米米蓮妖怪作品 -《旅行‧如此‧難以忘‧記 》(百集長篇): 第122集 ~ 洋︰咁就嚟講返一集「井上」先生啦！
第122集 ~ 洋︰咁就嚟講返一集「井上」先生啦！
係咪好奇怪點解今集有個「洋」字呢？
冇錯，我諗亦都唔會有讀者會諗錯，就係我，我係「十里洋腸」！
(點解唔用個「腸」字啊？)
你要明白我個名嘅精髓係來自個「洋」字。
(即係你條「腸」可以唔要啊？)
條「腸」以後就交俾你喇，連我個「龜頭」都可以交埋俾你。
冇錯，喺我身邊嘅就係同我襯到絕而且我就追求緊嘅「七色彩雲」喇。
而家，我哋拍住拖咁睇緊佢哋打…
由於「井上」先生(即係「阿明」)話我太過得閒…
所以今集就授權我去講佢嘅英雄事跡，而授權書亦都已經喺我手喇。
佢話驚人哋話自吹自擂，自怨自艾，自宮自瀆咁囉…
(唔好攪爛GAG，唔該。)
咁都俾你發現添。
好，即刻開始！
一切就由「井上」先生暈咗講起…
砸暈「井上」先生嘅係一條「死肥仔」(即係「東虫」)…
佢之後同「鬼王」攪咗一輪…
無端端又閃電霹靂咁發射咗一條電光龍出嚟攻向「鬼王」…
力量係幾勁，但係淨係打到「鬼王」冇咗隻左手同個籃囉。
佢仲激嬲咗「鬼王」，攪到佢要喺現場玩爆炸品。
炸到周圍爛晒，大家於是乎都要出盡法寶…
可惜都俾佢嘅一招就彈開晒…
喺呢個時候，一條老嘢無端端推咗「井上」先生送俾佢女友隻公仔去死…
公仔死咗，女友發火…
佢一吓尖叫之後就成隻「摩天鬼爪」打落去「鬼王」度…
「鬼王」趴咗街…
本來都已經奄奄一息…
可惜有條笨實，無端端行埋去送頭，我都唔知佢想點？
「鬼王」食咗佢之後，雙手就再次重生，諗住開拖啦，點知…
有個「木獨佬」(「東歪」)阻住晒，仲係咁講自己D嘢…
其實佢有冇諗過人哋唔想聽嘅呢？
最衰係個「死肥仔」，仲叫佢幫手，你睇吓，而家點呢？
佢一搥就窩咗落去個靚女度喇！
好，呢一集正式開始！
(而家先開始？)
阿輝見到「東歪」咁做，嗱嗱聲就一個「鳳凰閃現」飛埋去營救佢女友…
好可惜，「東歪」話你快我都唔慢，佢一個閃身就向後退返埋「鬼王」後面…
喺呢個時候，當大家嘅目光都注視住佢哋幾個嘅呢一刻，突然…
「哈哈哈哈，我明喇，我明喇！」
係「井上」先生啊！
「傻佬明，你醒咗喇！」
「其實我一早醒咗，不過見有D肚餓，食住花生等啫…」
「死到臨頭，你呢個傻仔仲笑得出？」「鬼王」講。
「我笑又關你事呀？」
「你梗係嫌命長頂喇！」
「哈哈哈哈，係又點啊？夠膽就同我隻揪丫？」
「又係激將法，你估我仲會信咩？」
「冇錯，係激將法，咁你夠唔夠膽同我隻揪丫？」
「隻揪！？哈哈哈哈，睇你咪又係話幾個人同我同時隻揪。」
「唔好意思，打爆你條粉腸，我一個就夠喇！」
「就憑你？」
「錯，係我手上嘅呢把劍！」
「井上」先生佢充滿自信咁打橫揸住把「九陽草薙」隊向「鬼王」…
「咩劍咁巴閉啊？」
「九陽草薙！」
「神劍之一噃，但係…哈哈哈哈，你條傻仔笑死我喇，「青龍劍」同「鳳凰火炎」我都未驚過啦，你唔係覺得我會驚佢呀？」
「唔啱或者我同你隻揪丫？」阿輝揸實把「鳳凰火炎」好認真咁講。
「哼，你估我又會驚你咩？我夠膽講，你哋呢度冇一個人可以單揪得贏我！」
「你錯喇，可以揪贏你嘅人大把，喺你面前就有一個，就係我。」
