第129集 ~ 欣︰有呢個「神」出現,一個就夠喇!

呢集直接駁住去啦!

家姐佢真係…

原來愛起一個人嚟,會係咁傻嫁!

「直頭黐Q線嫁!救佢條仔得啦,唔使理我哋啦!」阿明大嗌。





「咁愛起一個人上嚟,真係可以咁盲目家嘛,我唔准你哋怪我家姐啊!」

我回應佢,大家亦冇反博我。

我望住家姐個樣,淨係見到佢揸住兩支電筒,但係仍然展露出喜悅嘅神情…

我…我又點忍心話佢半句噃。

只係希望大家都可以安全咁返去自己屋企,包括…





而家已經變咗做大壞蛋嘅「袋袋」。

「袋袋」即係金城武咁嘅樣嘅「地魔」,佢而家身型比之前仲要大…

妖邪嘅力量好似仲比之前勁咗好多咁…

我感覺到即使係「金身二郎神」亦都唔會夠佢打。

「變大就得架喇?睇我哋啦!金銀齊飛!」





金身﹑銀身「二郎神」一齊大嗌,亦一齊衝去「地魔」度,仲出咗…

「神戟!」呢個咁強勁,勁到全場震動嘅招式。

但係…

「你要知道幾時要退~」「地魔」超有自信,口噏噏好似唱緊歌咁…

佢只係慢慢準備好拔刀嘅動作…

到「金銀二郎神」真係衝到埋去嗰吓,佢突然…

「妖夢縱橫!」

佢用呢一招就抵擋咗「金銀二郎神」嘅「神戟」!仲要…




「奧義流鬼影爆烈斬!」嚟多招反擊添。

「金身二郎神」俾佢一刀就斬到彈開咗…

佢仲喺呢個時候,再出多招…

「血鬼頭真義﹒虹吸!」

將「銀身二郎神」吸住咗…

唔單止咁,佢仲…

「血鬼頭真義﹒撕裂!」

佢竟然…





佢竟然將成個「銀身二郎神」撕開咗兩邊…

我一時間…

真係呆咗,仲驚到忍唔住喊咗出嚟…

「輝輝,唔好打喇,唔打喇!唔打喇!」

「地魔大人,求你…求你放過我哋啦,最多我哋聽晒你話…唔好殺…唔好殺輝輝啊…」

我直頭驚到跪咗喺地下度求「地魔」…

「呢個小妹妹都幾靚女噃,妹妹,你起身先啦,我可以唔殺你,仲可以娶埋你添,哈哈哈哈哈…」佢就好似戲弄緊我咁。





但係佢咁講,我冇驚,反而…

真係有少少想用自己嘅身體嚟換取大家嘅平安…

不過…

「阿欣,放心啦,你要相信阿輝啊!」

係阿明啊!佢捉住我隻手臂,好誠懇咁同我講。

係噃,點解我唔選擇去相信輝輝啊?

「理性話俾你聽你哋班人冇個會夠我打,就只有死,但係感性又話你知,你要支持同信任你嘅呢個朋友,所以理性同感性對抗底下,你理性贏咗,所以嚟求我囉,真係可憐,呵呵。」就連「地魔」都睇得出我嘅反應。

咁好啦!





「輝輝加油!輝輝加油!打死呢個臭口祖!」

「女人真係可怕,頭先先叫我放過佢,而家又要殺死我,真係惡。」

「地魔」佢自言自語咁,好似係話緊我。

「似乎得返冥想呢條路咋,快D冥想吓啦。」

「先生」同「肥高人」都對阿明咁講。

「呢度又嘈又亂,我又唔知諗咩差嘢先對付到「大袋」,點諗啊?」阿明回應。

「對付惡魔就梗係神啦!你諗個可以打敗到呢個大惡魔嘅神咪得囉!」

「例如…孫悟空囉!」

「先生」同「肥高人」你一言我一語,令到我都煩喇…

阿明又點可能有空間冥想噃?

