米米蓮妖怪作品 -《旅行‧如此‧難以忘‧記 》(百集長篇): 第114集 ~ 欣︰等唔切，唯有出去頂住先啦！
第114集 ~ 欣︰等唔切，唯有出去頂住先啦！
「先生」用一招「日月神劍」打敗咗「血面刀魔」(即係變身後嘅「南轅」)…
但係因為「仁慈」，冇將佢置諸死地，仲俾佢走甩咗…
佢個衰人臨逃走都仲整堆廢物「骷髏怪」出嚟，想害我哋…
好在「先生」見慣大場面，仲顧及大家…
我兩姊妹就同「荷瑪」去睇睇D男仔同老師，佢哋個身體仲係好似好沈重咁…
「先生」就去收拾D「骷髏怪」，當然兩三吓手勢就殺晒佢哋啦。
攪掂晒之後，我哋互相扶持，總算可以行到呢個石殿嘅出口…
但係呢個出口，竟然俾一道要解封嘅巨牆擋住咗…
解封方法似乎就係巨牆上面嘅三個凹位…
「唔通要放返啱位嘅嘢落去先開到？」「先生」講。
無錯，就係咁，我仲好叻咁喺地下搵到其中一個凹位嘅發光石頭…
但係就再搵唔到第二舊，咁點算好呢？
我哋一邊搵，一邊傾計，期間仲知道咗「先生」同「陳老師」嘅恩怨…
原來係「陳老師」誤會「先生」殺咗佢喜歡嘅師姐…
但係點解「師姐」會俾人殺咗，仲誤會埋「先生」做嘅呢？
我真係好想知，但係又真係唔敢問…
「解籤先生，細妹…呢個機關睇嚟應該好廢…後面原來係金屬片。」家姐講。
之後「先生」去咗攞佢把銅錢劍嘅銅錢俾家姐…
家姐將D銅錢放去凹位，道牆就開咗喇！
「YEAH！成功咗，原來只係一個導電體嘅把戲！」家姐好開心。
「家姐，你好叻啊！」
「咁我哋一齊上去啦！」「先生」講。
………
我哋戰戰兢兢咁慢慢沿住樓梯向上行…
呢度好詭異，明明之前喺遠處望係一條直線長梯，但係行咗上去之後…
原來係一條密封旋轉嘅石梯，望唔到出面，淨係可以不斷向上行…
感覺就好似行極都行唔完，仲總係會覺得有嘢會突然彈出嚟嘅咁…
令到成個人都好唔舒服，好在我哋係一大班人慢慢行，仲有「先生」佢喺度啫。
「解籤先生，你唔係最出名係用道具咩？點解唔用吓嘅？」家姐突然咁問。
「叻極都唔夠你隻貓貓叻啦，「縮小光線」都有，獻醜不如藏拙啦，哈哈哈。」
家姐同「荷瑪」都怕醜到紅晒塊面仔…
「哈哈哈，講笑咋，其實係我老婆太新潮喇，佢新造D道具我都唔識用，舊道具又爛得七七八八喇，咪用得咁少道具囉。」
「新道具係點嫁？」我問。
之後「先生」喺個「百寶盒」度攞咗D嘢出嚟…
「呢，呢個係佢上年睇嗰套四級片呢…」
「四級片？」
「咩咩咩蝦你個波凸。」
「哈利波特？兒童故事嚟嫁。」
「咪就係囉，兒童色情片都睇，仲要帶埋零龍同一龍去睇，唉…」
我已經唔想再解釋…
「佢話根據故事內容造嫁，隱形斗篷，仲要玩隱形，肯定係偷窺用嫁啦。」
我再次唔想解釋…
「咦，不過妹妹，好似啱你用噃，你始終唔夠力量保護自己，不如你著丫。」
「先生」遞咗件「斗篷」俾我，我就著住咗佢…
「先生」再喺「百寶盒」度攞咗D嘢出嚟…
「呢個又咩嚟嫁？咁似電話嘅？」家姐問。
「哀風！」
「哀風？」我好疑惑。
「係咪有D霸氣呢？所以我揀用佢，唔用「三叔」嗰個。」