「井上」先生唔知邊度嚟D自信，我記得佢應該開唔到把「九陽草薙」嫁喎。
唔通係拋浪頭？定係真係有咩秘密武器呢？
「好，雖然我唔信你會真係會同我隻揪隻，但係我都真係好想睇吓你有咩能力，竟然咁有膽識去挑戰我。」
「放心啦，邊個夠膽出手，我亦都會出手幫你。」「東歪」咁講。
「哼。」「鬼王」雖然咁樣哼一聲，但係明顯「東歪」咁做係幫咗佢唔少忙。
「接招啦，癲仔！靈魂鬼步！」
「鬼王」迅間移動到「井上」先生面前，但係…
隨即一個閃身就彈開咗，究竟發生咩事呢？我見到…
「井上」先生佢咩都冇做，淨係合埋咗對眼，仲咁講︰—
「我暈咗嘅時候，戇居居咁一直揸住咗把「九陽草薙」，到我醒返之後，我發現咗一樣嘢，白痴到冇人信嘅嘢…」
「哼，你唔係諗住合埋眼打羸我呀？」
「你講得冇錯丫，我就係要合埋眼嚟打羸你…」
「睇嚟你有D精神病。」
「傻佬明，唔好亂嚟啊！」當時大家都咁叫。
「大家可以放心，我冇亂嚟，講返頭先樣白痴嘢先，我發現嘅就係…四個字，熱，脹，冷，縮！」
「熱脹冷縮！？」大家驚訝。
「冇錯，就係因為熱力，令到「九陽草薙」個劍鞘脹開…」
「吓？咁白痴？」大家再驚訝。
「就係咁白痴，而家…佢可以見大家喇，但係…大家就唔可以見到佢。」
「又點解啊？」大家問。
「唔好問，只要信，大家聽我講，先合埋眼，仲要搵手噤住對眼。」
「井上」先生佢一直合埋眼講嘢，而反叛嘅我，就冇聽佢講，繼續睇戲…
「哼，我睇你都癲夠喇！就送你一程啦，天狗夢魘！」
發出灰白色光嘅陰魂喺「鬼王」身邊突然走出嚟，再向「井上」先生飛埋去…
「大家都保護好對眼啦嘛？九陽草薙，出鞘！」
佢一講完，一手就將「九陽草薙」從劍鞘抆出嚟，
「哇丫！」陰魂迅間被消滅。
好在…
我有戴太陽眼鏡啫，唔係真係會盲嫁！因為…
原來「九陽草薙」會發出刺眼嘅陽光，真係好燦眼啊！
唔怪得之「井上」先生佢要我哋噤住對眼啦！
「點啊？鬼王，覺得點啊？」
「鬼王」雙眼被致盲。
「丫丫丫，你…哼，即使你把劍就咁樣效果又點啊？你咪一樣要合埋眼，你點樣可以殺得到我啊？」
「兩個字，我有你冇嘅…心眼！」
「咩話？咩係心眼啊？」
「唔需要用肉眼，合埋眼都知你喺邊，夠唔夠屈機？」
「冇可能！」
「論力量的確冇得同你比，但係論諗頭，香港年青一代真係冇得輸啊！」
「井上」先生講完就連環攻擊「鬼王」…
「鬼王」雖然睇唔到，但係亂咁左閃右避都總算避到幾吓…
可惜「井上」先生太強勁喇，就好似真係睇到「鬼王」去邊一樣…
最後一吓…(插~！)
插中喇！「鬼王」倒地…
………
但係…
「哈哈哈哈，好在，你有張良計，我有過牆梯啫。」
「鬼王」原來一早分多咗個身出嚟…
「你分幾多都一樣，只會一直俾我拮到你死為止！」
「井上」先生之後繼續攻擊…
「鬼風！靈魂鬼步！鬼風！靈魂鬼步！」
「鬼王」睇唔到嘢，只有一直閃避，但係…
突然…
(嚓~！) 一聲…
咩事啊？
「唔使再浪費大家時間喇，你好明顯已經輸咗！」
大家都想知發生咩事，但係又唔敢開眼，直至…
「大家開眼啦。」「井上」先生咁講。
淨係見到「鬼王」俾「東歪」殺死咗。
(待續)
下集預告︰
餐~~~~ 餐躝~ 餐躝~
註解︰
(1) 笨實 — 粗口歪音，本來係—笨染！
(2) 送頭 — 遊戲術語，即係送死。
(3) 拋浪頭 — 裝腔作勢，扮晒嘢。