竟佢係忠定奸嫁？
不過我唔理喇，總知大家都成功打敗對手就好喇。
…
「你班死仔！仲唔過嚟幫手？」
「袋袋」佢原來已經打低咗成二三百個人，但係佢似乎有D攰喇…
家姐身為人哋哎吔女友，當然幫都幫唔切啦，但係…
「我哋想睇你威丫嘛，大力D！專心D！」
乜輝輝同阿狗咁衰嫁…
不過睇住一對情侶一齊並肩作戰，又真係幾好睇嘅…
所以我都冇叫佢哋幫手添，嘻。
佢哋一對情侶就繼續並肩作戰，而我哋就望咗去大台度…
高手過招，果然係唔同D，原來到而家佢哋仲係鬥緊把口，仲未出過手…
「媽媽！你哋走先，呢度等我呼子攪掂啦！」
「草帽呼子」原來未死，仲雙手噤住傷口，好大力咁吸氣，依家…
阿狗製造咗一道土牆出嚟保護我哋…
而其他嘢，包括同「情侶」打緊嘅人類都俾佢吸晒入口…
而「千年石妖」﹑「南轅」同「西斜」就襯機走咗佬…
「草帽呼子」而家吸到成個「香港太空館」咁…
唔通…佢要大爆炸炸死晒我哋！？
(待續)
下集預告︰
咩話！？冇路可以離開呢度？
註解︰
(1) 墟冚—熱鬧，人聲嘈雜，形容地方。
(2) 調轉槍頭—反過來幫另一邊。
(3) LUR口水—吐口水。
(4) GTO個鬼塚英吉—GTO，漫畫嚟嘅，鬼塚英吉就係主角麻辣教師。
(5) 順攤—近似順利，但係通常用嚟形容人奇怪地順從你意思去做事。
(6) 飛過咗就算—將片段跳過或者視角轉移。
(7) 廢事—免得。
(8) 醫返都唗藥費—藥石無靈。
(9) 哎吔女友—「哎吔」書面語應該係便宜，不過呢度用便宜女友好似好怪，所以可解為新女朋友或者未知係咪女朋友嘅女朋友。