第121集 ~ 輝︰點解突然嚟一集講「東歪」嫁?

奮鬥?摩天鬼爪?「鬼王」真係死咗?我唔信囉。

(「奮鬥」其實係招式名嚟,取材自《阿信的故事》一曲嘅最後兩個字)

唉,唔講呢度住,一陣先追返上嚟。

講返「東歪」嗰度先…





當時,我真係以為佢係用「妖夢縱橫」一招嚟救「鬼王」…

點知「鬼王」竟然話佢呢招係用嚟救我哋…

究竟…究竟點解呢?唔通…「東歪」佢良心未泯?

個死人頭「鬼王」又唔解釋,攪到我個心囉囉攣添。

個死仔阿明又淨係返嚟出醜,俾人咬完拳頭,仲要俾人砸暈埋…





(唔啱,你試吓俾佢砸吓丫,睇吓你暈唔暈?)

阿明佢又冇錯嘅,砸暈佢嘅係「肥龍大師」,佢咁嘅件頭,正常人砸匾咗依次。

不過點都好,「肥龍大師」嘅出現,的確係俾咗一D希望我哋。

好可惜,佢唔能夠將「鬼王」一吓打死,但係我諗佢都已經盡晒力喇…

佢一招「神龍波」攪到「鬼王」冇咗隻左手同件邪器,已經算係咁嫁喇…





但係同時間,佢嘅呢一吓仲令「鬼王」發埋嬲添…

D鬼怪發起嬲上嚟,就淨係識得殺人嫁啫。

於是乎,我哋逼於無奈底下,唯有一齊出手嚟對抗「鬼王」啦。

好可惜,一輪打鬥之後,受傷嘅都係我哋呢班人…

喺呢個時候,大家唔係噤住傷口,就係訓咗喺地,唯有佢…

受咗輕傷嘅「南龍」先生竟然無端端話跟個咩「噏屎」做…

佢行咗埋抱住咗傻佬明嘅小倩度…

仲一手攞起小倩手上嘅「米米蓮」,再將佢掟咗埋去「鬼王」度…





「米米蓮」就係咁,俾「鬼王」當場殺死 (其實本來已經係死物)…

俾人整爛咗自己愛人所送嘅禮物,唔嬲就假喇!

小倩異常冷靜咁企咗起身,而家佢成隻「貞子」咁款…

(「貞子」係咩?長頭髮遮住個樣嘅女鬼囉。)

女人發起嬲上嚟,真係好得人驚啊!

佢唔知喺邊度嚟咁大力量,一吓鬼哭神嚎已經夠嚇人喇…

仲要使出一招「奮鬥」,用佢隻「摩天鬼爪」爪到「鬼王」趴晒街…





用完呢招之後…

小倩自己就已經冇晒力咁,而冇咗雙手嘅「鬼王」就趴喺我哋前面條街度…

(點解你會咁得閒喺旁邊講故嫁?)

咁之前「鬼王」嗰吓整傷咗我,我喺旁邊抖陣都唔得咩?

而家,全場靜晒,大家都只係望住「鬼王」條屍,似係唔相信係事實一樣…

之後,我突然諗起仲有「東歪」未死,我抬頭望佢一吓…

奇怪嘅係,佢仲係一副木獨嘅樣…

我再望一望「鬼王」條屍,但係真係冇郁嫁喎,就連一D氣息都冇…





喺呢個時候…

「以防萬一,我哋都係要將佢打到粉身碎骨先得…」

「鐵拳」一邊慢慢爬起身,一邊咁講。

佢再慢慢行埋去「鬼王」條屍度,舉起右手,握實拳頭…

「赤煉神拳,死啦,鬼王!」

突然…

(咔嚓 ~!)





