米米蓮妖怪作品 -《旅行‧如此‧難以忘‧記 》(百集長篇): 第090集 ~ 欣︰總算離開咗丫，諗住訓返覺好啦，點知又…
第090集 ~ 欣︰總算離開咗丫，諗住訓返覺好啦，點知又…
我呢邊上次講到，話我好心急想阿明快D返上嚟同我哋離開呢度…
好在，佢真係好聽話，即刻就一招「天馬行空」跳咗返上嚟，仲帶埋隻龜添…
不過，雖然佢咁聽話跳返上嚟，可惜我哋都係趕唔切，最後嘅出口都被閂埋咗。
但係，陳老師佢不慌不忙咁，仲請咗「地藏菩薩」出嚟…
總算係搵返D可以離開呢度嘅曙光…
「地藏菩薩」俾咗塊石碑我哋，上面有九行字，每行有九個字…
好明顯係有D嘢嘅，我嘗試去讀，發現有D字唔係咁啱…
所以淨係選咗D駁得埋嘅字嚟讀…
「吾乃千年岩石所化，修得魔性，練成妖邪之體，現於此與…應該係四妖共同死建造，唔啱，個死字唔要，即係共同建造迷離境界，境內進出必須得我批准方可，此地除外？」
咦，好似好順噃，差D乜呢？數字？「此地」又係邊度呢？
唔係，女人嘅直覺話我聽，數字唔使理，咁…不如試吓呢段說話都唔要丫…
還掂建造嘅係「草帽呼子」，又唔係「千年石妖」…
呢段嘢似係「千年石妖」亂噏嘅，咁即係…
「村，桂，家，婆，沙，婆，之，內，家？」
咦，好似咁熟咁嘅？咁似佢哋…
我知喇！桂家村，沙婆婆，同埋家之內！我明晒喇！
咦，輝輝都似乎就諗到喇喎，借D倚俾D提示佢，等佢喺班朋友度威吓先…
「輝輝呀，你覺唔覺得有D字好似駁唔到文啊？不如試吓將D唔關事嘅字重組一吓丫，例如第一行個「村」字呢。」
咦，輝輝好似就睇到喇喎…
「OK！攪掂！我哋應該走到喇！」
死人頭阿狗丫，阻我輝輝發達，佢之後仲懶有道理咁解釋返噃…
乞人憎，應該係我輝輝威家嘛！
輝輝見到我嬲爆爆嘅樣，就望咗我一陣…
「欣欣，你一早諗到喇？仲諗住俾貼士我解答，等我威吓？傻妹嚟嘅。」
都好，輝輝知道我心意。
………
之後，大家就去晒「沙婆婆」屋企度搵…
不過，都唔知點搵，呢度俾D妖怪塞實晒，想郁都郁唔到…
好在，輝輝一直喺我身邊啫…
「搵到喇！呢度啊！」
係阿明佢搵到，不過，我睇到小倩企喺佢身邊，我估，小倩同我一樣…
又係鍾意俾自己嘅男人威嘅嗰種女人仔…
嘻嘻，自己嘅男人，諗起都覺得好開心，嘻嘻。
我哋就係咁，跟住阿明搵出嚟嘅秘道嘗試離開「迷離境界」…
條秘道好似香港戲院散場嗰陣嘅後樓梯，我哋就係沿住佢，一直係咁行…
行行吓，見到有道門，一推出去…
咦，真係出返嚟人類世界喇！
我哋五男三女一老一嫩加三隻小動物就係咁，之後一齊上咗地鐵返去酒店…
佢哋個樣都好似好攰咁，係得阿明佢好似好緊張咁…
一直同佢公公傾緊嘢，好似話要趕時間咁…
我望一望隻錶，原來而家先十一點啫…
睇嚟「迷離境界」裡面嘅時間同人類世界應該有分別。
………
好快咁，我哋就返到去酒店，而阿妮就喺櫃檯度迎接我哋。
大家返到嚟都各有各返房休息…
「欣欣，我返房訓喇，聽朝見啦。」
「好啊，聽朝見。」
雖然唔係咁捨得，但係都要分房訓家嘛，我哋又未結婚。
………
返到自己房，沖個涼，又要寫我嘅日記喇，今日多嘢寫囉…
「細妹，你覺得阿袋佢點啊？」
「幾好丫，佢係輝輝朋友，應該唔會太差嘅。家姐，你真係想同佢拍拖呀？」
「我係想拍吓拖，但係又…唔知呢，我見佢其實都幾好咁丫，又出過手救過我，頭先我打隻「毒藤女妖」嗰陣呢，其實整傷咗自己嫁…」
「你整親邊度啊？冇事丫嘛？」
「手背啫，但係阿袋佢頭先見到我受傷，即刻就用咗張「TEMPLE」紙巾幫我抹，仲慢慢攤開到正晒先幫我抹，佢又幾細心丫。」
「死喇死喇死喇，家姐，你十月芥菜喇！」
「咦，人哋又冇話要同佢一齊，只係覺得呢個男仔可以交往吓喳嘛。」
家姐佢講完呢句就攬住咗個枕頭訓咗埋一邊眼光光咁，我就繼續寫我嘅日記…
寫寫吓，都未寫晒，可能太攰啦，我就上咗床訓嚧…
………
(啪~！啪~！啪~！)
「欣欣！欣欣！開門啊！」
咦，邊個啊？咁嘈嘅？咁叫我，唔通係輝輝？
我蒙蒙鬆鬆咁行咗去開門…
(噗~！)
嚇死我啊！我一開門，輝輝就攬埋我度。
「嚇死我啊！我以為你都出咗事啊！」
「輝輝，咩事啊？」
「我D同學俾人捉晒啊！」
「咩話！？佢哋俾人捉晒！？邊個做嫁？」
「未知，而家我哋查緊邊D同學俾人捉咗先，因為頭先阿妮話有人留低咗封信喺櫃檯，佢唔識睇，俾咗阿狗睇，封信係話有個人捉晒我哋D同學。」
「咁我叫醒埋家姐先。」
………
我叫醒家姐之後，就同輝輝三個人一齊返上去搵阿狗佢哋…
「咦，你哋做乜嘢啊？」
係陳老師﹑阿明同小倩，佢哋似乎唔知去完邊度，啱啱先返嚟咁。
「陳Sir，除咗我哋頭先喺「迷離境界」嗰幾個人，其他同學都俾人捉晒啊，你哋跟我嚟丫，阿狗嗰邊有封信。」
我哋之後走咗去阿狗個房，而家淨返我哋五男三女同三隻小動物…
陳老師攞咗阿狗封信睇…
「咩話！？要我哋去大阪市長居陸上足球競技場？咦，署名係…田某人！？」
「係咪即係「北轍」啊？」
「唔通係「黃仔」做嘅！？」
「好，而家去我房睇吓！」
………
我哋八個人就係咁去咗陳老師個房度搵黃老師，但係…
(咔嚓~！) 陳老師開咗門…
個房好靜…
「吓！？」
陳老師似乎好驚訝咁，究竟發生咩事呢？
我行前去睇吓，點知…
我見到…一條…被綁到大字型咁嘅乾屍…
屍體被抽到乾晒，只係淨返D泥黃色嘅枯骨…
黃…黃老師死得好慘…
(待續)
下集預告︰
咩話？要我哋同佢踢波？