米米蓮妖怪作品 -《旅行‧如此‧難以忘‧記 》(百集長篇): 第091集 ~ 輝︰呢邊又唔知攪乜嘢，竟然被逼要踢波！？
第091集 ~ 輝︰呢邊又唔知攪乜嘢，竟然被逼要踢波！？
石碑嘅秘密終於俾阿狗佢解開咗，但係…
欣欣佢好似好嬲咁噃，所以我望咗佢一陣…
唔知係咪情人眼裡出西施呢？我覺得佢嬲爆爆個樣好得意好可愛好靚。
「欣欣，你一早諗到喇？仲諗住俾貼士我解答，等我威吓？傻妹嚟嘅。」
佢俾我講中，伸一伸條脷仔，個樣仲可愛D添…
………
之後，我拖住佢隻手，跟住大隊一路行去「沙婆婆」屋企…
欣家姐而家有愛情滋潤，睇嚟都唔得閒阻住我哋喇，真係要多謝「大袋」。
………
嚟到「沙婆婆」屋企，D鬼怪又唔知頭又唔知路…
喺度撞來撞去搵出口，真係有D乞人憎…
而我身為欣欣男朋友當然要喺佢身邊一直保護佢啦。
終於，俾個「傻佬明」搵到個出口先…
仲成功帶領我哋在場嘅所有人類同妖怪離開呢度添。
………
出返咗去之後，唔知點解，我有少少掛住「大師」同「星」老前輩…
我哋應該再冇機會見到「大師」喇…
至於「星」老前輩，佢去得開心，我當然都開心啦，但係…
佢走之前所講嘅嘢，除咗我唔明我隻「慧眼」究竟喺邊之餘…
我仲有D擔心「大袋」，因為…
我有個好強烈嘅感覺係…
佢真係會變成惡魔，仲好可能要同我哋大戰添。
咦，我竟然唔記得擔心一吓校長添，但係…似乎喺醫院仲安全D。
………
諗諗吓嘢，好快就返到去酒店…
「欣欣，我返房訓喇，聽朝見啦。」
「好啊，聽朝見。」
之後，「光管陳」同阿明就好似有嘢要做咁…
而我就同阿狗﹑「大袋」佢哋兩個返房訓…
返到上12樓，諗住行返自己房啦，點知見到「肥妹」，但係佢…
做乜耷低頭行到成條行屍咁啊？
我都唔記得佢係妖怪，同行屍冇咩分別添，但係，佢真係怪怪地…
佢見唔到我，我亦都冇理佢，自己返咗入房…
入到自己房，發現阿倫又唔喺度，不過真係太攰喇…
所以我又冇理，涼都冇沖就訓咗上床…
(啪啪啪~！啪啪啪~！)
「阿輝！你喺唔喺度啊？」
似係阿狗把聲，我咪行去開門囉。
「咩事啊，傻狗？」
「D人俾人捉晒啊！」
「D人！？」
「老師同同學啊！」
「邊個捉咗佢哋啊？咦，「黃仔」好似係壞人嚟嫁喎，會唔會係佢做嫁？佢哋幾時俾人捉嫁？」
「唔知，你睇吓封信。」
我望咗兩眼，突然諗起欣欣可能有危險，即刻就飛奔落去搵佢…
………
「欣欣！欣欣！開門啊！」
…
我一見到佢開門，真係開心到癲咗，即刻就攬實佢…
「輝輝，咩事啊？」
「我D同學俾人捉晒啊！」
「咩話！？佢哋俾人捉晒！？邊個做嫁？」
………
之後，佢叫醒埋佢家姐，我哋就返上去搵阿狗佢哋…
中途仲撞到「光管陳」佢哋啱啱返嚟添…
「陳Sir，除咗我哋頭先返嚟嗰幾個人，其他同學都俾人捉晒啊，你哋跟我嚟丫，阿狗嗰邊有封信。」
………
一到咗，阿狗就俾封信佢睇…
睇完之後，大家都好直接咁懷疑係「黃仔」做嘅，所以即刻就落去搵佢。
………
「光管陳」佢開咗自己房門之後，好奇怪地，個房好靜…
