米米蓮妖怪作品 -《旅行‧如此‧難以忘‧記 》(百集長篇): 第115集 ~ 輝︰頂到就好喇，等我啊！
第115集 ~ 輝︰頂到就好喇，等我啊！
遇到D傷心嘅事，唔好話係欣家姐呢D小女人會喊丫，就連…
就連我呢D大男人都一樣，會忍唔住喊…
(呢幾集唔好咁慘得唔得啊？)
我都唔想嫁，你問編劇丫，都唔知點解，好好地一個鬼故，寫到嗚喱嘛嚓…
而家仲要攪到D人死嘅死，傷嘅傷，都唔知為乜，真係逼到人流眼淚咩？
人地流到眼淚又點啫？代表D咩噃？
(唔好意思囉，捱埋呢集先啦，唔該晒丫。)
唉~~~~
上次講…講到邊話？係啊！講到「鳳凰火炎」唔聽人使…
所以我哋就試咗條屎坑橋，我拜咗「達叔」做師父，睇吓叫唔叫得郁「佢」…
可惜都係唔得，雖然我覺得我隊隻手落去攞就應該得，但係我冇咁做到…
「光管陳」佢俾「九曲追魂劍」嘅邪氣侵蝕，差D就變成條屍…
好在佢識一招「火鳳重生」，變咗隻蛋，再變返自己就淨化咗D邪氣…
「西斜」余二十見「九曲追魂劍」對「光管陳」冇用，就用咗佢嘅終極必殺技…
一招「幾何黑洞」，將所有嘢都吸走，本來我都會被吸走，但係…
「光管陳」為咗救我，佢…佢竟然…
我已經唔想再講，我睇住…
(蕉~ 龐~！)
「黑洞」消失咗，余二十被吸走，就連「光管陳」佢亦都被吸埋…
呢一刻…呢一刻…
「陳…陳…陳Sir…」
我衝咗去「黑洞」嘅位置，空氣中已經冇實體可以俾我搵去摷…
我只有向地下去摷，我博命咁爪個地下…
「阿輝，輝仔…」
「唔可以，唔可以，唔可以啊！陳Sir你唔可以死嫁~~~！」
「輝仔，唔好咁啦…你對手流晒血喇…」
「汪~汪~嗚~嗚~」「居居」低鳴。
「…」「英雄」冇出聲，淨係流眼淚。
而我就繼續係咁爪，係咁爪…
………
「我搵到喇，我搵到喇，係「光管陳」條腳毛啊！佢肯定喺下面！」
「…」「…」「…」
我手揸住呢條腳毛，眼淚就更加流到唔停，因為…
好明顯…呢條腳毛根本冇可能屬於「光管陳」，佢係「光管腳」嘅…
點會有腳毛啫，呢一刻我笑咗…
我笑自己真係好細個，好無知，好白痴，好低B…
有頭髮邊個會想做癩痢啫？
我竟然一直都笑自己嘅老師呢樣嘢，我真係覺得自己…
「輝仔，死者而已，前面嘅路，我哋仲要行嫁…」
「達叔…師父，你有能力救返陳Sir嫁可？」
「達叔」佢淨係另另頭，冇出聲回應。
而我…就仲呆咗咁坐喺地下…
…
「輝仔，你仲要去保護你最愛嘅人嫁，一定要堅強啊！」
係，「達叔」佢講得啱，我仲要去保護欣欣，所以…
我坐咗起身，同「達叔」﹑「英雄」同「居居」開始出發…
………
沿途我仲係忘記唔到頭先嗰個情景，個腦不停咁諗，亦不斷去追問…
「師父，你係有方法嘅，唔講我知嫁啫，陳Sir佢一定冇事嘅…」
「咦，係噃，應該好似之前教我哋「九字護身法」嗰陣咁，佢係匿埋咗…」
「丫，打贏咗鬼王，肯定陳Sir佢會返嚟嫁喇…」
我就係咁，一直自言自語…
而「達叔」就一直低頭沈思緊…
