米米蓮妖怪作品 -《旅行‧如此‧難以忘‧記 》(百集長篇): 第130集 ~ 米︰大結局喇！(三)
第130集 ~ 米︰大結局喇！(三)
發現…係紙妖啊！紙妖俾人困咗喺水晶球度…
阿欣立即打開水晶球，紙妖就立即飛返出嚟，仲…
「係佢喇，佢就係想害死你哋嘅「北轍」田育文喇！」
佢手指指住「呢個同學」，而「呢個同學」就係我哋萬萬都估唔到…
但係一直最接近我哋嘅…
「大家好，機已經起飛喇，即係話大家都唔可以離開呢度，被逼要聽我講嘢，係咪好意外呢？冇錯，我係阿倫，但係有樣嘢大家唔知嘅，就係我識不老之術，我原名叫做田育文，即係「北轍」。原本我只係想生兒育女，做返個平凡人，好可惜，我為咗我個仔，為咗佢想贏學界冠軍，我混入咗你哋呢間已經係幾年班霸嘅學校做內鬼，諗住幫佢完成佢夢想，點知你哋一位同學竟然將我個仔隻腳鏟斷，仲要令佢自殺，所以我要報仇。本來諗住假手俾「鬼王」同「地魔」呢D壞人嘅，點知你哋班人死好命，總係一次又一次咁過關，所以我冇辦法喇，只有做最後嘅呢個決定，就係同你哋同歸於盡。」
大家係好愕然，但係冇乜驚，唔知點解呢？「細寶」仲出口問︰—
「你脅持咗飛機師咩？」
「冇，但係我有佢哋，佢哋就係我旁邊呢兩個空姐，仲有一大堆鬼頭喺飛機外面。」
「哦，咁我哋都冇咁驚。」「大寶」講。
「點解啊？」
「你旁邊兩條女已經俾大寶細寶溝咗喇…」「細鬼」講。
「咩話！？冇理由嫁，「深田恭子」被溝我就明啫，「夏惠姨」咁嘅尊容都哽得落？」
「車，你理人啫，冤豬頭都有聞鼻菩薩丫嘛。」同學都一齊講。
「你兩隻衰鬼，我先唔理你哋，遲D先同你哋計數。我有鬼頭就夠喇，一陣佢哋會幫我帶架機去撞海嫁喇，哈哈哈哈哈。」
「我真係唔知你點樣學人做人哋阿頭嫁，你望清楚出面先講啦！」阿輝講。
之後，田育文真係走咗去望出窗外…
「冇問題丫，係鬼頭嚟啊！」
「佢哋唔係鬼頭，而係鬼頭個仔，即係鬼頭仔，而家係聽我哋話嫁。」阿明講。
「咩話！？」
當田育文唔相信係事實嘅呢一吓，佢雙手俾人從後面鎖上…
「邊個？」
「國際刑警，PAKKA HO。」
「河童？！」
「無錯，我而家已經係國際刑警，中文名，河童，小姓河。」
「唔通所有人都要背叛我？」田育文大嗌。
但係喺呢一刻突然有個龐大身影衝咗埋去攬住佢…
原來係「肥妹鬼」啊！
「我唔會背叛你嫁，一世都唔會。」
真係難得有情人啊！
…
之後，飛機事件總算告一段落…
返咗去香港之後，大家都各自返歸正正常常咁生活…
…
時間飛快，咁就過咗幾年…
阿輝佢一個唔小心就攪大咗阿欣個肚，因為米已成炊，所以逼住要結婚…
當晚宴會雖然唔係星光熠熠，但總算係濟濟一堂…
阿狗同阿明當然係兄弟團嘅成員啦！
新娘化緊妝，兄弟就喺前台傾計…
「喂，阿明，你真係諗住一世同小倩呢隻唔老嘅鬼喺埋一齊呀？」
「當然，我當初追佢就諗好咗喇，鍾意就係鍾意，我根本唔介意佢係咩。」
「吹水啦，你貪人靚喳嘛。」阿狗講。
「我只能講，小倩佢落咗妝，個樣仲恐怖過鬼，但係我冇介意。」阿明講。
「嘩，好男人，好在阿欣唔化妝都OK啫。」阿輝講。
「其實女人話冇化妝都係化咗D妝，只係你唔識睇啫。」阿狗講。
「咁呃到我就OK啦，呃呃吓好快就一世嫁喇，一齊開心咪得囉。」阿輝講。
「嘩，好男人。」阿明同阿狗一齊講。
「咁你個阿妮呢？」阿明問。
「車，阿妮原本就係妖怪，我本來就冇介意啦。」阿狗講。
「嘩，好男人。」阿明同阿輝一齊講。
「好得過佢？」阿狗指住啱啱嚟嘅「大寶」同「細寶」。
阿輝亦都行前寒暄幾句…
「嘩，乜你兩兄弟嚟真嫁？真係同呢兩隻…呢兩位小姐一齊呀？」
「係啊。佢哋好好玩嫁，想佢變咩樣就咩樣，我尋晚先玩完全球十大美女明星咋。」
「吓！？咁你哋一陣飲多兩杯啦吓。」
…
「喂，阿輝，要準備喇！」阿狗叫。
…
當晚司儀係阿欣嘅大家姐。
大家姐一望埋來賓度，就感覺奇怪…
皆因後排所有都係阿輝同阿欣呢幾年識埋識埋嘅術士同妖怪…
佢哋就好似三山五岳嚟嘅大惡人一樣…
「Eee…歡迎大家嚟臨我細妹同妹夫嘅婚禮，喺証婚之前，就等一位我妹妹請嚟嘅表演嘉賓表演先啦！唔知佢要表演嘅係咩呢？咩話？妖女？」
一個妖豔女子突然行出嚟，仲…
(妖女叉腰側望 ~ Bad Boy ~ 可干擾思想的咀微微張開 ~)
(妖女叉腰側望 ~ Bad Boy ~ 腰間的火花可蒸發每個深海 ~)
(Come on Bad Boy ~ 我並未放你在眼內 ~)
「呢個邊個嚟嫁？」阿明問。
「同東歪西斜南轅北轍齊名嘅中毛豔，毛豔芳！」阿狗答。
「好在佢當年冇幫地魔佢哋手咋，你睇吓而家個場！」阿明講。
而一望無際嘅宴席上面，而家每個人都跟住晒呢首歌跳舞啊！
場面震撼…
不過震撼過後，表演完畢，就係嚴肅而又神聖嘅証婚儀式喇！
(鄧櫈櫈櫈 ~ 鄧燈鄧櫈 ~ 鄧鄧鄧燈燈櫈鄧燈櫈 ~)
音樂響起，阿欣扶住爸爸慢慢進場，受住大家嘅歡呼聲…
終於慢慢行到台前，阿輝從外父手上接過阿欣之後…
突然…
竟然…
宴會場地中心出現一個黑色電球，電球慢慢變大，就似係個黑洞…
黑洞冇吸走任何人，反而有一個人喺黑洞度跌咗落嚟…
而佢係…
「光管陳！？」
「光管陳」企返起身，望到阿輝阿明佢哋，笑咗一吓，再問︰—
「何家明，朱嘉輝，我份英文作文做好未？」
(全故事完)
註解︰
(1) 超級撤亞人嘅氣 — 睇龍珠就知。
(2) 第一首歌係周華健嘅《刀劍若夢》。
(3) 無間道 — 卧底。
(4) 第二首歌係梅姐，梅艷芳嘅《妖女》。