米米蓮妖怪作品 -《旅行‧如此‧難以忘‧記 》(百集長篇): 第085集 ~ 輝︰可惜…佢要離開我哋…
第085集 ~ 輝︰可惜…佢要離開我哋…
「欣欣！」
我另返轉頭，見到個乜差「呼子」想食咗欣欣…
我即刻就成支三尖兩刃槍飛埋去，但係…
唔知點解，我頭頂上面又有條流星飛過，唔通係有D乜嘢鬼神一直庇祐緊我！？
條流星帶住我支槍直飛埋去，「插」一聲插穿咗「呼子」側面…
如果淨係靠我嘅眼界肯定冇咁準，究竟「佢」係乜嚟嘅呢？
「呼子」飛開，我亦唔得閒理條流星太多…
即刻就騎住「居居」，直跑埋去救欣欣先…
(碰隆 ~ 碰隆 ~ 碰隆 ~)
「上馬！」
我一手就將欣欣扯咗上嚟…
「欣欣，你冇事丫嘛？」
「無…無事，但係頭先嚇死我喇！」
佢攬到我實一實，頭先梗係嚇親頂喇…
「蝦~！「居居」，衝去欣家姐嗰邊啦！」
唔知做乜，我好似癲咗咁，竟然好自然咁覺得嗌一聲把槍就會飛返埋我度…
而最攞命嘅…
就係把槍真係飛返埋我度，配上坐騎，加上美人…
而家我成個人飄飄然，真係覺得自己成個大英雄咁，感覺真係好正啊！
「衝啊！」
「蝦！蝦！蝦！」
(嘭~！嘭~！嘭~！)
「妖女」嘅毒藤俾我三吓就發爆晒…
「喵~！」
欣家姐亦襯機迅間衝埋去爪爆「毒藤女妖」，但係…
我有小小後悔，後悔自己竟然幫個惡婆傷害咗一位咁美艷嘅女仕…
「女妖姐姐」對唔住啊，你安息啦。
「女妖姐姐」幾秒之後變成飛灰，我亦慢慢另返去睇睇阿狗佢點…
而個死仔就恃住「靈狐」嘅力量，擺明蝦人哋「迷霧天魔」年紀大…
佢似乎輕鬆打敗咗「迷霧天魔」，真係狐假狗威，咦，好似調返轉先啱。
…
「你班死仔！仲唔過嚟幫手？」
估唔到個死仔「大袋」又幾威噃，一條友打低咗成百幾人…
而家班嘍囉訓晒喺地下…
欣家姐剛剛上任人哋女友，又幾稱職噃，幫埋手一齊打…
佢哋公一份婆一份，我為咗「大袋」嘅未來，我當然唔會出手幫啦！
「我哋想睇你威丫嘛，大力D！專心D！」
好似好衰咁添，不過估唔到連欣欣都唔嗌我哋幫手…
我見無聊，咪望望去睇吓「星」老前輩佢哋嗰邊囉，點知…
「夠膽你就出手先！」
「你出手先丫！」
「你出手先丫！」
佢哋真係…仲衰過愣仔打交，一直喺度鬥嘴，仲未出過手…
…
「媽媽！你哋走先，呢度等我呼子攪掂啦！」
媽媽！？呢兩個字嚇親我，大台上面明明就係五個大男人…
唔會係講緊「南轅」，又唔會係講緊「西斜」，唔會係「千年石妖」呀！？
原來越醜樣越勁呢個準則一直冇變過，女人生到好似反町隆史咁，又真係…
死咗佢好過。
突然，有個好強大嘅吸力好似想吸走我哋咁…
係「呼子」啊！佢想吸晒我哋入口！？
阿狗佢嘅能力果然唔錯，一吓就整咗成道牆出嚟，保護咗我哋，但係…
「大袋」打低咗嘅人﹑啱啱落返嚟嘅「大師」徒弟…
同仲未走嘅一堆小妖怪都俾佢吸晒入口…
「呼子」變咗做「吸子」，而「千年石妖」﹑「南轅」同「西斜」就唔見咗…
而家，「吸子」吸到成個「巨型菠蘿包」咁…
佢就係咁，一直吸，一直變大，就嚟想爆咁，點算好呢？
「你哋唔使諗住離開「迷離境界」喇！媽媽佢走之前會封晒呢度D出路！」「吸子」佢竟然仲有口講嘢。
「咩話！？冇路可以離開呢度？」衝動嘅「大袋」總係第一個出聲。
大家都變得好緊張…
…
突然，全場靜晒，淨係見到「吸子」雖然仲係吸緊，但係就越嚟越細…
因為…佢D妖氣好似一直俾另一D嘢吸緊咁…
我哋都唔知發生乜嘢事，但係估計應該係好事，因為肯定咗唔會爆炸。
「吸子」越嚟越細，我哋就慢慢見到佢個身後面，原來一直有一個人喺度…
係佢啊！又係佢啊！「司徒不正」啊！
妖刀插咗入「吸子」後面，所有妖氣，甚至係成隻「吸子」都俾把妖刀吸收咗…
…
我哋就係咁，一直睇住，冇人出聲，直到佢出聲…