………
我哋行到去一個出口，出口似乎本來係有機關，但係而家已經俾人開咗…
我哋再上咗一條旋轉石梯…
「呢度係無盡天梯，出口係要打穿道牆先出到去嘅。」「達叔」咁講。
佢咁講，我就試吓聽聽石牆出面有冇聲，我聽到一堆雜聲…
「咁…我哋而家係咪可以打穿牆出去喇？」
「達叔」對住我另另頭，再噤住自己心口講…
「美奈子，你以後要靠自己喇…」
咩事呢？點解「達叔」要咁講啊？我好愕然…
「師父，做乜事啊？」
「我哋成班人都唔會夠鬼王打，要打贏佢，只有一個方法…」
「係咩啊？」
「用你嘅「神體」。」
「神體！？」
「阿初佢臨終嘅說話，就係要我幫你引出「神體」。你識唔識用，就靠你自己嘅悟性喇，但係幫你引出「神體」就係我嘅責任…」
我意識到呢個「引出神體」，好可能會令「達叔」死嘅，所以…
「唔好啊，千祈唔好，我唔想連你都死埋啊！」
「丫！」
「達叔」佢左手喺自己身體扯出「美奈子」，再左掌拍出…
似係俾部份力量「美奈子」，而「美奈子」就生勾勾咁俾佢推開咗。
右手就將我捉起，再推前，右掌打到我背脊中心位置，之後…
就好似有源源不絕嘅力量輸入我身體咁，但係我就連嘢都講唔到…
「輝仔，好開心認識你，之前都講過，係你令我舒懷嘅，亦係你令我見返阿初佢嘅，真係好多謝你。肉麻嘅嘢我唔講太多喇，你要記住，我而家係將我畢身所學嘅 「天凰三十六變」，用「鳳移換影」之術將我嘅靈力輸送俾你，你要好好運用佢！只要你學識運用，一切一切就會化成你嘅「神體」，以神力去對抗鬼王，就冇得輸，只有贏嫁喇，你要加油啊！」
………
三十八秒，係我三十八吓心跳聲先啱，我就係咁，聽咗我三十八吓心跳聲…
我背脊心嘅推力開始慢落嚟，再慢慢停咗落嚟，再慢慢…
我郁得到身，我側身一望，係喊到變咗豬頭嘅「美奈子」…
再向後一望…
我見到…
一個滿頭白髮嘅「達叔」…
「師…師父…」
「輝…輝仔，記住，只有你可以贏到鬼王…」
呢句講完，「達叔」就…
合埋雙眼，再冇任何反應…
「美奈子」喺度繼續喊，而我就…
(嘭~！) 一拳打爆咗道石牆…
「輝輝！」
「阿輝！」
欣欣同大家我都冇理到，我淨係滿肚怒火想搵人發洩…
「咦，得返一個細路嚟到咋？哈哈哈，余老兄果然厲害，北鳳都俾佢攪掂咗。」
講嘢嘅係…「南轅」袁丰田！？
我雙眼發火，右手運勁，拳頭想爆咁滯，「英雄」配合我…
我一個箭步衝前，只需要零點五秒就去到佢面前，我一手就劈落去…
「你去死啦！」
(嘭~！)
呢一吓，我自己都嚇呆咗，我呢一劈，成個「袁丰田」劈到爆開咗…
………
「哼，睇嚟唔錯噃。」「鬼王」出聲。
呢一刻，我先睇到「鬼王」好似又唔同咗，佢而家…
闊面旁邊有兩扇鰓葉，雙手亦有D似翼非翼嘅嘢，唯一冇變，係血紅嘅膚色…
「阿輝，鬼王原來識變身，我哋幾經辛苦，終於打敗咗佢頭兩個變身，但係…」
阿狗咁講。
(待續)
下集預告︰
「就俾你哋睇吓我變咗身嘅力量啦！」