第104集 ~ 明︰「呼子」比起其他三隻都要可怕。

而家,「喪狗」同「迷霧天魔」打緊…

「迷霧天魔」使出一招「天魔迷霧」之後,成個場變得煙霧濔漫…

喺迷霧之中亦傳出幾吓打鬥聲,似乎係「迷霧天魔」嘅攻擊打中咗阿狗。

「就憑你D咁嘅招數就可以打贏我咩?」





係「喪狗」把聲啊!

「我嘅狐尾,每一條都有一種能力,就試吓我嘅「月狐之尾」啦,吸收!」

場內迷霧經「喪狗」一講之後就慢慢散去…

十秒唔夠,我哋就清楚可以見到「喪狗」旁邊多咗隻小鬼,將D迷霧吸收晒。

而家,「喪狗」同「迷霧天魔」對視緊…





「估唔到你隻狐妖真係幾勁噃,咁就試吓我嘅…哈哈哈,霧氣集結,霧氣三叉戟!」

突然間,迷霧再次出現,亦迅間集結起嚟,喺「迷霧天魔」手上形成一支長戟…

「睇住啦,連環三叉戟!」

「喪狗」冇直接閃避,反而嘗試直接抵擋…

「「土狐之尾」,土靈壁壘!」





一道土牆抵擋咗「迷霧天魔」嘅攻擊,但係…

「好,霧氣入侵,三叉破擊!」

「迷霧天魔」扭動手臂,用強大嘅力氣隊穿咗「土靈壁壘」,再衝向「喪狗」…

「啪啪」兩聲,「喪狗」將三叉戟緊緊抓實,但係…

「丫!」

「哈哈哈,我支三叉戟係有刺嫁,仲有毒液添,我睇你呢次都插翼難飛喇呱!」

「喪狗」塊面突然好似中毒咁,好快就變成咗綠色…

「哼,係咩?「水狐之尾」,淨化!」





佢迅間將D毒逼出體外,面色亦變回原狀…

「睇嚟,你都再冇乜嘢板斧傷害得到我喇,完場啦!「火狐之尾」,狐燄!」

「喪狗」「乎」一聲吐出火燄,令到「迷霧天魔」全身著火…

「哇丫~!」

「迷霧天魔」傷重跌咗喺地下…

「呢局我哋贏咗,下個啦。」

「喪狗」自信十足咁,佢冇將「迷霧天魔」置諸死地,只係將佢打到重傷。





「哼,「迷霧天魔」的確係輸咗,下個就…女妖你去啦。」「千年石妖」咁講。

「毒藤女妖」行咗出嚟…

「咁我哋派邊個出去好啊?」「鐵拳」問。

「你放心啦,唔會係你啦。」我答。

「不如就…洋腸啦,好嗎?」我再建議。

點知大家都未表態,「洋腸」就衝咗出去…

「出手啦,女妖!」「洋腸」講。

「好,毒藤絕殺蔓陀蘿!」





嘩,呢隻女妖好毒,一出手就出必殺技,直頭係想攞命咁…

現場一大堆毒藤直飛埋去「洋腸」度,仲將佢勒住咗…

「喂,你犯規啊,勒住人哋,人哋點同你打啊?好茅啊!」「洋腸」大嗌。

「我就係唔俾你郁…」

之後,女妖仲行咗埋去「洋腸」度…

「我係唔俾你郁啊,吹咩?」

佢仲想一巴打落「洋腸」塊面度,但係「洋腸」缩埋龜頭避開咗。





「玩茅丫嗱?我就同你玩,缩入龜殼,睇你點打我?」

之後,「洋腸」真係缩咗入龜殼,唔直接同佢打,就係咁,「洋腸」一直龜缩…

而「毒藤女妖」雖然被佢激到面紅耳赤,但係又真係冇辦法打穿佢個龜殼。

………

時間過咗都唔知幾耐喇,「洋腸」依然係唔出肯嚟…

而「毒藤女妖」亦依然冇辦法打到佢。

「千年石妖!」「喪狗」突然大嗌。

「咩事啊,狐妖?」「千年石妖」回應。

「不如將佢哋放埋一邊打下場先啦,下場你哋出邊個啊?」

「鬼吼啦!」