「你哋仲有冇咩板斧啊?冇就開始要死喇喎。」「地魔」仲咁講。

睇嚟時間更加緊逼喇。

「阿明你自己諗辦法啦,我哋全部一齊上,頂得幾耐得幾耐!靜音,唔該!」

之後全場為咗俾空間阿明去冥想,所以「靜音」咗…

我都係偷偷地繼續講故仔俾大家聽咋。

阿明佢見全場靜晒,立即就合埋雙眼去冥想…

希望「臣婆」前輩D嘢係掂啦!

因為「靜音」咗,大家俾「地魔」打傷晒都冇晒聲添…

就等我嚟講吓大家而家情況啦。

而家,阿妮俾佢打到暈咗﹔

阿狗就頭破血流﹔

「先生」就右手噤住左臂,似係左臂受咗重傷﹔

「青龍劍」就爛咗喺地下﹔

「肥高人」就口角出血﹔

「洋腸」同「彩雲」就攬埋咗一舊﹔

班男仔就攬埋咗幾舊咁,中間一堆人仲好似攬住咗「美奈子」添﹔

淨係得「居居」傍住「輝輝」,即係肉身二郎神啊,佢受咗少少傷﹔

「荷瑪」就陪住家姐﹔

「金身二郎神」就襯自己仲有少少力量,強行去抵擋「地魔」嘅攻擊…

好可惜,連我都睇得出,應該都唔可以頂得好耐喇。

我心裡面而家淨係可以著急阿明幾時可以冥想到D嘢出嚟…

我望咗佢一望,佢依然係合埋雙眼,乜都做唔到…

我唯有再望返輝輝嗰邊…

輝輝佢雖然咬牙切齒,但係一樣係好似諗唔到辦法咁…

究竟點算啊?

我都未諗到點算啫,突然就…

喺呢一刻…

我見到…我見到…

「金身二郎神」俾「地魔」一招「血鬼頭真義﹒粉碎」所擊殺…

而家現場滿佈金粉,好可惜不但止唔靚,仲好令人心寒…

感覺就好似下一個被行刑嘅就係我哋咁…

我已經心灰意冷,絕望喇…

就只有呆呆滯滯咁望住輝輝佢…







但係!

喺呢一刻…

突然!

現場「靜音」符號冇咗喎!

而且…

換嚟嘅係…

一隻振奮人心嘅音樂…

一隻來自一套電影嘅音樂…

一隻來自一套香港電影嘅音樂…

(燈櫈燈 ~ 燈燈櫈鄧 ~)

係一隻一聽到就感覺到有個英到爆嘅男人…

(鄧櫈鄧櫈 ~ 燈燈櫈鄧 ~)

行出嚟,好似有佢就乜都攪掂晒咁嘅音樂。

「咩事啊?」「地魔」問。

「阿明?」輝輝問。

(鄧櫈櫈 ~ 燈櫈燈 ~ 櫈燈燈櫈燈~)

「佢冥想咗個咩神出嚟啊?」「先生」同「肥高人」咁問。

我即刻好雀躍咁另轉頭望住阿明…

點知…

佢竟然…

「好話喇!我就係 — 賭 ~~~~~ 神 ~~~~~!」

全場呆咗三秒,佢嘅呢套動作,就好似…

將大家嘅希望都掟晒落街一樣…

唔係話我哋唔信佢,但係佢就連賭神兩個字都用咗賭聖嘅叫法…

咁你叫人哋點信佢啫?
「哈哈哈哈哈,你呢個傻仔真係笑死我啊!蠟個死人高進頭出嚟就當自己係神呀?想同我賭一舖呀?哈哈哈。」

就連「地魔」都恥笑佢。

而且我都喺心裡面認同咗「地魔」嘅恥笑。

而家…

感覺唔單止冇好轉,仲更加覺得我哋會死得更慘。

不過我係咁諗咋,阿明佢唔係,佢仲咁講︰
「觀世音菩薩如來佛祖耶蘇我都冥想過,但係都係唔得,所以我選擇咗我暫時呢世仔最信任嘅神嚟幫吓手,點知我一想佢,佢就標出嚟喇,香港男神,發哥!」