「唔好啊!」我大嗌出嚟…

我見到「鬼王」個頭180度轉咗過嚟啊,佢再擘大咗個口,一口就…

將成個「鐵拳」吞咗…

呢一刻,我眼都凸埋,大家亦都呆晒,一時之間,唔知可以有咩反應咁…

調轉咗頭嘅「鬼王」雙手突然「紮」一聲再生返出嚟,再慢慢推起自己…

「真係唔該晒噃,本來都以為自己係咁大嫁喇,咩邪力都冇晒,淨係死剩把口,點知…哈哈哈哈哈!」

呢個時候,大家都已經冇晒力量,眼見住「鬼王」再次翻生…

一陣強烈嘅絕望感壓抑住大家…

當大家都唔知點算好嗰陣,「肥龍大師」突然…

「師兄,求你幫吓手,救吓呢班無辜嘅年輕人啦。」

呢吓絕啊!有事就嗌人「師兄」,冇事就整個「黑龍波」人嘆吓。

「司徒不正」佢聽到呢句,望咗一望「肥龍大師」…

再慢慢行前,提起左手,似係叫調轉咗個頭嘅「鬼王」唔好出手住咁…

我冇期望過佢會係善意,因為佢對死魚眼一直都係啤住我哋班人…

「師弟…」

佢…佢竟然咁講,就連我都有覺得好詫異…

但係…呢兩個字已經足夠令「肥龍大師」佢熱淚盈眶…

含住一包眼淚咁,使到佢好專心咁聽住「司徒不正」之後嘅每一句說話…

「我都已經好耐冇同你講過嘢,不如就一次過講晒啦。講個故事你聽丫,從前有一個人,佢無名無姓,從來都唔知自己過去係點,喺佢腦海裡面,淨係得佢大個嘅記憶, 佢一直喺人世間飄流,唔知方向,直到某年某月某日,佢遇到一個喺佢生命中…哼,我都唔知係咪應該叫做重要嘅人,呢個人教識咗佢好多嘢,當中包括治邪捉鬼嘅技能。佢一直都以為自己只係一個失咗細個記憶嘅孤兒,但係,佢慢慢發覺自己好奇怪,人世間嘅喜怒哀樂,佢好似從來冇感受過咁,於是乎佢嘗試周遊列國去搵返自己,直到某一日,有個人話俾佢聽,佢根本就唔係人,當時佢先如夢初醒,呢個傻仔,就叫做司徒不正…」

聽到佢呢段說話,大家都呆咗,佢做乜話自己啊?佢唔係人!?唔通係妖怪?

之後佢再講︰—

「司徒不正呢個名,係教佢治邪捉鬼嘅嗰個人幫佢改嘅,「司徒」二字,其實係講緊佢哋當時嘅師徒關係,「不正」呢個名,佢一直都唔知點解,直至遇到嗰個令佢如夢初醒嘅人,嗰個人講俾佢聽,「不正」嘅意思就係自己呃自己話俾自己聽自己唔係…妖,刀,村,正。」

「吓?究竟…冇可能…唔會嘅…發生咩事啊?」

「肥龍大師」好似傻咗咁自言自語。

而「司徒不正」就再講︰—

「我一直都以為自己係一個人,但係…原來…我只係一把劍,正確D嚟講,係一把刀,冇錯,我就係「妖刀村正」,一把殺盡人同鬼怪嘅刀,一把人體化嘅刀…」

「冇可能,嗰個人呃你咋!佢係邊個啊?」

「呃我?呃我嘅係叫阿「星」嘅人,佢根本一直都知我唔係人,但係佢呃我,其實只係想收服我,等我以為我真係佢徒弟,等我幫佢賣命,幫佢斬妖除魔!而令我如夢初醒嘅人就係「地魔」大人。」

「地…地魔?點…點解…調轉晒D說話嚟講嫁?明明就係而家「地魔」呃你幫佢賣命,幫佢殺D阻佢嘅人啊!你醒吓啦!點解要咁自甘墮落啊?」

「冇用嫁…」「南龍」先生突然行埋「肥龍大師」身邊講…

「當一個人已經被呃,佢又點會覺得自己係被呃丫,加上喺呢件事上面,對司徒不正佢個人根本冇影響,殺妖怪又係殺,殺人又係殺,有咩分別啫,再加上,如果佢真係「妖刀村正」,佢個本質就係壞人。」

「我唔信,我唔信…我記得…我記得師兄係識笑嫁,點會係冇感覺嘅「妖刀」啫?」

「肥龍大師」唔相信係事實,一直就另住頭咁講。

(餐 ~!) 司徒不正突然抆出紫光長刀…

唔通係想殺晒我哋?

「呢把似妖刀嘛?」佢問。

一把帶住詭異紫光嘅長刀,再加上我親眼見過佢吸收「蛇蠍魔人」嘅妖力…

根本冇可能會答唔係。

(喳 ~ 哇丫 ~!)

佢手上嘅「妖刀」突然爆開,仲有無數條閃耀嘅紫光繞住佢右臂旋轉…

慢慢慢慢…

我見到…佢右臂…發出更閃耀嘅紫光,再用心D睇,會發現…

佢右臂已經變成咗一把明顯妖力更加強大嘅長刀…

之後佢再問︰—

「如果你係我,你會點啊?原來自己只係一把刀。」

「肥龍大師」喺呢一刻再冇話可說,甚至覺得司徒不正講得啱咁…

「歪理,歪理,歪理!」欣欣突然大嗌。

「唔怪得人哋都叫你「東歪」啦!就算係妖刀咁又點噃?唔可以改邪歸正嫁咩?唔可以得道成仙,變成仙劍神刀咩?唔好話你自己冇心!點解要助紂為虐啊?仲要親手殺死自己師父,你連做把刀都唔配啊!做…做PAT屎啦你!」

突然我見到「鬼王」好似想郁手…

我想出手,但係…

「司徒不正」比我哋兩個都仲要快…

「噗」一聲,我睇住…我睇住…欣欣佢俾司徒不正一拳打中咗個肚…

(待續)

下集預告︰

其實我一早醒咗,不過見有D肚餓,食住花生等啫…