米米蓮妖怪作品 -《旅行‧如此‧難以忘‧記 》(百集長篇): 第130集 ~ 米︰大結局喇！(一)

第130集 ~ 米︰大結局喇！(一)

點解係個「米」字？冇錯，就係我米米蓮。

(你唔係俾「鬼王」爪死咗咩？)

死咗一個我，仲有千千萬萬個我。

(大家表示無言。)





既然大家都冇嘢講，咁我就繼續講喇。

上一集阿欣講到，阿明佢變咗做「發哥」…

(發哥未死嫁喎，你咒佢呀？唔好話我聽又有千千萬萬個發哥啊？)

我當然唔會咒我偶像啦，發哥亦只會係得一個…

但係喺呢個故事裡面冇嘢係冇可能嘅…





「發哥」嘅力量就當係阿明佢自已領悟出嚟嘅神力爆發啦！

阿明佢變過高進，再變過MARK哥，之後仲要變埋許文強…

究竟「發哥」仲識變咩呢？

當阿欣同大家都一樣感到絕望之際…

阿明佢突然開出金口講︰—





「死啫，大家唔使怕，死咗咪升仙囉，睇住我點打爆隻「地魔」啦！」

就連我都同阿欣有一樣諗法︰「咩發哥做過神仙咩？」

「冇錯，就係做過，仲一係唔做，一做就要做個最勁嘅…」阿明講。

「冇理由，我都係睇發哥大嘅，發哥邊有做過神仙！」「地魔」似乎唔相信。

「你當然冇睇過啦，因為2014年之前嘅今日你已經死咗喺我手上，我都係唔賣關子喇，冇錯，就係天界最強嘅「玉皇大帝」！」阿明回應。

「地魔」聽完呢句之後連頭先肚餓得滯偷偷地走咗去後台食嘅飯都噴咗出嚟…

「「二郎神」都唔夠我打，你放個「玉皇大帝」出嚟！？你攪笑行返去喜劇組啦！」

「我冇攪笑，「玉皇大帝」本來就係天界最好打嗰個，佢皇帝咁大支嘢嘅外表只係世人對佢嘅誤解，佢全名係「劍神玉皇大帝」！」





「哈哈哈，你呢條細路哥真係笑肯死我，好！我就讓你三劍，嚟啦！」

「你話嫁咋，唔好後悔啊！」

阿明一講完呢句，身上立即發出閃耀金光，就好似「超級撤亞人」嘅氣一樣…

皇者之氣力壓「地魔」妖邪之氣…

佢之後再右手握實「九陽草薙」向「地魔」傾力一伸。

金光環繞「九陽草薙」，力量龐大，旁觀者只可以嘩然…

至於「地魔」見到阿明神劍嘅力量太大，唯有立即就反口…





使出一招「妖夢斷刀流」嚟格擋…

「頂你個肺丫！差D俾你一劍隊死我啊！」

「車，又話讓我三劍，而家第一劍就想反口啊？」

「Eee…我冇還擊啊，唔算反口。」

「咁再嚟喇喎！」

之後，阿明再使出一招「翻雲覆雨劍」…

氣如雲海，劍如雨下…

「對唔住喇！我真係要反口喇！你都黐九線嘅，萬九幾劍筒埋嚟。接我招啦，奧義流鬼影萬人斬！」





刀光連連，氣勢磅礡…

「地魔」總算可以抵擋得住阿明嘅「翻雲覆雨劍」…

「估唔到你哋竟然可以有咁大嘅力量！睇嚟我真係唔可以再掉以輕心喇，就一口氣拼盡佢啦！」

「地魔」講完呢句之後，立即用力運勁，將體內妖氣爆發晒出嚟…

再握緊「妖刀村正」，諗住一口氣出盡所有招數去殺絕現場所有人…

「奧義流鬼影﹒十二路勾魂斬！」
「破滅斬！」
「爆烈斬！」
「追魂斬！」




「百烈斬！」
「萬人斬！」
「勾魂斬！」
「左斬！」
「右斬！」
「斜斬！」
「橫斬！」
「豎斬！」
「旋風斬！」

阿輝見到情況咁，立即配合上阿明去抵擋「地魔」嘅攻擊…

「直刺式！」
「橫削式！」
「斜斬式！」
「旋風式！」
「順劈式！」
「拖劍式！」
「推刃式！」

而阿明就…

「覆雨劍！」
「翻雲劍！」
「飛天劍！」
「遁地劍！」
「爆烈劍！」

(刀劍若夢 ~ 恩怨似風 ~ 有沒有輕重 ~)
(只要情濃 ~ 不要武功 ~ 愛恨兩難容 ~)
(只怕熱淚 ~ 不怕刀鋒 ~ 手中有劍 ~ 眼前有你 ~ 可不可一生抱擁 ~…)

阿明同阿輝加埋嘅十二劍抵擋咗「地魔」嘅十二刀…

而佢哋足足就係打咗一首歌咁耐嘅時間…

雙方互有攻守，但係始終分唔到勝負，更可惜嘅係根本問題依然冇辦法解決…

就係神力用得越耐力量就會退減…

「哈哈哈，睇嚟你哋唔捱得幾耐喇喎…」

「捱你條命，你信唔信我哋一齊插爆你丫喇！」

「我又真係好想睇吓你點插得爆我噃！」

喺呢個時候「南龍」先生依然睇緊佢個「哀風」，可惜只係依然得三個字…

「神與神。」

但反而阿狗好似諗到D嘢噃…

「阿明，阿輝，「光管陳」教過我哋咩啊？」佢大大聲咁問。

「英文囉。」阿明﹑阿輝回應。

「唔係啊，嚟到呢度先教嘅呢！」

「隱身咒？護身咒？好！我哋試吓啦。」

一講完，阿明同阿輝就一齊先做隱身咒，但係換嚟「地魔」咁回應…

「我哋而家力量相若，的確我地魔嘅真身係睇你哋唔到，但係唔好忘記我個肉身係你哋嘅人類朋友啊，所以我睇得你哋好清楚，我斬！」

「阿輝，咁護身咒仲用唔用啊？」阿明問。

「傻佬明，你仲想撞埋去呀？」阿輝答。

「妖，你兩條友唔好叻唔切得唔得啊？係呢招啊！」

阿狗講呢句嘅同時，做咗一個不文手勢…

起初阿明同阿輝都唔明係咩，但係…

兩秒之後，佢哋你眼望我眼咁，大家似乎都諗通咗D嘢喇！