「不正…可以講句說話嗎？」
「星」老前輩就好似一個好耐冇同自己個仔傾過一句計…
呢刻淨係好想聽聽個仔把聲嘅爸爸一樣。
而我哋都靜晒，全場就好似期待住司徒不正嘅回應一樣…
不過，佢真係一直都冇回應過…
淨係望住「星」老前輩，有D唔知係想喊定係嬲嘅樣…
………
(呼~~~ 嚓~！)
一吓風聲，一吓刀聲，呢一刻，時間就好似停頓咗咁，全場冇人相信係事實…
「哇~！ 丫~！」
「星」老前輩俾司徒不正嘅妖刀向上拖斬咗一吓…
我哋就連佢點樣去到前輩面前都見唔到…
(趴~！)
「星」老前輩被斬到噴血飛起，再跌返落地，而我哋就連一個反應都做唔到…
「師…師父！」
「哇丫！五雷轟頂！」
「大師」用「風雷天網」嘅閃電劈向司徒不正…
仲「嘭」一聲巨響，劈咗成個大窿出嚟…
但係「司徒不正」速度實在太快喇，一貶眼又唔知去咗邊…
「雷神，絕殺，黑龍波！」
(龐龐龐龐龐龐龐龐龐~！)
「大師」似乎見到司徒不正，仲炸咗成條坑出嚟，但係司徒不正就已經唔見咗。
…
而家，「星」老前輩就訓咗喺地度，奄奄一息咁，D女仔就喊晒，D男仔就呆晒…
「大師」就衝返埋去前輩度，抱咗佢喺自己心口…
「師…父…你點…你點啊？」
「肥…肥仔唔…唔好喊，師…師父想咗死好耐嫁喇…」
「師父！你係咪傻咗啊！？」
「長…長生不死，唔見得好快樂，愛人…從未走近自己，愛徒…離我而去，我呢幾十年，根本冇快樂過…」
「師父！」
「前輩！」
前輩佢嘔咗成啖血出嚟…
「冇事…我最開心…就係見到你仲係咁肥，肥得咁得意，記唔記得啊…」
「記得，記得，師父講乜我都記得！」「大師」已經喊到好似缺堤咁。
「當年…我喺條街度執你嗰陣，你好肥嘟嘟，好可愛嫁…」前輩再嘔咗啖血。
「你…你要努力維護世界平衡，發揚…我所教你嘅嘢啊…知唔知道？」
「肥仔知道！師父…」
「呢度…冇咗妖力保護…會散晒…你哋會返唔到去人間嫁…」
之後，前輩推開咗「大師」。
「行…行開啊！」仲鬧開我哋。
「大師」同我哋都唔敢逆前輩意思，見佢坐定返D就慢慢退後…
…
「呼~ 治，癒，星，塵。」前輩雙手向天，就好似祈求上天賜予大地一D嘢咁。
而家，成個天空都佈滿星光，D星星仲慢慢隨住無數條光柱走落嚟…
成個場地都變得好夢幻，死去嘅小妖怪﹑人類，破爛嘅場地…
都好似慢慢癒合緊咁，但係…
「唔好啊！」「大師」竟然咁嗌，仲想衝埋去阻止前輩咁…
(啪~！)「星」老前輩用其中一條光柱變成一道牆阻止「大師」埋去。
「師…父…唔好啊…你…會死嫁…」
………
夢幻過後，星光慢慢消失，人類同妖怪，甚至場地都回復原狀…
似乎只有四妖同…
「星」老前輩佢離開咗我哋…
…
突然，個天空開咗一條裂痕，發出燦爛陽光，仲有一個…神明！？
有個就好似仙女一樣，全身充滿仙氣嘅女性慢慢降落嚟…
「星」老前輩睜開雙眼…
「月…月娥…」
月娥！？唔通就係「星」老前輩之前提過，佢嘅一生中最愛！？
「係啊！等你好耐喇！卒之肯死嚟搵我喇？」一把好溫柔嘅女聲。
「等我好耐！？」「星」老前輩似乎喜出望外，喜從中來咁。
「當年我冇同阿日佢喺埋一齊，我根本鍾意嘅人就係你，係你一直冇同我表白喳嘛，等等吓，我都死埋嚧。」
「我…我…，佢…佢冇呃我啊…佢真係喺我臨死之前，俾我同我「女神」喺埋一齊啊…多謝啊…天神…」
我哋同「大師」見到呢個情景，都忍唔住喊咗出嚟，真係好戥前輩開心啊。
「月」前輩就係咁，帶住「星」前輩，一齊隨住光柱返上天上。
雖然佢要離我哋而去，但係離開唔緊要，最緊要係佢去得快樂，而呢一刻…
欣欣俟咗埋我度，欣家姐俟咗埋「大袋」度，至於「大師」…
佢唔知做乜俟咗埋阿狗度…
(待續)
下集預告︰
咩話！？井底之龜！？