「Yeah!終於到我出場喇,上次就輸俾你哋個銀鎗俠,而家睇吓你哋點對付我!」

「鬼吼」行咗出嚟,好似好開心咁,佢口中嘅「銀鎗俠」應該係阿輝。

「鬼影分身,百刀鬼吼!」

佢迅間分成五十個自己,其中幾隻走咗去搬開「毒藤女妖」同「洋腸」。

「丫!」「毒藤女妖」突然大嗌。

「邊個摸我PATPAT?」

全部「鬼吼」迅間變成豆豉眼,仲耍手另頭…

「毒藤女妖」隨手捉起一隻嚟打,點知…

「哎吔!做乜好打唔打,打埋我個真身啊?饒命啊!」

但係其實我見到…

「洋腸」條尾出咗嚟,我估係「洋腸」玩佢哋嘅。

「等我出場啦!」阿妮突然咁講。

佢再突然爆衫,變成一身「不知火舞」咁款…

即係著住件一件頭紅色短袍,對波彈吓彈吓咁…

「鬼吼」俾「毒藤女妖」折磨完之後,即刻就位,開始應戰…

佢一入返分身群中,大家就再分唔到邊個係佢真身,但係阿妮佢一於好少理…

「狐炎舞!」

阿妮佢扭動屁股,將尾巴變成火燄,燒爆晒「鬼吼」D分身。

(縫 ~!縫 ~!縫 ~!)

「丫~!丫~!丫~!」

轉一吓,燒一堆,而家淨係十幾個「鬼吼」啫…

「再俾你咁燒法,我仲有得剩嘅?好,到我出招,必殺技,鬼吼靈魂刀波!」

呢招有D似鬼廟嗰度「骷髏武士」嗰招大招,但係威力就更加強大…

「鬼吼」將兩刀合埋,再一次過將分身集結,形成靈魂光波,再向阿妮斬埋去…

我睇住個「靈魂刀波」衝到埋阿妮度,但係阿妮就…

「不知火流派奧義﹒火狐亂舞!」

全場突然一團團旋轉火球飛舞,「靈魂刀波」被部份火球抵銷…

同時,其他火球亦衝向「鬼吼」。

(龐~!)

「鬼吼」亦都應聲倒地。

………

「唔好煩喇!媽媽等我嚟一次過收拾佢哋啦!」「呼子」突然出聲。

「爸爸同哥哥都冇鬼用嫁,不如用嚟祭我隻沙婆老妖啦!」

佢兩手執起「迷霧天魔」同「百刀鬼吼」,就將佢哋放咗入口,之後…

佢喺個口度嘔咗個皮蛋缸出嚟,而皮蛋缸上面,就係一個人頭。

小倩佢見到皮蛋缸上面個人頭之後…

「沙…沙婆…你…你竟然將沙婆婆變成咁?」佢喊咗出嚟。

因為皮蛋缸上面嘅人頭,就係沙婆婆嚟。

「小倩…」其實我又何嘗唔係夾雜住傷心同憤怒丫。

「係余二十先生佢送俾我嫁,我想殺呢個老女人好耐嫁喇,成人恃住自己認識媽媽,媽媽唔會出手殺佢,就喺度阻頭阻勢,攪亂晒迷霧森林D秩序!而家,我就要佢俾我控制,做D佢自己唔鍾意做嘅嘢,例如殺晒你哋,哈哈哈!去啦,沙婆老妖,幫我殺晒佢哋!」

我見到「千年石妖」只係蹺住對手睇戲,完全對「呼子」嘅所作所為冇件事咁…

「知道,主人…」

沙婆婆變得青筋暴現,兩隻眼紅到出血咁,仲突然…

「哇~~~!丫~~~!」

「趴冷~」皮蛋缸爆開,我見到…

沙婆婆變成一隻兩個人咁高嘅螳螂型怪物,全身呈現嘅顏色就好似一隻曱甴咁。

一個自己認識,本來完好嘅人,俾隻妖怪攪成咁…

我嘅憤怒已經到咗極限喇!我要殺死「呼子」!

(待續)

下集預告︰

「皇龍真金甲!」

註解︰

不知火舞 — 以前一隻好流行嘅電視遊戲《餓狼傳說》裡面嘅女角,胸前一對巨乳,總係彈吓彈吓咁嘅,佢所用嘅招數呢個故事裡面嘅阿妮都可能會用到。