「三叔？」家姐好疑惑。
「識得出呢類道具嘅高人有兩個，一個叫「三叔」，一個叫「阿婆」，「哀風」係「阿婆」嘅產品，行嘅係「105」系統，用嘅係「噏屎」。」
「噏屎？」家姐再次疑惑。
「辛辛苦苦出個程式出嚟，冇人用，仲唔係慘過BB「噏屎」，欲哭無淚喺啦。」
佢再喺「百寶盒」攞多樣嘢出嚟…
「呢個就係世界第一嘅「谷哥」翻譯器，佢話驚我唔識日文，所以整俾我。」
「好犀利架？世界第一？」家姐又再次疑惑。
「係啊，真係犀利嫁！邊有一個翻譯器可以好似佢咁，翻譯到有笑點啊？」
「點解「嬸嬸」好似變咗電子生產商咁嘅？」
「咩電子啊？全部行靈力系統，一般人用唔到嫁。」
………
我哋就係咁廢話一大輪之後，始終仲未行出呢條「無盡」嘅樓梯…
「解籤先生，我哋仲要行幾耐嫁？」家姐問。
「Eee…」
「先生」合埋眼一陣，再開眼望一望隻錶…
「點啊，先生？」我問。
「行多陣就到。」
「行多陣就到？」
「阿欣，唔好問，只要信。」「荷瑪」突然好嚴肅咁出聲。
但係佢咁講，我反而覺得更奇怪，究竟做乜事呢？
唔知輝輝點呢？一定要相安無事啊！
我哋就係咁，依舊一團人一直慢慢向上行…
………
「哈哈哈哈~」一陣笑聲突然喺牆外傳嚟…
「先生，咩事啊？」
「先生」冇回應我，淨係揚一揚手叫我哋繼續行…
「哈哈哈哈~ 你哋唔使再扮喇，入嚟啦！」
我聽清楚，發現應該係「鬼王」嘅聲音…
「冇辦法喇，妹妹著好件「隱形斗篷」，件嘢唔少嘢，應該頂得吓，D男仔同老師都唔理得太多喇，由得佢哋啦，段估「鬼王」對冇靈力嘅人冇興趣呱，貓仔你要保護好大妹妹啊，我哋等唔切其他人嚟幫手喇，出去啦。」
講完之後…
(嘭 ~！)
「先生」一拳打爆咗道外牆…
將D石磚推開之後…
而家，喺我哋面前嘅係…
一個更大更闊嘅石殿，原來樓梯真係「無盡」嘅，真正嘅出口係打穿外牆先有…
而家，我哋喺大殿嘅尾，直望前去，最盡處有一個大台…
上面有三個人喺度，右邊嘅係頭先受咗傷嘅「南轅」…
中間有張皇帝椅，坐喺度，成個霸主咁嘅係…「鬼王」…
而左邊嘅係…一個企得筆直嘅道人…一個熟悉嘅面容…
一個我一見到佢就嬲嘅男人，殺死「星」老前輩嘅「東歪」，司徒不正…
頭先一個「南轅」已經令「先生」打得咁辛苦…
而家三個大壞蛋喺我哋面前，點打啊？可唔可以有人嚟幫吓手啊？
突然…
(嘭 ~！)
………
「總算趕得切。」
係阿狗佢哋啊！真係有人嚟幫手啊！佢哋打穿另一道石牆出咗嚟…
仲有一個…
呢個人係…邊個嚟嫁？好似好勁咁嘅。
一個禿頭，白髮，滿身肌肉，電光沿住身體閃爍嘅男人…
佢唔係「肥高人」噃，究竟係邊個嚟嫁？
「你班衰人，竟然將大袋攪成咁？」
阿狗咁講，我就連呢個特別嘅男人都冇再理…
即刻就跟住阿狗望嘅方向望過去…
原來…「袋袋」佢…俾人掛咗喺個十字架度，仲半天吊緊，而且D衫爛晒…
我見到佢好似曾經不斷辛苦掙扎過咁，我好想喊，但係第一時間就諗起家姐…
再望向家姐…
家姐佢…已經哭成淚人…
(待續)
下集預告︰
「哈哈哈，余老兄果然厲害，北鳳都俾佢攪掂咗。」