第105集 ~ 欣︰呢邊我就覺得「先生」可怕D喇。

我呢邊嘅上回講到…

輝輝嘅同學同老師都同家姐一樣,匿晒喺「先生」同我嘅後面…

佢哋唔係郁唔到就係暈咗。

「南轅」個壞蛋就令「大惡鬼」重生,而「大惡鬼」而家仲分咗做四個身體…





「鱷魚」就俾「荷瑪」爪傷,痛到跳咗落深淵…

「巨蟲」就俾我篤中笑穴,而家都仲笑緊…

「癲狗」就俾「荷瑪」一個轉手爪死咗…

淨返「美杜莎」喺度,準備同「先生」大戰。

而我就同「荷瑪」繼續打D飄浮嘅人頭,希望可以削弱「大惡鬼」嘅妖力。





「南轅」唔知係自命清高定係過度自信,佢只係蹺起雙手喺度睇戲。

大戰一觸即發,「先生」已經準備好…

「古代中國九轉神龍伏魔斬妖治邪捉鬼百寶盒!」

「先生」隨手拎出一件黃色嘅八卦道袍,兩吓手就著好咗佢…

再右手一伸,拎出一把桃木劍…





左手一伸,拎出一個八卦鏡,再掟佢上天…

「神明八卦,曙光滅魔!」

八卦鏡飛到上天,隨即變大,鏡面向下,發出白光,將成個石殿照成晨早一樣…

明顯呢招係要消除對手妖力嘅…

「以血引靈,桃木斬妖!」

「先生」佢輕力一咬,手指鮮血流出,隨即點喺桃木劍上,再衝向「美杜莎」。

「美杜莎」並冇選擇避開,反而不甘示弱,使出一招…

「毒霧雲煙!」





一舊綠色毒雲掩蓋一地,幸好,「先生」一個鯉魚翻身就避開咗…

「先生」嘅桃木劍並未刺出已經換嚟「美杜莎」嘅步步進逼…

「妖氣裂縫!」

一個個裂縫喺「先生」下方出現,再爆出紫色毒氣…

雖然「先生」可以一次又一次咁避到,但係始終唔可以進行任何反擊,仲…

「哎吔!」

一個跣腳,唔小心就跌咗喺地下。





「美杜莎」見到「先生」倒地,立即使出致命一擊…

「鬼魅毒牙!」

雖說叫做「毒牙」,但係其實係「美杜莎」雙手尖銳嘅指甲…

「先生」一個蜈蚣彈彈返起身,再一個側手翻閃避攻擊,但係…

「美杜莎」連出幾吓「鬼魅毒牙」,「先生」佢始終唔可以全部閃避…

而家,「先生」身上已經有幾排「毒牙」插咗喺身…

「哈哈哈,我呢次仲報唔到仇?毒牙爆發!」

插咗喺「先生」身上嘅毒牙突然爆起嚟,仲令「先生」俾一舊綠色毒雲包住咗…





「先生!」我驚起嚟就大嗌咗一聲。

………

等待毒雲散去就好似等咗好幾個鐘咁…

等待「先生」發聲更加就似遙遙無期一樣…

「妹妹唔使驚,九龍伏魔訣!藍龍閉月!」「先生」終於出聲喇!

天上嘅八卦鏡突然由白光變成藍光,毒氣迅間就好似被淨化咗咁…

「青龍翻海!」





一個靈氣波浪衝向「美杜莎」…

「先生」隨即衝向「百寶盒」,攞出一舊墨斗線,再將線頭掟向「美杜莎」…

「橙龍繞林,綠龍盤據!」

線頭變成粗繩,將啱啱避開「青龍翻海」嘅「美杜莎」緊緊綁起嚟…

「白龍飛天,紫龍神劍!」

「先生」一跳而起,飛到「美杜莎」頭頂想一劍就將佢刺死…

但係…

「美杜莎」突然用雙眼發光,使出一招…

「靈魂石化,哇丫!」

綠光閃耀,完全擊中「先生」正面…

………

全場靜咗落嚟,而我就呆咗,因為…

「先生」佢俾「美杜莎」變咗做石頭,而家我哋就好似冇晒希望一樣…

只係見到「美杜莎」喺度沾沾自喜…

「妹妹,你要對阿龍佢有信心啊!」

「嬸嬸」嘅一句說話突然浮現喺我腦海裡面。

真係不出三秒…

「九龍伏魔訣奧義﹒皇龍真金甲!」

(嘭 ~!)

石頭爆開,「先生」變成金身,隨即進行反擊…

「天龍羽翼,神劍飛星!」

金光黃袍之外,插上一對白色羽翼,「先生」就好似仙人一樣…

再連環刺出神劍,過百條直線紫光向住「美杜莎」射去…

就好似一次過打出一百次「紫龍神劍」一樣…

(插插插插插 ~ 插插插插插 ~!)

一連百幾劍全部命中「美杜莎」…

「哇~! 丫~!」

呢次嘅尖叫,代表嘅係「美杜莎」,亦即係「大惡鬼」已經正式被消滅…

佢化成石頭,再變成飛灰,隨風散去,(呼 ~)

………

「估唔到「南龍」嘅後人都唔錯噃,竟然連「青龍劍」都未出就打贏我嘅手下。」

「南轅」一講我先記得又的確係噃,「先生」竟然處於咁嘅劣勢都唔出「青龍劍」?

「冇計,我份人就係咁硬頸,唔鍾意就唔鍾意,第一次打敗佢,我冇用「青龍劍」,第二次又係,呢次係第三次,我就係唔鍾意用我家傳之寶嚟打死佢,但係…你放心啦,對住你,我一定會用,仲會用佢嚟斬死你。」

「先生」佢真係丫,咁硬頸做乜噃,頭先真係嚇死人啊!

「睇夠未啊?頭先D人頭全部都係我打爆嫁!你睇吓你對手指篤咗去邊?」

「荷瑪」突然咁講,我先記得原來我一早就停咗落嚟睇戲…

不過頭先真係太精彩丫只嘛!

我回頭望一望先發現…

「丫!衰人荷瑪,唔早D講!」

原來我一直篤住咗隻飄浮人頭嘅鼻窿。

「我諗你都知我「南轅」最勁係乜啦…」

「大蕃薯」講嘢,我「蝦」一聲篤爆咗呢個頭又另返去睇佢哋場戲…

「我係化獸師,最勁就係變身,既然你都會出「青龍劍」囉,我就認真D,直接用我最強嘅身體啦,就俾你睇吓我同魔鬼契約嘅真身啦!」

佢一講完,佢身體就產生變化,開頭一個又一個氣泡喺佢塊面度凸起…

再而爆開,傷口撕裂,滲出血液,再生出一舊又一舊嘅賤肉…

重複又重複之後,佢而家…

變成一隻有幾米高嘅人頭馬身怪物…

頭上面有兩隻長角,身上一把弓箭,雙手揸住一把噬血長鐮刀…

我都未睇清楚佢成個樣,佢就出招喇…

「哈哈哈,割頭鬼鐮刀!」

佢一堆鬼影分身,迅間就嚟到「先生」面前…

但係「先生」並冇怯場,仲要自信滿滿咁…

「係到你出場嘅時候喇,白氏家傳之寶,「青龍劍」出鞘!」

(待續)

下集預告︰

「鳳凰七重天﹒飛鳳炎鱗!」