唔通「黃仔」唔喺度，或者訓咗？
「吓！？」
我行前去一睇，見到一條乾屍，大家都呆咗…
佢唔係「北轍」咩？點解咁易死，仲要死成咁嘅？
「光管陳」想行埋去睇吓佢，但係突然…
「退後！」
我哋都一仆一碌咁跌咗喺地下…
「護身牆！」「光管陳」佢用法力整咗道氣牆出嚟。
我見到氣牆出面係一堆綠色嘅煙霧，睇嚟係隻乾屍發出嚟嘅…
「呢招明顯係中國天師所做嘅，借屍體釋放毒氣，睇嚟冇錯喇，黃Sir未死，條屍係佢整嘅陷阱，佢就係「北轍」田育文！」
「好！我哋就去「大阪市長居陸上足球競技場」度會一會佢，睇吓佢攪得D乜都好！」
「陳老師，「肥高人」我哋已經聯絡唔到，我有個朋友，佢都好犀利嫁，不如等埋佢先一齊先去丫，佢叫「白百龍」啊！」欣欣講。
「白百龍！？咁唔使喇！出發！」「光管陳」回應。
睇嚟「南龍」真係同佢有仇。
………
我哋沿途，除咗緊張，就係緊張，大家都冇乜講嘢…
好快，我哋就到咗「競技場」門口，而且大門亦已經開住等我哋入去咁…
我哋亦都唔客氣，就咁一行九個人行入去，其實阿妮因為擔心阿狗都跟咗嚟…
(嘭~！)
我哋入咗去，但係大門閂埋咗。
「歡迎光臨大阪市長居陸上足球競技場！」
場內廣播！？
「請先到更衣室準備！」
發生乜嘢事啊？
(哇哇哇哇丫丫丫丫~！)
我哋未見到個足球場，但係就聽到出面觀眾席已經好嘈…
估計係有成千上萬隻妖怪喺度…
「大家唔使驚，既來之，則安之，你哋都見過大場面啦，就去更衣室睇吓佢哋咩葫蘆賣咩藥！」
………
我哋慢慢跟住場內指示，行到去一個更衣室…
「光管陳」帶頭，準備開門…
「麗麗，呢度男更衣室嚟嫁，你唔係想跟埋入去啊？」
呢次「大袋」又幾冷靜噃，但係呢度個情況咁怪，可能有危險…
係咪應該留低幾個女仔喺度呢？
「妹妹你哋四個唔好入住，我唔會閂更衣室呢道門，我帶頭行入去，你哋四個男仔排成人鍊慢慢行入嚟。」「光管陳」講。
………
我哋小心翼翼咁行入去，突然…
「光管陳」停低咗，仲做好戰鬥準備。
我即刻行前去睇吓乜事，而家…
一堆戴晒頭盔，著晒盔甲嘅人企咗喺我哋前面，仲面向住我哋…
「光管陳」想一吓就劈死一件咁款…
「哇！陳Sir！我啊！Kenny啊！」
Kenny！？佢除咗個頭盔，原來係真係Kenny。
「係我哋啊！」
成班盔甲戰士都除晒頭盔，原來係成班死仔。
「你哋做乜嘢啊？」「光管陳」問。
「鬼王話要我哋同佢隊波踢一場喎。」
「咩話？要我哋同佢踢波？」阿狗問。
「係啊！仲俾晒D裝備我哋添，佢俾咁多裝備我哋，肯定場波似打交多過踢波啦，佢俾我哋咪著定先，保護吓都好丫嘛。」
「美式足球呀？定係欖球啊？」「大袋」問。
「有咩分別嫁？」
成班人傻吓傻吓咁喺度諗…
「唔好理啦，兩個都唔係啊，係踢足球啊。」
「咁你哋著成咁，點踢啊？咪生人唔生膽啦，換返正常裝備同佢哋踢啦！」阿狗問。
「呢度有個窗口，你望完我哋對手個樣先講我諗會好D。」Kenny講。
我行埋窗口一望，對手係妖怪就好明顯啦，但係…
佢哋個款…
(待續)
下集預告︰
阿婆？…井底之蛙？