「哈哈哈,用香港男神嚟對我亞洲男神!?」「地魔」回應佢。

「喺其他地方,我就唔知邊個會勁D,但係喺香港,肯定係我最勁!」

「香港!?你睇到呢度邊忽似喺香港啊?」「地魔」再講。

「你試吓走去窗口望吓,睇吓睇唔睇到大嶼山?」「賭神」自信回應。

「咩話?」

講完之後,「地魔」真係喺度打開咗一個空間窗口,仲望咗出去…

我雖然望唔到佢望咩,但係佢另返轉頭個樣話俾我知,阿明冇呃佢。

半秒之後…

「哈哈哈,犀利噃,點解你做到嫁?」「地魔」仲尷尬咁問返轉頭。

「唔係我犀利,係河童老兄做嫁。」「賭神」回應。

「咩話?係PAKKA?」大家都好疑惑。

「哈哈,算啦,咩都冇所謂喇,我就唔信你用啤牌飛得死我。」

不過「地魔」依然清醒,仲講得幾有道理。

「我都唔知話你無知定白痴好,你以為發哥淨係識做賭神咩?」

阿明佢講到佢自己唔單止係「賭神」一樣。

「即係點啊?」大家都有呢個疑問。

阿明佢仲…

(BATMAN話我知 ~ MARK哥話我知 ~)

兩句歌詞之後…

「英雄本色又點睇啊?」阿明佢…

佢突然唔知喺邊度攞咗件大褸出嚟…

配上黑超眼鏡同手上雙鎗…

真係…

有D過份有型啊!

佢揸實兩支鎗就射喇!

「嘭!嘭!嘭!嘭!嘭!嘭!」

鎗聲雷雷,「地魔」仲…

中晒咁多鎗,睇嚟…

我哋嘅希望返晒返嚟喇!

只不過…

好景不常…

「地魔」將身體裡面嘅子彈逼出,仲…

反射去阿明度…

(浪奔 ~ 燈燈燈 ~ 浪流~ 鄧鄧鄧 ~ 萬里滔滔江水永不休 ~)

「嘭嘭嘭嘭嘭嘭嘭嘭嘭嘭嘭嘭嘭嘭嘭嘭嘭嘭!」

我哋都呆咗,點解…

點解…

要係「上海灘」啊?

阿明佢身中多鎗,仲訓咗喺地下…

心情嘅大起大落…

真係令到我哋差D死咁滯…

眼見出現一D曙光…

卻又點知點解,唔夠幾秒又再黑暗返…

唔通真係要絕望?

「死啫,大家唔使怕,死咗咪升仙囉,睇住我點打爆隻「地魔」啦!」

但係阿明喺呢個時候竟然咁講,我哋仲信唔信佢好呢?不過…

乜發哥做過神仙咩?

(待續)

下集預告︰

(大結局)

註解︰

(1) 你要知道幾時要退 ~ — 王傑嘅《我會知道幾時要退》歌詞,調轉咗嚟講。

(2) 臭口祖 — 口臭嘅始祖。

(3) 靜音 — 「MUTE」,搖控器按鍵。

(4) 香港電影嘅音樂 — 上面講緊呢隻音樂,真係要睇過《賭神》先知。

(5) 賭神﹑賭聖 — 仲有賭俠,香港三大經典賭片。

(6) 高進 — 賭神個名。

(7) 「你試吓走去窗口望吓,睇吓睇唔睇到大嶼山?」 — 賭神台詞。

(8) BATMAN話我知 ~ MARK哥話我知 ~ — 劉德華《城市獵人》歌詞。